Read Fɨso Fi Jɔ̌n 7 Bible Online

Jɔ̌n 7 - Fɨso Fi bible

Jɔ̌n 7

¹Ənɨ ənû ze ə nyaʼa fə che i, Yeso nyaʼa ghanə yèn ɨŋga ɨsɨ mbe rɨ ə Galiliî. Chəi wɨ̀ nyaʼa ghaʼ nɨ yèn ɨŋga ɨsɨ mbe rɨ ə Jùdeyà ɨmbə̀ʼ ɨghəm nɨ bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼə kə̀b zwiirɨ əməd.

²Əchwɨ̂ ze nɨ mɨ̀Jû nyaʼə jɨgə kɔndɨ mɨŋwenɨ [6] nyaʼa fə tiinɨ,

³əne bɔŋgɔb Yeso nyaʼa ghà ɨ bɔ ni, “Nɔʼ rɨ əgha wò ə Jùdeyà ɨmbə̀ʼ mbe mə̀mə̀ə̀nɨ̀-ɨnû zə ɨnû mbe nɨ àwɔ̀ ə ghɨ̀ə̀,

⁴ɨmbə̀ʼ ɨghəm nɨ chəi wə̀d mɔʼɔ ə ghɨ̀ ɨnû ənə̀mə əwù ze nɨ wɨ̀ kəbɨ ni bə̂d kyerɨ əməd. Əne ɨchî nɨ àwɔ̀ ə ghɨ̀ ɨnû mbɔ̂, zɨə bɔ̀ŋ ni ɨsɨg jìm kyerɨ əwe!”

⁵(Bɔŋgɔb məd mbɨə nyaʼa ghà əne ɨmbə̀ʼ ɨghəm nɨ chəi mbɨ nyaʼa bə ben əməd.)

⁶Yeso nyaʼa ghà əmbɨ mɨ̀mə̌d ni, “Chəi mɨ nyùmə̀ kɨrɨ kuʼ, àyɨə nyùmə̀ jìm ə kùʼ ɨ nən.

⁷Chəi bə̂d rɨŋga ɨsɨg berɨ əton nɨ ban əwən, àyɨə mbɨ berɨ bàn əmɨ ɨmbə̀ʼ ɨghəm nɨ mə wɨə kɨə ghàə̀ ni ɨnû mbe nɨ mbɨə ghɨ̀ə̀ yɨ ɨnû rɨbɔ̀ŋ.

⁸Mbə̀ wo ənɨ əchwɨ̂ ze. Chəi mə bɨrɨ kɨrɨ wo ɨmbə̀ʼ ɨghəm nɨ chəi mɨ nyùmə̀ kɨrɨ kuʼ.”

⁹Wɨ̀ nyaʼa ghà əne, tə̀n əwi ə Galiliî.

¹⁰Ənɨ bɔŋgɔb Yeso nyaʼa fə wo ənɨ əchwɨ̂ ze, məd ziə nyaʼa bə̀ wò. Chəi wɨ̀ nyaʼa wo əsaŋ əsaŋ. Wɨ̀ nyaʼa nə̀mbɨ̀ bɔŋ wò.

¹¹Bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼə ghanə kə̀b əməd ənɨ əchwɨ̂ ze, əne ɨ mbɨə nyaʼə biirɨə əmbɨ ə bə̂d ni, “Mbə̀ wa zə ə Yeso əgha ə?”

¹²Bə̂d mɨ̀nɔnɔʼ rɨŋga ɨnɔ̂n bə̂d we wɨə nyaʼə chùmbɨ̀ ɨmbə̀ʼ ə Yeso. Mbɨ mɔʼɔ mbɨə nyaʼə ghàə̀ ni, “Məd yɨə wə̀d chɔ̀m,” àyɨə mbɨ cherə mbɨə nyaʼə ghàə̀ ni, “Chə̂, məd wɨə fèbrɨ̀ ə bə̂d.”

¹³Àyɨə chəi wə̀d mɔʼɔ nyaʼa gha ɨnû ɨmbə̀ʼ əməd əsaŋ əsaŋ, ɨmbə̀ʼ ɨghəm nɨ mbɨə nyaʼə bɔə bə̂d mbe nɨ nyaʼə tekɨ ɨnû ɨŋga əbeŋ mɨ̀Jû.

¹⁴Ənɨ mbɨ nyaʼa fə jɨg əchwɨ̂ ze nə̀ə̀nɨ̀, Yeso nyaʼa kɔʼ wò ɨŋga mbàn Ŋwìə̀, pè kɔ chwi ɨnû.

¹⁵Ənû ze ə nyaʼa chè bə̂d mbe nɨ nyaʼə tekɨ ɨnû ɨŋga əbeŋ mɨ̀Jû, əne mbɨ nyaʼa biirɨ ni, “Mbaŋə̀ zɔ̂ ə chè rɨ ye kyerɨ ɨnû əni, nɨ chəi wɨ̀ kweʼ kwembɨ ə̀ŋwàʼnɨ̀ ə?”

¹⁶Yeso nyaʼa wììrɨ̀ əmbɨ mɨ̀mə̌d ni, “Kaʼ ɨnû mbɔ̂ nɨ mɨə chwiə yɨ i rɨ num. Mbɨ yɨ rɨ əmbɨ wə̀d we nɨ nyaʼa tom əmɨ.

¹⁷Wə̀d mɔʼɔ mɨ kə̀b ghɨ ɨnû mbe nɨ Ŋwìə̀ kəbɨ, wɨ̀ bɨrɨ kyerɨ ni ɨnû mbe nɨ mɨə chwiə yɨ rɨ əmbɨ ə Ŋwiə̀, kɨ̀ ni mə wɨə ghàə̀ yeʼ ənɨ mɨ ɨka.

¹⁸Wə̀d we nɨə ghà ɨnû ənɨ i ɨka wɨə kə̀bə̀ ni bə̂d wumnɨ əməd. Àyɨə we nɨə kə̀bə̀ ni bə̂d wumnɨ wə̀d we nɨ tom əməd wɨə ghàə̀ rəsìʼ. Kaʼ məd yɨ i wə̀d mɨghab.

¹⁹Ɨmbə̀ʼ Mose nyaʼa nàʼ tɨkə ɨ nən ə? Àyɨə chəi wə̀d mɔʼɔ rəbɔʼ nən ə nùŋ rɨkə te. Mbə̀ kɨə kə̀b zwiirɨ əmɨ ɨmbə̀ʼ ə yè ə?”

²⁰Ɨnɔ̂n bə̂d we nyaʼa wììrɨ̀ ni, “Əzwî rɨbɔ̀ŋ ə zɨ ɨŋga ne! À kɨə we ə kə̀b zwiirɨ əwe ə?”

²¹Yeso nyaʼa wììrɨ̀ əmbɨ mɨ̀mə̌d ni, “Mə fə ghɨ̀ àmei ənû ə mɔʼ, əne mbə̀n mɨjìm mbɨə yiirɨ ənû ze.

²²Mose nyaʼa ghà ni mbə̀ ne mbə bɔn mbaŋə̀. (Kaʼi Mose nyaʼa gha ənû zɔ̂. À yɨ mbə mɨ̀mbǎʼ ɨnəbɨ nyaʼa gha ni mbə̀ ghɨ əne.) Əne mbə mbɨə nèə̀ bɔn mbaŋə̀ əni əkwɨ, nɨ kaʼi əni nɨ bə̂d berɨ nɨ fàʼ.

²³Mbə mɨ yeʼə nèə̀ mbə bɔn mbaŋə̀ əni əkwɨ, ɨmbə̀ʼ tɨ mbə̀ gu ə tɨkə rɨ Mose, njɨ mbə̀ kɨə sə ɨtəm mbɨ num ɨmbə̀ʼ ɨchî nɨ mə̀ ghɨ mbaŋə̀ mɔʼɔ bɔtɨ ɨchî chɔ̀m əni əkwɨ ɨmbə̀ʼ ə yè ə?

²⁴Tɨ mbə̀ saʼ ə wə̀d beenɨ əbɔʼ ɨnû mbe nɨ mbə̀ə zəə. Mbə̀ saʼ beenɨ yeʼ əbɔʼ ɨchî nɨ kuʼnɨ.”

²⁵Bə̂d mɔʼɔ rɨ ə Jèrusalèm nyaʼa ghà ni, “Ɨmbə̀ʼ mbaŋə̀ zɔ̂ yɨ we nɨ bə̂d mbe nɨə tekɨ ɨnû ɨŋga a əbeŋ ə kə̀b zwiirɨ ə?

²⁶Məd wɔ̂ əgha, ghàm əsaŋ əsaŋ, àyɨə chəi mbɨ ghà ənû ə mɔʼɔ ɨ bɔ. Tɨ̀ zɨə wa chwi ni bə̂d nɨə tekɨ mba ɨnû ə kaŋ kyerɨ ni məd yɨə Wə̀d we nɨ Ŋwìə̀ zɔʼ ə?

²⁷Ənû nɨ yeʼ əŋgu mei ni ənɨ Wə̀d we nɨ Ŋwìə̀ zɔʼɔ yeʼe, chəi wə̀d bɨrɨ kyerɨ əsɨ ze nɨ wɨ̀ nɔʼ rəŋgu. Àyɨə tɨ̀ kyerɨ əsɨ ze nɨ mbaŋə̀ zɔ̂ nɔʼ rəŋgu.”

²⁸Ənɨ Yeso nyaʼə chwi ɨnû ɨŋga mbàn Ŋwìə̀, wɨ̀ nyaʼa gham rɨ̀kǎ ghà ni, “Mbə kàŋ kyerɨ əmɨ bə̀ kyerɨ əsɨ ze nɨ mə̀ nɔʼ rəŋgu. Chəi mə nyaʼa yeʼe ɨŋga ɨsɨg wɔ̂ ənɨ mɨ ɨghəm. Àyɨə wə̀d we nɨ nyaʼa tom əmɨ wɨə ghàə̀ rəsìʼ. Chəi mbə̀ kyerɨ əməd,

²⁹àyɨə mə kyerɨ əməd ɨmbə̀ʼ ɨghəm nɨ mə nɔ̀ʼ rɨ əsɨ məd. Əne à yɨə məd nyaʼa tom əmɨ.”

³⁰Ənɨ wɨ̀ nyaʼa gha əne, mbɨ nyaʼa kə̀b gywɨ əməd, àyɨə chəi wə̀d mɔʼɔ nyaʼa yim əməd, ɨmbə̀ʼ ɨghəm nɨ chəi nyùmə̀ nɨ mbɨ nyaʼa berɨ gywɨ əməd nyaʼa kɨrɨ kuʼ.

³¹Àyɨə bə̂d mɨ̀nɔnɔʼ nyaʼa ben ənû ze nɨ wɨ̀ nyaʼə ghàə̀. Mbɨ nyaʼa gha ni, “Ənɨ Wə̀d we nɨ Ŋwìə̀ zɔʼɔ yeʼe, wɨ̀ wa bɨrɨ ghɨ ɨnû yiirɨ nɨ nɔʼ chè mbe nɨ mbaŋə̀ zɔ̂ fə ghɨ ə?”

³²Mɨ̀Farisiî nyaʼa zu ɨchî nɨ ɨnɔ̂n bə̂d we nyaʼə chùmbɨ̀ ɨnû ɨmbə̀ʼ ə Yeso, əne mɨ̀mə̌d mbɨ ə bə̂d kyeŋ mbe rɨ ə mbàn Ŋwìə̀ nyaʼa tom Mənə̂ŋgɨ̀ mbàn Ŋwìə̀ ni mbɨ wo gywɨ̀ əməd.

³³Yeso nyaʼa ghà əmbɨ mɨ̀mə̌d ni, “Mə bɨrɨ kɨrɨ chubɨ mbɨ nən ɨkə nyùmə̀. Ənɨ ə nyùmə̀ we fə che, mə bɨrɨ bəndɨ wò əsɨ məd we nɨ nyaʼa tom əmɨ.

³⁴Mbə bɨrɨ kə̀b əmɨ, àyɨə chəi mbə̀ bɨrɨ zə əmɨ. Chəi ənɨ tɨ̀ mbə yeʼe əsɨ ze nɨ mə̀ yeʼ əŋgu.”

³⁵Bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa ghà mbənə mbənə ni, “Mbaŋə̀ zɔ̂ kɨə kə̀b wo ə yi nɨ chəi ənɨ tɨ̀ rɨ wɨrɨ zə əməd ə? Wɨ̀ wa kə̀b wo əsɨ mba bə̂d mbe nɨ jaŋ ɨŋga ɨbeŋ cherə ɨmbə̀ʼ chwi ɨnû əmbɨ mɨ̀mə̌d ə?

³⁶Wɨ̀ kɨə ghàə̀ ni ye ənɨ wɨ̀ gha ni, 'Mbə bɨrɨ kəb əmɨ, àyɨə chəi mbə bɨrɨ zə əmɨ ə?' fɔrɨ ni, 'Chəi ənɨ tɨ̀ mbə yeʼe əsɨ ze nɨ mə̀ yeʼ əŋgu ə'?”

³⁷À nyaʼa əni ze nɨ sɨ nwìə̀, nɨ nyaʼa əni ə kyeŋ ənɨ mbɨ nyaʼə jɨg əchwɨ̂ ze, Yeso nyaʼa nɔ̀ʼ təm rətiə ghàm rɨ̀kǎ ni, “Ədɔʼ ə mɨ ne wə̀d mɔʼɔ, wɨ̀ yeʼe əsɨ num mə̀ naʼ mɨnib ɨ bɔ wɨ̀ nɔ.

³⁸Wə̀d mɔʼɔ we nɨ ben ənû ze nɨ mɨə ghàə̀, wɨ̀ yeʼe nɨŋ nɔ. Zɨə bɨrɨ yeʼ ɨ bɔ ɨchî nɨ mbɨ ŋwaʼnɨ ɨŋga Ə̀ŋwàʼnɨ̀ ə Ŋwiə̀ ni, 'Mɨgyɨ̂ nɨə nàʼ ɨ̀tènɨ̀ bɨrɨ koŋ rɨŋga fîŋ məd.'”

³⁹Yeso nyaʼa ghà ənû zɔ̂ bə̀ ghà ɨmbə̀ʼ Əzwî ə Ŋwiə̀ ze nɨ nyaʼa berɨ nyɨ ɨgun ə bə̂d mbe nɨ nyaʼa ben əməd. Ɨ pe ənɨ ə nyùmə̀ we, chəi Ŋwìə̀ nyaʼa kɨrɨ cha e Əzwî ɨgwɨ ə bə̂d, ɨmbə̀ʼ ɨghəm nɨ chəi wɨ̀ nyaʼa kɨrɨ naʼ ɨwumnɨ we nɨ yeʼ wɨ Yeso ɨ bɔ.

⁴⁰Ənɨ ɨnɔ̂n bə̂d we nyaʼa zu ɨŋgam wɔ̂, mbɨ mɔʼɔ rəbɔʼ mɨ̀mə̌d nyaʼa ghà ni, “Mbaŋə̀ zɔ̂ yɨə kaŋə wə̀d ɨ̀kə̀n we nɨ Ŋwìə̀ nyaʼa kaʼi ni tə bɨrɨ tom.”

⁴¹Mbɨ cherə nyaʼa ghà ni, “Məd yɨə Wə̀d we nɨ Ŋwìə̀ zɔʼɔ!” Àyɨə mbɨ mɔʼɔ nyaʼa ghà ni, “Wə̀d we nɨ Ŋwìə̀ zɔʼɔ wa bɨrɨ yeʼe rɨ ə Galiliî ə?

⁴²Ɨmbə̀ʼ ə zɨ ɨŋga Ə̀ŋwàʼnɨ̀ ə Ŋwiə̀ ni Wə̀d we nɨ Ŋwìə̀ zɔʼɔ yɨə wan tɨ ənɨ əghaŋ ə Ɨfɔ̀n Dèvîd, fɔrɨ ni məd yɨ rɨ ə Betlehem, nɨ yeʼ əsɨ ze nɨ ɨfɔ̂n Dèvîd nyaʼa chub əŋgu ə?”

⁴³Əne ɨnɔ̂n bə̂d we nyaʼa ghàbrɨ̀ ɨmbə̀ʼ ə Yeso.

⁴⁴Mbɨ mɔʼɔ rəbɔʼ mɨ̀mə̌d nyaʼa kəb gywɨ̀ əməd, àyɨə chəi wə̀d nyaʼa yim əməd.

⁴⁵Mənə̂ŋgɨ̀ mbàn Ŋwìə̀ mbe nɨ bə̂d kyeŋ mbe rɨ ə mbàn Ŋwìə̀ mbɨ mɨ̀Farisiî nyaʼa tomɨ, nyaʼa wɨrɨ bə̀ndɨ̀ wò əsɨ mɨ̀mə̌d. Ənɨ mbɨ nyaʼa pè, mbɨ nyaʼa biirɨ əmbɨ mɨ̀mə̌d ni, “Chəi mbə̀ yeʼe mbɨ məd ɨmbə̀ʼ ə ye ə?”

⁴⁶Mənə̂ŋgɨ̀ mbàn Ŋwìə̀ mbe nyaʼa wììrɨ̀ ni, “Chəi wə̀d mɔʼɔ kweʼ ghàm ɨghabɨ ə mbaŋə̀ zɔ̂!”

⁴⁷Mɨ̀Farisiî mbe nyaʼa biirɨ əmbɨ mɨ̀mə̌d ni, “Wɨ̀ fə fèbrɨ̀ əwən bə ə?

⁴⁸Wə̀d mɔʼɔ rəbɔʼ mbe nɨə tekɨ ɨnû ɨŋga əbeŋ kɨ̀ wɨ mɔʼɔ rəbɔʼ mɨ̀Farisiî wa fə ben əməd ə?

⁴⁹Àyɨə Ŋwìə̀ bɨrɨ zɨ ndɔ̀n ɨgun ɨnɔ̂n bə̂d wɔ̂ ɨmbə̀ʼ ɨghəm nɨ chəi mbɨ kyerɨ tɨkə rɨ Mose!”

⁵⁰Nikodemùs, nɨ nyaʼa wɨ mɔʼɔ rəbɔʼ mɨ̀Farisiî mbe, nɨ nyaʼa kweʼ wo əsɨ Yeso, nyaʼa ghà əmbɨ mɨ̀mə̌d ni,

⁵¹“Ə zɨə wa ɨŋga ta rɨkə ni tɨ̀ sob ɨsaʼi ɨgun ə wə̀d nɨ chəi tɨ̀ be zu rɨ bɔ kɨ̀ be kyerɨ ənû ze nɨ wɨ̀ ghɨ̀ ə?”

⁵²Mbɨ nyaʼa wììrɨ̀ ɨ bɔ ni, “Àwɔ̀ wa kɨ rɨ ə Galiliî bə ə? Jeŋgɨ neŋ ɨŋga Ə̀ŋwàʼnɨ̀ ə Ŋwiə̀, əne à bɨrɨ zə ni chəi wə̀d ɨ̀kə̀n Ŋwìə̀ mɔʼɔ bɨrɨ jwɨ rɨ ə Galiliî.”

⁵³[7] Wə̀d jìm nyaʼa sɨ nɔ̀ʼ wò i əkwɨ ni.