Read Fɨso Fi Jɔ̌n 9 Bible Online

Jɔ̌n 9 - Fɨso Fi bible

Jɔ̌n 9

¹Ənɨ Yeso nyaʼə yènə̀ chèə̀, wɨ̀ nyaʼa zə mbaŋə̀ mɔʼɔ nɨ mbɨ nyaʼa gywɨ əfɨgə.

²Mə̀mə̀ə̀nɨ̀-ɨnû ɨməd nyaʼa biirɨ ɨ bɔ ni, “Əchwiə̀-ɨnû, à kɨ ɨnû rɨbɔ̀ŋ we ghɨ ni mbɨ gywɨ mbaŋə̀ zɔ̂ əfɨgə ə? À kɨ mbɨ məd, kɨ̀ mbɨ mbǎʼ məd, kɨ̀ mbɨ ɨŋgɔb məd ə?”

³Yeso nyaʼa wììrɨ̀ ni, “Kaʼi ni à yɨə mbaŋə̀ zɔ̂ nyaʼa ghɨ ənû rɨbɔ̀ŋ kɨ̀ mbǎʼ məd kɨ̀ ɨŋgɔb məd. Məd ə fɨ̀g ɨmbə̀ʼ bə̂d zə ɨchî nɨ Ŋwìə̀ ə fàʼə̀.

⁴Tɨ̀ berɨ faʼ ə̀fàʼì ze nɨ wə̀d we nɨ nyaʼa tom əmɨ naʼ ɨ na. Àyɨə tɨ̀ berɨ fàʼ ənɨ ɨsɨ ə kɨrɨ zeŋə. Ɨzɨmɨ wɨə yeʼe nɨ chəi ənɨ tɨ̀ bə̂d wɨrɨ fàʼ.

⁵Mbə̀ kyerɨ ni ənɨ mə̀ kɨrɨ ɨŋga ɨsɨg, mɔ̌ yɨ ɨzeŋɨ zeŋɨ əmbɨ ɨsɨg.”

⁶Ənɨ wɨ̀ nyaʼa gha ɨnû mbɔ̂, wɨ̀ nyaʼa chèd mad ə si, tɔpɨ, nɨŋ tɨchaʼ ze zɔʼ əghə ə mbaŋə̀ ze əŋgu,

⁷ghà ɨ bɔ ni, “Ndə̀ wo sò e ɨfě ɨŋga ətuŋ ze rɨ ə Silòàm.” (Əton ənɨ ɨkum wɔ̂ yɨ ni “Tom”). Mbaŋə̀ ze nyaʼa wò sò i ɨfě wɨrɨ bə̀ndɨ̀ yeʼe ənɨ wɨ nyaʼə sɨə zə ɨsɨ.

⁸Bə̂d rɨ ɨban əkwɨ mbɨ mbe nɨ nyaʼa kweʼ zə əməd ənɨ wɨə nɔndɨ ɨghɨ nyaʼa biirɨ ni, “Ɨmbə̀ʼ mbaŋə̀ zɔ̂ yɨ ze nɨ nyaʼə chub ə si, nɔndɨ ɨghɨ ə?”

⁹Bə̂d mɔʼɔ nyaʼa ghà ni, “À yɨ wɨwən”, mbɨ cherə nyaʼa gha ni, “Chə̂, kaʼi wɨwən. À yɨ wə̀d cherə nɨ yeʼ ɨghabɨ ə məd.” Mbaŋə̀ ze ziə nyaʼa ghà ni, “Mə yɨə mbaŋə̀ ze nɨ nyaʼə nɔndɨ ɨghɨ.”

¹⁰Mbɨ nyaʼa biirɨ ɨ bɔ ni, “À sɨ che rɨ ye kɔ zə ɨsɨ ə?”

¹¹Wɨ̀ nyaʼa wììrɨ̀ ni, “Mbaŋə̀ ze nɨ mbɨə tɔŋ ənɨ Yeso kəʼ tɔpɨ si, zɔʼ mɨ əghə əŋgu, ghà ɨ num ni, 'Ndə̀ wò sò e ɨfě ə Silòàm.' Mə kə̀ʼ wò sò, əne mə wɨə sɨə zə ɨsɨ.”

¹²Mbɨ nyaʼa biirɨ ɨ bɔ ni, “Mbaŋə̀ rəŋgu zi ə?” Wɨ̀ nyaʼa wììrɨ̀ ni, “Chəi mə kyerɨ əsɨ ze nɨ wɨ̀ yeʼ əŋgu.”

¹³Bə̂d mbe nɨ nyaʼə ghàmbɨ̀ə̀ mbɨ ə mbaŋə̀ ze nɨ nyaʼa kweʼ fɨgə nyaʼa nɨŋ əməd mbɨ wò əsɨ mɨ̀Farisiî.

¹⁴Əni ze nɨ Yeso nyaʼa tɔpɨ si vɨ̀ ɨfɨgɨ we əŋgu yɨə nyaʼa əni əkwɨ mɨ̀Jû.

¹⁵Mɨ̀Farisiî mbe nyaʼa bə̀ biirɨ ɨ bɔ ni, “À che rɨ ye bɔŋ sɨə zə ɨsɨ ə?” Wɨ̀ nyaʼa wììrɨ̀ əmbɨ mɨ̀mə̌d ni, “Wɨ̀ kə̀ʼ tɔpɨ si zɔʼ mɨ əghə əŋgu, mə wò sò, əne tɨ̀nîn mə wɨə sɨə zə ɨsɨ.”

¹⁶Mɨ̀Farisiî mɔʼɔ nyaʼa ghà ni, “Kaʼi Ŋwìə̀ tom mbaŋə̀ ze nɨ ghɨ ənû zɔ̂, ɨmbə̀ʼ ɨghəm nɨ chəi məd ə nùŋ əni əkwɨ.” Àyɨə mbɨ mɔʼɔ nyaʼa ghà ni, “Tɨ̀ mbaŋə̀ ze nɨə ghɨ̀ ɨnû rɨbɔ̀ŋ ghɨ̀ ɨnû yiirɨ ɨghabɨ mbɔ̂ ə?” Ənɨ mbɨ nyaʼa ghà əne, ə̀ghàbrɨ̀ ə nyaʼa jwɨ̀ əkaʼ mɨ̀mə̌d.

¹⁷Mɨ̀Farisiî mbe nyaʼa wɨrɨ yì biirɨ əmbɨ ə mbaŋə̀ ze ni, “Wɨ̀ fə ghɨ à sɨə zə ɨsɨ. À ghà ni ye ɨmbə̀ʼ əməd ə?” Mbaŋə̀ ze nyaʼa wììrɨ̀ ni, “Mə kyerɨ ni məd yɨə kàŋ ə wə̀d ɨ̀kə̀n Ŋwìə̀.”

¹⁸Chəi bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa ben ni mbaŋə̀ ze nyaʼa fɨ̀gə̀, əne ɨ wɨə sɨə zə ɨsɨ, pè ənɨ mbɨ nyaʼa tɔŋ mbǎʼ məd mbɨ ɨŋgɔb məd.

¹⁹Ənɨ mbɨ nyaʼa yeʼe, mbɨ nyaʼa biirɨ əmbɨ mɨ̀mə̌d ni, “Wɔ̂ kɨ ə wan nɨ mbə̀ gha ni mbə nyaʼa gywɨ əməd əfɨgə ə? Wɨ̀ che rɨ ye sɨə zə ɨsɨ ə?”

²⁰Mbǎʼ məd mbɨ ɨŋgɔb məd nyaʼa wììrɨ̀ ni, “Tɨ̀ kyerɨ ni mbaŋə̀ zɔ̂ yɨ a wan. Tɨ̀ bə̀ kyerɨ ni tɨ̀ nyaʼa gywɨ əməd əfɨgə.

²¹Àyɨə chəi tɨ̀ kyerɨ ɨchî nɨ zɨə yeʼ ni ɨ wɨə sɨə zə ɨsɨ rɨ̀nîn, kɨ̀ bè kyerɨ wə̀d we nɨ ghɨ̀ ni wɨ̀ kɔ zə ɨsɨ. Mbə̀ biirɨ ɨ bɔ. Wɨ̀ fə sɨ i mbaŋə̀, wɨ̀ bɨrɨ wiirɨ i ɨŋgam ziə.”

²²Mbǎʼ mbɨ ɨŋgɔb mbaŋə̀ ze nyaʼa ghà əne ɨmbə̀ʼ ɨghəm nɨ mbɨ nyaʼə bɔə bə̂d mbe nɨ nyaʼə tekɨ ɨnû ɨŋga əbeŋ mɨ̀Jû, ɨmbə̀ʼ ɨghəm nɨ mbɨ nyaʼa fə nùŋ ni mbə bɨrɨ fid wə̀d mɔʼɔ we nɨ ben ni Yeso yɨə Wə̀d we nɨ Ŋwìə̀ zɔʼɔ rɨŋga nəb ə̀kàtɨ̀.

²³À yɨ əton nɨ mbǎʼ mbaŋə̀ ze mbɨ ɨŋgɔb məd nyaʼa gha ni, “Wɨ̀ fə sɨ i mbaŋə̀, mbə̀ biirɨ ɨ bɔ.”

²⁴Mbɨ nyaʼa tɔŋ mbaŋə̀ ze nɨ mbɨ nyaʼa gywɨ əfɨgə ənɨ ɨghəm nɨ pe be ghà ɨ bɔ ni, “Gha we rəsìʼ ɨfě Ŋwiə̀! Tɨ̀ kyerɨ ni mbaŋə̀ zɔ̂ nɨ vɨ əwe yɨə wə̀d nɨə ghɨ̀ ɨnû rɨbɔ̀ŋ.”

²⁵Mbaŋə̀ ze nyaʼa wììrɨ̀ ni, “Kɨ̀ à kɨ ə wə̀d nɨ ghɨ̀ ɨnû rɨbɔ̀ŋ kɨ̀ chə, chəi mə kyerɨ. Ənû nɨ mə kyerɨ yɨ ni mbɨ nyaʼa gywɨ əmɨ əfɨgə, əne tɨ̀nîn mə wɨə sɨə zə ɨsɨ!”

²⁶Mbɨ nyaʼa biirɨ ɨ bɔ ni, “Wɨ̀ kəʼ ghɨ̀ ənû ə ye ənɨ ə ne ə? Wɨ̀ kəʼ chè rɨ ye bɔŋ fiʼ e əghə ə?”

²⁷Wɨ̀ nyaʼa wììrɨ̀ əmbɨ mɨ̀mə̌d ni, “Mə fə kə̀ʼ gha ɨ nən, àyɨə chəi mbə̀ ghaʼ nɨ zwetɨ. Mbə kɨə wɨrɨə kəb zu ɨghəm cherə ɨmbə̀ʼ ə yè ə? Mbə wa bə̀ kəb nɨ yeʼ mə̀mə̀ə̀nɨ̀-ɨnû ɨməd ə?”

²⁸Mbɨ nyaʼa zɔ̀m əməd ghà ni, “Àwɔ̀ yɨ ə̀mə̀ə̀nɨ̀-ɨnû məd. À yeʼ ɨmbə̀ʼ əwa, tɨ̀ yɨ mə̀mə̀ə̀nɨ̀-ɨnû Mose.

²⁹Tɨ̀ kyerɨ ni Ŋwìə̀ nyaʼa ghàm əmbɨ Mose, à yeʼ ɨmbə̀ʼ mbaŋə̀ zɔ̂, chəi tɨ̀ kyerɨ əsɨ ze nɨ wɨ̀ nɔʼ rəŋgu.”

³⁰Mbaŋə̀ ze nyaʼa wììrɨ̀ ni, “Əzɔ̂ yɨə kàŋ ənû ə yiirɨ! Chəi mbə̀ kyerɨ əsɨ ze nɨ wɨ̀ nɔʼ rəŋgu, àyɨə wɨ̀ fə fìʼ mɨ əghə.

³¹Tɨ̀ kyerɨ ni chəi Ŋwìə̀ ə zwetɨ ɨnû mbe nɨ bə̂d nɨə ghɨ̀ ɨnû rɨbɔ̀ŋ ə ghàə̀, àyɨə məd wɨə zwetɨ rɨ əmbɨ ə bə̂d mbe nɨə wumnɨ əməd bə ghɨ̀ə̀ ɨnû mbe nɨ wɨ̀ kəbɨ.

³²Tɨ ənɨ Ŋwìə̀ nyaʼa tekɨ ɨsɨg, chəi bə̂d kweʼ zu ni wə̀d mɔʼɔ fə fìʼ əghə ə wə̀d nɨ mbɨ nyaʼa gywɨ əfɨgə.

³³À mɨ yeʼ nɨ kaʼi Ŋwìə̀ kəʼ tom mbaŋə̀ zɔ̂, njɨ chəi ənɨ tɨ̀ wɨ̀ ghɨ̀ ənû ə mɔʼɔ.”

³⁴Mbɨ nyaʼa wììrɨ̀ ɨ bɔ ni, “Mbɨ nyaʼa gywɨ əwe à kwi ɨŋga ɨnû rɨbɔ̀ŋ əne à wa bɨrɨ chwi ɨnû ɨ na ə?” Mbɨ nyaʼa ghà əne, fid əməd tɨ ɨŋga nəb ə̀kàtɨ̀ ze.

³⁵Ənɨ Yeso nyaʼa zu ni mbɨ fə fid mbaŋə̀ ze rɨŋga nəb ə̀kàtɨ̀, wɨ̀ nyaʼa wo kə̀b əməd zə, biirɨ ɨ bɔ ni, “À ben Wan Wə̀d [8] ə?”

³⁶Mbaŋə̀ ze nyaʼa wììrɨ̀ ni, “Masà, məd kɨə we, ɨmbə̀ʼ mə ben əməd ə?”

³⁷Yeso nyaʼa gha ɨ bɔ ni, “À fə zə əməd. À yɨə məd wɔ̂ ə ghàm ɨ ne.”

³⁸Mbaŋə̀ ze nyaʼa ghà ni, “Ə̀nùŋɨ̀sɨg, mə benɨ.” Ənɨ wɨ̀ nyaʼa ghà əne, wɨ̀ nyaʼa chìndɨ̀ ɨtu ɨnywɨ ɨfě Yeso.

³⁹Yeso nyaʼa ghà ni, “Mə nyaʼa yeʼe ɨ saʼ ɨsɨg wɔ̂ ɨmbə̀ʼ mɨfɨgɨ̀ zə ɨsɨ, mbe nɨə zə ɨsɨ beŋ ənɨ mɨfɨgɨ̀.”

⁴⁰Mɨ̀Farisiî mɔʼɔ nɨ nyaʼa əŋgu mbɨ məd nyaʼa zu ənû ze nɨ wɨ̀ nyaʼə ghàə̀, əne mbɨ nyaʼa biirɨ ɨ bɔ ni, “À wa kəb gha ni tɨ̀ yɨə bə mɨfɨgɨ̀ ə?”

⁴¹Yeso nyaʼa wììrɨ̀ əmbɨ mɨ̀mə̌d ni, “À mɨ yeʼ nɨ mbə yɨ mɨfɨgɨ̀, njɨ chəi ɨgu-ənû ɨgwɨ nən. Àyɨə ɨchî nɨ mbə̀ gha ni mbə mbɨə zə ɨsɨ, ɨgu-ənû we kɨrɨ tən ɨgwɨ nən.”