Read Fɨso Fi Ɨ̀fàʼì bə̂d tom Kristo 1 Bible Online

Ɨ̀fàʼì bə̂d tom Kristo 1 - Fɨso Fi bible

Ɨ̀fàʼì bə̂d tom Kristo 1

¹Wə̀d kyeŋ Tiofilùs, ɨŋga ə̀ŋwàʼnɨ̀ rɨtu ze nɨ mə̀ nyaʼa ŋwàʼnɨ̀, mə nyaʼa ŋwàʼnɨ̀ ɨnû jìm mbe nɨ Yeso nyaʼə ghɨ̀ə̀ fɔrɨ mbe nɨ wɨ̀ nyaʼə chwiə kɔ rɨ ənɨ wɨ̀ nyaʼa kɔ e ə̀fàʼì

²wò pè əni ze nɨ Ŋwìə̀ nyaʼa nɨŋ əməd ɨkaŋ. Bɔŋ wɨ̀ nyaʼə sɨə wò ɨkaŋ, wɨ̀ nyaʼa chè ənjìm Əzwî ə Zeŋɨ nàʼ rɨkə əmbɨ ə bə̂d tom mbe nɨ wɨ̀ nyaʼa fə chɔʼɔ.

³Ənɨ wɨ̀ nyaʼa fə zə ŋgəʼ, kwɨ, wɨrɨ zwemə, wɨ̀ nyaʼa chwi i ɨnyod əmbɨ mɨ̀mə̌d ənɨ ɨnweenɨ nɔnɔʼ ɨmbə̀ʼ mbɨ kyerɨ ni tə wɨ ɨkǎ. Ɨ wɨə nyaʼə jwɨ̀ ɨfě mɨ̀mə̌d ɨŋga ɨni ɨwum kwè. Wɨ̀ nyaʼa mɨ jwɨ̀, wɨ̀ ghà əmbɨ mɨ̀mə̌d ɨmbə̀ʼ ənû ɨfɔ̀n ə Ŋwiə̀.

⁴Ənɨ wɨ̀ nyaʼa kɨrɨ i mbɨ mɨ̀mə̌d, wɨ̀ nyaʼa patɨ mɨ̀mə̌d ni, “Tɨ mbə̀ nɔʼ ə rɨ ə Jèrusalèm, àyɨə mbə̀ chubɨ wòm ɨneʼe we nɨ mə̀ nyaʼa gha ɨ nən, əne yɨ ɨneʼe we nɨ mɨ Mbǎʼ nyaʼa kaʼ ni tə bɨrɨ naʼ ɨ nən.

⁵Jɔ̌n wɨə nyaʼə nàʼə̀ mɨnib, àyɨə bɔŋ ɨni nɔnɔʼ sɨə yeʼe, Ŋwìə̀ bɨrɨ naʼ Əzwî ə Zeŋɨ ɨ nən.”

⁶Ənɨ Yeso mbɨ mbi bə̂d tom nyaʼa wò fetɨ əsɨ ə mɔʼ, mbɨ nyaʼa biirɨ ɨ bɔ ni, “Ə̀nùŋɨ̀sɨg, à wa bɨrɨ baŋ məRom sɨ wɨrɨ nàʼ ənû ɨfɔ̀n əmbɨ mɨ̀Izre tɨ̀nîn ə?”

⁷Wɨ̀ nyaʼa wììrɨ̀ əmbɨ mɨ̀mə̌d ni, “Kaʼi əzən rɨmbin nɨ kyerɨ mɨ̀nyùmə̀ kɨ̀ ɨni mbe nɨ Mbǎʼ fə nuŋ ənɨ i ɨka.

⁸Àyɨə mbə bɨrɨ berɨ ɨka ənɨ Əzwî ə Zeŋɨ ə fə nyɨ ɨgwɨ nən. Əne mbə bɨrɨ sɨ yeʼ bə̂d nɨə ghà ɨnû ɨmbə̀ʼ əmɨ ɨŋga Jèrusalèm, ɨŋga ɨsɨ jìm mbe rɨ ə Jùdeyà, bə̀ fɔrɨ ɨŋga ɨsɨ jìm mbe rɨ ə Sàmàriyà, əne əne wò pè ɨnwǐ ɨsɨg.”

⁹Ənɨ wɨ̀ nyaʼa fə gha əne, ənɨ bə̂d tom mbe nyaʼə kɨrɨ nèŋə̀, Ŋwìə̀ nyaʼa nɨŋ əməd ɨkaŋ. Pàʼ nyaʼa kən mɨ̀mə̌d ni tɨ mbɨ zə əməd.

¹⁰Ənɨ mbɨ nyaʼə toŋ əghə nèŋ ɨchî nɨ wɨə wò ɨkaŋ, mbɨ nyaʼa saʼ zə mbaŋə̀ rɨ̀be nɨ nyaʼa zɨ̌ ngywɨ̌ tɨ rɨ̀fɨ. Tɨ nyaʼa təm ɨban mɨ̀mə̌d.

¹¹Mbaŋə̀ te nyaʼa ghà ni, “Mbaŋə̀ tɨ rɨ ə Galiliî, mbə təm əgha ɨ neŋ ɨkaŋ ɨmbə̀ʼ ə yè ə? Yeso wɔ̂, nɨ Ŋwìə̀ fə nɨŋ rəkaʼ nən ɨkaŋ, bɨrɨ bəndɨ yeʼe àmei ɨchî nɨ mbə̀ zə ənɨ wɨə wò ɨkaŋ.”

¹²Bə̂d tom mbe nyaʼa nɔ̀ʼ rɨkaŋ Ɨwum mɨ̀Olìf, bə̀ndɨ̀ wò ə Jèrusalèm. Əgha nɨ wo pe əŋgu yɨə nyaʼa ɨghabɨ kilometà mɔʼ. [1]

¹³Ənɨ mbɨ nyaʼa nyɨ ə Jèrusalèm, mbɨ nyaʼa kɔʼ wò nyɨ ɨŋga ətu ə nəb ze rɨkaŋ, nɨ yeʼ əsɨ ze nɨ mbɨ nyaʼə chub əŋgu. Mbɨ yɨə nyaʼə: Pità, Jɔ̌n, Jems, Andrù, Filip, Tomas, Bàtòlòmiù, Matiù, Jems nɨ nyaʼə wan Alfaùs, Saimòn nɨ nyaʼə mɨ̀taku mbɨ Judàs nɨ nyaʼə wan Jems.

¹⁴Mɨ̀mə̌d mbɔ̂ mɨ̀jìm mbɨə nyaʼə bòmnɨ̀ə̀ kɔ̀ŋgɨ̀ ə Ŋwiə̀ ənɨ ə fîŋ mɔʼ. Ɨ mbɨə nyaʼə bòmnɨ̀ə̀ mbɨ məyi, mbɨ Mèri ɨŋgɔb Yeso fɔrɨ mbɨ ə bɔŋgɔb məd.

¹⁵À nyaʼa ənɨ ə nyùmə̀ we, Pità nyaʼa nɔ̀ʼ təm əkaʼ bə̂d mbe nɨ nyaʼa ben ə Kristo, nɨ nyaʼa fɔtɨ əsɨ ə mɔʼ ɨghabɨ ɨkɨ fibɨ̀ mbɨ ɨwum be. Wɨ̀ nyaʼa təm əne ghà ni,

¹⁶“Mbɨ bɔŋgɔb, ɨŋgam Ŋwiə̀ we nɨ Əzwî ə Zeŋɨ ə nyaʼa fə be ghɨ̀ ɨfɔ̂n Dèvîd ghà, ə berɨ jwɨ̀ ənɨ rəsìʼ de ə Judàs we nɨ nyaʼa chwi ɨnə̂njɨ̀ əmbɨ ə bə̂d mbe nɨ nyaʼa gywɨ ə Yeso.

¹⁷Judàs yɨə nyaʼə wɨ mɔʼɔ rəbɔʼ na. Yeso nyaʼa chɔʼ əməd ni wɨ̀ faʼ ə̀fàʼì zɔ̂ nɨ tɨə fàʼə̀.

¹⁸“(Judàs nyaʼa wò zon əsɨ ə si ənɨ ɨchɔʼ ə̀fàʼì tɨ ənɨ ɨnû rɨbɔ̀ŋ məd. Wɨ̀ nyaʼa gù əsɨ si ze rətuŋə, ɨbum məd toʼ ɨŋga mɨgharə̀, mɨtɔ məd mɨjìm jwɨ̀ əsaŋ.

¹⁹Bə̂d mɨjìm mbe nɨ nyaʼə chub ə Jèrusalèm nyaʼa kyerɨ ənû zɔ̂. Əne ɨ mbɨə nyaʼə sɨə tɔŋ əsɨ ə si ze ənɨ ɨŋgam əbeŋ mɨ̀mə̌d ni Àkeldamà, əne yɨ ni, Əsɨ ə Si Ənəm.)

²⁰“Ə zɨ ɨŋga Ə̀ŋwàʼnɨ̀ ə mɨ̀Sâm ni, 'Nəb məd chubɨ zɨ zobɨ, tɨ wə̀d mɔʼɔ chub i ɨŋga,' mbɨ ni, 'Wə̀d cherə nɨŋ tɨmbin ə̀fàʼì əməd.'

²¹“Əne tɨ̀ chɔʼ mbaŋə̀ mɔʼ rəbɔʼ te nɨ nyaʼa mbɨ na ənɨ mɨ̀nyùmə̀ jìm mbe nɨ Ə̀nùŋɨ̀sɨg Yeso nyaʼə yèn əkaʼ na,

²²kɔ rɨ ənɨ Jɔ̌n we nɨ nyaʼə nàʼ mɨnib wò pè əni ze nɨ Ŋwìə̀ nyaʼa nɨŋ ə Yeso rəkaʼ na. Mbaŋə̀ mɔʼ rəbɔʼ tɔ̂ berɨ fɔtɨ əbɔʼ na yènə̀ ghà ɨnû ɨmbə̀ʼ ɨchî nɨ Ə̀nùŋɨ̀sɨg nyaʼa zwemə.”

²³Mbɨ nyaʼa nàʼ rɨkum mbaŋə̀ rɨ̀be. Wɨ rɨtu yɨə nyaʼə Jòsêf nɨ mbɨ nyaʼə bə̀ tɔŋ ənɨ ə Bàsabàs, nɨ ɨkum məd deenɨ yɨə nyaʼə Justùs. We nɨ nyaʼa beenɨ yɨə nyaʼə Màtiàs.

²⁴Mbɨ nyaʼa ghɨ̀ əne, kɔŋgɨ ə Ŋwiə̀ ghà ni, “Ə̀nùŋɨ̀sɨg, àwɔ̀ nɨ kyerɨ fîŋ rɨ bə̂d mɨ̀jìm, chwi mbaŋə̀ mɔʼ rəbɔʼ mbaŋə̀ tɔ̂ rɨ̀be nɨ à fə chɔʼɔ

²⁵ni wɨ̀ faʼ ə̀fàʼì zɔ̂ ɨghabɨ ə wə̀d tom, ɨchî nɨ Judàs nyaʼa saŋ ə̀fàʼì rəŋgu wò ənɨ əzi rɨmbin.”

²⁶Mbɨ nyaʼa kɔ̀ŋgɨ̀ əne, sɔ̀ŋ mbaŋ wɨ feŋ ɨgun ə Màtiàs. Əne mbɨ nyaʼa yì əməd əbɔʼ bə̂d tom mbe wum chɔ̀b mɔʼ.