Read Fɨso Fi Ɨ̀fàʼì bə̂d tom Kristo 12 Bible Online

Ɨ̀fàʼì bə̂d tom Kristo 12 - Fɨso Fi bible

Ɨ̀fàʼì bə̂d tom Kristo 12

¹À nyaʼa ənɨ ə nyùmə̀ we, ɨfɔ̂n Herɔ̀d nyaʼa kɔ nwendɨ tɨkyerɨ-ɨwu bə̂d mɔʼɔ mbe nɨ nyaʼa ɨŋga ɨfetɨ bə̂d Kristo.

²Wɨ̀ nyaʼa ghɨ̀ mbɨ zwiirɨ ə Jems, aŋgɔb Jɔ̌n, ənɨ ɨbi bid.

³Ənɨ wɨ̀ nyaʼa zə ni ənû ze ə nyaʼa bɔ̀ŋ mɨ̀Jû, wɨ̀ nyaʼa wò ɨmbì gywɨ̀ ə Pità. Wɨ̀ nyaʼa ghɨ̀ ənû zɔ̂ ənɨ mbɨ nyaʼə jɨgə ŋgə̀ŋ ze nɨ chəi ɨfuʼ we nɨə ghɨ̀ ni ŋgə̀ŋ kɔʼ ɨŋga.

⁴Ənɨ Herɔ̀d nyaʼa fə gywɨ ə Pità, wɨ̀ nyaʼa zɨ̀ əməd ə ndəŋ, əne nàʼ əməd əmbɨ ɨwaŋ mɨ̀sɔgyɨ̀ kwè, mbɨ mɨ̀sɔgyɨ̀ mɨ̀kwè ɨŋga ɨwaŋ fibɨ̀, ni mbɨ nəŋgɨ əməd. Herɔ̀d nyaʼa nùŋ əməd sɨə kɔndɨə ni mbɨ mɨ jɨg Əchwɨ̂ ə Che-ɨgun màànɨ̀, tə bɨrɨ nɨŋ əməd wò ni mbɨ saʼ əməd əsaŋ əsaŋ.

⁵Əne mbɨ nyaʼa nuŋ ə Pità ə nəb ndəŋ. Àyɨə ɨfetɨ bə̂d Kristo wɨə nyaʼə kɔ̀ŋgɨ̀ ə Ŋwiə̀ ɨgwɨ məd ənɨ tə fîŋ rɨjìm.

⁶À nyaʼa ɨzimɨ we nɨ ɨtuʼ bɨrɨ chɨg Herɔ̀d chɨ̀ ə Pità nàʼ ni mbɨ saʼ əməd əsaŋ əsaŋ, Pità wɨə nyaʼə gwen ɨŋga mɨgharə̀ mɨ̀sɔgyɨ̀ mɨ̀be. Mbɨ nyaʼa kod məd ənɨ mɨ̀kàrə̀ mɨ̀be. Mɨ̀sɔgyɨ̀ nyaʼa bə̀ chub ɨchû ɨkam ɨ nəŋgɨ ə nəb ndəŋ ze.

⁷Aŋgɨrə̀ Ə̀nùŋɨ̀sɨg nyaʼa saʼ jwɨ̀, ɨzeŋɨ zeŋɨ te ɨŋga nəb ndəŋ ze. Wɨ̀ nyaʼa nìpɨ̀ ə Pità ɨban ɨbeŋ nɔ̀ əməd ghà ɨ bɔ ni, “Zambɨ nɔʼ.” Ənɨ wɨ̀ nyaʼa ghà əne, mɨ̀kàrə̀ mbe nyaʼa feŋgɨ rɨ ənɨ ɨbɔ Pità.

⁸Aŋgɨrə̀ we nyaʼa ghà ɨ bɔ ni, “Zɨ te ngywɨ̌ bə̀ zɨ̀ mbe ɨtabɨ.” Pità nyaʼa ghɨ̀ àmei ɨchî we. Aŋgɨrə̀ we nyaʼa ghà ɨ bɔ ni, “Nɨŋ e ngywɨ̌ maʼi nib e ɨnyod əŋgu beenɨ əbɔʼ num.”

⁹Pità nyaʼa beenɨ əbɔʼ məd mbɨ jwɨ̀ rɨŋga nəb ndəŋ ze. Chəi wɨ̀ nyaʼa kyerɨ ni ənû ze nɨ aŋgɨrə̀ we nyaʼə ghɨ̀ə̀ yɨ ənû rəsìʼ. Wɨ̀ nyaʼa kɔndɨ yeʼ ni tə wɨə zəə rɨ̀taanɨ njə̀m.

¹⁰Ənɨ mbɨ nyaʼa fə che ɨwaŋ mɨ̀sɔgyɨ̀ rɨtu bə̀ chè we nɨ pe be, mbɨ nyaʼa pè ɨchû ɨkam ətənɨ we nɨə neŋ ɨŋga əbeŋ ze. Ɨchû ɨkam we nyaʼa fiʼ əmbɨ mɨ̀mə̌d tə̀zìʼ wi. Mbɨ nyaʼa jwɨ̀ wò ɨsɨg. Ənɨ mbɨ nyaʼa chè ɨnə̂njɨ̀ kyeŋ mɔʼ, aŋgɨrə̀ we nyaʼa sàʼ sàŋ əməd.

¹¹Ənɨ Pità nyaʼa kyerɨ ənû ze nɨ nyaʼa ghɨ ənɨ məd, wɨ̀ nyaʼa ghà ni, “Tɨ̀nîn mə fə kyerɨ ənɨ rəsìʼ ni Ə̀nùŋɨ̀sɨg fə tom wi aŋgɨrə̀ ni wɨ̀ yeʼe chɨ̀ əmɨ rɨŋga tɨkyerɨ-ɨbɔ Herɔ̀d, bə̀ chɨ əmɨ rɨ ənɨ ɨnû jìm mbe nɨ mɨ̀Jû ə kə̀ʼə̀ wòmə̀ ni mbə bɨrɨ ghɨ ənɨ ə num.”

¹²Ənɨ wɨ̀ nyaʼa kyerɨ əne, wɨ̀ nyaʼa wò əkwɨ Mèri, ɨŋgɔb Jɔ̌n, nɨ ɨkum məd cherə nyaʼə Mak. Bə̂d mɨ̀nɔnɔʼ nyaʼa fə fetɨ əŋgu. Əne ɨ mbɨə nyaʼə kɔ̀ŋgɨ̀ ə Ŋwiə̀.

¹³Ənɨ wɨ̀ nyaʼa goŋgɨ ɨchû ɨkam, wan əyi ə̀fàʼì mɔʼɔ nɨ ɨkum məd nyaʼə Rodà nyaʼa wò biirɨ wə̀d we nɨə goŋgɨə.

¹⁴Ənɨ wɨ̀ nyaʼa zu gɨ̂ Pità kyerɨ, wɨ̀ nyaʼa ghaʼ kwàʼ rɨŋgəʼ, əne nòrə̀ wò nyɨ ə nəb ghà əmbɨ ə bə̂d mbe ni Pità wɨ ɨchû ɨkam. Àyɨə chəi wɨ̀ nyaʼa fiʼ ɨchû ɨkam ɨ bɔ.

¹⁵Mbɨ nyaʼa ghà ɨ bɔ ni, “À wɨə beə!” Àyɨə wɨ̀ nyaʼa nyèŋ ni à yɨ rəsìʼ. Əne mbɨ nyaʼa ghà ni, “À yɨ aŋgɨrə̀ məd!”

¹⁶Àyɨə Pità nyaʼa wò ɨmbì rəbə goŋgɨ i ɨchû ɨkam we goŋgɨ. Ənɨ mbɨ nyaʼa fiʼ ɨkam we, mbɨ nyaʼa zə əməd, yiirɨ.

¹⁷Pità nyaʼa mə̀ ənɨ e əbɔ ni mbɨ kəm rəziə. Ənɨ mbɨ nyaʼa kəmɨ, wɨ̀ nyaʼa tòʼrɨ̀ ɨchî nɨ Ə̀nùŋɨ̀sɨg kəʼ chɨ əməd rɨ ə ndəŋ. Wɨ̀ nyaʼa ghɨ̀ əne ghà ni, “Mbə̀ gha ənû zɔ̂ əmbɨ Jems fɔrɨ əmbɨ ə bɔŋgɔb mbə.” Ənɨ wɨ̀ nyaʼa ghà əne, wɨ̀ nyaʼa nɔ̀ʼ wò əsɨ ə cherə.

¹⁸Ənɨ ɨtuʼ nyaʼa chɨgɨ, ə̀bùùrɨ̀ ə kyeŋ ə nyaʼa jwɨ̀ əkaʼ mɨ̀sɔgyɨ̀ mbe. Chəi mbɨ nyaʼa kyerɨ ənû ze nɨ ghɨ ənɨ Pità.

¹⁹Herɔ̀d nyaʼa chà bə̂d ni mbɨ kəb ə Pità, àyɨə chəi mbɨ nyaʼa zə əməd. Wɨ̀ nyaʼa nwèndɨ̀ mɨ̀sɔgyɨ̀ mbe, əne ghà ni mbɨ zwiirɨ mɨ̀mə̌d. Ənɨ mbɨ nyaʼa ghɨ̀ əne, wɨ̀ nyaʼa nɔ̀ʼ rɨ ə Jùdeyà swiʼi wò ə Kàisàriyà pè chub əŋgu ənɨ ɨkə nyumə̀.

²⁰Herɔ̀d nyaʼa sə ɨtəm əbɔʼ bə̂d mbe rɨ ə Taì fɔrɨ ə Sidòn. Əne mbɨ nyaʼa fɔtɨ wò əsɨ məd ənɨ ɨnɔ̀n. Mbɨ nyaʼa pè zə ə Blasiùs nɨ nyaʼə nəŋgɨə tɔʼ Herɔ̀d, əne mbɨ nyaʼa fi ətu əməd ni wɨ̀ weerɨ əwən. Mbɨ nyaʼa ghɨ̀ əne, wò əsɨ Herɔ̀d pè ghà ɨ bɔ ni wɨ̀ ghɨ mbə̀ chub ənɨ əbɔrəbɔd, ɨmbə̀ʼ ɨghəm nɨ tɨjɨg tɨ mɨ̀mə̌d tɨə nyaʼə nɔ̀ʼ rɨŋga əbeŋ ə Herɔ̀d.

²¹À nyaʼa ɨgwɨ əni ze nɨ mbɨ nyaʼa nuŋɨ, Herɔ̀d nyaʼa zɨ̀ ti ngywɨ̌ rɨfɔ̀n wò chub ɨgun e ətən ɨfɔ̀n, ghàm əmbɨ ə bə̂d mbe.

²²Ənɨ wɨ̀ nyaʼa ghàm əne, bə̂d mbe nyaʼa wumnɨ əməd, ghà rɨ̀kǎ ni, “Zɔ̂ yɨə gɨ̂ ŋwìə̀, kaʼi gɨ̂ wə̀d!”

²³Àmei əwu əwən, aŋgɨrə̀ Ə̀nùŋɨ̀sɨg nyaʼa zɨ əwɔn ə ka ka ɨgwɨ məd, ɨmbə̀ʼ ɨghəm nɨ chəi wɨ̀ nyaʼa naʼ ɨwumnɨ we yeʼ əmbɨ ə Ŋwiə̀. Tɨgwid nyaʼa nyɨ ɨŋga ɨnyod məd, kud əməd, wɨ̀ kwɨ.

²⁴Ɨŋgam Ŋwiə̀ wɨə nyaʼə jàŋə̀ wò ɨmbì. Bə̂d mɨ̀nɔnɔʼ nyaʼa zu benɨ.

²⁵Ənɨ Banabàs mbɨ Sɔ̂l nyaʼa maanɨ ə̀fàʼì ze nɨ mbɨ nyaʼa wo faʼ ə Jèrusalèm, mbɨ nyaʼa bə̀ndɨ̀ wò ə Antiɔ̀k. Ənɨ mbɨ nyaʼə bə̀ndɨ̀ə̀, mbɨ nyaʼa nɨŋ ə Jɔ̌n we nɨ ɨkum məd cherə nyaʼə Mak wò mbɨ məd.