Read Fɨso Fi Ɨ̀fàʼì bə̂d tom Kristo 18 Bible Online

Ɨ̀fàʼì bə̂d tom Kristo 18 - Fɨso Fi bible

Ɨ̀fàʼì bə̂d tom Kristo 18

¹Ənɨ Pɔ̂l nyaʼa fə gham əmbɨ ɨfetɨ Àriopagùs we, wɨ̀ nyaʼa nɔ̀ʼ rɨ ə Atèns wò ə Kɔrèn.

²Wɨ̀ nyaʼa pè əŋgu, zə wə̀d Jû mɔʼɔ nɨ ɨkum məd nyaʼə Àkwilà. Wɨ̀ yɨə nyaʼa rɨ ə Pontùs. Ɨkum ɨwi məd yɨə nyaʼə Prìsilà. Mbɨ nyaʼa cherə yeʼe rɨ ə Italì. Mbɨ nyaʼa nɔ̀ʼ rɨ ə Italì ɨmbə̀ʼ ɨghəm nɨ Ɨfɔ̂n Klodiùs nyaʼa sob ni mɨ̀Jû mɨ̀jìm jwɨ rɨ ə Rom. Pɔ̂l nyaʼa wò zə mɨ̀mə̌d,

³pè chubɨ mbɨ mɨ̀mə̌d ɨmbə̀ʼ ɨghəm nɨ mbɨ nyaʼa berɨ əbɔ ə̀fàʼì ə mɔʼ. Wɨ̀ nyaʼa chubɨ bə̀ fàʼə̀ mbɨ mɨ̀mə̌d. Əbɔ ə̀fàʼì mɨ̀mə̌d yɨə nyaʼa nɨ tekɨ gôb te nɨ mbɨ nyaʼə kod mɨŋwenɨ əŋgu.

⁴Ɨ wɨə nyaʼə tàŋə̀ mbɨ mɨ̀Jû ɨŋga nəb ə̀kàtɨ̀ ɨni ɨkwɨ jìm. Əne wɨ̀ nyaʼa fi ɨtu mɨ̀Jû bə̀ fi ɨtu bə̂d mbe nɨ kaʼi mɨ̀Jû ɨmbə̀ʼ mbɨ ben ə Kristo.

⁵Ənɨ Sailàs mbɨ Timotì nyaʼa yeʼe rɨ ə Màsèdonià, Pɔ̂l nyaʼa zɨ̀ ətu àmei nɨ gha ɨŋgam Ŋwiə̀ bə̀ fɔrɨ nɨ toʼrɨ əmbɨ mɨ̀Jû ni Yeso yɨə Wə̀d we nɨ Ŋwìə̀ zɔʼɔ.

⁶Ənɨ mbɨ nyaʼa ton ɨŋgam we nɨ wɨ̀ nyaʼə ghàə̀ bə̀ kɔ zɔm əməd, wɨ̀ nyaʼa kùd mbi ɨ̀tǒŋ, ghà əmbɨ mɨ̀mə̌d ni, “Ndɔ̀n bɨrɨ nyɨ àmei ɨgwɨ nən! Mbɨ ɨbɔ ə zeŋ. Ɨ kɔ rɨ̀nîn mə bɨrɨ wo əsɨ bə̂d mbe nɨ kaʼi mɨ̀Jû.”

⁷Ənɨ wɨ̀ nyaʼa ghà əne, wɨ̀ nyaʼa sàŋ mɨ̀mə̌d wo ɨŋga nəb mbaŋə̀ mɔʼɔ nɨ ɨkum məd nyaʼə Taitùs Justùs. Məd wɨə nyaʼə bə̀ wumnɨ ə Ŋwiə̀. Nəb məd zɨə nyaʼa ɨban nəb ə̀kàtɨ̀ mɨ̀Jû.

⁸Krispùs bə̂, nɨ nyaʼa ətu ɨŋga nəb ə̀kàtɨ̀ ze mbɨ ə bə̂d mɨ̀jìm mbe nɨ nyaʼa ɨŋga nəb məd, nyaʼa ben Ə̀nùŋɨ̀sɨg. Bə̂d mɨ̀nɔnɔʼ ə Kɔrèn nyaʼa zu ənû ze nɨ Pɔ̂l nyaʼə ghàə̀, əne mbɨ nyaʼa bə̀ ben Ə̀nùŋɨ̀sɨg. Ənɨ mbɨ nyaʼa benɨ, mbɨ nyaʼa nɨŋ mɨnib.

⁹À nyaʼa ɨzimɨ mɔʼɔ, Ə̀nùŋɨ̀sɨg nyaʼa ghà əmbɨ Pɔ̂l ɨŋga rɨ̀taanɨ njə̀m ni, “Tɨrə̀ bɔ e! Ndə̀ ɨmbì ghàm əmbɨ ə bə̂d! Tɨrə̀ tɔ kəm e rəziə!

¹⁰Mə wɨ mbɨ ne, əne chəi wə̀d mɔʼɔ nɨ tɨ̀ wɨ̀ kɔ əwe ənɨ ə ndàn, kɨ̀ nɨ tɨ̀ wɨ̀ ghɨ̀ əghəm ənɨ ə ne, ɨmbə̀ʼ ɨghəm mbɨ bə̂d ə nɔʼ ɨŋga əsɨ zɔ̂.”

¹¹Pɔ̂l nyaʼa zu əne, chub əŋgu əghəm əwu ə fibɨ̀ mbɨ əmɨg rɨ̀fuə. Wɨ̀ nyaʼa chub əne bə̀ sɨə ghà ɨŋgam Ŋwiə̀ əmbɨ ə bə̂d mbe rəŋgu.

¹²Ənɨ Galiò nyaʼə gɔmnà əbà əbeŋ ze rɨ ə Àkàiyà, mɨ̀Jû mɔʼɔ rɨ əsɨ ze nyaʼa fɔtɨ wò gywɨ̀ ə Pɔ̂l nɨŋ wò ə nəb ɨsaʼi.

¹³Mbɨ nyaʼa pè əŋgu ghà ni, “Mbaŋə̀ zɔ̂ zɨə fi ɨtu bə̂d ni mbɨ wumnɨ ə Ŋwiə̀ ənɨ mɨnə̂njɨ̀ nɨ chəi ɨŋga ta rɨkə.”

¹⁴Ənɨ Pɔ̂l nyaʼə nɨrə ghàmə̀, Galiò nyaʼa ghà əmbɨ mɨ̀Jû mbe ni, “Mɨ̀Jû, mbə̀ zwetɨ! À mɨ yeʼ ni mbə̀ kə̀ʼ zɨ ɨsaʼi ɨgwɨ ə mbaŋə̀ zɔ̂ ni wɨə gù ənû ə mɔʼɔ, kɨ̀ ni wɨə ghɨ ənû rɨbɔ̀ŋ ə kyeŋ ə mɔʼɔ, njɨ mə berɨ əton nɨ zwetɨ ənû ze nɨ mbə̀ə ghàə̀.

¹⁵Àyɨə ɨchî nɨ mbə̀ə tàŋ ɨmbə̀ʼ mɨŋgam bə̀ tàŋ ɨmbə̀ʼ rɨkum bə̀ tàŋ ɨmbə̀ʼ tə rɨkə, mbə̀ neŋ ənû rəŋgu mbənə mbənə. Ka mə bɨrɨ ben əmɨ nɨ saʼ ɨnû ɨghabɨ mbɔ̂!”

¹⁶Ənɨ wɨ̀ nyaʼa ghà əne, wɨ̀ nyaʼa fid mɨ̀mə̌d rɨŋga nəb ɨsaʼi ze.

¹⁷Mɨ̀Jû mbe mɨjìm nyaʼa gywɨ̀ ə Sòstenès, nɨ nyaʼə ətu ɨŋga nəb ə̀kàtɨ̀ ze, som əməd ɨfě nəb ɨsaʼi ze. Àyɨə chəi Galiò nyaʼa nɨŋ əze ənɨ ənû ə mɔʼɔ.

¹⁸Pɔ̂l nyaʼa wɨrɨ chub ə Kɔrèn ɨni nɔnɔʼ. Ənɨ wɨ̀ nyaʼa maanɨ rəŋgu, wɨ̀ nyaʼa sàŋ bɔŋgɔb mbe, nɨŋ ə Prìsilà mbɨ Àkwilà mbɨ nyɨ əbaŋ ɨgyɨ̀ baanɨ wò ə Sirià. Bɔŋ mbɨ nyaʼa sɨə nɔʼ rɨə Senkrià, wɨ̀ nyaʼa serɨ e ətu ɨchî nɨ wɨ̀ nyaʼa fə kaʼ əmbɨ ə Ŋwiə̀.

¹⁹Ənɨ mbɨ nyaʼa pe ə Efesùs, wɨ̀ nyaʼa sàŋ ə Prìsilà mbɨ Àkwilà əŋgu. Məd ziə nyaʼa wò nyɨ ɨŋga nəb ə̀kàtɨ̀ kɔ taŋɨ mbɨ mɨ̀Jû.

²⁰Ənɨ mbɨ nyaʼa gha ɨ bɔ ni wɨ̀ chub ənɨ əgha nɨ tɔ yi sààrɨ̀, wɨ̀ nyaʼa ton i.

²¹Àyɨə ənɨ wɨ̀ nyaʼa sɨə wo ə, wɨ̀ nyaʼa kàʼ mɨ̀mə̌d ni, “Ŋwìə̀ mɨ benɨ, mə bɨrɨ wɨrɨ yeʼe əsɨ nən.” Ənɨ wɨ̀ nyaʼa ghà əne, wɨ̀ nyaʼa nyɨ əbaŋ ɨgyɨ̀ nɔʼ rɨ ə Efesùs.

²²Ənɨ wɨ̀ nyaʼa pe ə Kàisàriyà, wɨ̀ nyaʼa jwɨ rɨŋga əbaŋ ɨgyɨ̀ ze, kɔ̀ʼ wò chàʼrɨ̀ bə̂d rɨŋga ɨfetɨ we rɨ ə Jèrusalèm. Wɨ̀ nyaʼa ghɨ əne, swiʼi wò ə Antiɔ̀k.

²³Ənɨ wɨ̀ nyaʼa chub əŋgu ənɨ ə nyùmə̀ mɔʼɔ, wɨ̀ nyaʼa nɔ̀ʼ ghanə yèn ɨsɨ ɨsɨ ɨŋga əba əbeŋ ze rɨ ə Gàlesià fɔrɨ ə Frigìà. Wɨ̀ nyaʼə yènə̀ tìmbɨ̀ ə bə̂d mɨjìm mbe nɨ nyaʼa ben ə Kristo.

²⁴À nyaʼa ənɨ ə nyùmə̀ we, Jû mɔʼɔ nɨ ɨkum məd nyaʼə Àpolòs nyaʼa wò ə Efesùs. Mbɨ nyaʼa gywɨ əməd ə Àlèzandrià. Wɨ̀ nyaʼa berɨ ɨŋgam ɨchû bə̀ kyerɨ ɨnû mbe nɨ yeʼ ɨŋga Ə̀ŋwàʼnɨ̀ ə Ŋwiə̀ kwàʼ ɨchî chɔ̀m.

²⁵Wɨ̀ nyaʼa fə kwembɨ ɨnû ɨmbə̀ʼ Ɨnə̂njɨ̀ we nɨ Ə̀nùŋɨ̀sɨg nyaʼa chwiə. Ɨ wɨə nyaʼə ghà ɨŋgam Ŋwiə̀ bə̀ chwi ɨnû ɨmbə̀ʼ ə Yeso ɨchî nɨ kuʼnɨ, ka à be yeʼi ni wɨ̀ nyaʼa kyerɨ àmei ənû ɨmbə̀ʼ ɨchî nɨ Jɔ̌n nyaʼə nàʼ mɨnib.

²⁶Wɨ̀ nyaʼa kɔ gha ɨŋgam Ŋwiə̀ ɨŋga nəb ə̀kàtɨ̀ ənɨ ə fîŋ nɨ kǎ. Àyɨə ənɨ Prìsilà mbɨ Àkwilà nyaʼa zu ənɨ wɨ̀ nyaʼə ghàə̀, mbɨ nyaʼa nɨŋ əməd wò jeŋgɨ toʼrɨ Ɨnə̂njɨ̀ we nɨ Ŋwiə̀ nyaʼə chwiə.

²⁷Ənɨ wɨ̀ nyaʼə kə̀b baanɨ wo ə Àkàiyà, bə̂d Kristo mbe rɨ ə Efesùs nyaʼa tìmbɨ̀ əməd, əne ŋwàʼnɨ̀ əmbɨ bə̂d Kristo mbe rɨ ə Àkàiyà ni mbɨ nɨŋ əməd. Ənɨ wɨ̀ nyaʼa pe əŋgu, wɨ̀ nyaʼa nàʼ ə̀wèèrɨ̀ ə kyeŋ əmbɨ ə bə̂d mbe nɨ Ŋwìə̀ nyaʼa ghɨ ɨ̀chɔ̀m ənɨ mɨ̀mə̌d mbɨ ben ə Kristo.

²⁸Wɨ̀ nyaʼa ton ɨnû mbe nɨ mɨ̀Jû nyaʼə ghà ɨfě bə̂d, əne baŋ mɨ̀mə̌d ɨchî nɨ wɨ̀ nyaʼə chwi rɨŋga Ə̀ŋwàʼnɨ̀ ə Ŋwiə̀ ni Yeso yɨə Wə̀d we nɨ Ŋwìə̀ zɔʼɔ.