Read Fɨso Fi Ɨ̀fàʼì bə̂d tom Kristo 19 Bible Online

Ɨ̀fàʼì bə̂d tom Kristo 19 - Fɨso Fi bible

Ɨ̀fàʼì bə̂d tom Kristo 19

¹Ənɨ Àpolòs nyaʼə Kɔrèn, Pɔ̂l nyaʼa chè ətu ətu ɨŋga ɨsɨ mbe rɨŋga əbà əbeŋ ze wò ə Efesùs. Wɨ̀ nyaʼa pè zə bə̂d mɔʼɔ nɨ nyaʼa ben ə Kristo.

²Əne wɨ̀ nyaʼa biirɨ əmbɨ mɨ̀mə̌d ni, “Əzwî ə Zeŋɨ ə wa nyaʼa yeʼe ɨgwɨ nən ənɨ mbə̀ nyaʼa ben ə Kristo ə?” Mbɨ nyaʼa wììrɨ̀ ni, “Chə̂, chəi tɨ̀ be kweʼ zu ni Əzwî ə Zeŋɨ ə zɨ əŋgu.”

³Wɨ̀ nyaʼa biirɨ ni, “Mbə nyaʼa nɨŋ mɨnib mbi ə?” Mbɨ nyaʼa wììrɨ̀ ni, “À yɨ mbe nɨ Jɔ̌n nyaʼə ghà ɨmbə̀ʼ mbɨwən.”

⁴Pɔ̂l nyaʼa ghà ni, “Jɔ̌n wɨə nyaʼə nàʼ mɨnib ghàə̀ ni bə̂d beŋ tə fîŋ nɨŋ mɨnib. Ɨ wɨə nyaʼa bə̀ ghà əmbɨ ə bə̂d ni mbɨ ben wə̀d we nɨ bɨrɨ yeʼe ənɨ i njìm, əne yɨ wɨ̀ nyaʼə ghà ə Yeso.”

⁵Ənɨ mbɨ nyaʼa zu ənû zɔ̂, mbɨ nyaʼa nɨŋ mɨnib ənɨ ɨkum Ə̀nùŋɨ̀sɨg Yeso.

⁶Ənɨ Pɔ̂l nyaʼa zab mbi ɨbɔ ɨgwɨ mɨ̀mə̌d, Əzwî ə Zeŋɨ ə nyaʼa yeʼe ɨgwɨ mɨ̀mə̌d, mbɨ kɔ gham mɨŋgam rɨsɔ̀ʼɔ̀, bə̀ kɔ ghà ɨkə̂n Ŋwiə̀.

⁷Mbaŋə̀ rɨ̀jìm te nɨ nyaʼa əŋgu tɨə nyaʼa ɨghabɨ ə wum chɔ̀b rɨ̀be.

⁸Pɔ̂l nyaʼa wò nyɨ ɨŋga nəb ə̀kàtɨ̀. Ɨ wɨə nyaʼə ghàmə̀ əŋgu əmɨg ətad ənɨ ə fîŋ nɨ kǎ. Ɨ wɨə nyaʼə bə̀ tàŋə̀ mbɨ ə bə̂d mbe nɨ nyaʼa əŋgu. Ɨ wɨə nyaʼə bə̀ kə̀bə̀ ni mbɨ kyerɨ ni ənû ɨfɔ̀n ə Ŋwiə̀ yɨ ənû rəsìʼ.

⁹Àyɨə mbɨ mɔʼɔ nyaʼa koorɨ mbə ɨ̀tǒŋ. Chəi mbɨ nyaʼa ben ənû ze nɨ Pɔ̂l nyaʼə ghàə̀. Mbɨ nyaʼa kɔ ghà ɨnû rɨbɔ̀ŋ ɨmbə̀ʼ Ɨnə̂njɨ̀ we nɨ Ə̀nùŋɨ̀sɨg nyaʼa chwiə. Əne Pɔ̂l nyaʼa jwɨ̀ i rəkaʼ mɨ̀mə̌d. Wɨ̀ nyaʼa nɨŋ bə̂d mbe nɨ nyaʼa ben ə Kristo mbɨ ni, mbɨ kɔ taŋ ɨni jìm ɨŋga ɨ̀chàm we nɨ Tìranùs nyaʼə chwi ɨnû ɨŋga.

¹⁰Ɨ wɨə nyaʼə tàŋ mbɨ mɨ̀mə̌d ɨghəm ɨwu be. Əne bə̂d mɨ̀jìm mbe nɨ nyaʼə chub ə Esià, əne yɨ mɨ̀Jû mbɨ mbe nɨ kaʼi mɨ̀Jû, nyaʼa zu ɨŋgam Ə̀nùŋɨ̀sɨg.

¹¹Ŋwìə̀ nyaʼa chè ənjìm ə Pɔ̂l ghɨ ɨnû yiirɨ ka ka nɨ chəi bə̂d kweʼ zə.

¹²Əne bə̂d mbɨə nyaʼə nɨŋ ɨghɨ ngywɨ̌ mbe nɨ mbɨə fuə mɨnimə bə̀ nɨŋə ɨkubɨ ngywɨ̌ te nɨ bə̂d ə tìŋə̀ fàʼə̀ mbɨ rɨwən, nɨ nyaʼa kweʼ betɨ ɨnyod Pɔ̂l, wò əsɨ bə̂d əwɔn mbɨ rɨwən. Ɨwɔn mɨ̀mə̌d nyaʼa bɔtɨ. Ɨzwî rɨbɔ̀ŋ nyaʼa bə̀ jwɨ̀ rɨŋga bə̂d mbe nɨ ɨzwî rɨbɔ̀ŋ nyaʼa ɨŋga mɨ̀mə̌d.

¹³Mɨ̀Jû mɔʼɔ mbe nɨ nyaʼa yènə̀ chɨ̀ ɨzwî rɨbɔ̀ŋ nyaʼa bə̀ kə̀b nɨ tɔŋ ɨkum Ə̀nùŋɨ̀sɨg Yeso ɨgwɨ ə bə̂d mbe nɨ ɨzwî rɨbɔ̀ŋ nyaʼa ɨŋga mɨ̀mə̌d. Ɨ mbɨə nyaʼə ghà əmbɨ ɨzwî rɨbɔ̀ŋ mbe ni, “Mə ghà ɨ nən ənɨ ɨkum Yeso we nɨ Pɔ̂l ə ghà ɨŋgam Ŋwiə̀ ɨmbə̀ʼ əməd ni mbə̀ jwɨ ə.”

¹⁴Bɔn mbaŋə̀ sambe nɨ nyaʼə bɔn ətu ɨgwɨ ə bə̂d mbàn Ŋwìə̀, nɨ ɨkum məd nyaʼə Skevà, mbɨə nyaʼə ghɨ̀ ənû zɔ̂.

¹⁵Àyɨə əzwî rɨbɔ̀ŋ ze ə nyaʼa ghà əmbɨ mɨ̀mə̌d ni, “Mə kyerɨ ə Yeso bə̀ kyerɨ ə Pɔ̂l, àyɨə mbə̀ kɨ mɨ̀we ə?”

¹⁶Mbaŋə̀ ze nɨ əzwî rɨbɔ̀ŋ ze ə nyaʼa ɨŋga məd nyaʼa feŋ ɨgwɨ mɨ̀mə̌d, som, əne baŋ mɨ̀mə̌d mɨjìm. Əze ə nyaʼa ghɨ̀ mbɨ jwɨ̀ rɨŋga nəb ze nòrə̀ tɨ̀sɔ̀ʼ ɨkyerɨ, mbɨ ɨna ə ɨnyod.

¹⁷Mɨ̀Jû mɨ̀jìm mbɨ ə bə̂d mɨ̀jìm mbe nɨ kaʼi mɨ̀Jû nɨ nyaʼə chub ə Efesùs nyaʼa zu ənû zɔ̂. Mbɨ nyaʼa zu əne bɔ kwàʼ rɨŋgəʼ. Əne mbɨ nyaʼa nàʼ ɨwumnɨ kyeŋ əmbɨ Ə̀nùŋɨ̀sɨg Yeso.

¹⁸Bə̂d mɨ̀nɔnɔʼ rəbɔʼ mbe nɨ nyaʼa ben ə Kristo nyaʼa wò ben tə rɨ̀gùrɨ-ɨnû ɨfě bə̂d Kristo bə̀ ghà ɨnû rɨbɔ̀ŋ mbe nɨ mbɨ nyaʼə ghɨ̀ə̀.

¹⁹Bə̂d mɔʼɔ rəbɔʼ mbe nɨ nyaʼə ghɨ̀ mɨ̀sà nyaʼa fetɨ mbə ɨ̀ŋwàʼnɨ̀ mɨ̀sà tɔ̀n ɨfě bə̂d mɨ̀jìm. Mbɨ nyaʼa taŋ ɨnun ɨkab tɨ ənɨ ɨ̀ŋwàʼnɨ̀ mbe jìm, wɨ jwɨ̀ əkam chuʼ ɨwum tân. [11]

²⁰Əne ɨŋgam Ə̀nùŋɨ̀sɨg wɨə nyaʼə jàŋə̀ wò ɨmbì. Ɨ wɨə nyaʼə bə̀ bètɨ̀ə̀ fîŋ rɨ bə̂d mɨ̀nɔnɔʼ. Bə̂d mbe nɨ nyaʼa zu nyaʼa benɨ.

²¹Ənɨ ɨnû mbɔ̂ nyaʼa fə che i, Əzwî ə Ŋwìə̀ ə nyaʼa ghɨ̀ Pɔ̂l nùŋ ɨŋga i fîŋ ni tə bɨrɨ chè ə Màsèdonià bə̀ chè ə Àkàiyà bɔŋ wò ə Jèrusalèm. Wɨ̀ nyaʼa ghà ni, “Mə mɨ fə wò pè əŋgu, mə berɨ bɨ wo ə Rom.”

²²Əne wɨ̀ nyaʼa tom mbaŋə̀ rɨ̀be rəbɔʼ te nɨ nyaʼə wèèrɨ̀ əməd, əne yɨə Timotì mbɨ Erastùs, ni mbɨ wo ə Màsèdonià. Məd ziə nyaʼa chub ə Esià ənɨ əkɔb ə nyumə̀.

²³À nyaʼa ənɨ ə nyùmə̀ we, əchɔb ə ka ka ə nyaʼa jwɨ̀ ə Efesùs ɨmbə̀ʼ Ɨnə̂njɨ̀ we nɨ Ə̀nùŋɨ̀sɨg nyaʼa chwiə.

²⁴Mbaŋə̀ mɔʼɔ nɨ ɨkum nyaʼə Dèmetriùs, nɨ nyaʼə kywɨ ɨghɨ ənɨ ə sɨrɨvà, nyaʼa kywɨ rɨfeenɨ mbàn rɨ ŋwìə̀-əyi we nɨ mbɨ nyaʼə tɔŋ ənɨ Atemìs. Ɨ wɨə nyaʼə kywɨə fènə̀. Əne bə̂d ə̀fàʼì məd nyaʼa berɨ ɨkab nɔnɔʼ.

²⁵Wɨ̀ nyaʼa fetɨ mbi bə̂d ə̀fàʼì bə̀ fetɨ bə̂d ə̀fàʼì cherə mbe nɨ nyaʼə fàʼ ɨkwɨ ə̀fàʼì mɔʼ mbɨ məd, ghà əmbɨ mɨ̀mə̌d ni, “Mbɨ bɔŋgɔb, mbə kyerɨ ni a mbɔ̂n yɨ rɨ ənɨ ə̀fàʼì zɔ̂.

²⁶Mbə mbɨə zəə bə̀ zuə ni Pɔ̂l wɔ̂ fə fì ɨtu bə̂d bə̀ beŋ fîŋ rɨ bə̂d mɨ̀nɔnɔʼ ɨchî nɨ wɨə ghàə̀ ni ka mɨ̀ŋwìə̀ mbe nɨ mbɨ tekɨ ənɨ ɨbɔ yɨ i mɨ̀ŋwìə̀ mɔʼɔ. Ɨ wɨə ghà ənû zɔ̂ ə Efesùs bə̀ ghà ɨŋga ɨsɨ jìm mbe nɨ yeʼ əbà əbeŋ ze rɨ ə Esià.

²⁷Ənû nɨ tɨ̀ berɨ nɨ bɔ yɨ ni ə̀fàʼì zɔ̂ ɨ na ə bɨrɨ berɨ ɨkum rɨbɔ̀ŋ, mbàn ŋwìə̀-əyi Atemìs, wɨ kyeŋ, bə̀ chè ətu ə̀kǒ. Ɨ mbe tɨ mbɨ swi əməd tɨ ənɨ ɨkyěŋ məd. Məd yɨ ŋwìə̀-əyi we nɨ bə̂d mɨ̀jìm mbe rɨ ə Esià mbɨ mbe rɨŋga ɨsɨg jìm ə wumnɨə.”

²⁸Ənɨ bə̂d mbe nyaʼa zu ənû zɔ̂, mbɨ nyaʼa sə ɨtəm kwàʼ rɨŋgəʼ, kyeŋ rɨkǎ ghà ni, “Atemìs we rɨ əmbɨ məEfesùs ə kàŋ dabə!”

²⁹Ə̀bùùrɨ̀ ə nyaʼa swi ɨŋga əsɨ ze əjìm. Əne bə̂d mɔʼɔ nyaʼa gywɨ̀ ə Gayùs mbɨ Àristakùs nɨ nyaʼə rɨ ə Màsèdonià. Ɨ mbɨə nyaʼə bə̀ yènə̀ mbɨ Pɔ̂l. Mbɨ nyaʼa gywɨ̀ əne sùŋ mɨ̀mə̌d nɨŋ wò ə sǎm əferɨ.

³⁰Pɔ̂l ziə nyaʼə kə̀b ni njɨ tə wò ɨfě ɨnɔ̂n bə̂d we, àyɨə chəi bə̂d mbe nɨ nyaʼa ben ə Kristo nyaʼa saŋ əməd ni wɨ̀ wo əŋgu.

³¹Bə̂d kyeŋ mɔʼɔ rɨŋga əbà əbeŋ ze, nɨ nyaʼə bə mɨ̀sə̀ʼ məd, nyaʼa chà ɨkə̂n ɨ bɔ buʼ ɨbɔ ɨ bɔ ni tɨ wɨ̀ tɔ wo i ɨŋga sǎm ze.

³²Ə̀bùùrɨ̀ ə nyaʼa jwɨ̀ ɨŋga ɨfetɨ we. Mbɨ mɔʼɔ mbɨə nyaʼə kyeŋə ghà ənû ə mɔʼ, mbɨ mɔʼɔ kyeŋə ghà ənû ə cherə. Chəi bə̂d mɨ̀nɔnɔʼ nyaʼa kyerɨ əton nɨ mbɨ nyaʼa wo fetɨ.

³³Mɨ̀Jû nyaʼa tin mbaŋə̀ mɔʼɔ nɨ ɨkum məd nyaʼə Àlèzandà chà ɨfě ni wɨ̀ toʼrɨ əton nɨ bə̂d nyaʼa wo fetɨ. Wɨ̀ nyaʼa ghɨ̀ ənweenɨ ənɨ əbɔ ni mbɨ kəm rəziə tə toʼrɨ ənû ze əmbɨ mɨ̀mə̌d.

³⁴Ənɨ mbɨ nyaʼa zə ni məd yɨə Jû, mɨ̀mə̌d mɨjìm nyaʼa fɔtɨ kyeŋ rɨkǎ ɨghabɨ ənɨ mɨ̀awà mɨbe ghàə̀ ni, “Atemìs we rɨ əmbɨ məEfesùs ə dabə!”

³⁵Ənɨ wə̀d we nɨ nyaʼə ŋwàʼnɨ̀ ə̀ŋwàʼnɨ̀ ɨŋga əsɨ ze nyaʼa ghɨ̌ ɨnɔ̂n bə̂d we kəm rəziə, wɨ̀ nyaʼa ghà ni, “MəEfesùs, wə̀d mɔʼɔ wɨə wa əŋgu nɨ chəi wɨ̀ kyerɨ ni à yɨ məEfesùs ə nùŋə̀ mbàn Atemìs we nɨ dabə, fɔrɨ ni à yɨ mɨ̀mə̌d bə̀ nùŋə̀ anèŋ məd we nɨ nyaʼa feŋ rɨkaŋ ə?

³⁶Chəi wə̀d nɨ tɨ̀ wɨ̀ ton ənû zɔ̂, əne mbə̀ bɔɔnɨ ɨnyod. Tɨ mbə̀ ghɨ ə ənû ə mɔʼɔ zɨ rɨ kɔndɨ.

³⁷Mbə fə nɨŋ bə̂d mbɔ̂ yeʼe əgha nɨ chəi mbɨ jɨ rɨŋga mbàn mɨ̀ŋwìə̀ mɔʼɔ, nɨ chəi mbɨ bə̀ zɔm a ŋwìə̀-əyi.

³⁸Əne à mɨ yeʼ nɨ Dèmetriùs mbɨ mbi bə̂d ə̀fàʼì berɨ ɨsaʼi mbɨ wə̀d mɔʼɔ, nəb rɨ ɨsaʼi tɨ əŋgu, bə̂d nɨə saʼ mɨsaʼi mbɨ ə bə̀ əŋgu. Mbɨ wo putɨ mbə mɨ̀sàʼi əŋgu.

³⁹Mbə mɨ wɨrɨ kəb ənû ə cherə, mbɨ bɨrɨ nweenɨ əze ənɨ mbɨ bɨrɨ yim ɨfetɨ.

⁴⁰Ənû nɨ tɨ̀ berɨ nɨ bɔ yɨ ni mbɨ bɨrɨ zɨ ɨsaʼi ɨgwɨ na ni tɨ̀ fə bu əchɔb rə̀chɔ̀ŋ. Chəi ənɨ tɨ rɨ̀ tòʼrɨ̀ əton nɨ tɨə jùʼə̀.”

⁴¹Ənɨ wɨ̀ nyaʼa gha əne, wɨ̀ nyaʼa ghà əmbɨ ə bə̂d mbe nɨ nyaʼa fetɨ ni mbɨ sɨ wo əwən.