Read Fɨso Fi Ɨ̀fàʼì bə̂d tom Kristo 28 Bible Online

Ɨ̀fàʼì bə̂d tom Kristo 28 - Fɨso Fi bible

Ɨ̀fàʼì bə̂d tom Kristo 28

¹Ənɨ tɨ̀ nyaʼa pe əsaŋ nɨ chəi mbaŋə̀ mɔʼɔ nyaʼa nyɨ ŋgəʼ, mbɨ nyaʼa ghà ɨ na ni ɨkum əkəm əsɨ ə si ze yɨə Maltà.

²Bə̂d əbeŋ ze nyaʼa ghɨ̀ ɨkwɨ chɔ̀m mɔʼɔ ənɨ ə na nɨ chəi tɨ̀ kweʼ zə. Mbɨ nyaʼa nɨŋ mbà mɨjìm kwàʼ ɨchî chɔ̀m. Mbɨ nyaʼa bə̀ nepɨ ɨwid ɨ na ɨmbə̀ʼ ɨghəm nɨ mbə̀ŋ zɨə nyaʼə nɔə, ɨfə bə̀ kɔə.

³Pɔ̂l nyaʼa fetɨ ɨbiŋ rɨkaʼi mɔʼɔ zɨ̀ ɨjə̀ŋ. Əne wɨ̀ nyaʼa zɨ əne, tɨndum nyaʼa jwɨ̀ rɨŋga tɨkaʼi te ɨmbə̀ʼ ɨghəm nɨ ɨwid we wɨə nyaʼə nòmə̀. Zɨ̀ nyaʼa jwɨ̀ əne nom əbɔ əməd tə̀n əŋgu.

⁴Ənɨ bə̂d əbeŋ mbe nyaʼa zə rɨndum ze nɨ nyaʼə nəŋ ənɨ əbɔ ə Pɔ̂l, mbɨ nyaʼa ghà mbənə mbənə ni, “Mbaŋə̀ zɔ̂ berɨ yeʼ wə̀d nɨə zwiirɨ ə bə̂d! Ka à bè yeʼi ni wɨ̀ fə nod ɨvɨ ɨŋga rɨ̀bàà, chəi ŋwìə̀-əyi we nɨə saʼə bə̂d bɨrɨ ben i ni wɨ̀ chub ɨkǎ.”

⁵Àyɨə Pɔ̂l nyaʼa ŋwì rɨndum ze ɨŋga ɨwid. Chəi əghɨ ə mɔʼɔ ə nyaʼa ghɨ əməd.

⁶Bə̂d mbe nyaʼa wòm ɨ zə ni wɨ̀ bɨrɨ mòd kɨ̀ ni wɨ̀ bɨrɨ saʼ gu ə si kwɨ. Àyɨə ənɨ mbɨ nyaʼa wom əgha ə se, mbɨ nyaʼa zə ni chəi ənû ə mɔʼɔ ə nyaʼa ghɨ əməd, mbɨ nyaʼa bèŋ tə fîŋ ghà ni məd yɨə ŋwìə̀ mɔʼɔ.

⁷Mbaŋə̀ ze nɨ nyaʼə tùmbɨ̀ əkəm əsɨ ze, nɨ ɨkum məd nyaʼə Pobliùs, nyaʼa berɨ mbeŋ ɨban əsɨ ze. Wɨ̀ nyaʼa nɨŋ əwa əkwɨ ni nəŋgɨ əwa ɨni tad.

⁸Mbǎʼ Pobliùs wɨə nyaʼa ɨgun əbàʼ mbɨ ɨfə fɔrɨ nu. Pɔ̂l nyaʼa wò nèŋgɨ̀ əməd, pè kɔ̀ŋgɨ̀ ə Ŋwiə̀, zab mbi ɨbɔ ɨgwɨ məd, vɨ̀ əməd.

⁹Ənɨ wɨ̀ nyaʼa ghɨ əne, ə̀bùʼ ə bə̂d əwɔn mbe rɨŋga əkəm əsɨ ze nyaʼa wò əsɨ Pɔ̂l, wɨ̀ vɨ̀ mɨ̀mə̌d.

¹⁰Mbɨ nyaʼa nàʼ ɨghɨ nɔnɔʼ ɨ na. Ənɨ tɨ̀ nyaʼa kəb wo a, mbɨ nyaʼa zɨ̀ ɨghɨ mbe nɨ tɨ̀ nyaʼa kəbɨ ɨŋga əbaŋ.

¹¹Ənɨ əmɨg ə nyaʼa che ətad, tɨ̀ nyaʼa wò nyɨ əbaŋ nɨ nyaʼa əkəm əsɨ ze ənɨ ə nyùmə̀ we nɨ ɨfə nyaʼə kɔ əku. Əbaŋ ze zɨə nyaʼa rɨ ə Àlèzandrià. Mbɨ nyaʼa tɔ bɔn mɨ̀ŋwìə̀ ɨfě əbaŋ ze.

¹²Tɨ̀ nyaʼa pè təm ə Sirakùs, chubɨ əŋgu ɨni tad.

¹³Tɨ̀ nyaʼa nɔ̀ʼ rəŋgu wò ə Regiùm. À nyaʼa əni ze nɨ beenɨ, əfim rɨ əbà ze rɨ əton ə nyaʼa kɔ chě. À sɨ ɨgwɨ əni ze nɨ nyaʼa pe be, tɨ̀ nyaʼa wò ə Pùtiolì.

¹⁴Tɨ̀ nyaʼa pè əŋgu, zə bə̂d nɨ nyaʼa ben ə Kristo. Mbɨ nyaʼa tɔŋ əwa ni tɨ̀ chubɨ mbɨ mɨ̀mə̌d ɨni sambe. Əne yɨ ɨchî nɨ tɨ̀ nyaʼa wò pè ə Rom.

¹⁵Ənɨ bə̂d mbe nɨ nyaʼa ben ə Kristo ə Rom nyaʼa zu ɨmbə̀ʼ əwa, mbɨ nyaʼa nɔ̀ʼ rɨ Ɨbeŋ Ɨwin Apiùs [18] bə̀ nɔ̀ʼ rɨ ə Nəb Ni Rɨtad [19] yeʼe kumnɨ əwa. Ənɨ Pɔ̂l nyaʼa zə mɨ̀mə̌d, wɨ̀ nyaʼa nàʼ məben-əwe əmbɨ ə Ŋwiə̀, əne fîŋ məd nyaʼa wɨrɨ kàànɨ̀.

¹⁶Ənɨ tɨ̀ nyaʼa pè ə Rom, mbɨ nyaʼa sàŋ ə Pɔ̂l ni wɨ̀ chub ənɨ i ɨghəm. Ɨ wɨə nyaʼə chubə mbɨ sɔgyɨ̀ we nɨ nyaʼə nəŋgɨ əməd.

¹⁷Ənɨ ɨni nyaʼa che ɨtad, Pɔ̂l nyaʼa tɔŋ bə̂d mbe nɨ nyaʼə chàə̀ mɨ̀Jû. Ənɨ mbɨ nyaʼa fetɨ, wɨ̀ nyaʼa ghà əmbɨ mɨ̀mə̌d ni, “Mbɨ bɔŋgɔb, ka à bè yeʼi ni chəi mə̀ nyaʼa ghɨ ənû ə mɔʼɔ ənɨ mba bə̂d, kɨ̀ bè ghà ənû ə mɔʼɔ ɨmbə̀ʼ mɨchî mba mɨ̀mbǎʼ rəŋwe, mbɨ nyaʼa gywɨ̀ əmɨ ə Jèrusalèm zɨ̀ ɨŋga tɨkyerɨ-ɨbɔ məRom.

¹⁸Ənɨ mbɨ nyaʼa nwendɨ əmɨ, mbɨ nyaʼa kəb saŋ əmɨ ɨmbə̀ʼ ɨghəm nɨ mbɨ nyaʼa zə ni chəi mə̀ nyaʼa gu ənû ə mɔʼɔ nɨ tɨ̀ mbɨ zwiirɨ əmɨ.

¹⁹Àyɨə ənɨ mɨ̀Jû nyaʼa ton nɨ zu ənû ze nɨ məRom nyaʼə ghàə̀, mə nyaʼa berɨ ghà ni mbɨ cha ɨsaʼi we əmbɨ Kaisà, ka à bè yeʼi ni chəi mə̀ berɨ ɨsaʼi nɨ zɨ ɨgwɨ mbɨ bə̂d.

²⁰À yɨ əton nɨ mə ghà ni mbə̀ yeʼe mə̀ zə əwən, bə̀ ghàmbɨ̀ mbɨ nən, ɨmbə̀ʼ ɨghəm nɨ à yɨ ɨmbə̀ʼ Wə̀d we nɨ mɨ̀Izre nuŋ tɨkɔndɨ wòm, nɨ ghɨ ni mbɨ kod əmɨ ənɨ mɨ̀kàrə̀ mbɔ̂.”

²¹Mbɨ nyaʼa wììrɨ̀ ni, “Chəi tɨ̀ zə ɨ̀ŋwàʼnɨ̀ rɨ ə Jùdeyà ɨmbə̀ʼ əwe. Chəi mba bɔŋgɔb mbe nɨ yeʼe rəŋgu bə̀ putɨ ənû ə mɔʼɔ ɨ na ɨmbə̀ʼ əwe, kɨ̀ bè ghà ənû rɨbɔ̀ŋ ə mɔʼɔ ɨmbə̀ʼ əwe.

²²Àyɨə tɨ̀ bɨrɨ ghaʼ nɨ zu te rɨkɔndɨ, ɨmbə̀ʼ ɨghəm nɨ tɨ̀ ə kyerɨ ni bə̂d mbɨə ton ɨfɔtɨ fi wɔ̂ ɨsɨ jìm.”

²³Mbɨ nyaʼa nùŋ əni nɨ mbɨ bɨrɨ wɨrɨ wo zə ə Pɔ̂l. Ənɨ əni ze ə nyaʼa yeʼe kùʼ, mbɨ nyaʼa jwɨ̀ kwàʼ mɨ̀nɔnɔʼ wò əsɨ ze nɨ Pɔ̂l nyaʼə chubə. Wɨ̀ nyaʼa kɔ toʼrɨ ənû ɨmbə̀ʼ ənû ɨfɔ̀n ə Ŋwiə̀ kɔ ɨsɔsɔ wò pè ɨkwirɨ. Wɨ̀ nyaʼa bə̀ nɨŋ mɨŋgam rɨŋga ə̀ŋwàʼnɨ̀ tɨkə rɨ Mose bə̀ nɨŋ rɨŋga ə̀ŋwàʼnɨ̀ mbe nɨ bə̂d ɨ̀kə̀n Ŋwiə̀ nyaʼa ŋwaʼnɨ ghɨ̀ mbɨ kyerɨ ni ɨnû mbe nɨ tɨə ghà ɨmbə̀ʼ ə Yeso yɨ ɨnû rəsìʼ.

²⁴Bə̂d mɔʼɔ nyaʼa ben ənû ze nɨ wɨ̀ nyaʼə ghàə̀, àyɨə chəi mbɨ mɔʼɔ nyaʼa benɨ.

²⁵Ɨchî nɨ chə nyaʼa i mɨ̀mə̌d ənɨ ɨchû mɔʼ, mbɨ nyaʼa jwɨ̀ rɨŋga nəb Pɔ̂l, ənɨ wɨ̀ nyaʼa fə ghǎ ənû zɔ̂ ə mɔʼ ni, “Əzwî ə Zeŋɨ ə nyaʼa kùʼ ɨchî nɨ zɨə nyaʼa chè ənjìm wə̀d ɨ̀kə̀n Ŋwìə̀ Aizayà ghà əmbɨ mbə mɨ̀mbǎʼ rəŋwe ni,

²⁶'Ndə̀ əsɨ ə bə̂d mbɔ̂, ghà əmbɨ mɨ̀mə̌d ni; Mbə bɨrɨ kaŋ zwetɨ yì zwetɨ, àyɨə chəi mbə ɨtu bɨrɨ zeŋ. Mbə bɨrɨ kaŋ nèŋ yì nèŋ, àyɨə chəi mbə bɨrɨ zə kyerɨ,

²⁷ɨmbə̀ʼ ɨghəm nɨ fîŋ rɨ bə̂d mbɔ̂ fə tu, chəi ɨ̀tǒŋ mɨ̀mə̌d ə wɨrɨə jeŋgɨə zu ɨnû, mbɨ fə bə̀ kubrɨ ə əghə; njɨ mbɨ bɨrɨ zə ɨsɨ ənɨ ə əghə, bə̀ zu ənû ənɨ mbə ɨ̀tǒŋ, bə̀ kyerɨ ɨnû mbɨ zeŋ ɨŋga tə fîŋ, əne bèŋ yeʼe əsɨ num ɨmbə̀ʼ mə vɨ mɨ̀mə̌d.'

²⁸“Əne mə wɨə kə̀bə̀ ni mbə̀ kyerɨ ni Ŋwìə̀ fə cha ɨkə̂n ɨmbə̀ʼ ɨchî nɨ wɨə chɨ̀ə̀ bə̂d rəŋgəʼ əmbɨ ə bə̂d mbe nɨ kaʼi mɨ̀Jû. Mbɨ bɨrɨ zwetɨ.” [

²⁹Ənɨ Pɔ̂l nyaʼa fə ghà ɨnû mbɔ̂, mɨ̀Jû mbe nyaʼa jwɨ̀ yènə̀ tàŋə̀ mbənə mbənə kwàʼ rɨ̀kǎ.] [20]

³⁰Pɔ̂l nyaʼa chub əŋgu ɨghəm ɨwu be ɨ swi. Ɨ wɨə nyaʼə chub ɨŋga nəb nɨ wɨ̀ nyaʼə chwɨə. Ɨ wɨə nyaʼə nɨŋə bə̂d mɨjìm mbe nɨ nyaʼə wò əsɨ məd.

³¹Ɨ wɨə nyaʼə ghà ɨmbə̀ʼ ənû ɨfɔ̀n ə Ŋwiə̀, bə̀ chwi ɨnû ɨmbə̀ʼ Ə̀nùŋɨ̀sɨg Yeso Kristo əsaŋ əsaŋ mbɨ ə fîŋ nɨ kǎ. Chəi wə̀d mɔʼɔ nyaʼa kən əməd.