Read Fɨso Fi Ɨ̀fàʼì bə̂d tom Kristo 3 Bible Online

Ɨ̀fàʼì bə̂d tom Kristo 3 - Fɨso Fi bible

Ɨ̀fàʼì bə̂d tom Kristo 3

¹À nyaʼa əni ə mɔʼɔ, Pità mbɨ Jɔ̌n mbɨə nyaʼə kɔʼə wò ə mbàn Ŋwìə̀ ənɨ mɨ̀nyùmə̀ tad əziə, nɨ nyaʼə nyùm ə̀kɔ̀ŋgɨ̀.

²Ənɨ mbɨ nyaʼa sɨə tiinɨ əŋgu, bə̂d mɔʼɔ nyaʼa beʼ mbaŋə̀ mɔʼɔ nɨ nyaʼa buʼrə tɨ ənɨ ɨŋgɔb məd nyaʼa gywɨ əməd. Ɨ mbɨə nyaʼə beʼ əməd ɨni jìm wò nùŋ ɨchû ɨkam mbàn Ŋwìə̀ we nɨ mbɨə tɔŋ ənɨ Ɨchû Ɨkam nɨ Təmɨ, ɨmbə̀ʼ wɨ̀ nɔn ɨkab rɨ əmbɨ ə bə̂d mbe nɨ nyaʼə nyɨ ɨŋga mbàn Ŋwìə̀.

³Ənɨ wɨ̀ nyaʼa zə ə Pità mbɨ Jɔ̌n nɨ nyaʼə nɨrə nyɨ ɨŋga mbàn Ŋwìə̀, wɨ̀ nyaʼa buʼ ɨbɔ əmbɨ mɨ̀mə̌d ni mbɨ naʼ ɨkab ɨ ni.

⁴Pità mbɨ Jɔ̌n nyaʼa toŋ əghə ɨgwɨ məd. Əne Pità nyaʼa ghà ɨ bɔ ni, “Neŋ əwa!”

⁵Wɨ̀ nyaʼa toŋ ɨghə ɨgwɨ mɨ̀mə̌d, kɔndɨə ni mbɨ bɨrɨ naʼ ɨkab ɨ ni.

⁶Àyɨə Pità nyaʼa ghà ni, “Chəi mə̀ berɨ ə sɨrɨvà kɨ̀ ə gôl, àyɨə əghɨ ze nɨ mə̀ berɨ mə bɨrɨ naʼ ɨ ne: Ənɨ ɨkum Yeso Kristo we rɨ ə Nazàret, nɔʼɔ yènɨ̀.”

⁷Ənɨ wɨ̀ nyaʼa ghà əne, wɨ̀ nyaʼa yim əbɔ ə jɨg əməd, nɔ̀ wɨ̀ təm rətiə. Àmei əwu əwən, ɨwu məd mbɨ ŋgwèd ɨwu məd nyaʼa kàànɨ̀.

⁸Wɨ̀ nyaʼa nɔ̀ʼ tom, təm rətiə kɔ yènə̀ wo nyɨ ɨŋga mbàn Ŋwìə̀ mbɨ mɨ̀mə̌d. Ɨ wɨə nyaʼə yènə̀ tòmbə̀ bə̀ yiirɨ ə Ŋwiə̀.

⁹Bə̂d mɨjìm nyaʼa zə əməd ənɨ wɨ̀ nyaʼə yènə̀ əne mbɨ nyaʼa yiirɨ ə Ŋwiə̀.

¹⁰Ənɨ mbɨ nyaʼa kyerɨ ni à yɨə mbaŋə̀ ze nɨ nyaʼə chub ɨ nɔn ɨkab Ɨchû Ɨkam we nɨ Təmɨ, ənû ze ə nyaʼa chè mɨ̀mə̌d, əne mbɨ nyaʼa yiirɨ ɨmbə̀ʼ ənû ze nɨ nyaʼa ghɨ ənɨ məd.

¹¹Ɨchî nɨ mbaŋə̀ ze nyaʼa bed ənɨ Pità mbɨ Jɔ̌n, ənû ze ə nyaʼa chè mɨ̀mə̌d, əne mbɨ nyaʼa nòrə̀ wò fetɨ ɨban mɨ̀mə̌d ɨŋga əsɨ ze nɨ mbɨ nyaʼə tɔŋ ənɨ Ə̀tâŋ ə Solomòn.

¹²Ənɨ Pità nyaʼa zə əne, wɨ̀ nyaʼa ghà əmbɨ ə bə̂d mbe ni, “Mɨ̀Izre, mbə̀ kɨə yiirɨ ənû zɔ̂ ɨmbə̀ʼ ə ye ə? Mbə̀ kɨə toŋ ɨghə ɨgwɨ na ɨghabɨ ni à yɨ ənɨ a ɨka kɨ̀ ənɨ ɨchî nɨ tɨə wumnɨ ə Ŋwiə̀ ə ghɨ ni mbaŋə̀ zɔ̂ yen ə?

¹³Ŋwìə̀ Abràham, Ŋwìə̀ Aizìk mbɨ Ŋwìə̀ Jakɔ̂b, Ŋwìə̀ mba mɨ̀mbǎʼ rəŋwe nyaʼa wumnɨ i wə̀d ə̀fàʼì Yeso we nɨ mbə̀ nyaʼa yimɨ nàʼ ni mbɨ zwiirɨ. Mbə nyaʼa bə̀ ton əməd ɨfě Pailèt ənɨ wɨ̀ nyaʼa fə nuŋ ɨŋga i fîŋ ni tə bɨrɨ saŋ əməd wɨ̀ wò i.

¹⁴Mbə nyaʼa ton Wə̀d Zeŋɨ nɨ Təm Kùʼnɨ̀, sɨ ghà yeʼ ni mbɨ naʼ mbaŋə̀ ze nɨ nyaʼa zwiirɨ wə̀d ɨ nən.

¹⁵Mbə nyaʼa zwiirɨ wə̀d we nɨə nàʼ ɨ̀tènɨ̀, àyɨə Ŋwiə̀ nyaʼa zwemnɨ əməd. Tɨ̀ yɨ mɨ̀zərɨmbin ənɨ ənû zɔ̂.

¹⁶À yɨ ɨbenɨ ənɨ Yeso ghɨ ni mbaŋə̀ zɔ̂ nɨ mbə̀ə zəə bə̀ kàŋ kyerɨ təm kàànɨ̀. À yɨ ɨbenɨ we nɨ tɨ̀ berɨ ənjìm ə Yeso we ghɨ̀ ni mbaŋə̀ zɔ̂ bɔtɨ i ɨfě nən mbə̀n mɨjìm.

¹⁷“Mbɨ bɔŋgɔb, mə kyerɨ ni chəi mbə̀nə mbɨ ə bə̂d mbe nɨə tekɨ ɨnû ɨŋga əbeŋ mɨ̀Jû nyaʼa kyerɨ ənû ze nɨ mbə̀ nyaʼə ghɨ̀ə̀.

¹⁸Àyɨə ənû ze nɨ Ŋwìə̀ nyaʼa che ənjìm mbi bə̂d ɨ̀kə̀n mɨjìm ghà rəŋwe ni Wə̀d məd we nɨ wɨ̀ zɔʼɔ berɨ zə ŋgəʼ, wɨ̀ fə ghɨ̀ zɨə jwɨ̀ ənɨ rəsìʼ.

¹⁹Əne mbə̀ beŋ tə fîŋ, wò əsɨ ə Ŋwiə̀ ɨmbə̀ʼ wɨ̀ waʼ mbə ɨnû rɨbɔ̀ŋ.

²⁰Mbə mɨ ghɨ̀ əne, Ə̀nùŋɨ̀sɨg bɨrɨ zùtɨ̀ tə fîŋ. Wɨ̀ bɨrɨ bɨ chà ə Yeso nɨ yeʼ Wə̀d we nɨ wɨ̀ chɔʼɔ bə̀ zɔʼ, əsɨ nən.

²¹Yeso berɨ chub ɨkaŋ pè ənɨ Ŋwìə̀ tekɨ ɨnû jìm mbɨ kuʼ ɨchî nɨ wɨ̀ nyaʼa fə ghɨ̌ bə̂d ɨ̀kə̀n zeŋɨ ghà rəŋwe.

²²Mose nyaʼa ghà ni, 'Ə̀nùŋɨ̀sɨg Ŋwìə̀ bɨrɨ ghɨ ni wə̀d ɨ̀kə̀n jwɨ rəkaʼ mbə bə̂d ɨchî nɨ wɨ̀ nyaʼa ghɨ̌ mə jwɨ̀. Mbə berɨ ghɨ ɨnû jìm mbe nɨ wɨ̀ gha ɨ nən.

²³Mbɨ bɨrɨ chɨ wə̀d jìm we nɨ chəi wɨə zuunɨ ə wə̀d ɨ̀kə̀n Ŋwìə̀ we rəkaʼ bə̂d, nimnɨ.'

²⁴Bə̂d ɨ̀kə̀n Ŋwiə̀ mɨ̀jìm, kɔ rɨ ənɨ ə Samwèl wò pè ənɨ mbe nɨ nyaʼa yeʼe rənjìm, nyaʼa fə ghà ɨmbə̀ʼ ɨni mbɔ̂.

²⁵Mbə yɨə bɔn bə̂d ɨ̀kə̀n mbe. Mbə yɨə bə̀ ə bɔn tɨ ənɨ fɨso fe nɨ Ŋwìə̀ nyaʼa sanɨ mbɨ mbə mɨ̀mbǎʼ rəŋwe, ɨchî nɨ wɨ̀ nyaʼa gha əmbɨ Abràham ni, 'Mə bɨrɨ zɨ əbɔrəbɔd ɨgwɨ mɨnəbɨ jìm mbe nɨ yeʼ ɨgwɨ ə si ənjìm ə bɔn tɨ ənɨ e əghaŋ.'

²⁶Ŋwìə̀ nyaʼa chɔʼ i wə̀d ə̀fàʼì, bè chà əməd ɨ nən ni wɨ̀ zɨ əbɔrəbɔd ɨgwɨ nən ɨchî nɨ wɨə ghɨ ni wə̀d mɔʼ mɔʼ rəbɔʼ nən waʼ ɨnû ɨzɨg.”