Read Fɨso Fi Ɨ̀fàʼì bə̂d tom Kristo 4 Bible Online

Ɨ̀fàʼì bə̂d tom Kristo 4 - Fɨso Fi bible

Ɨ̀fàʼì bə̂d tom Kristo 4

¹Ənɨ Pità mbɨ Jɔ̌n nyaʼə kɨrɨ ghàm əmbɨ ə bə̂d mbe, bə̂d mbàn Ŋwìə̀, wə̀d kyeŋ mɨ̀sɔgyɨ̀ mbe nɨ nyaʼə nəŋgɨ ə mbàn Ŋwìə̀ mbɨ mɨ̀Sadusiî nyaʼa wò jwɨ̀ ɨgwɨ mɨ̀mə̌d.

²Mbɨ nyaʼa sə ɨtəm ɨmbə̀ʼ ɨghəm nɨ Pità mbɨ Jɔ̌n mbɨə nyaʼə chwi ɨnû bə̀ saʼə ni bə̂d bɨrɨ chè ənjìm ə Yeso bɔŋ zwemə.

³Əne mbɨ nyaʼa gywɨ ə Pità mbɨ Jɔ̌n wò wùb ə ndəŋ ɨmbə̀ʼ mbɨ chub əŋgu pè əni ze nɨ beenɨ, ɨmbə̀ʼ ɨghəm nɨ əfub ə zɨə nyaʼa sɨə bɨ̀gə̀.

⁴Àyɨə bə̂d mɨ̀nɔnɔʼ rəbɔʼ mbe nɨ nyaʼa zu ɨŋgam Ŋwiə̀ we, nyaʼa ben ə Kristo. Ɨnun mbaŋə̀ nyaʼa pè ɨghabɨ ə chuʼ rɨtân.

⁵Ənɨ ɨtuʼ nyaʼa chɨgɨ, bə̂d mbe nɨ nyaʼə tekɨ ɨnû ɨŋga əbeŋ mɨ̀Jû, bə̂d kyeŋ mbe rɨŋga əbeŋ mbɨ məchwiə̀ rɨ̀kə̌ nyaʼa wò fetɨ ə Jèrusalèm.

⁶Mbɨ nyaʼa fetɨ əne mbɨ Anas nɨ nyaʼa ətu ɨgwɨ ə bə̂d mbàn Ŋwìə̀. Kaifàs, mbɨ Jɔ̌n, mbɨ Àlèzandà, mbɨ ə mbaŋə̀ rɨjìm te nɨ nyaʼa rɨŋga ɨnəbɨ ətu ɨgwɨ ə bə̂d mbàn Ŋwìə̀ mbɨə nyaʼa bə̀ əŋgu.

⁷Ənɨ mbɨ nyaʼa nɨŋ ə Pità mbɨ Jɔ̌n mbɨ wò təm ɨfě mɨ̀mə̌d, mbɨ nyaʼa biirɨ əmbɨ mɨ̀mə̌d ni, “À kɨ ənɨ ɨka wi, kɨ̀ à kɨ ənɨ ɨkum we nɨ mbə̀ ghɨ ənû zɔ̂ ə?”

⁸Əzwî ə Zeŋɨ ə nyaʼa swi ɨŋga Pità, əne wɨ̀ nyaʼa wììrɨ̀ əmbɨ mɨ̀mə̌d ni, “Bə̂d nɨə tekɨ ɨnû mbɨ ə bə̂d kyeŋ rɨŋga əbeŋ!

⁹Mbə mɨ yeʼə nwèndɨ̀ əwa rə̀chɔ̀ŋ dè ənû ə chɔ̀m nɨ tɨ̀ ghɨ ənɨ ə mbaŋə̀ zɔ̂ nɨ nyaʼa buʼrə, mbə mɨ bə̀ kə̀b kyerɨ ɨchî nɨ tɨ̀ che ghɨ̀ ni mbaŋə̀ zɔ̂ bɔtɨ i,

¹⁰njɨ mbə̀n mɨjìm mbɨ mɨ̀Izre mɨ̀jìm kyerɨ ni mbaŋə̀ zɔ̂ ə təm ɨfě nən, bɔtɨ i kwàʼ ɨchî chɔ̀m ənjìm ɨka we nɨ yeʼ ənɨ ɨkum Yeso Kristo we rɨ ə Nazàret nɨ mbə̀ nyaʼa kòmbɨ̀ əzed ə baʼnɨ, àyɨə Ŋwìə̀ nyaʼa zwemnɨ əməd.

¹¹Yeso wɔ̂ yɨ ɨghabɨ, 'Ɨti we nɨ mbə̀nə məbɔmɨ nəb nyaʼa tonɨ, nɨ fə bèŋ ənɨ ɨti rɨ ɨbu nəb.'

¹²Chəi wə̀d cherə nɨ tɨ̀ wɨ̀ chɨ̀ bə̂d rəŋgəʼ, ɨmbə̀ʼ ɨghəm nɨ chəi wə̀d cherə ɨgwɨ ə si nɨ Ŋwìə̀ nyaʼa nuŋ ni wɨ̀ chɨ bə̂d rəŋgəʼ.”

¹³Ənɨ bə̂d mbe nɨə tekɨ ɨnû mbɨ ə bə̂d kyeŋ mbe rɨŋga əbeŋ nyaʼa zə ɨchî nɨ Pità mbɨ Jɔ̌n nyaʼə ghàmə̀ mbɨ ə fîŋ nɨ kǎ, bə̀ kyerɨ ni chəi mbɨ nyaʼa kyerɨ ə̀ŋwàʼnɨ̀ mbɨ ni mbɨ yɨ ɨnatɨ bə̂d, mbɨ nyaʼa yiirɨ. Mbɨ nyaʼa bə̀ kyerɨ ni ɨ mbɨə nyaʼə yènə̀ mbɨ Yeso.

¹⁴Àyɨə ɨchî nɨ mbɨ nyaʼa zə mbaŋə̀ ze nɨ Pità mbɨ Jɔ̌n nyaʼa vɨ̌, nɨ nyaʼa təm ɨban mɨ̀mə̌d, chəi ənû ə cherə nɨ tɨ̀ mbɨ nyaʼa wɨrɨ ghà.

¹⁵Əne mbɨ nyaʼa ghà əmbɨ Pità mbɨ Jɔ̌n ni mbɨ jwɨ rɨŋga nəb ɨsaʼi ze wo ɨsɨg. Ənɨ mbɨ nyaʼa jwɨ wò, mbɨ nyaʼa ghà mbənə mbənə

¹⁶ni, “Tɨ̀ kɨə wò ghɨ ye mbɨ ə mbaŋə̀ tɔ̂ ə? Wə̀d jìm ə Jèrusalèm fə kyerɨ ni mbɨ fə ghɨ̀ ənû ə yiirɨ ə kyeŋ, nɨ chəi ənɨ tɨ̀ rɨ̀ ton.

¹⁷Àyɨə ɨ ghɨ ni tɨ ənû zɔ̂ ə wɨrɨ jaŋ i wò ɨmbì əkaʼ bə̂d, tɨ̀ patɨ mɨ̀mə̌d ni tɨ mbɨ tɔ wɨrɨ ghà ə ənû ə mɔʼɔ ənɨ ɨkum wɔ̂.”

¹⁸Ənɨ mbɨ nyaʼa ghà əne, mbɨ nyaʼa wɨrɨ tɔŋ ə Pità mbɨ Jɔ̌n, patɨ mɨ̀mə̌d ni tɨ mbɨ tɔ gha ə ənû ə mɔʼɔ kɨ̀ bè chwi ənû ə mɔʼɔ ənɨ ɨkum Yeso.

¹⁹Àyɨə Pità mbɨ Jɔ̌n nyaʼa wììrɨ̀ əmbɨ mɨ̀mə̌d ni, “Mbə̀ sob mbənə mbənə ni zɨə wa kùʼ ɨfě Ŋwiə̀ ɨ zuunɨ əwən kɨ̀ ɨ zuunɨ ə Ŋwiə̀ ə?

²⁰Chəi tɨ̀ bɨrɨ sob nɨ gha ɨnû mbe nɨ tɨ̀ fə zə bə̀ zu.”

²¹Ənɨ mbɨ nyaʼa ghà əne, mə̀saʼ əbeŋ mbe nyaʼa yì patɨ mɨ̀mə̌d kwàʼ rɨ̀kǎ, sàŋ ni mbɨ wo ə. Chəi mbɨ nyaʼa zə ɨnə̂njɨ̀ nɨ chə mɨ̀mə̌d, ɨmbə̀ʼ ɨghəm nɨ bə̂d mɨ̀jìm mbɨə nyaʼə yiirɨ ə Ŋwiə̀ ɨmbə̀ʼ ənû ze nɨ nyaʼa ghɨ̌.

²²Mbaŋə̀ ze nɨ mbɨ nyaʼa ghɨ̌ ənû ə yiirɨ zɔ̂ ənɨ məd vɨ̀ əməd nyaʼa fə chè ɨghəm ɨwu ɨwum kwè.

²³Ənɨ mbɨ nyaʼa saŋ ə Pità mbɨ Jɔ̌n, mbɨ nyaʼa nɔ̀ʼ wò əsɨ mbə bə̂d pè ghà ɨnû mbe nɨ bə̂d kyeŋ mbe rɨ ə mbàn Ŋwìə̀ mbɨ ə bə̂d kyeŋ mbe rɨŋga əbeŋ nyaʼa ghà əmbɨ mɨ̀mə̌d.

²⁴Ənɨ mbɨ nyaʼa zu ɨnû mbe, mbɨ nyaʼa fɔtɨ kɔ̀ŋgɨ̀ ə Ŋwiə̀ ghà ni, “Ə̀tùmbɨ̀ ɨsɨg, à yɨ àwɔ̀ nyaʼa tekɨ ɨkaŋ, tekɨ si, tekɨ rɨ̀bàà bə̀ tekɨ ɨghɨjìm mbe nɨ yeʼ ɨŋga ɨghɨ mbɔ̂.

²⁵À nyaʼa chè ənjìm Əzwî ə Zeŋɨ ghɨ̀ a mbǎʼ kyeŋ ɨfɔ̂n Dèvîd, e wə̀d ə̀fàʼì, ghàm ghà ni, 'Bə̂d mbe nɨ kaʼi mɨ̀Jû nyaʼa sə ɨtəm ɨmbə̀ʼ ə yè ə? Bə̂d kɨə kɔndɨ ɨnû əko ɨmbə̀ʼ ə yè ə?

²⁶Mɨfɔ̂n rɨ ɨgwɨ ə si nyaʼa fə tekɨ ə ɨnyod, mə̀tùmbɨ̀ bə̂d nyaʼa bə̀ fetɨ yeʼe ni mbə̀ zɔŋ Ə̀nùŋɨ̀sɨg mbɨ Wə̀d məd we nɨ wɨ̀ zɔʼɔ.'

²⁷À yɨ rəsìʼ ni Herɔ̀d mbɨ Pailèt nyaʼa fɔtɨ mbɨ ə bə̂d mbe nɨ kaʼi mɨ̀Jû bə̀ fɔtɨ mbɨ mɨ̀Izre ɨŋga əsɨ zɔ̂, əne taŋ mɨnaŋ ɨgwɨ ə Yeso, e wə̀d ə̀fàʼì we nɨ zeŋɨ, nɨ à nyaʼa zɔʼɔ,

²⁸ɨmbə̀ʼ ghɨ ɨnû jìm mbe nɨ à nyaʼa nuŋ ənɨ e ɨka bə̀ fɔrɨ ənɨ e ɨkɔndɨ ni mbɨ bɨrɨ ghɨ̀.

²⁹Əne tɨ̀nîn Ə̀nùŋɨ̀sɨg, zə ɨchî nɨ mbɨə fàŋ əwa. Ghɨ ni mbǎ, mbe bə̂d ə̀fàʼì, gha e ɨŋgam mbɨ ə fîŋ nɨ kǎ.

³⁰Tɨ̀ mɨə ghɨ̀ əne, à sem e əbɔ ghɨ ni tɨ̀ vɨ bə̂d əwɔn bə̀ ghɨ̀ ɨnweenɨ-ɨnû fɔrɨ ɨnû yiirɨ ənɨ ɨkum Yeso, e wə̀d ə̀fàʼì nɨ zeŋɨ.”

³¹Ənɨ mbɨ nyaʼa kɔŋgɨ ə Ŋwiə̀ màànɨ̀, əsɨ ze nɨ mbɨ nyaʼa fetɨ əŋgu ə nyaʼa wùd. Əzwî ə Zeŋɨ ə nyaʼa swi ɨŋga mɨ̀mə̌d mɨjìm, mbɨ gha ɨŋgam Ŋwiə̀ mbɨ fîŋ nɨ kǎ.

³²Bə̂d mɨ̀jìm mbe nɨ nyaʼa ben ə Kristo nyaʼa mbɨ ə fîŋ mɔʼ fɔrɨ mbɨ əzwî ə mɔʼ. Chəi wə̀d mɔʼɔ nyaʼa gha ni ɨghɨ mbe nɨ tə berɨ yɨ mbi. Mbɨ nyaʼa berɨ ɨghɨjìm ənɨ mbɨ mɔʼ.

³³Bə̂d tom Kristo mbe mbɨə nyaʼə ghà ɨmbə̀ʼ ɨchî nɨ Ə̀nùŋɨ̀sɨg Yeso nyaʼa zwemə. Ɨ mbɨə nyaʼə ghà əne ənɨ ɨnə̂njɨ̀ nɨ kaanɨ. Ɨ̀chɔ̀m Ŋwiə̀ wɨə nyaʼa ɨgwɨ mɨ̀mə̌d mɨjìm.

³⁴Chəi wɨ mɔʼɔ rəbɔʼ mɨ̀mə̌d nyaʼa kwaŋ əghɨ, ɨmbə̀ʼ ɨghəm nɨ bə̂d mɨjìm mbe nɨ nyaʼa berɨ ɨsɨ si kɨ̀ nəb nyaʼa fèndɨ̀ ɨghɨ mbe, nɨŋ ɨkab we nɨ mbɨ fendɨ əŋgu

³⁵wò nuŋ ɨfě bə̂d tom mbe. Mbɨ nyaʼa sɨ nɨŋ ɨghɨ mbe ghàpɨ̀ ɨchî nɨ wə̀d mɔʼ mɔʼ nyaʼa kəbɨ.

³⁶Zɨə nyaʼa chè ni Jòsêf, nɨ bə̂d tom nyaʼa chu əməd ənɨ ə Banabàs (əton ənɨ ɨkum we yɨ ni, Wan mbaŋə̀ nɨə tìmbɨ̀ ə bə̂d), nɨ nyaʼa rɨŋga ɨnəbɨ Levì, mbɨ gywɨ əməd ə Saiprùs,

³⁷nyaʼa fen i mbeŋ, wò mbɨ ɨkab we pè nùŋ ɨfě bə̂d tom mbe.