Read Fɨso Fi Ɨ̀fàʼì bə̂d tom Kristo 5 Bible Online

Ɨ̀fàʼì bə̂d tom Kristo 5 - Fɨso Fi bible

Ɨ̀fàʼì bə̂d tom Kristo 5

¹Mbaŋə̀ mɔʼɔ nɨ ɨkum məd nyaʼə Ànàniàs mbɨ i ɨwi nɨ ɨkum məd nyaʼə Sàfirà, nyaʼa fèn əsɨ ə si nɨ nyaʼa əzɨ mɨ̀mə̌d.

²Mbɨ nyaʼa fen əne, Ànàniàs tekɨ mbɨ i ɨwi, nùŋ əbà rɨ ənɨ ɨkab we. Wɨ̀ nyaʼa wò mbɨ ə̀bùʼ ɨkab pè nùŋ ɨfě bə̂d tom mbe.

³Ənɨ wɨ̀ nyaʼa nùŋ əne, Pità nyaʼa biirɨ ɨ bɔ ni, “Ànàniàs, əton nɨ à saŋ ni Satàn nyɨ ɨŋga e fîŋ ghɨ̀ ni à ghà mɨghab əmbɨ Əzwî ə Zeŋɨ, əne nùŋ əba rɨ ənɨ ɨkab we nɨ à fen əsɨ ə si ze, kɨ ɨmbə̀ʼ ə yè ə?

⁴Ənɨ chəi à nyaʼa kɨrɨ fen əsɨ ze, ɨmbə̀ʼ à yɨə nyaʼa əze ə? Ənɨ à nyaʼa fenɨ, ɨmbə̀ʼ ɨkab we yɨə nyaʼa kɨrɨ we ə? Əton nɨ à kɔndɨ ɨkwɨ ənû zɔ̂ kɨ ɨmbə̀ʼ ə yè ə? Chəi à gha mɨghab mbɔ̂ əmbɨ ə bə̂d, à ghà yeʼ əmbɨ ə Ŋwiə̀.”

⁵Ənɨ Ànàniàs nyaʼa zu ənû zɔ̂, wɨ̀ nyaʼa gu ə si, kwɨ. Bə̂d mɨjìm mbe nɨ nyaʼa zu ənû zɔ̂ nyaʼa bɔ kwàʼ rɨŋgəʼ.

⁶Ŋgwàʼ bə̂d nyaʼa nɔ̀ʼ nib əvɨ əməd, bèʼ wò tweŋɨ.

⁷Ənɨ mɨ̀awà nyaʼa che ɨghabɨ mɨtad, ɨwi məd nyaʼa wò nyɨ. Chəi wɨ̀ nyaʼa kyerɨ ənû ze nɨ nyaʼa ghɨ̌.

⁸Pità nyaʼa biirɨ ɨ bɔ ni, “Gha ɨ num, à kɨ̀ ɨnun ɨkab we nɨ mbə̀ nyaʼa fen əsɨ ə si ze əŋgu wɔ̂ ə?” Wɨ̀ nyaʼa wììrɨ̀ ni, “Ee, à yɨ ɨwɔ̂.”

⁹Pità nyaʼa ghà ɨ bɔ ni, “À kɨə ye ə ghɨ ni mbə̀ fɔtɨ ben ni mbə̀ kwaʼnɨ Əzwî Ə̀nùŋɨ̀sɨg ə? Zə, bə̂d mbe nɨ tweŋ e nom mbɨ ɨchû nəb tɨ̀nîn. Mbɨ bɨrɨ bɨ beʼ əwe wò ɨsɨg.

¹⁰Àmei əwu əwən, wɨ̀ nyaʼa gù ɨban ɨwu Pità, kwɨ. Ənɨ ŋgwàʼ bə̂d ze nyaʼa wɨrɨ yeʼe nyɨ, mbɨ nyaʼa zə ni wɨ̀ fə kwɨ, əne mbɨ nyaʼa bə̀ beʼ əməd wò tweŋ ɨban ɨnom məd.

¹¹Ɨfetɨ bə̂d Kristo mbɨ ə bə̂d mɨ̀jìm mbe nɨ nyaʼa zu ɨnû mbɔ̂ nyaʼa bɔ kwàʼ rɨŋgəʼ.”

¹²Bə̂d tom Kristo nyaʼa ghɨ̀ ɨnweenɨ-ɨnû mbɨ ɨnû yiirɨ. Bə̂d mbe nɨ nyaʼa ben ə Kristo nyaʼa fetɨ ɨchû ə̀tâŋ ze nɨ mbɨ nyaʼə tɔŋ ənɨ Ə̀tâŋ ə Solomòn.

¹³Chəi wə̀d mɔʼɔ rɨ ɨsɨg nɨ tɨ̀ wɨ̀ nyaʼa yim fîŋ fɔtɨ əbɔʼ mɨ̀mə̌d, àyɨə ɨ mbɨə nyaʼə wumnɨ mɨ̀mə̌d kwàʼ rɨŋgəʼ.

¹⁴Mɨnɔ̂n mbaŋə̀ mbɨ məyi mbɨə nyaʼə fɔtɨ əbɔʼ bə̂d mbe nɨ nyaʼa ben Ə̀nùŋɨ̀sɨg, əne ɨnɔ̂n mɨ̀mə̌d wɨə nyaʼə sɨə nɔʼrɨə wò ɨmbì.

¹⁵Ɨnû yiirɨ mbe nɨ bə̂d tom Kristo nyaʼə ghɨ̀ə̀, nyaʼa ghɨ̀ ni bə̂d beʼ mbə bə̂d əwɔn wò nùŋ ɨgun mɨkon fɔrɨ ɨgun mɨmatə̀ ɨban ɨnə̂njɨ̀, ɨmbə̀ʼ ənɨ Pità ə chèə̀, əzîŋ əməd ə ze tɨ̀ zɨə chè ɨgwɨ mbɨ mɔʼɔ, vɨ̀ mɨ̀mə̌d.

¹⁶Bə̂d mɨ̀nɔnɔʼ nyaʼa bə̀ nɔ̀ʼ rɨŋga ɨsɨ mbe nɨ nyaʼa kad ə Jèrusalèm wò mbɨ mbə bə̂d əwɔn fɔrɨ mbɨə bə̂d mbe nɨ ɨzwî rɨbɔ̀ŋ nyaʼa ɨŋga mɨ̀mə̌d. Bə̂d tom mbe nyaʼa vɨ̀ mɨ̀mə̌d mɨjìm.

¹⁷Ə̀dìì ə nyaʼa swi ɨŋga fîŋ ətu ɨgwɨ ə bə̂d mbàn Ŋwìə̀ bə̀ swi ɨŋga fîŋ bə̂d mɨjìm mbe nɨ nyaʼa mbɨ məd, əne yɨə bə̂d rɨŋga ɨfɔtɨ mɨ̀Sadusiî.

¹⁸Mbɨ nyaʼa gywɨ̀ bə̂d tom mbe wò zɨ̀ ə nəb ndəŋ əbeŋ.

¹⁹À nyaʼa ɨzimɨ we, aŋgɨrə̀ Ə̀nùŋɨ̀sɨg nyaʼa wò fìʼ mɨchû nəb ndəŋ ze, chɨ̀ mɨ̀mə̌d chà əsaŋ, ghà əmbɨ mɨ̀mə̌d ni,

²⁰“Mbə̀ wo təm ɨŋga mbàn Ŋwìə̀ ghà ɨnû jìm ɨmbə̀ʼ ɨchî nɨ tɨ̀ bə̂d jɨg ɨ̀tènɨ̀ fi wɔ̂.”

²¹Ənɨ ɨtuʼ nyaʼa chɨgɨ, mbɨ nyaʼa wò nyɨ ɨŋga mbàn Ŋwìə̀, kɔ chwi ɨnû ɨchî nɨ aŋgɨrə̀ we kəʼ ghà əmbɨ mɨ̀mə̌d. Ətu ɨgwɨ ə bə̂d mbàn Ŋwìə̀ mbɨ ə bə̂d mbe nɨ nyaʼa mbɨ məd, nyaʼa wò tɔŋ mə̀saʼ əbeŋ mɨjìm mbɨ ə bə̂d kyeŋ mɨ̀Jû mɨ̀jìm ni mbɨ wo fetɨ ɨŋga ɨ̀chàm mɨ̀mə̌d. Ənɨ mbɨ nyaʼa wò fetɨ, mbɨ nyaʼa chà bə̂d ni mbɨ wo nɨŋ bə̂d tom mbe rɨ ə nəb ndəŋ yeʼe mbɨ mɨ̀mə̌d.

²²Àyɨə ənɨ mɨ̀sɔgyɨ̀ mbe nyaʼa wo ə nəb ndəŋ, chəi mbɨ nyaʼa zə bə̂d tom mbe ɨŋga nəb ndəŋ ze, əne mbɨ nyaʼa bə̀ndɨ̀ wò ghà ni,

²³“Tɨ̀ kə̀ʼ pè zə nəb ndəŋ ze nɨ mbɨ fən kwàʼ ɨchî chɔ̀m, bə̀ zə mɨ̀sɔgyɨ̀ mbe nɨə nəŋgɨ ɨsɨ nɨ təmbɨ ɨban mɨchû nəb. Àyɨə ənɨ tɨ̀ sɨ fiʼ nəb ndəŋ ze, chəi tɨ̀ zə wə̀d mɔʼɔ ɨŋga.”

²⁴Ənɨ ətu ɨgwɨ mɨ̀sɔgyɨ̀ mbe nɨə nəŋgɨ ə mbàn Ŋwìə̀ mbɨ ə bə̂d kyeŋ mbe rɨ ə mbàn Ŋwìə̀ nyaʼa zu ənû zɔ̂, zɨə nyaʼa chè mɨ̀mə̌d, əne mbɨ nyaʼa bid əwən ɨmbə̀ʼ ənû ze nɨ bɨrɨ jwɨ̀ rɨ ənɨ ənû zɔ̂.

²⁵Ənɨ mbɨ nyaʼə bid əne, wə̀d mɔʼɔ nyaʼa wò ghà əmbɨ mɨ̀mə̌d ni, “Mbə̀ zə! Mbaŋə̀ te nɨ mbə̀ kəʼ zɨ̀ ə ndəŋ ɨ te təmbɨ ɨŋga mbàn Ŋwìə̀, chwi ɨnû!”

²⁶Ənɨ mbɨ nyaʼa zu əne, ətu ɨgwɨ mɨ̀sɔgyɨ̀ nyaʼa wò mbɨ mbi mɨ̀sɔgyɨ̀, pè nɨŋ mɨ̀mə̌d wò mbɨ mbɨwən. Chəi mbɨ nyaʼa nɨŋ mɨ̀mə̌d ənɨ ɨka, ɨmbə̀ʼ ɨghəm nɨ ɨ mbɨə nyaʼə bɔə ni bə̂d mbe bɨrɨ tumbɨ əwən ənɨ əti.

²⁷Ənɨ mbɨ nyaʼa nɨŋ mɨ̀mə̌d wò əne, mbɨ nyaʼa pè nùŋ mɨ̀mə̌d ni mbɨ təm ɨfě mə̀saʼ əbeŋ mbe. Ətu ɨgwɨ ə bə̂d mbàn Ŋwìə̀ nyaʼa biirɨ əmbɨ mɨ̀mə̌d ni,

²⁸“Tɨ̀ nyaʼa fə jeŋgɨ patɨ əwən ni tɨ mbə̀ chwi ə ənû ə mɔʼɔ ənɨ ɨkum wɔ̂, àyɨə ɨnû mbe nɨ mbə̀ə chwiə fə jaŋ ɨŋga Jèrusalèm jìm. Mbə mbɨə bə̀ kə̀b ghɨ̀ ni ndɔ̀n ɨmbə̀ʼ ɨchî nɨ mbɨ zwiirɨ əməd nyɨ ɨgwɨ na.”

²⁹Àyɨə Pità mbɨ ə bə̂d tom Kristo mbə nyaʼa wiirɨ ni, “Tɨ̀ berɨ zuunɨ ə Ŋwiə̀, kaʼi bə̂d.

³⁰Ŋwìə̀ mba mɨ̀mbǎʼ rəŋwe nyaʼa zwemnɨ ə Yeso we nɨ mbə̀ nyaʼa kombɨ əzed ə baʼnɨ, zwiirɨ.

³¹Ŋwìə̀ nyaʼa nɔ əməd nùŋ ənɨ e əbà əbɔ ə jɨgɨ ni wɨ̀ chub ənɨ Ə̀chà bə̂d fɔrɨ ənɨ Wə̀d nɨə chɨ̀ə̀ bə̂d rəŋgəʼ, ɨmbə̀ʼ wɨ̀ ghɨ ni mɨ̀Izre beŋ tə fîŋ, Ŋwìə̀ waʼ ɨnû rɨbɔ̀ŋ mɨ̀mə̌d.

³²Mbǎ mbɨ Əzwî ə Zeŋɨ ze nɨ Ŋwìə̀ naʼ əmbɨ ə bə̂d mbe nɨə zuunɨ əməd yɨə mɨ̀zərɨmbin ənɨ ɨnû mbɔ̂.”

³³Ənɨ mə̀saʼ əbeŋ mbe nyaʼa zu ənû zɔ̂, mbɨ nyaʼa sə ɨtəm kwàʼ rɨŋgəʼ. Əne mbɨ nyaʼa kə̀b ni njɨ mbə zwiirɨ mɨ̀mə̌d.

³⁴Àyɨə Farisiî mɔʼɔ nɨ ɨkum məd nyaʼə Gàmalièl wɨə nyaʼa əbɔʼ mə̀saʼ əbeŋ mbe. Məd yɨə nyaʼə əchwiə̀ rɨ̀kə̌. Bə̂d mɨ̀jìm mbɨə nyaʼə bə̀ wumnɨ əməd. Wɨ̀ nyaʼa nɔ̀ʼ təm ghà ni mbɨ cha bə̂d tom mbe ɨsɨg ənɨ ɨkə nyumə̀.

³⁵Ənɨ mbɨ nyaʼa cha mɨ̀mə̌d ɨsɨg, wɨ̀ nyaʼa ghà əmbɨ mə̀saʼ əbeŋ mbə̂ ni, “Mɨ̀Izre, mbə̀ we ə mbɨ ənû ze nɨ mbə̀ə kə̀b ghɨ̀ mbɨ ə mbaŋə̀ tɔ̂.

³⁶À nyaʼa ənɨ ə nyùmə̀ mɔʼɔ, mbaŋə̀ mɔʼɔ ze nɨ mbɨ nyaʼə tɔŋ ənɨ ə Tìodàs nyaʼa nɔ̀ʼ ghà ni tə yɨ ədabɨ ə wə̀d. Bə̂d ɨghabɨ əkɨ əkwè nyaʼa fɔtɨ əbɔʼ məd. Àyɨə mbɨ nyaʼa zwiirɨ əməd, əne bə̂d mbe nɨ nyaʼə beenɨ əbɔʼ məd nyaʼa jàŋə̀. Ənû əməd ze ə nyaʼa nim.

³⁷Əze ə nɨə cheə, wə̀d mɔʼɔ rɨ ə Galiliî nɨ mbɨ nyaʼə tɔŋ ənɨ Judàs nyaʼa bə̀ nɔ̀ʼ ɨŋga ɨni mbe nɨ mbɨ nyaʼə taŋə bə̂d, əne sùŋ bə̂d mɔʼɔ əbɔʼ ni. Wɨ̀ nyaʼa bə̀ kwɨ, əne bə̂d mɨjìm mbe nɨ nyaʼə beenɨ əbɔʼ məd nyaʼa bə̀ jàŋə̀.

³⁸Əne ɨmbə̀ʼ ɨsaʼi wɔ̂ nɨ yeʼ ənɨ a ɨfě, mə ghà ɨ nən ni mbə̀ chɨ mbə ɨbɔ rɨŋga ɨnû mbaŋə̀ tɔ̂! Mbə̀ saŋ mɨ̀mə̌d! À mɨ yeʼ ni ənû ze nɨ mbɨə kə̀b ghɨ̀, kɨ̀ ə̀fàʼì zɔ̂ nɨ mbɨə kəb fàʼ yɨ rɨ əmbɨ ə bə̂d mɨ̀sɔŋɨchù, zɨə bɨrɨ nwìə̀.

³⁹Àyɨə ənû zɔ̂ ə mɨ nɔ̀ʼ rɨ əmbɨ ə Ŋwìə̀, njɨ chəi mbə̀ bɨrɨ berɨ ɨka nɨ baŋ mɨ̀mə̌d. Ɨghə̀m mbə bɨrɨ zə ni mbə mbɨə zɔŋə mbɨ ə Ŋwiə̀.”

⁴⁰Mə̀saʼ əbeŋ mbe nyaʼa zu ɨkə Gàmalièl. Ənɨ mbɨ nyaʼa wɨrɨ tɔŋ bə̂d tom mbe, mbɨ nyaʼa te mɨ̀mə̌d ənɨ ə ŋgwad, patɨ mɨ̀mə̌d ghà ni tɨ mbɨ tɔ gha ə ənû ə mɔʼɔ ənɨ ɨkum Yeso. Mbɨ nyaʼa ghɨ̀ əne sàŋ mɨ̀mə̌d mbɨ wò əwən.

⁴¹Bə̂d tom mbe nyaʼa sàŋ mə̀saʼ əbeŋ mbe yènə̀ ghaʼə ni Ŋwìə̀ fə zə əwən ni mbə kuʼ nɨ zə ŋgəʼ bə̀ berɨ tɨ̀nìd ətu ɨmbə̀ʼ ə Yeso.

⁴²Mbɨ nyaʼa wò ɨmbì ɨni jìm nɨ chwi ɨnû bə̀ fɔrɨ nɨ ghà ɨkə̂n chɔ̀m ɨŋga mbàn Ŋwìə̀ bə̀ fɔrɨ ɨŋga tə nəb ni Yeso yɨə Wə̀d we nɨ Ŋwìə̀ zɔʼɔ.