Read Fɨso Fi Ɨ̀fàʼì bə̂d tom Kristo 6 Bible Online

Ɨ̀fàʼì bə̂d tom Kristo 6 - Fɨso Fi bible

Ɨ̀fàʼì bə̂d tom Kristo 6

¹À nyaʼa ɨŋga ɨni mbe, ənɨ ɨnun bə̂d mbe nɨ nyaʼa ben ə Kristo nyaʼə sɨə nɔʼrɨə wò ɨmbì, mɨ̀Jû mbe nɨ nyaʼə ghàm ə Grik mbɨə nyaʼə ghàmbɨ̀ mbe nɨ nyaʼə ghàm ə Hibrù, ɨmbə̀ʼ ɨghəm nɨ ɨ mbɨə nyaʼə mèʼnɨ̀ mɨku əyi mɨ̀mə̌d ɨni jìm ənɨ mbɨ nyaʼə ghàpɨ̀ ɨghɨjɨg.

²Bə̂d tom mbe wum chɔ̀b rɨ̀be nyaʼa fetɨ bə̂d mɨjìm mbe nɨ nyaʼa ben ə Kristo ghà ni, “Zɨ rɨka bɔŋ i ni tɨ̀ saŋ ənû nɨ gha ɨŋgam Ŋwiə̀ ɨmbə̀ʼ ghapɨ rɨjɨg.

³Əne kyɨə bɔŋgɔb, mbə̀ chɔʼ mbaŋə̀ sambe rəkaʼ nən nɨ bə̂d ə ghà ɨnû chɔ̀m ɨmbə̀ʼ mɨ̀mə̌d, nɨ Əzwî ə Zeŋɨ ə swi ɨŋga mɨ̀mə̌d, mbɨ bə̀ berɨ ɨwe, ɨmbə̀ʼ tɨ̀ naʼ ənû nɨ ghapɨ rɨjɨg əmbɨ mɨ̀mə̌d.

⁴Əne mbǎ ənɨ wa rɨghəm, tɨ̀ bɨrɨ ten nɨ kɔŋgɨ ə Ŋwiə̀ bə̀ ten nɨ ghà ɨŋgam Ŋwiə̀.”

⁵Ənû ze nɨ mbɨ nyaʼa ghǎ ə nyaʼa bɔ̀ŋ əmbɨ ɨnɔ̂n bə̂d we ɨjìm. Əne mbɨ nyaʼa chɔʼ ə Stɨfɨ̀n nɨ ɨbenɨ məd nyaʼa kaanɨ, Əzwî ə Zeŋɨ ə bə̀ swi ɨŋga məd. Mbɨ nyaʼa bə̀ chɔʼ ə Filip mbɨ Prokorùs mbɨ Nìkano mbɨ Timòn mbɨ Pàmenàs mbɨ Nikolaùs nɨ nyaʼə rɨ ə Antiɔ̀k, nɨ nyaʼa fə beŋ i fîŋ ben ənû ə Ŋwiə̀ mɨ̀Jû.

⁶Mbɨ nyaʼa nuŋ mbaŋə̀ tɔ̂ sambe ɨfě bə̂d tom mbe, əne mbɨ nyaʼa kɔŋgɨ ə Ŋwiə̀ bə̀ zab mbə ɨbɔ ɨgwɨ mɨ̀mə̌d.

⁷Ɨŋgam Ŋwiə̀ wɨə nyaʼə jàŋə̀ wò ɨmbì. Ɨnun bə̂d mbe nɨ nyaʼa ben ə Kristo ə Jèrusalèm wɨə nyaʼə bə̀ nɔʼrɨə wò ɨmbì ənɨ ə bid. Bə̂d mbàn Ŋwìə̀ nɔnɔʼ nyaʼa bə̀ ben ə Kristo.

⁸Ŋwiə̀ nyaʼa ghɨ̀ ɨ̀chɔ̀m ənɨ ə Stɨfɨ̀n bə̀ naʼ ɨka ɨ bɔ. Əne wɨ̀ nyaʼa kɔ ghɨ̀ ɨnû yiirɨ bə̀ kɔ ghɨ̀ ɨnweenɨ-ɨnû ka ka əkaʼ ə bə̂d.

⁹Bə̂d mɔʼɔ nɨ nyaʼa rɨŋga nəb ə̀kàtɨ̀ mɨ̀Jû mbe nɨ nyaʼa jwɨ rɨ ənɨ ə̀bòʼò, ɨchî nɨ mbɨ nyaʼə tɔŋə nəb ə̀kàtɨ̀ ze, nyaʼa kɔ tàŋɨ mbɨ Stɨfɨ̀n. Bə̂d mbe yɨə nyaʼə mɨ̀Jû nɨ nyaʼa rɨ ə Sìrin, rɨ ə Àlèzandrià, rɨ ə Selisià bə̀ fɔrɨ rɨ ə Esià.

¹⁰Əzwî ə Zeŋɨ ə nyaʼa nàʼ ɨwe əmbɨ Stɨfɨ̀n ni wɨ̀ mɨ ghàm, chəi ənɨ tɨ bə̂d wììrɨ̀.

¹¹Əne mbɨ nyaʼa no bə̂d mɔʼɔ ənjìm ənjìm ni mbɨ gha ni, “Tɨ̀ kə̀ʼ zu ənɨ wɨə zɔ̀m ə Mose bə̀ zɔ̀m ə Ŋwiə̀.”

¹²Ənɨ mbɨ nyaʼa ghà əne, mbɨ nyaʼa nɔm fîŋ rɨ bə̂d mbe nɨ nyaʼa əŋgu, nɔm fîŋ rɨ bə̂d kyeŋ mbe rɨŋga əbeŋ bə̀ nɔm tɨ məchwiə̀ rɨ̀kə̌. Əne mbɨ nyaʼa gywɨ̀ əməd nɨŋ wo ɨfě mə̀saʼ əbeŋ.

¹³Ənɨ mbɨ nyaʼa pè əŋgu, mbɨ nyaʼa zɨ̀ mɨ̀zərɨmbin mɨghab nɨ nyaʼa gha ni, “Mbaŋə̀ zɔ̂ zɨə ghà mɨŋgam rɨbɔ̀ŋ ɨmbə̀ʼ mbàn Ŋwìə̀ bə̀ fɔrɨ ɨmbə̀ʼ tɨkə rɨ Mose.

¹⁴Tɨ̀ nyaʼa zu ənɨ wɨ̀ nyaʼa gha ni Yeso we rɨ ə Nazàret bɨrɨ saʼ mbàn Ŋwìə̀, bə̀ kwepɨ mɨchî əbeŋ mbe nɨ Mose nyaʼa naʼ ɨ na.”

¹⁵Bə̂d mɨ̀jìm mbe nɨ nyaʼa chub ɨŋga ɨ̀chàm we nyaʼa toŋ əghə ɨgwɨ məd zə ni ɨfě məd wɨə nyaʼa ɨghabɨ wɨ aŋgɨrə̀.