Read Fɨso Fi Rom 11 Bible Online

Rom 11 - Fɨso Fi bible

Rom 11

¹Mə wɨə biirɨə ni Ŋwìə̀ wa fə ton mbi bə̂d ə? Chə̂! Mə yɨə wə̀d Izre. Mə yɨə wan tɨ ənɨ əghaŋ ə Abràham. Mə yɨ rɨŋga ɨnəbɨ Benjamìn.

²Chəi Ŋwìə̀ kɨrɨ ton mbi bə̂d mbe nɨ wɨ̀ nyaʼa be chɔʼ. Chəi mbə̀ kyerɨ ənû ze nɨ Ə̀ŋwàʼnɨ̀ ə Ŋwiə̀ ə gha ɨmbə̀ʼ Èlaijà, ɨchî nɨ wɨ̀ nyaʼa gha əmbɨ ə Ŋwiə̀ ɨmbə̀ʼ ənû ze nɨ mɨ̀Izre nyaʼa ghɨ̀ ə?

³Wɨ̀ nyaʼa ghà ni, “Ə̀nùŋɨ̀sɨg, mbɨ fə zwiirɨ mbe bə̂d ɨ̀kə̀n bə̀ sàʼ te rɨkwi ɨjə̀ŋ ə̀fààrɨ̀. Àmei mɔ̌ mɔʼ sɨ bùʼ. Ɨ mbɨə bə̀ kə̀b zwiirɨ əmɨ.”

⁴Ŋwìə̀ nyaʼa wììrɨ̀ ɨ bɔ ni yè ə? Wɨ̀ nyaʼa ghà ɨ bɔ ni, “Mə fə nùŋ bə̂d chuʼ sambe ənɨ mbum, nɨ chəi mbɨ kɨrɨ wumnɨ ŋwìə̀ əko we nɨ mbɨə tɔŋ ənɨ ə Bal.”

⁵Əne bə̂, ənɨ ə nyùmə̀ wɔ̂ rɨ̀nîn, ə̀bùʼ ə bə̂d ə zɨ əŋgu nɨ Ŋwiə̀ chɔʼ ənjìm ɨ̀chɔ̀m məd.

⁶Wɨ̀ nyaʼa chɔʼ bə̂d mbe ənjìm ɨ̀chɔ̀m məd, kaʼi ɨmbə̀ʼ ɨnû mbe nɨ mbɨ nyaʼa ghɨ̌. À kɨ nɨ wɨ̀ nyaʼa chɔʼ mɨ̀mə̌d ənjìm ɨnû mbe nɨ mbɨ nyaʼa ghɨ̌, njɨ ka ɨ̀chɔ̀m Ŋwiə̀ yɨə wɨrɨ i ɨ̀chɔ̀m Ŋwiə̀.

⁷Əne kɨ nɨ yè ə? Chəi mɨ̀Izre nyaʼa berɨ əghɨ ze nɨ mbɨ nyaʼə kə̀bə̀. Bə̂d mbe nɨ Ŋwìə̀ nyaʼa chɔʼɔ nyaʼa berɨ əzɨ əwən, àyɨə ə̀bùʼ ə bə̂d nyaʼa ghɨ̀ tə fîŋ tu.

⁸Ə zɨ ɨŋga Ə̀ŋwàʼnɨ̀ ə Ŋwiə̀ ni, “Ŋwìə̀ nyaʼa nàʼ əzwî ze nɨə ghɨ̀ ni bə̂d fundɨ əmbɨ mɨ̀mə̌d, bə̀ nàʼ əghə ɨmbə̀ʼ tɨ mbɨ zə ə ɨsɨ bə̀ nàʼ ɨ̀tǒŋ ɨmbə̀ʼ tɨ mbɨ zu ə ɨnû. Mbɨ nyaʼa chub əne yeʼe pè rə̀chɔ̀ŋ.”

⁹Ɨfɔ̂n Dèvîd nyaʼa bə̀ ghà ni, “Əsɨ ze nɨ mbɨə jɨg əŋgu yɨ ətam nɨ mbɨ bɨrɨ gywɨ mɨ̀mə̌d ɨŋga. À yɨə bə̀ əgum ze nɨ mbɨ bɨrɨ gu ɨgun, bə̀ yeʼ əsɨ nɨ mbɨ bɨrɨ chə mɨ̀mə̌d əŋgu.

¹⁰Əghə mɨ̀mə̌d ə fə fin ɨmbə̀ʼ tɨ mbɨ zə ə ɨsɨ. Njìm tɨ mɨ̀mə̌d fə bə̀ gumə koŋ.”

¹¹Əne mə wɨə biirɨə ni mbɨ kə̀ʼ tɨgrɨ ɨmbə̀ʼ wɨrɨ gu ə? Chə̂! À yɨ ɨmbə̀ʼ ɨchî nɨ mbɨ nyaʼa gu ənû nɨ bə̂d mbe nɨ kaʼi mɨ̀Jû nyaʼa jwɨ rəŋgəʼ. Mbɨ nyaʼa jwɨ̀ ɨmbə̀ʼ mɨ̀Jû ghɨ ə̀dìì.

¹²À mɨ yeʼ nɨ ɨgu-ənû mɨ̀Jû nyaʼa ghɨ ni bə̂d rɨŋga ɨsɨg jɨg ɨ̀chɔ̀m, bə̀ ghɨ̀ ni ɨchî nɨ mbɨ nyaʼa ton ə Ŋwiə̀ ə nyaʼa ghɨ̀ ni bə̂d mbe nɨ kaʼi mɨ̀Jû jɨg ɨ̀chɔ̀m, njɨ à yɨ ənû nɨ bɔŋɨ ni mɨ̀Izre mɨ̀jìm fə fɔtɨ əbɔʼ mɨ̀mə̌d!

¹³Mə yɨ əni ghàm ɨ nən, mbə̀n mbe nɨ kaʼi mɨ̀Jû. Ɨchî nɨ mə̀ yeʼ wə̀d tom əmbɨ ə bə̂d mbe nɨ kaʼi mɨ̀Jû, mə wɨə zɨ̀ ətu ənɨ ə̀fàʼì ze nɨ Ŋwìə̀ chɔʼ əmɨ ni mə̀ faʼ ə

¹⁴ɨmbə̀ʼ mbɨ bɔŋgɔb mɨ̀Jû ghɨ ə̀dìì əne ghɨ̀ mə chɨ mbɨ mɔʼɔ rəŋgəʼ.

¹⁵Ɨchî nɨ Ŋwìə̀ nyaʼa ton mɨ̀mə̌d nyaʼa mɨ chwi ni wɨ̀ fə maanɨ taŋ mbɨ ə bə̂d rɨŋga ɨsɨg, njɨ kaʼ ɨchî nɨ wɨ̀ wɨrɨ ben mɨ̀mə̌d rɨ wa chwi i ni mbɨ fə kwɨ wɨrɨ zwemə ə?

¹⁶Mbɨ mɨ yeʼə nàʼə̀ ŋgə̀ŋ rɨtu ənɨ əghɨ ə̀fà əmbɨ ə Ŋwiə̀, njɨ ŋgə̀ŋ ze jìm yɨ zɨ məd. Mbɨ mɨ yeʼə nàʼ əghaŋ əzed ənɨ əghɨ ə̀fà əmbɨ ə Ŋwiə̀, njɨ rɨtəb rɨjìm yɨə bə̀ rɨ məd.

¹⁷Mbɨ nyaʼa sopɨ rɨtəb mɔʼɔ rɨ ənɨ əzed olìf chɔ̀m, əne nɨŋ ɨghə rɨ ənɨ əzed ə olìf bǔʼ wò ban ənɨ əzed ə olìf chɔ̀m ze, ɨmbə̀ʼ wɨ sɔ mɨnib rɨ ənɨ əghaŋ əzed ə olìf chɔ̀m. Mbə̀n bə̂d nɨ kaʼi mɨ̀Jû yɨ ɨghabɨ ɨghə rɨ ənɨ əzed ə olìf bǔʼ nɨ mbɨ nɨŋ ban ənɨ əzed ə olìf chɔ̀m.

¹⁸Əne tɨ mbə̀ goŋ ə ɨgɔ̂ ɨmbə̀ʼ ɨghəm nɨ mbə̀ fə nɨŋ rɨmbin rɨtəb te nɨ mbɨ sopɨ. Mbə mɨ yeʼə goŋ ɨgɔ̂, njɨ mbə̀ kyerɨ ni kaʼi mbə̀n ə jə əghaŋ ze, à yɨ əghaŋ ze ə jə əwən.

¹⁹Wə̀d mɔʼɔ rəbɔʼ nən bɨrɨ ghà ni, “Mbɨ nyaʼa sopɨ rɨtəb te ɨmbə̀ʼ mbɨ ban əmɨ ənɨ rɨmbin mɨ̀mə̌d.”

²⁰Əze yɨ rəsìʼ. Mbɨ nyaʼa sopɨ rɨtəb te, əne yɨ mɨ̀Jû, ɨmbə̀ʼ ɨghəm nɨ chəi mbɨ nyaʼa benɨ, àyɨə mbən ə təm kàànɨ̀ àmei ɨmbə̀ʼ ɨchî nɨ mbə̀ benɨ. Əne tɨ mbə̀ nɔ ə ɨnyod, àyɨə mbə̀ we əwən ɨmbə̀ʼ ənû ze nɨ tɨ̀ zɨə ghɨ̀.

²¹À mɨ yeʼ nɨ chəi Ŋwìə̀ nyaʼa saŋ rɨtəb chɔ̀m te ni tɨ chubɨ, njɨ chəi wɨ̀ bɨrɨ bɨ saŋ əwən.

²²Mbə̀ zə ɨchî nɨ Ŋwìə̀ ə ghɨ̀ ɨ̀chɔ̀m bə̀ tɔə. Ɨ wɨə tɔ əmbɨ ə bə̂d mbe nɨə gù ənû, àyɨə ɨ wɨə ghɨ̀ ɨ̀chɔ̀m ənɨ ə nən, əne mbə̀ chub àmei ɨŋga ɨ̀chɔ̀m məd. Mbə mɨ ton ghɨ ə əne, wɨ̀ bɨrɨ bɨ sob əwən waʼ.

²³Ka àbei mɨ̀Jû, mbɨ mɨ waʼ ɨchî nɨ chəi mbɨ benɨ, Ŋwìə̀ bɨrɨ wɨrɨ ban mɨ̀mə̌d, ɨmbə̀ʼ ɨghəm nɨ məd ə berɨ ɨka nɨ wɨrɨ ban mɨ̀mə̌d ənɨ əzed ə chɔ̀m ze ɨghəm cherə.

²⁴À mɨ yeʼ nɨ mbɨ fə sob əwən tɨ ənɨ əzed ə olìf bǔʼ, əne ban ənɨ əzed ə olìf konɨ, nɨ kaʼi ɨchî nɨ zɨə berɨ yeʼ we, njɨ zɨə zàm ni mbɨ bɨrɨ wɨrɨ ban rɨtəb te ənɨ əzed mɨ̀mə̌d.

²⁵Mbɨ bɔŋgɔb, mə kə̀b ni mbə̀ kyerɨ ənû ze nɨ yeʼ ənə̀mə, ɨmbə̀ʼ tɨ mbə̀ kɔndɨ ə ni mbə we əku. Ənû ze yɨ ni: Ŋwiə̀ fə ghɨ̀ ni fîŋ tɨ mɨ̀Izre tu. Tɨ bɨrɨ tu wò pè ənɨ ɨnun bə̂d mbe nɨ kaʼi mɨ̀Jû nɨ berɨ yeʼe əmbɨ ə Ŋwiə̀ fə kuʼu.

²⁶Nyùmə̀ we mɨ kùʼ, mɨ̀Izre mɨ̀jìm bɨrɨ jwɨ rəŋgəʼ. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Wə̀d we nɨ bɨrɨ chɨ bə̂d rəŋgəʼ bɨrɨ yeʼe rɨ ə Zayɔ̀n. Wɨ̀ bɨrɨ nimnɨ ənû ze nɨ chəi bə̂d ə wumnɨ ə Ŋwiə̀ tɨ ənɨ ə bɔn Jakɔ̂b.

²⁷Fɔ̂ yɨə fɨso fe nɨ mə san mbɨ mɨ̀mə̌d ənɨ mə̀ waʼ ɨnû rɨbɔ̀ŋ mɨ̀mə̌d.”

²⁸À yeʼ ɨmbə̀ʼ ɨkə̂n chɔ̀m, mɨ̀Jû yɨə bə̂d pə̀n Ŋwiə̀ ɨmbə̀ʼ əwən. À yeʼ ɨmbə̀ʼ ɨchî nɨ Ŋwìə̀ chɔʼ mɨ̀mə̌d, Ŋwiə̀ ə ghaʼ mɨ̀mə̌d kwàʼ rɨŋgəʼ ɨmbə̀ʼ mɨ̀mbǎʼ mɨ̀mə̌d rəŋwe.

²⁹Ŋwìə̀ mɨ fə nàʼ ɨneʼe əmbɨ ə bə̂d bə̀ tɔŋ mɨ̀mə̌d ənɨ mbi, chəi wɨ̀ bɨrɨ wɨrɨ kwepɨ i fîŋ.

³⁰Ɨchî nɨ mbə̀ nyaʼa kweʼ ghɨ̀ rɨ̀zuə̀ əmbɨ ə Ŋwiə̀, əne tɨ̀nîn wɨ̀ fə dììrɨ̀ əwən ɨmbə̀ʼ ɨghəm nɨ mɨ̀Jû nyaʼa bə̀ ghɨ rɨ̀zuə̀.

³¹Əne mɨ̀mə̌d mbɨə ghɨ̀ rɨ̀zuə̀ rɨ̀nîn ɨmbə̀ʼ Ŋwìə̀ diirɨ mɨ̀mə̌d ɨchî nɨ wɨ̀ fə diirɨ əwən.

³²Ŋwìə̀ fə zɨ̀ bə̂d mɨ̀jìm ə ndəŋ ɨmbə̀ʼ ɨchî nɨ mbɨ nyaʼa ghɨ rɨ̀zuə̀. Wɨ̀ nyaʼa ghɨ̀ əne ɨmbə̀ʼ wɨrɨ diirɨ mɨ̀mə̌d mɨjìm.

³³Wəi! Mbə̀ zə ɨchî nɨ Ŋwìə̀ ə ghɨ̀ ɨ̀chɔ̀m ənɨ ə bə̂d mɨ̀jìm. Mbə̀ zə ɨchî nɨ wɨ̀ berɨ ɨwe bə̀ kyerɨ ɨnû jìm! Chəi ənɨ tɨ̀ wə̀d kyerɨ tɨkɔndɨ məd! Chəi ənɨ tɨ̀ wə̀d kyerɨ mɨchî məd!

³⁴Ə zɨ ɨŋga Ə̀ŋwàʼnɨ̀ ə Ŋwiə̀ ni, “À kɨə we nɨ kyerɨ ɨkɔndɨ Ə̀nùŋɨ̀sɨg ə? Kɨ̀ à kɨə we nɨə kəərɨ əməd ə?

³⁵À kɨə we nɨ kweʼ naʼ ɨghɨ ɨ bɔ, ɨmbə̀ʼ wɨ̀ wɨrɨ wì ə?”

³⁶À yɨə məd nyaʼa tekɨ ɨghɨjìm, ɨghɨjìm mbɨ əŋgu ənjìm məd, ɨghɨjìm yɨə bə mbɨ məd. Tɨ̀ wumnɨ əməd koŋ. À yɨ əne.