Read Fɨso Fi Rom 12 Bible Online

Rom 12 - Fɨso Fi bible

Rom 12

¹Mbɨ bɔŋgɔb, mə wɨə buʼ ɨbɔ ɨ nən ni ɨchî nɨ Ŋwìə̀ ə dììrɨ̀ əwa, mbə̀ naʼ ə ɨnyod əmbɨ ə Ŋwiə̀ ɨghabɨ əghɨ ə̀fà ze nɨ yeʼ ɨkǎ, nɨ zeŋɨ, nɨ Ŋwìə̀ bə̀ ghaʼ. Əzɔ̂ yɨ ɨchî nɨ kuʼnɨ nɨ tɨ̀ mbə wumnɨ ə Ŋwiə̀.

²Tɨ mbə̀ beenɨ ə əbɔʼ ɨnû mbe nɨ bə̂d ɨŋga ɨsɨg wɔ̂ ə ghɨ̀ə̀, àyɨə mbə̀ saŋə ni Ŋwìə̀ beŋ əwən ɨchî nɨ wɨə nàʼ rɨkɔndɨ fi ɨ nən, ɨmbə̀ʼ mbə kyerɨ ənû ze nɨ wɨ̀ kə̀bɨ. Əne yɨ ni mbə̀ kyerɨ ɨnû mbe nɨ yeʼ mbɨ chɔ̀m, kyerɨ mbe nɨ wɨ̀ ghaʼi bə̀ kyerɨ mbe nɨ kuʼnɨ.

³Ɨchî nɨ Ŋwìə̀ fə ghɨ ɨ̀chɔ̀m ənɨ ə num, mə wɨə ghà əmbɨ wə̀d jìm əkaʼ nən ni tɨ wɨ̀ kɔndɨ i ni tə chè ɨchî nɨ tə yeʼ ə, àyɨə wə̀d jìm kɔndɨ ənû ɨmbə̀ʼ i ɨnyod ɨchî nɨ kuʼnɨ. Wə̀d mɔʼ mɔʼ kɔndɨ beenɨ əbɔʼ ɨchî nɨ Ŋwìə̀ naʼ ɨbenɨ ɨ bɔ.

⁴Mbə̀ kyerɨ ə ni nyamnyod ə berɨ ɨsɨ ɨnyod nɔnɔʼ, àyɨə chəi ɨsɨ ɨnyod jìm berɨ ɨkwɨ ə̀fàʼì mɔʼ.

⁵Əne mba mbɔ̂ nɨ nɔʼɔ, tɨ̀ yɨə nyamnyod mɔʼ ɨchî nɨ tɨ̀ yeʼ ənɨ ɨfɔtɨ mbɨ Kristo. Wə̀d mɔʼ mɔʼ fə sɨ ɨba rɨ ənɨ ə nyamnyod wə̀d jìm.

⁶Tɨ̀ berɨ mɨneʼe nɨ kwepə beenɨ əbɔʼ ɨchî nɨ Ŋwìə̀ ghɨ ɨ̀chɔ̀m ənɨ ə na. Ɨneʼe wə̀d mɔʼɔ mɨ yeʼ ni wɨ̀ zu ɨkə̂n Ŋwiə̀ ghà, wɨ̀ gha ɨchî nɨ ɨbenɨ məd chwiə.

⁷Ɨneʼe wə̀d mɔʼɔ mɨ yeʼ ni wɨ̀ faʼa, wɨ̀ bə fàʼ. Ɨneʼe wə̀d mɔʼɔ mɨ yeʼ ni wɨ̀ chwi ənû, wɨ̀ bə chwiə.

⁸Ɨneʼe wə̀d mɔʼɔ mɨ yeʼ ni wɨ̀ timbɨ bə̂d, wɨ̀ bə tìmbɨ̀. Ɨneʼe wə̀d mɔʼɔ mɨ yeʼ ni wɨ̀ naʼ ɨghɨ əmbɨ ə bə̂d, wɨ̀ saŋnɨ. Ɨneʼe wə̀d mɔʼɔ mɨ yeʼ ni wɨ̀ tumbɨ bə̂d, wɨ̀ tumbɨ ənɨ i fîŋ jìm. Ɨneʼe wə̀d mɔʼɔ mɨ yeʼ ni wɨ̀ ghɨ ɨ̀chɔ̀m ənɨ ə bə̂d ŋgəʼ, wɨ̀ ghɨ̀ əne mbɨ ɨghaʼi.

⁹Mbə̀ ghaʼ bə̂d ənɨ tə fîŋ rɨ̀jìm. Mbə̀ ban ɨnû rɨbɔ̀ŋ, yim ɨnû nɨ ghɨ ɨ̀chɔ̀m kwɨ ɨgun.

¹⁰Mbə̀ ghaʼ mbə bɔŋgɔb ɨchî nɨ bɔŋgɔb berɨ ghaʼrɨ ə ɨnyod. Mbə̀ bə wumnɨ mbə bɔŋgɔb chè ɨchî nɨ mbə̀ə wumnɨ ə ɨnyod.

¹¹Tɨ mbə̀ tɔ ghɨ̀ ə ɨgwed ənɨ mbə̀ə fàʼ əmbɨ ə Ŋwiə̀. Mbə̀ saŋ Əzwî ə nyɨ ɨŋga tə fîŋ ghɨ̀ ni mbə̀ faʼ rɨkǎ. Mbə̀ faʼ əmbɨ Ə̀nùŋɨ̀sɨg ənɨ tə fîŋ rɨ̀jìm.

¹²Mbə̀ ghaʼrɨ əwən ɨmbə̀ʼ ɨghɨ mbe nɨ mbə̀ nuŋ rɨkɔndɨ ɨ wòm, yim fîŋ ənɨ mɨ̀nyùmə̀ jìm mbe nɨ mbə̀ə zəə ŋgəʼ bə̀ kɔŋgɨ ə Ŋwiə̀ ənɨ mɨ̀nyùmə̀ jìm.

¹³Bə̂d Ŋwiə̀ mɔʼɔ mɨ kwaŋ ɨghɨ, mbə̀ naʼ ɨghɨ mbe əmbɨ mɨ̀mə̌d. Mbə̀ nɨŋ bə̂d rɨ̀sɔ̀ʼɔ̀ ɨŋga tə nəb.

¹⁴Mbə̀ zɨ əbɔrəbɔd ɨgun ə bə̂d mbe nɨə nwèndɨ̀ tə rɨkyerɨ-ɨwu. Mbə̀ zɨ yeʼ əbɔrəbɔd, kaʼi ndɔ̀n.

¹⁵Mbə̀ ghaʼrɨ mbɨ ə bə̂d mbe nɨə ghaʼə, bə̀ zə̀ʼ mbɨ mbe nɨə zə̀ʼə̀.

¹⁶Mbə̀ chub ənɨ ənû ə mɔʼ mbɨ mbə bɔŋgɔb. Tɨ mbə̀ nɔ ə ɨnyod, àyɨə mbə̀ jɨgnɨ mbɨ ə bə̂d kwa kwa. Tɨ mbə̀ kɔndɨ ə ni mbə berɨ ɨwe chè bə̂d mɨ̀jìm.

¹⁷Tɨ̀ mbə̀ wi ə ɨbə ənɨ ɨbə, àyɨə mbə̀ kywɨ ənywɨ ghɨ̀ yeʼ ɨnû mbe nɨ wə̀d jìm kyerɨ ni à yɨ ɨnû chɔ̀m.

¹⁸Ɨchî mɨ chwiə, mbə̀ ghɨ ɨnû jìm ənɨ əzən əbà ɨ zə ni mbə̀ chub ənɨ əbɔrəbɔd mbɨ ə wə̀d jìm.

¹⁹Mbɨ bɔŋgɔb nɨ mə̀ ghaʼi kwàʼ rɨŋgəʼ, tɨ mbə̀ wi ə pə̀n, àyɨə mbə saŋ ənû nɨ wi pə̀n əmbɨ ə Ŋwiə̀, ɨmbə̀ʼ ɨghəm nɨ ə zɨ ɨŋga Ə̀ŋwàʼnɨ̀ ə Ŋwiə̀ ni, Ə̀nùŋɨ̀sɨg ə ghà ni, “À yɨ mɔ̌ ə wìə̀ pə̀n. Mə bɨrɨ wì.”

²⁰Àyɨə “Njì rɨ mɨ yeʼə zaŋ e wə̀d pə̀n, à naʼ ɨghɨjɨg ɨ bɔ; ədɔʼ ə mɨ yeʼə ne əməd, à nàʼ əghɨ ə mɔʼɔ ɨ bɔ ni wɨ̀ nɔ. À mɨ ghɨ̀ əne, ətu əməd ə bɨrɨ nìd.”

²¹Tɨrə̀ ben e ni ɨnû rɨbɔ̀ŋ baŋ əwe, àyɨə baŋ ɨnû rɨbɔ̀ŋ mbɨ ɨ̀chɔ̀m.