Read Fɨso Fi Rom 16 Bible Online

Rom 16 - Fɨso Fi bible

Rom 16

¹Mə kə̀b ni mbə̀ kyerɨ a njàbɨ Febè. Məd wɨə wèèrɨ̀ ɨŋga ɨfetɨ bə̂d Kristo we rɨ ə Senkrià.

²Mbə̀ nɨŋ əməd ənɨ ɨkum Ə̀nùŋɨ̀sɨg ɨchî nɨ zɨə kuʼ ni mbɨ nɨŋ bə̂d Ŋwiə̀. Mbə̀ bə̀ wèèrɨ̀ əməd mbɨ əghɨ ə mɔʼɔ ze nɨ wɨ̀ biirɨ ɨ nən, ɨmbə̀ʼ ɨghəm nɨ məd ziə fə wèèrɨ̀ bə̂d mɨ̀nɔnɔʼ, bə̀ wèèrɨ̀ əmɨ.

³Mbə̀ chaʼrɨ ə Priskà [3] mbɨ Àkwilà. Mɔ̌ mbɨ mɨ̀mə̌d mbɨə fàʼ əmbɨ Kristo Yeso.

⁴Mbɨ nyaʼa sɔ̀ŋ ə ɨ̀tènɨ̀ ɨmbə̀ʼ əmɨ. Kaʼ àmei mɔ̌ ə nàʼ məben-əwe əmbɨ mɨ̀mə̌d, tɨfetɨ bə̂d Kristo rɨjìm te nɨ kaʼi tɨ mɨ̀Jû tɨə bə̀ nàʼə̀ məben-əwe əmbɨ mɨ̀mə̌d.

⁵Mbə̀ bə̀ chaʼrɨ ɨfetɨ bə̂d Kristo we nɨə bòmnɨ̀ ɨŋga nəb mɨ̀mə̌d. Mbə̀ chaʼrɨ ə Epenetùs. Məd yɨ mɨ sə̀ʼ nɨ mə̀ ghaʼi kwàʼ rɨŋgəʼ. À yɨə məd nyaʼa be ben ə Kristo əbà əbeŋ ze rɨ ə Esià.

⁶Mbə̀ chaʼrɨ ə Mèri. Məd fə faʼ ɨ nən kwàʼ rɨ̀kǎ.

⁷Mbə̀ chaʼrɨ ə Àndronikùs mbɨ Juniàs. Mbɨ yɨ mbɨ ɨfurɨ nɨ tɨ̀ nyaʼa ə nəb ndəŋ ɨnɔ̂n. Bə̂d tom Kristo jeŋgɨ kyerɨ mɨ̀mə̌d kwàʼ ɨchî chɔ̀m. Mbɨ nyaʼa bè ben ə Kristo rəbɔʼ num.

⁸Mbə̀ chaʼrɨ ə Àmpliatùs. Məd yɨ mɨ sə̀ʼ nɨ mə̀ ghaʼi kwàʼ rɨŋgəʼ ɨchî nɨ wɨ̀ yeʼ ənɨ ɨfɔtɨ mbɨ Ə̀nùŋɨ̀sɨg.

⁹Mbə̀ chaʼrɨ ə Òbanùs. Məd yɨə wə̀d ə̀fàʼì Kristo mbɨ na. Mbə̀ bə̀ chàʼrɨ̀ ə Stakìs. Məd yɨ mɨ sə̀ʼ nɨ mə̀ ghaʼi kwàʼ rɨŋgəʼ.

¹⁰Mbə̀ chaʼrɨ ə Apelès. Məd fə chwi ni tə yɨə kàŋ ə wə̀d Kristo. Mbə̀ chaʼrɨ bə̂d mbe nɨ yeʼ ɨŋga nəb Àrìstobulùs.

¹¹Mbə̀ chaʼrɨ ə Hèrɔdiòn. Məd yɨ mɨ əfurɨ. Mbə̀ bə chàʼrɨ̀ bə̂d Kristo mbe nɨ yeʼ ɨŋga nəb Nasisùs.

¹²Mbə̀ chaʼrɨ ə Trifenà mbɨ Trifosà. Mɨ̀mə̌d mbɨə fàʼ əmbɨ Ə̀nùŋɨ̀sɨg. Mbə̀ chàʼrɨ̀ ə Pesì nɨ yeʼ mɨ sə̀ʼ nɨ mə̀ ghaʼi kwàʼ rɨŋgəʼ. Məd fə fàʼ kwàʼ rɨ̀kǎ əmbɨ Ə̀nùŋɨ̀sɨg.

¹³Mbə̀ chaʼrɨ ə Rufùs. Ə̀nùŋɨ̀sɨg fə chɔʼ əməd ənɨ wi. Mbə̀ bə chàʼrɨ̀ ɨŋgɔb məd nɨ bə yeʼ avɨ wum.

¹⁴Mbə̀ chaʼrɨ ə Asinkritùs mbɨ Flegòn mbɨ Hemès mbɨ Pàtrobàs mbɨ Hamàs, bə̀ chàʼrɨ̀ bə̂d Kristo mbe nɨ yeʼ mbɨ mɨ̀mə̌d.

¹⁵Mbə̀ chaʼrɨ ə Fìlologùs mbɨ Julìà mbɨ Nerèùs bə̀ chaʼrɨ njàbɨ məd. Mbə̀ bə chàʼrɨ̀ ə Olimpàs mbɨ ə bə̂d Ŋwiə̀ mɨ̀jìm mbe nɨ yeʼ mbɨ mɨ̀mə̌d.

¹⁶Mbə̀ chaʼrɨ wə̀d mɔʼ mɔʼ kwàʼ ɨchî chɔ̀m. Mbə̀ chaʼrɨ əne chwi ɨghaʼi we nɨ yeʼ əkaʼ bə̂d Kristo. Tɨfetɨ bə̂d Kristo rɨjìm chàʼrɨ̀ əwən.

¹⁷Mbɨ bɔŋgɔb, mə wɨə buʼ ɨbɔ ɨ nən ni mbə̀ we əwən mbɨ ə bə̂d mbe nɨə ghɨ̀ ni bə̂d Kristo ghabrə mbɨ ni mbɨ feb ɨnə̂njɨ̀. Ɨ mbɨə ghɨ̀ əne ɨchî nɨ mbɨə ton ɨnû mbe nɨ mbə̀ nyaʼa fə be kwembɨ. Tɨ mbə̀ tiinɨ ə ɨban mɨ̀mə̌d,

¹⁸ɨmbə̀ʼ ɨghəm nɨ chəi tɨkwɨrɨ bə̂d tɔ̂ ə fàʼ əmbɨ a Ə̀nùŋɨ̀sɨg Kristo. Ɨ mbɨə fàʼ àmei əmbɨ tə rɨbum. Ɨ mbɨə nɨŋ ɨŋgam nɨə nə̀mə̀ wə̀ŋ bə̀ nɨŋ ɨŋgam nɨə bɔtɨə tambɨə bə̂d mbe nɨ chəi mbɨ kyerɨ ənû.

¹⁹Wə̀d jìm ə kyerɨ ni mbə mbɨə zuunɨ Ə̀nùŋɨ̀sɨg. À yɨ əton nɨ ɨghaʼi kaŋ swi ɨŋga mɨ fîŋ ɨmbə̀ʼ əwən. Mə kə̀b ni mbə̀ berɨ ɨwe ɨmbə̀ʼ ghɨ àmei ɨnû mbe nɨ yeʼ mbɨ chɔ̀m fɔrɨ ni mbə̀ chub ənɨ mɨ̀mbûd nɨ chəi mbə̀ kyerɨ ɨchî nɨ ghɨ ɨnû rɨbɔ̀ŋ.

²⁰Ŋwiə̀ we nɨə nàʼ əbɔrəbɔd bɨrɨ zambɨ baŋ ə Satàn, əne ghɨ̀ ni mbə̀ berɨ ɨka ɨgwɨ məd. A Ə̀nùŋɨ̀sɨg Yeso Kristo ghɨ ɨ̀chɔ̀m ənɨ ə nən.

²¹Timotì nɨə fàʼə̀ mbɨ num wɨə bə̀ chàʼrɨ̀ əwən. Lusiùs mbɨ Jasɨ̀n fɔrɨ ə Sosipatà, nɨ yeʼ mbɨ ɨfurɨ, mbɨə bə̀ chàʼrɨ̀ əwən.

²²Mɔ̌ Tetiùs, nɨ ŋwaʼnɨ ə̀ŋwàʼnɨ̀ zɔ̂, ə bə̀ chàʼrɨ̀ əwən ənɨ ɨkum Ə̀nùŋɨ̀sɨg.

²³Gayùs, nɨ mɨə chub əkwɨ məd mbɨ ə bə̂d Kristo mbe nɨə fetɨ ɨŋga nəb məd bə̀ chàʼrɨ̀ əwən. Erastùs, nɨə nuŋ ɨkab ɨŋga əsɨ zɔ̂ mbɨ Kwatùs, wa aŋgɔb, bə̀ chàʼrɨ̀ əwən. [

²⁴A Ə̀nùŋɨ̀sɨg Yeso Kristo ghɨ ɨ̀chɔ̀m ənɨ mbə̀n mɨjìm. À yɨ əne.] [4]

²⁵Tɨ̀ yiirɨ ə Ŋwiə̀ we nɨ tɨ̀ wɨ̀ ghɨ̀ mbə təm kàànɨ̀ ənjìm ɨkə̂n chɔ̀m, ənjìm ɨŋgam we nɨ mɨə ghà ɨmbə̀ʼ ə Yeso Kristo bə̀ fɔrɨ ənjìm ɨnû mbe nɨ nyaʼa ənə̀mə tɨ əŋwe rəŋwe nɨ mbɨ fə du əsaŋ.

²⁶Tɨ̀nîn mbɨ fə toʼ ɨnû mbe əsaŋ ənjìm ɨ̀ŋwàʼnɨ̀ mbe nɨ bə̂d ɨ̀kə̀n Ŋwiə̀ nyaʼa ŋwàʼnɨ̀ ghɨ̀ ni ɨbeŋ ɨjìm kyerɨ. Ŋwìə̀ we nɨ ten i koŋ nyaʼa fə sob əne, ɨmbə̀ʼ ɨbeŋ jìm ben əməd bə̀ zuunɨ əməd.

²⁷Mbə̀ naʼ ɨwumnɨ we nɨ ten i koŋ, ənjìm ə Yeso Kristo, əmbɨ ə Ŋwìə̀ we mɔʼ nɨ berɨ ɨwe! À yɨ əne.