Read Fɨso Fi Rom 3 Bible Online

Rom 3 - Fɨso Fi bible

Rom 3

¹Mɨ̀Jû ə chè bə̂d mbe nɨ kaʼi mɨ̀Jû ənɨ ə ye ə? Njìm ze nɨ wə̀d bɨrɨ jɨg ɨchî nɨ mbɨ ne əməd kɨə ye ə?

²Wɨ̀ bɨrɨ jɨg njìm nɔnɔʼ ənɨ mɨnə̂njɨ̀ jìm. Ənû rɨtu yɨ ni, Ŋwìə̀ nyaʼa bè zɨ̀ i ɨŋgam ɨŋga tɨkyerɨ-ɨbɔ mɨ̀Jû.

³Zɨə kɨə wò yeʼ rɨ ye ɨchî nɨ chəi mbɨ mɔʼɔ nyaʼa ben ɨŋgam we ə? Ɨchî nɨ chəi mbɨ nyaʼa benɨ wa nyaʼa nimnɨ ɨchî nɨ Ŋwìə̀ ə ghɨ̀ ɨnû mbe nɨ wɨ̀ kaʼ ə?

⁴Chə̂! Mbə̀ kyerɨ ni Ŋwìə̀ wɨə ghà rəsìʼ, ka à bè yeʼi ni wə̀d jìm yɨə wə̀d mɨghab. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Mbɨ berɨ chwiə ni ɨŋgam we nɨ àwɔ̀ ə ghàə̀ yɨ ɨŋgam nɨ kuʼnɨ, əne à bɨrɨ jɨg ɨsaʼi əwù ze nɨ mbɨ saʼ əwe.”

⁵Mba ɨnû rɨbɔ̀ŋ mɨ yeʼə chwiə ni Ŋwìə̀ wɨə ghɨ̀ ɨnû nɨ kuʼnɨ, njɨ tɨ̀ kɨə wò ghà ni ye ə? Ni chəi Ŋwìə̀ ə ghɨ̀ ɨnû nɨ kuʼnɨ əwù ze nɨ wɨ̀ sə ɨtəm chə əwa ə? (Mə wɨə ghàm ɨchî nɨ bə̂d mɨ̀sɔŋɨchù ə ghàmə̀.)

⁶Chə̂! À mɨ yeʼ nɨ chəi Ŋwìə̀ ə ghɨ̀ ɨnû nɨ kuʼnɨ, njɨ wɨ̀ kɨə wò saʼ ɨsɨg rɨ ye ə?

⁷Mɨghab mbe nɨ mɨə ghàə̀ mɨ yeʼə ghɨ̀ ni bə̂d kyerɨ rəsìʼ ɨmbə̀ʼ ə Ŋwìə̀ mbɨ ni mbɨ nàʼ ɨwumnɨ ɨ bɔ, njɨ əton nɨ mbɨə kɨrɨ zɨ ɨsaʼi ɨgwɨ num ni mə wɨə ghɨ̀ ɨnû rɨbɔ̀ŋ kɨ ɨmbə̀ʼ ə yè ə?

⁸Njɨ mbə̀ ghà ni, “Tɨ̀ ghɨ ɨbə ɨmbə̀ʼ ɨ̀chɔ̀m yeʼe,” ɨchî nɨ bə̂d mɔʼɔ ə chə̀kɨ̀ əwa ni ɨŋgam wɔ̂ yɨ rɨ na ə? Ŋwìə̀ bɨrɨ zɨ ɨsaʼi ɨgwɨ mɨ̀mə̌d ɨchî nɨ kuʼnɨ.

⁹Əne kɨ ni ye ə? Mbǎ mɨ̀Jû ə wa bɔ̀ŋ chè bə̂d cherə ə? Chə̂! Ka àbei rɨpiî! Tɨ̀ fə chwi ni ɨnû rɨbɔ̀ŋ mbɨə tùmbɨ̀ə̀ bə̂d mɨjìm, əne yɨ mɨ̀Jû mbɨ ə bə̂d nɨ kaʼi mɨ̀Jû.

¹⁰Ə zɨ ɨŋga Ə̀ŋwàʼnɨ̀ ə Ŋwiə̀ ni: “Chəi wə̀d mɔʼɔ əŋgu nɨə ghɨ̀ ɨnû nɨ kuʼnɨ, ka àbei mɔʼ;

¹¹chəi ətu wə̀d mɔʼɔ ə kɨrɨ zeŋ ɨmbə̀ʼ ə Ŋwiə̀, chəi wə̀d nɨə kə̀b kyerɨ ə Ŋwiə̀.

¹²Bə̂d mɨjìm fə fid njìm ənɨ ə Ŋwiə̀. Chəi mbɨə ghɨ̀ ɨnû mbe nɨ Ŋwìə̀ nyaʼa tekɨ mɨ̀mə̌d ni mbɨ ghɨ ə. Chəi wə̀d mɔʼɔ əŋgu nɨə ghɨ̀ ɨ̀chɔ̀m, ka àbei mɔʼ.”

¹³“Tɨ̀fɨ̀g ədɔʼ tɨ mɨ̀mə̌d yɨ ɨghabɨ mɨsî nɨ yeʼ əjə. Ɨ mbɨə nɨŋə mbə mɨchû tambɨə bə̂d.” “Ɨŋgam we nɨə jwɨ̀ rɨŋga ɨchû mɨ̀mə̌d yɨ ɨghabɨ mɨtɨg jɔ.”

¹⁴“Mɨzɔ̂m mbɨ mɨŋgam nɨə tɔbə fîŋ mbɨə jwɨ̀ rɨŋga ɨchû mɨ̀mə̌d.”

¹⁵“Ɨwu mɨ̀mə̌d mbɨə zàmə̀ nɨ wo zwiirɨ bə̂d.

¹⁶Ɨsɨ jìm mbe nɨ mbɨə wòə̀, ɨ mbɨə yènə̀ chə̀kɨ̀ ɨghɨ bə̀ yènə̀ zɨ̀ə̀ ŋgəʼ ɨgwɨ ə bə̂d.

¹⁷Chəi mbɨ kyerɨ ɨchî nɨ tɨ̀ mbɨ chub ənɨ əbɔrəbɔd.”

¹⁸“Chəi mbɨ kyerɨ ni tɨ̀ mbɨ wumnɨ ə Ŋwiə̀.”

¹⁹Tɨ̀nîn tɨ̀ fə kyerɨ ni ɨnû mbe nɨ tɨkə ə ghàə̀, ɨ tɨə ghàə̀ yeʼ əmbɨ ə bə̂d mbe nɨ yeʼ əton rɨkə, ɨmbə̀ʼ tɨ mbɨ berɨ ə ənû nɨ wɨrɨ ghà. Əne Ŋwìə̀ bɨrɨ saʼ bə̂d mɨ̀jìm mbe nɨ yeʼ ɨŋga ɨsɨg.

²⁰Chəi wə̀d mɔʼɔ əŋgu nɨ təm kùʼnɨ̀ ɨfě Ŋwìə̀ ɨchî nɨ wɨə ghɨ̀ ɨnû mbe nɨ yeʼ ɨŋga rɨ̀kə̌. Tɨkə tɨə ghɨ̀ə̀ ni bə̂d kyerɨ ni ɨ mbɨə ghɨ̀ ɨnû rɨbɔ̀ŋ.

²¹Tɨ̀nîn, Ŋwìə̀ fə chwi ɨchî nɨ tɨ̀ bə̂d təm kùʼnɨ̀ ɨfě məd. Chəi ənû nɨ təm kùʼnɨ̀ ɨfě məd berɨ ənû nɨ ghɨ mbɨ rɨkə, ka à be yeʼi ni tɨkə rɨ Mose mbɨ ə bə̂d ɨ̀kə̀n Ŋwiə̀ nyaʼa fə ghà əne.

²²Ŋwiə̀ fə ghɨ̀ ni bə̂d mɨ̀jìm mbe nɨ benɨ təm kùʼnɨ̀ ɨfě məd ənjìm ɨchî nɨ mbɨ ben ə Yeso Kristo. Chəi ɨkwepɨ əkaʼ bə̂d,

²³ɨmbə̀ʼ ɨghəm nɨ bə̂d mɨ̀jìm fə ghɨ̀ ɨnû rɨbɔ̀ŋ əne chəi wɨrɨ i ɨzeŋɨ zeŋɨ Ŋwiə̀ ɨŋga mɨ̀mə̌d.

²⁴Ŋwìə̀ fə ghɨ̀ ni mbɨ təm kùʼnɨ̀ ɨchî nɨ wɨ̀ ghɨ ɨ̀chɔ̀m ənɨ mɨ̀mə̌d. Ɨ̀chɔ̀m we yɨ ɨneʼe nɨ wɨ̀ naʼ əmbɨ mɨ̀mə̌d ənjìm ə Kristo Yeso nɨ nyaʼa choʼ ɨtu mɨ̀mə̌d.

²⁵Ŋwiə̀ nyaʼa chà əməd ənɨ əghɨ ə̀fà ɨmbə̀ʼ ənəm əməd ə so mba ɨnû rɨbɔ̀ŋ ənjìm ɨchî nɨ tɨ̀ nuŋ fîŋ ɨgwɨ məd. Ŋwìə̀ nyaʼa chwi ənjìm ɨnyiʼ fîŋ ni tə wɨə ghɨ̀ ɨnû nɨ kuʼnɨ ɨchî nɨ chəi wɨ̀ nyaʼa chə bə̂d mbe nɨ nyaʼa be ghɨ̀ ɨnû rɨbɔ̀ŋ.

²⁶Wɨ̀ nyaʼa ghɨ̀ əne ɨmbə̀ʼ chwi tɨ̀nîn ni məd ziə wɨə ghɨ̀ ɨnû nɨ kuʼnɨ mbɨ ni məd ziə wɨə ghɨ̀ ni bə̂d mbe nɨ nuŋ fîŋ ɨgun ə Yeso təm kùʼnɨ̀.

²⁷Əne tɨ̀ kɨə wɨrɨə goŋ ɨgɔ̂ ɨmbə̀ʼ ə ye ə? Chə wɨrɨ i ənû ə mɔʼɔ nɨ tɨ̀ rɨ goŋ ɨgɔ̂ ɨmbə̀ʼ əzɨ əwən. Əton ə kɨ ni yè ə? À kɨ ɨmbə̀ʼ ɨghəm nɨ tɨə nùŋ rɨkə ə? Chə̂! À yɨ ɨmbə̀ʼ ɨghəm nɨ tɨ̀ benɨ.

²⁸Tɨ̀ benɨ ni wə̀d ə təm kùʼnɨ̀ ənjìm ɨbenɨ, kaʼi ɨmbə̀ʼ ɨchî nɨ wɨə ghɨ̀ ɨnû mbe nɨ yeʼ ɨŋga rɨ̀kə̌.

²⁹Ŋwìə̀ wa kɨə mei wɨ mɨ̀Jû ə? Ka məd wa kɨə bə i Ŋwìə̀ bə̂d mbe nɨ kaʼi mɨ̀Jû ə? Ee, məd yɨə bə̀ ə Ŋwìə̀ bə̂d mbe nɨ kaʼi mɨ̀Jû,

³⁰ɨchî nɨ məd mei we mɔʼ. Wɨ̀ bɨrɨ ghɨ ni bə̂d mbe nɨ mbɨ ne mɨ̀mə̌d təm kùʼnɨ̀ ənjìm ɨbenɨ. Wɨ̀ bɨrɨ bɨ ghɨ̀ ni bə̂d mbe nɨ chəi mbɨ ne mɨ̀mə̌d bə təm kùʼnɨ̀ ənjìm ɨbenɨ.

³¹Əne tɨ̀ wa waʼ rɨkə ɨmbə̀ʼ ɨbenɨ wɔ̂ ə? Chə̂! Àyɨə tɨ̀ wɨə yim rɨkə kwàʼ ɨchî chɔ̀m.