Read Fɨso Fi Rom 5 Bible Online

Rom 5 - Fɨso Fi bible

Rom 5

¹Ɨchî nɨ Ŋwìə̀ ben ni tɨ̀ fə təm kùʼnɨ̀ ənjìm a ɨbenɨ, əne tɨ̀ wɨ ənɨ əbɔrəbɔd mbɨ ə Ŋwiə̀ ənjìm a Ə̀nùŋɨ̀sɨg Yeso Kristo.

²Ənjìm ɨchî nɨ tɨ̀ ben əməd, tɨ̀ fə bə̀ nyɨ ɨŋga ɨ̀chɔ̀m we nɨ tɨ̀ yeʼ ɨŋga tɨ̀nîn. Əne tɨ̀ goŋ ɨgɔ̂ nùŋ ta rɨkɔndɨ wòm ni tɨ̀ bɨrɨ chubɨ mbɨ ə Ŋwiə̀ ɨŋga ɨwumnɨ məd.

³Ka àmei əne, tɨ̀ bɨrɨ bɨ goŋ ɨgɔ̂ ɨmbə̀ʼ ɨchî nɨ tɨə zəə ŋgəʼ, ɨmbə̀ʼ ɨghəm nɨ tɨ̀ kyerɨ ni ɨzə-ŋgəʼ wɨə ghɨ̀ ni bə̂d nyiʼ fîŋ,

⁴ɨnyiʼ fîŋ wɨə ghɨ̀ ni bə̂d berɨ mɨchî chɔ̀m, mɨchî chɔ̀m mbɨə ghɨ̀ ni bə̂d berɨ ɨkɔndɨ ni Ŋwìə̀ bɨrɨ ghɨ ənû ze nɨ wɨ̀ kaʼi.

⁵Ka ɨchî nɨ tɨ̀ nuŋ ɨkɔndɨ wɨə tam i əwa, ɨmbə̀ʼ ɨghəm nɨ Ŋwìə̀ fə chwi ni tə ghaʼ əwa, əne wɨ̀ fə zɨ̀ ɨghaʼi ɨŋga ta fîŋ ənjìm Əzwî ə Zeŋɨ ze nɨ wɨ̀ naʼ ɨ na.

⁶Ənɨ tɨ̀ nyaʼa kɨrɨ bɔd, nyùmə̀ nyaʼa kùʼ əne Kristo nyaʼa kwɨ ɨgwɨ ɨtu bə̂d mbe nɨ chəi mbɨ nyaʼə wumnɨ ə Ŋwiə̀.

⁷Təsìʼ yɨ ni zɨə kàŋ se əmbɨ ə wə̀d ni wɨ̀ kwɨ ɨgwɨ ətu wə̀d nɨ təm kùʼnɨ̀, ka à be yeʼi ni wə̀d mɔʼɔ we tɨ̀ wɨ̀ yim fîŋ kwɨ ɨgwɨ ətu ə wə̀d chɔ̀m.

⁸Ŋwìə̀ nyaʼa chwi ni tə ghaʼ əwa əni: Ənɨ tɨ̀ nyaʼa kɨrɨ ghɨ̀ ɨnû rɨbɔ̀ŋ, Kristo nyaʼa kwɨ ɨgwɨ mba ɨtu.

⁹Tɨ̀nîn nɨ tɨ̀ fə təm kùʼnɨ̀ ənjìm ənəm ze nɨ Kristo nyaʼa chəmnɨ, wɨ̀ bɨrɨ kaŋ ghɨ ni tɨ Ŋwìə̀ wɨrɨ sə i ɨtəm mbɨ na,

¹⁰ɨmbə̀ʼ ɨghəm nɨ ənɨ tɨ̀ nyaʼa kɨrɨ bə̂d pə̀n Ŋwiə̀, wɨ̀ nyaʼa màànɨ̀ taŋ mbɨ na ənjìm ɨvɨ Wan məd. Tɨ̀nîn nɨ tɨ̀ fə maanɨ taŋ, ɨ̀tènɨ̀ Kristo bɨrɨ ghɨ ni tɨ̀ jwɨ rəŋgəʼ.

¹¹Kaʼi əjìm əze, tɨ̀ wɨə bə̀ goŋ ɨgɔ̂ ɨmbə̀ʼ ə Ŋwiə̀ ənjìm a Ə̀nùŋɨ̀sɨg Yeso Kristo. Məd fə màànɨ̀ a taŋ mbɨ ə Ŋwiə̀.

¹²Ɨchî nɨ ɨnû rɨbɔ̀ŋ nyaʼa yeʼe ɨŋga ɨsɨg ənjìm wə̀d mɔʼ, ɨvɨ bə̀ yeʼe ənjìm ɨnû rɨbɔ̀ŋ, əne ɨvɨ nyaʼa yeʼe əmbɨ ə bə̂d mɨjìm ɨmbə̀ʼ ɨghəm nɨ bə̂d mɨjìm nyaʼa ghɨ ɨnû rɨbɔ̀ŋ.

¹³Ɨnû rɨbɔ̀ŋ nyaʼa fə sɨ i ɨŋga ɨsɨg bɔŋ Ŋwìə̀ nyaʼa sɨə nàʼ rɨkə. Chəi mbɨə taŋgɨ ɨnû rɨbɔ̀ŋ ənɨ chəi rɨkə əŋgu.

¹⁴Àyɨə ɨvɨ wɨə nyaʼə tùmbɨ̀ ɨsɨg kɔ rɨ ənɨ ə nyùmə̀ Adàm wò pè ənɨ ə nyùmə̀ Mose. Ɨ wɨə nyaʼə tùmbɨ̀ əne wò pè ɨgwɨ ə bə̂d mbe nɨ chəi mbɨ nyaʼa ghɨ ɨnû rɨbɔ̀ŋ ɨghabɨ ə Adàm. Adàm yɨə nyaʼə əmɨgɨ tɨ ənɨ ə wə̀d we nɨ nyaʼa wo yeʼe.

¹⁵Àyɨə ka ɨneʼe we nɨ Ŋwìə̀ ə nàʼə̀ yɨ i əndəŋ əndəŋ mbɨ ɨchî nɨ Abràham nyaʼa ɨgu-ənû. À mɨ yeʼ nɨ bə̂d mɨ̀nɔnɔʼ nyaʼa kwɨ ənjìm ɨgu-ənû wə̀d mɔʼ, əne yɨə Adàm, njɨ à yɨə kaŋ rəsìʼ ni ɨ̀chɔ̀m Ŋwiə̀ mbɨ ɨneʼe we nɨ Ŋwìə̀ ə nàʼə̀ bɨrɨ kaŋ nɔʼ əku əmbɨ ə bə̂d mɨ̀nɔnɔʼ ənjìm ɨ̀chɔ̀m wə̀d mɔʼ, əne yɨə Yeso Kristo.

¹⁶Ka ɨneʼe we nɨ Ŋwìə̀ ə nàʼə̀ yɨ i ɨghabɨ əghɨ ze nɨ nyaʼa ghɨ ənɨ ə nyùmə̀ we nɨ wə̀d we mɔʼ nyaʼa gu ənû. Ŋwìə̀ nyaʼa sob ɨsaʼi ɨgwɨ ɨgu-ənû wə̀d we mɔʼ, əne zɨ̀ ɨsaʼi ɨgwɨ ə bə̂d mɨjìm. Àyɨə ɨneʼe we nɨ Ŋwìə̀ ə nàʼə̀, nɨ nyaʼa yeʼe ənjìm tɨ̀gurɨ-ɨnû nɔnɔʼ, nyaʼa ghɨ̀ Ŋwìə̀ ben ni bə̂d ə təm kùʼnɨ̀.

¹⁷À mɨ yeʼ nɨ ɨvɨ wɨə nyaʼə tùmbɨ̀ ɨsɨg ənjìm ɨgu-ənû wə̀d mɔʼ, njɨ à yɨə bə̀ rəsìʼ ni bə̂d mbe nɨ jɨg ɨ̀chɔ̀m nɔnɔʼ bə̀ jɨg ɨneʼe we nɨ ghɨ ni mbɨ təm kùʼnɨ̀ bɨrɨ chub ɨkǎ tùmbɨ̀ ɨsɨg ənjìm ə wə̀d mɔʼ, əne yɨə Yeso Kristo.

¹⁸Əne ɨchî nɨ ɨgu-ənû wə̀d mɔʼ nyaʼa zɨ ɨsaʼi ɨgwɨ ə bə̂d mɨjìm, əne tɨ̀ghɨrɨ-ɨnû wə̀d mɔʼ we nɨ təm kùʼnɨ̀ fə ghɨ̀ bə̂d mɨjìm təm kùʼnɨ̀ bə̀ ghɨ̀ ni bə̂d mɨ̀jìm jɨg ɨ̀tènɨ̀.

¹⁹Ɨchî nɨ ənjìm rɨ̀zuə̀ wə̀d mɔʼ, bə̂d mɨ̀nɔnɔʼ mbɨə nyaʼə sɨə ghɨ̀ ɨnû rɨbɔ̀ŋ, əne bə̂ ənjìm ɨchî nɨ wə̀d mɔʼ nyaʼa zuunɨ, bə̂d mɨ̀nɔnɔʼ bɨrɨ təm kùʼnɨ̀.

²⁰Tɨkə nyaʼa yeʼe ɨ ghɨ ni ɨnû rɨbɔ̀ŋ nɔʼ. Àyɨə əsɨ ze nɨ ɨnû rɨbɔ̀ŋ nɔʼɔ, ɨ̀chɔ̀m Ŋwiə̀ bɨrɨ nɔʼ chè,

²¹ɨmbə̀ʼ ɨchî nɨ ɨnû rɨbɔ̀ŋ nyaʼə tùmbɨ̀ ɨsɨg ənjìm ɨvɨ, əne bə̂ ɨ̀chɔ̀m bɨrɨ bɨ tumbɨ ɨsɨg ənjìm ɨchî nɨ bə̂d təm kùʼnɨ̀. Əze ə bɨrɨ ghɨ ni bə̂d jɨg ɨ̀tènɨ̀ rɨ mì ənjìm ə Yeso Kristo a Ə̀nùŋɨ̀sɨg.