Read Fɨso Fi Rom 8 Bible Online

Rom 8 - Fɨso Fi bible

Rom 8

¹Tɨ̀nîn chəi wə̀d mɔʼɔ nɨ tɨ̀ wɨ̀ zɨ̀ ɨsaʼi ɨgwɨ ə bə̂d mbe nɨ yeʼ ənɨ ɨfɔtɨ mbɨ Kristo Yeso,

²ɨmbə̀ʼ ɨghəm nɨ ɨkə Əzwî we nɨə ghɨ̀ ni bə̂d jɨg ɨ̀tènɨ̀ ɨchî nɨ mbɨ yeʼ ənɨ ɨfɔtɨ mbɨ Kristo Yeso fə chɨ̀ əmɨ rɨŋga tɨkə te nɨə ghɨ̀ wə̀d ghɨ̀ ɨnû rɨbɔ̀ŋ əne kwɨ.

³Ənû ze nɨ chəi rɨkə nyaʼa ghɨ̀ ɨmbə̀ʼ ɨchî nɨ nyamnyod ə feenɨə ɨsɨg, Ŋwìə̀ fə ghɨ̀. Wɨ̀ nyaʼa ghɨ̀ əne ɨchî nɨ wɨ̀ nyaʼa cha i Wan wɨ̀ yeʼe ɨghabɨ ə wə̀d ɨnû rɨbɔ̀ŋ ɨmbə̀ʼ nimnɨ ɨnû rɨbɔ̀ŋ. Əne wɨ̀ nyaʼa nimnɨ ɨnû rɨbɔ̀ŋ ɨchî nɨ wɨ̀ nyaʼa naʼ i ɨnyod ənɨ əghɨ ə̀fà.

⁴Ŋwiə̀ nyaʼa ghɨ̀ əne ɨmbə̀ʼ ɨnû mbe nɨ kuʼnɨ ɨchî nɨ zɨə yeʼ ɨŋga rɨ̀kə̌ mbɨ jwɨ ənɨ rəsìʼ ɨŋga mba mbe nɨə chub ɨchî nɨ Əzwî ə kəbɨ, kaʼi ɨchî nɨ nyamnyod kəbɨ.

⁵Bə̂d mbe nɨə chub ɨchî nɨ nyamnyod kəbɨ, mbɨə nùŋ tə fîŋ yeʼ ɨgun ɨghɨ mbe nɨ nyamnyod ə feenɨə. Àyɨə mbe nɨə chub ɨchî nɨ Əzwî ə kəbɨ, mbɨə nùŋ tə fîŋ yeʼ ɨgun ɨghɨ mbe nɨ Əzwî ə nàʼə̀.

⁶Wə̀d mɨ nuŋ fîŋ ɨgwɨ ɨghɨ mbe nɨ nyamnyod ə feenɨə, wɨ̀ bɨrɨ kwɨ, àyɨə wɨ̀ mɨ nuŋ fîŋ yeʼ ɨgwɨ ɨghɨ mbe nɨ Əzwî ə nàʼə̀, wɨ̀ bɨrɨ jɨg ɨ̀tènɨ̀ bə̀ chub ənɨ əbɔrəbɔd.

⁷Fîŋ ze nɨə feenɨ ɨghɨ mbe nɨ nyamnyod ə kəbə zɨə ghɨ̀ ɨnû mbe nɨ chəi Ŋwìə̀ kəbɨ. Chəi zɨə nùŋ tɨkə rɨ Ŋwiə̀. À yɨ rəsìʼ ni chəi zɨ bɨrɨ nɔ nùŋ.

⁸Chəi bə̂d mbe nɨə ghɨ̀ ɨnû mbe nɨ nyamnyod kəbɨ mbe tɨ̀ mbɨ ghɨ̀ ni fîŋ Ŋwìə̀ bɔŋ ə.

⁹Àyɨə chəi mbə̀n ə ghɨ̀ ɨnû mbe nɨ nyamnyod ə feenɨə. Mbə mbɨə ghɨ̀ yeʼ mbe nɨ Əzwî ə ghà ɨ nən, əne yɨ əwù ze nɨ Əzwî ə Ŋwiə̀ ə kaŋ yeʼ ɨŋga nən. Ka wə̀d we nɨ chəi Əzwî ə Kristo ɨŋga məd yɨ i wə̀d Kristo.

¹⁰Kristo mɨ yeʼ ənɨ ɨfɔtɨ mbɨ nən, ka à bè yeʼi ni tə nyamnyod fə kwɨ ɨmbə̀ʼ ɨnû rɨbɔ̀ŋ, ə əzwî ə zɨ ɨkǎ ɨmbə̀ʼ ɨghəm nɨ mbə̀ fə təm kùʼnɨ̀.

¹¹À mɨ yeʼ nɨ Əzwî ə wə̀d we nɨ nyaʼa zwemnɨ ə Yeso ə yeʼ ɨŋga nən, njɨ məd we nɨ nyaʼa zwemnɨ ə Kristo bɨrɨ bɨ naʼ ɨ̀tènɨ̀ əmbɨ tə nyamnyod te nɨə kwɨə. Wɨ̀ bɨrɨ ghɨ əne ənjìm Əzwî əməd ze nɨ yeʼ ɨŋga nən.

¹²Əne, kyɨə bɔŋgɔb, tɨ̀ yɨə bə̂d njɔ, àyɨə kaʼi əmbɨ ə nyamnyod, ɨmbə̀ʼ chub ɨchî nɨ nyamnyod kəbɨ.

¹³Mbə mɨ chub ɨchî nɨ nyamnyod kəbɨ, mbə bɨrɨ kwɨ, àyɨə mbə mɨ che ənjìm Əzwî zwiirɨ ɨnû rɨbɔ̀ŋ mbe nɨ nyamnyod ə ghɨ̀ə̀, mbə bɨrɨ tènə̀.

¹⁴Bə̂d mɨjìm mbe nɨ Əzwî ə Ŋwiə̀ ə tùmbɨ̀ə̀ yɨə bɔn Ŋwiə̀.

¹⁵Chəi Əzwî ze nɨ Ŋwìə̀ fə naʼ ɨ nən ə ghɨ̀ ni mbə ben ɨ̀bòʼò, əne wɨrɨ kɔ bɔ, àyɨə mbə fə berɨ Əzwî ze nɨ ghɨ əwən ənɨ ə bɔn Ŋwiə̀. À yɨ Əzwî ə ghɨ ni tɨ̀ kyeŋ ni, “Mbǎʼ! mɨ Mbǎʼ!”

¹⁶Əzwî ziə fə fɔtɨ mbɨ mba ɨzwî ghà ni tɨ̀ yɨə bɔn Ŋwiə̀.

¹⁷Tɨ̀ mɨ yeʼ bɔn, əne yɨ ni tɨ̀ yɨ mə̀jɨnəb Ŋwiə̀ nɨ fɔtɨ ənû əjɨnəb mbɨ Kristo. Əne yɨ ənɨ tɨ̀ zə ŋgəʼ mbɨ məd ɨmbə̀ʼ bɨ berɨ ɨwumnɨ we nɨ Ŋwìə̀ bɨrɨ naʼ ɨ bɔ.

¹⁸Mə kyerɨ ni chəi ŋgəʼ ze nɨ tɨə zəə rɨ̀nîn kùʼ ənɨ ɨzeŋɨ zeŋɨ we nɨ Ŋwìə̀ bɨrɨ chwi ɨ na.

¹⁹Ɨghɨjìm mbe nɨ Ŋwìə̀ tekɨ mbɨə kàŋə̀ wòmə̀ ni wɨ̀ chwi bɔn mbe nɨ yeʼ mbɨ məd,

²⁰ɨmbə̀ʼ ɨghəm nɨ ɨghɨjìm mbe nɨ wɨ̀ nyaʼa tekɨ nyaʼa berɨ chè ətu ə̀kǒ. Chəi mbɨ nyaʼa berɨ che ətu əko ənɨ ə ɨghəm. Mbɨ nyaʼa berɨ chè ɨchî nɨ wə̀d we nɨ nyaʼa tekɨ ɨghɨ mbe nyaʼa kəbɨ, bə̀ nùŋ ɨkɔndɨ wòm

²¹ni wɨ̀ bɨrɨ chɨ ɨghɨ mbe nɨ wɨ̀ nyaʼa tekɨ ɨmbə̀ʼ tɨ mbɨ bɔb ə. Wɨ̀ bɨrɨ ghɨ̀ mbɨ chub ənɨ ə ɨghəm ɨŋga ɨzeŋɨ zeŋɨ, ɨmbə̀ʼ ɨghəm nɨ mbɨ yɨə bɔn Ŋwiə̀.

²²Tɨ̀ kyerɨ ni ɨ pe rɨ̀nîn, ɨghɨjìm mbe nɨ Ŋwìə̀ nyaʼa tekɨ mbɨə kɨrɨ chwem ɨghabɨ əyi nɨə zu rɨbuʼ ənɨ wɨə nombɨə.

²³Ka àmei ɨghɨ mbe nɨ Ŋwìə̀ nyaʼa tekɨ mbe ə chwèmə̀. Mba bə nɨ Əzwî ə Ŋwiə̀ ə yeʼ ɨŋga na, nɨ Əzwî ze ə yeʼ ɨneʼe rɨtu we nɨ Ŋwìə̀ naʼ ɨ na, wɨə bə̀ chwèm ɨŋga ta fîŋ ɨchî nɨ tɨə wòmə̀ ni Ŋwìə̀ nɨŋ əwa ənɨ mbi bɔn, ɨmbə̀ʼ choʼ ta nyamnyod tɨ ənɨ ŋgəʼ jìm.

²⁴Ɨchî nɨ tɨ̀ nuŋ rɨkɔndɨ ɨchî wɔ̂, Ŋwìə̀ fə chɨ əwa rəŋgəʼ. Ɨghɨ ze nɨ tɨə zəə əne nùŋ rɨkɔndɨ wòm, kaʼi ɨnû nɨ tɨ̀ rɨ̀ nùŋ ɨkɔndɨ wòm. À kɨə we nɨə nùŋ ɨkɔndɨ wòm əghɨ ze nɨ wɨə zə ə?

²⁵À mɨ yeʼ nɨ tɨə nùŋ ɨkɔndɨ wòm əghɨ ze nɨ chəi tɨə zəə, njɨ tɨ̀ bɨrɨ wòm mbɨ ɨyim fîŋ.

²⁶À yɨə bə̀ əndəŋ əndəŋ ni Əzwî ə zɨə wèèrɨ̀ əwa ɨchî nɨ tɨ̀ bɔrɨ, ɨmbə̀ʼ ɨghəm nɨ chəi tɨ̀ kyerɨ ɨchî nɨ kɔŋgɨ ə Ŋwiə̀ ɨchî nɨ tɨ̀ berɨ nɨ kɔ̀ŋgɨ̀. Àyɨə ənɨ chəi tɨ̀ berɨ ɨŋgam nɨ ghàm, Əzwî ziə ə zɨə kɔ̀ŋgɨ̀ ə Ŋwiə̀ ənɨ a ɨghəm.

²⁷Əne Ŋwìə̀ we nɨə kyèʼrɨ̀ə̀ fîŋ ə kyerɨ ɨkɔndɨ we nɨ Əzwî ə berɨ, ɨmbə̀ʼ ɨghəm nɨ Əzwî ə zɨə kɔ̀ŋgɨ̀ ə Ŋwiə̀ ɨgwɨ ə bə̂d Ŋwiə̀ ɨchî nɨ Ŋwìə̀ kəbɨ.

²⁸Tɨ̀ kyerɨ ni ənɨ ɨnû jìm, Ŋwìə̀ wɨə fàʼə̀ ni bə̂d mbe nɨ ghaʼ əməd zə ɨ̀chɔ̀m, əne yɨə bə̂d mbe nɨ wɨ̀ nyaʼa tɔŋ ni mbɨ yeʼ mbɨ bə̂d ɨchî nɨ wɨ̀ nyaʼa fə nuŋɨ.

²⁹Bə̂d mbe nɨ Ŋwiə̀ nyaʼa be kyerɨ, wɨ̀ nyaʼa fə bə̀ chɔʼ nùŋ ni mbɨ bɨrɨ yeʼ ɨghabɨ i Wan, ɨmbə̀ʼ Wan we yeʼ wan fə̀d ɨŋga ɨnəbɨ kyeŋ.

³⁰Bə̂d mbe nɨ wɨ̀ nyaʼa chɔʼɔ, wɨ̀ nyaʼa bə̀ tɔŋ ənɨ mbi; mbe nɨ wɨ̀ nyaʼa tɔŋə, wɨ̀ nyaʼa bə̀ ghɨ̀ mbɨ təm kùʼnɨ̀; mbe nɨ wɨ̀ nyaʼa ghɨ mbɨ təm kùʼnɨ̀, wɨ̀ nyaʼa bə̀ ghɨ̀ mbɨ berɨ ɨwumnɨ.

³¹Tɨ̀ kɨə wò gha ni ye ɨmbə̀ʼ ənû zɔ̂ ə? Ŋwìə̀ mɨ yeʼ i mbɨ na, à kɨə we nɨ tɨ̀ wɨ̀ baŋ əwa ə?

³²Məd we nɨ chəi wɨ̀ nyaʼa yim i Wan rəbɔʼɔ, àyɨə wɨ̀ nyaʼa nàʼ əməd ənɨ əghɨ ə̀fà ɨgwɨ mba ɨtu mbà mɨjìm, ka məd mbɨ i Wan wa bɨrɨ naʼ i ɨghɨjìm ɨ na ə?

³³À kɨə we nɨ bɨrɨ zɨ ɨsaʼi ɨgun ə bə̂d mbe nɨ Ŋwìə̀ chɔʼ ə? À yɨə Ŋwìə̀ benɨ ni mbɨ fə təm kùʼnɨ̀.

³⁴À kɨə we nɨ bɨrɨ gha ni mbɨ fə gù ɨsaʼi ə? À wa kɨə [1] Kristo Yeso nɨ nyaʼa kwɨ, ee, nɨ Ŋwìə̀ nyaʼa zwemnɨ, nɨ chub əbà əbɔ ə jɨgɨ ə Ŋwiə̀, kɔ̀ŋgɨ̀ əməd ɨgwɨ mba ɨtu ə?

³⁵À kɨə we bɨrɨ ghabrɨ əwa tɨ ənɨ ɨchî nɨ Kristo ghaʼ əwa ə? À kɨə ŋgəʼ, kɨ̀ à kɨ ɨnû ka ka, kɨ̀ à kɨ ənû nɨ nwendɨ tɨkyerɨ-ɨwu, kɨ̀ à kɨ ə njì kǎ kǎ, kɨ̀ à kɨ ənû nɨ yen tɨ̀sɔ̀ʼ ɨkyerɨ, kɨ̀ à kɨ ənû nɨ nim, kɨ̀ à kɨ ənû nɨ kwɨ ɨchû ɨbi ə?

³⁶Ə zɨ ɨŋga Ə̀ŋwàʼnɨ̀ ə Ŋwiə̀ ni, “Ɨmbə̀ʼ əwe, bə̂d mbɨə zwiirɨ əwa ɨni jìm. Ɨ mbɨə nɨŋ əwa ɨghabɨ ni tɨ̀ yɨə njɨ̀g nɨ mbɨə wo kyemɨ.”

³⁷Chə̂, ɨŋga ɨnû mbɔ̂ jìm, tɨ̀ chè bə̂d mbe nɨ che bid ənjìm əməd we nɨ ghaʼ əwa.

³⁸Mə kàŋ kyerɨ ni ka àbei ɨvɨ, kɨ̀ ɨ̀tènɨ̀, kɨ̀ mbɨ̀aŋgɨrə̀, kɨ̀ ɨzwî mbe nɨ yeʼ əton ɨkaŋ, kɨ̀ ɨghɨ mbe nɨ yeʼ rɨ̀nîn, kɨ̀ mbe nɨ bɨrɨ yeʼe,

³⁹kɨ̀ ɨghɨ mbe nɨ yeʼ ɨkaŋ, kɨ̀ mbe nɨ yeʼ ɨŋga si, kɨ̀ əghɨ ə mɔʼɔ ə cherə rəbɔʼ ɨghɨ mbe nɨ Ŋwiə̀ tekɨ, mbe tɨ̀ mbɨ ghabrɨ əwa tɨ ənɨ ɨchî nɨ Ŋwìə̀ ghaʼ əwa ɨchî nɨ tɨ̀ yeʼ ənɨ ɨfɔtɨ mbɨ Kristo Yeso, a Ə̀nùŋɨ̀sɨg.