Read Fɨso Fi 1 Kɔrèn 1 Bible Online

1 Kɔrèn 1 - Fɨso Fi bible

1 Kɔrèn 1

¹À yɨə mɔ̌ Pɔ̂l mbɨ wa aŋgɔb Sòstenès ŋwaʼnɨ ə̀ŋwàʼnɨ̀ zɔ̂. Ŋwìə̀ nyaʼa tɔŋ əmɨ ɨchî nɨ wɨ̀ nyaʼa kə̀b ni mə yeʼ wə̀d tom Kristo Yeso.

²Tɨ̀ wɨə ŋwaʼnɨ əmbɨ ɨfetɨ bə̂d Ŋwiə̀ we rɨ ə Kɔrèn, əmbɨ ə bə̂d mbe nɨ Ŋwìə̀ ghɨ̌ mbɨ zeŋ ɨchî nɨ mbɨ yeʼ ənɨ ɨfɔtɨ mbɨ Kristo, nɨ Ŋwìə̀ nyaʼa bə̀ tɔŋə ni mbɨ yeʼ mbi bə̂d. Tɨ̀ wɨə bə̀ ŋwaʼnɨ əmbɨ ə bə̂d mɨ̀jìm mbe nɨə wumnɨ a Ə̀nùŋɨ̀sɨg Yeso Kristo ɨsɨ jìm. Məd yɨ Ə̀nùŋɨ̀sɨg mɨ̀mə̌d bə̀ fɔrɨ wa.

³Ŋwiə̀ a Mbǎʼ mbɨ Ə̀nùŋɨ̀sɨg Yeso Kristo ghɨ ɨ̀chɔ̀m ənɨ ə nən bə̀ naʼ əbɔrəbɔd ɨ nən.

⁴Mə wɨə nàʼə̀ məben-əwe əmbɨ ə Ŋwiə̀ ɨghəm jìm ɨmbə̀ʼ ɨ̀chɔ̀m we nɨ wɨ̀ che ənjìm ə Kristo Yeso ghɨ̀ ənɨ ə nən.

⁵Wɨ̀ fə nàʼ mɨneʼe ɨ nən ənɨ mɨnə̂njɨ̀ jìm ɨchî nɨ mbə̀ yeʼ ənɨ ɨfɔtɨ mbɨ Kristo. Wɨ̀ fə ghɨ̀ ni mbə̀ gha ɨnû jìm mbe nɨ wɨ̀ kə̀bɨ ni mbə̀ ghǎ. Wɨ̀ nyaʼa bə̀ ghɨ̀ ni mbə̀ kyerɨ ɨnû jìm mbe nɨ wɨ̀ kəbɨ ni mbə̀ kyerɨ.

⁶Əzɔ̂ ə chwi ɨ nən ni ɨnû mbe nɨ mɨə ghà ɨmbə̀ʼ ə Kristo berɨ yeʼ ənû rəsìʼ.

⁷Əne chəi mbə̀ kwaŋ ɨneʼe mɔʼɔ we nɨ Əzwî ə nàʼ ɨchî nɨ mbə̀ə wòm ənɨ tə fîŋ rɨjìm ni a Ə̀nùŋɨ̀sɨg Yeso Kristo wɨrɨ yeʼe.

⁸Məd bɨrɨ ghɨ ni mbə̀ təm kàànɨ̀ wò pè ənɨ ɨnwǐ, ɨmbə̀ʼ tɨ wɨ̀ zə i ənû rɨbɔ̀ŋ ə mɔʼɔ ɨgwɨ nən əni ze nɨ a Ə̀nùŋɨ̀sɨg Yeso Kristo bɨrɨ wɨrɨ yeʼe.

⁹Ŋwìə̀ we nɨə ghɨ̀ ənû ze nɨ wɨ̀ kaʼi nyaʼa tɔŋ əwən ni mbə̀ chub ənɨ ɨfɔtɨ mbɨ Wan məd Yeso Kristo a Ə̀nùŋɨ̀sɨg.

¹⁰Mbɨ bɔŋgɔb, mə wɨə buʼ ɨbɔ ɨ nən ənɨ ɨkum a Ə̀nùŋɨ̀sɨg Yeso Kristo ni mbə̀n mɨjìm chub ənɨ ənû ə mɔʼ, mbɨ ni tɨ ə̀ghàbrɨ̀ ə nyɨ i əkaʼ nən, àyɨə mbə̀ nuŋ tə fîŋ ənɨ zɨ mɔʼ bə̀ nùŋ tə rɨkɔndɨ ənɨ wɨ mɔʼ.

¹¹Mbɨ bɔŋgɔb, mə wɨə ghà əne ɨmbə̀ʼ ɨghəm nɨ bə̂d mɔʼɔ rɨŋga ɨnəbɨ Kloè fə ghà ɨ num ni mbə mbɨə tàŋə̀.

¹²Ənû nɨ mɨə ghàə̀ yɨ ni wɨ mɔʼ rəbɔʼ nən wɨə ghàə̀ ni tə wɨə beenɨ əbɔʼ ə Pɔ̂l, wɨ cherə wɨə ghàə̀ ni tə wɨə beenɨ əbɔʼ ə Àpolòs, wɨ cherə wɨə ghàə̀ ni tə wɨə beenɨ əbɔʼ ə Sefàs, [1] wɨ cherə wɨə bə̀ yɨə ghàə̀ ni tə wɨə beenɨ əbɔʼ ə Kristo.

¹³Mbɨ wa fə ghabrɨ ə Kristo ə? À wa kɨə Pɔ̂l nɨ mbɨ nyaʼa kòmbɨ̀ əzed ə baʼnɨ ɨmbə̀ʼ əwən ə? Kɨ̀ mbɨ wa nyaʼa nàʼ mɨnib ɨ nən yeʼ ənɨ ɨkum Pɔ̂l ə?

¹⁴Mə wɨə nàʼə̀ məben-əwe əmbɨ ə Ŋwìə̀ ni chəi mə̀ nyaʼa naʼ mɨnib əmbɨ ə wə̀d mɔʼɔ rəbɔʼ nən chè rɨ ənɨ ə Krispùs mbɨ Gayùs.

¹⁵Əne chəi wə̀d mɔʼɔ nɨ tɨ wɨ̀ ghà ni mbə nyaʼa nɨŋ mɨnib ənɨ mɨ ɨkum.

¹⁶Mə kyerɨ ni mə nyaʼa bə̀ nàʼ mɨnib əmbɨ ɨnəbɨ Stefanàs. Ɨ chè rɨ ənɨ bə̂d mbɔ̂, chəi mə wɨrɨ kɔndɨ ni mə nyaʼa nàʼ mɨnib əmbɨ wə̀d cherə.

¹⁷Mə wɨə ghà əne ɨmbə̀ʼ ɨghəm nɨ chəi Kristo nyaʼa tom əmɨ ni mə̀ naʼ mɨnib. Wɨ̀ nyaʼa tom əmɨ yeʼ ni mə̀ gha ɨkə̂n chɔ̀m ənɨ ɨŋgam nɨ chəi wɨ nɔʼ rɨ ənɨ ɨwe bə̂d mɨ̀sɔŋɨchù, njɨ chəi ənû ze nɨ tɨə ghà ɨmbə̀ʼ ɨchî nɨ Yeso nyaʼa kwɨ əzed ə baʼnɨ ə wɨrɨ berɨ ɨka.

¹⁸Ɨŋgam ɨmbə̀ʼ ɨchî nɨ Yeso nyaʼa kwɨ əzed ə baʼnɨ yɨ ənû əneŋ əmbɨ ə bə̂d mbe nɨə nimə, àyɨə əmbɨ mbà mbe nɨə jwɨ̀ rəŋgəʼ, ɨŋgam we ə chwi ɨchî nɨ Ŋwìə̀ berɨ ɨka.

¹⁹Ə zɨ ɨŋga Ə̀ŋwàʼnɨ̀ ə Ŋwiə̀ ni, “Mə bɨrɨ chwi əmbɨ ə bə̂d mbe nɨ kɔndɨ ni mbə̀ berɨ ɨwe ni mbɨ yɨ ɨneŋ, bə̀ chwi əmbɨ mbe nɨ kɔndɨ ni mbə kyerɨ ənû ni chəi mbɨ kyerɨ ənû ə mɔʼɔ.”

²⁰Zɨə nɨə yeʼ əne, njɨ əzɔ̂ ə nùŋ wə̀d we nɨ kɔndɨ ni tə berɨ ɨwe ə yi, nùŋ wə̀d we nɨə chwi rɨ̀kə̌ ə yi, bə̀ nùŋ wə̀d we nɨə tàŋ ɨnû ənɨ ə nyùmə̀ wɔ̂ ə yi? Ɨmbə̀ʼ Ŋwìə̀ fə ghɨ̀ ni ɨwe bə̂d rɨŋga ɨsɨg beŋ ənɨ ənû əneŋ ə?

²¹Ŋwìə̀ nyaʼa nɨŋ i ɨwe ghɨ̀ ni tɨ bə̂d nɨŋ ə ɨwe bə̂d mɨ̀sɔŋɨchù kyerɨ əməd. Əne zɨə nyaʼa bɔ̀ŋ ɨ bɔ ni wɨ̀ chɨ bə̂d rəŋgəʼ ənjìm ɨchî nɨ mbɨ nyaʼa ben ənû əneŋ ze nɨ tɨ̀ nyaʼə ghàə̀.

²²Mɨ̀Jû mbɨə kə̀b zə ɨnû yiirɨ nɨ chwi ni ənû ze nɨ tɨə ghàə̀ yɨ ənû rəsìʼ. Bə̂d mbe nɨ kaʼi mɨ̀Jû mbɨə kəbə ni tɨ̀ gha ɨnû mbe nɨ berɨ ɨwe ɨŋga,

²³àyɨə tɨ̀ wɨə ghà ɨmbə̀ʼ ə Kristo nɨ mbɨ nyaʼa kombɨ əzed ə baʼnɨ. Chəi mɨ̀Jû ghaʼ nɨ zu ənû zɔ̂. À yɨə bə̀ ənû əneŋ əmbɨ ə bə̂d mbe nɨ kaʼi mɨ̀Jû.

²⁴Àyɨə əmbɨ ə bə̂d mbe nɨ Ŋwìə̀ nyaʼa tɔŋ ənɨ mbi, əne yɨ mɨ̀Jû mbɨ ə bə̂d mbe nɨ kaʼi mɨ̀Jû, Kristo yɨ wə̀d we nɨ Ŋwìə̀ che ənjìm məd chwi i ɨka bə̀ chwi i ɨwe.

²⁵Bə̂d mɔʼɔ mbɨə kɔndɨə ni ɨchî nɨ Ŋwìə̀ nyaʼa ghɨ̌ mbɨ kòmbɨ̀ ə Kristo əzed ə baʼnɨ yɨ ənû əneŋ. Àyɨə ənû ze ə berɨ ɨwe ɨŋga chè ɨwe bə̂d mɨ̀sɔŋɨchù. Mbɨ mɔʼɔ mbɨə bə̀ kɔndɨə ni ɨchî nɨ Ŋwìə̀ nyaʼa ghɨ̌ mbɨ kòmbɨ̀ ə Kristo ə chwiə ni Ŋwìə̀ ə bɔd. Àyɨə ənû ze ə berɨ ɨka chè ɨka bə̂d mɨ̀sɔŋɨchù.

²⁶Bɔŋgɔb, mbə̀ kɔndɨ ɨchî nɨ mbə nyaʼa ənɨ ə nyùmə̀ we nɨ Ŋwìə̀ nyaʼa tɔŋ əwən ni mbə̀ yeʼ mbi bə̂d. Chəi mbə̀n mɨ̀nɔnɔʼ nyaʼa berɨ ɨwe ɨchî nɨ bə̂d rɨŋga ɨsɨg ə nèŋ bə̂d ɨwe. Chəi mbə̀n mɨ̀nɔnɔʼ nyaʼa berɨ mbɨ̀rɨmbin kyeŋ ɨŋga əbeŋ. Chəi mbə̀n mɨ̀nɔnɔʼ nyaʼa berɨ mbɔ̂n.

²⁷Àyɨə Ŋwìə̀ nyaʼa chɔʼ bə̂d mbe rɨŋga ɨsɨg nɨ bə̂d ə kɔndɨ ni mbɨ yɨ ɨneŋ, ɨmbə̀ʼ naʼ tɨ̀nìd ətu əmbɨ mbe nɨ kɔndɨ ni mbə berɨ ɨwe. Ŋwìə̀ nyaʼa chɔʼ ɨghɨ mbe rɨŋga ɨsɨg nɨ bə̂d ə kɔndɨ ni à yɨ ɨghɨ nɨ bɔrɨ, ɨmbə̀ʼ naʼ tɨ̀nìd ətu əmbɨ mbe nɨ kɔndɨ ni mbə berɨ ɨka.

²⁸Ŋwìə̀ nyaʼa chɔʼ bə̂d mbe nɨ bə̂d ə tìbrɨ̀ə̀ mbɨ mbe nɨ bə̂d ə tə̀ə̀nɨ̀ ɨŋga ɨsɨg, nɨ yeʼ mbe nɨ bə̂d ə kɔndɨ ni à yɨ ɨghɨ əko, ɨmbə̀ʼ nimnɨ mbe nɨ bə̂d ə kɔndɨ ni mbɨ yɨə bə̂d kyeŋ.

²⁹Wɨ̀ nyaʼa ghɨ̀ əne ɨmbə̀ʼ tɨ wə̀d mɨ̀sɔŋɨchù goŋ i ɨgɔ̂ ɨfě Ŋwiə̀.

³⁰À yɨə Ŋwìə̀ nyaʼa ghɨ̌ ni mbə̀ yeʼ ənɨ ɨfɔtɨ mbɨ Kristo Yeso. Məd yɨ we nɨ Ŋwìə̀ ghɨ ni tɨ̀ che ənjìm məd berɨ ɨwe. Wɨ̀ fə ghɨ̀ ni tɨ̀ təm kùʼnɨ̀. Wɨ̀ fə zeŋnɨ əwa bə̀ choʼ mba ɨtu.

³¹Ə zɨ ɨŋga Ə̀ŋwàʼnɨ̀ ə Ŋwiə̀ ni, “Wə̀d we nɨə kəb goŋ ɨgɔ̂, wɨ̀ goŋ ɨmbə̀ʼ ənû ze nɨ Ə̀nùŋɨ̀sɨg ghɨ̌.”