Read Fɨso Fi 1 Kɔrèn 10 Bible Online

1 Kɔrèn 10 - Fɨso Fi bible

1 Kɔrèn 10

¹Mbɨ bɔŋgɔb, mə kə̀b ni mbə̀ wɨrɨ kɔndɨ ni à yɨə pàʼ nyaʼə chàə̀ mba mɨ̀mbǎʼ rəŋwe ɨŋga ɨbad rɨkwàʼi. Mə bə̀ kə̀b ni mbə̀ wɨrɨ kɔndɨ ni mɨ̀mə̌d mɨjìm nyaʼa baanɨ ɨŋga rɨ̀bàà.

²Mɨ̀mə̌d mɨjìm nyaʼa nɨŋ mɨnib ɨchî nɨ mbɨ nyaʼə yèn əton ə pàʼ. Mbɨ nyaʼa bə̀ nɨŋ ɨchî nɨ mbɨ nyaʼə yèn ɨŋga rɨ̀bàà. Mbɨ nyaʼa nɨŋ ɨchî nɨ mbɨ nyaʼə beenɨ əbɔʼ ə Mose.

³Mɨ̀mə̌d mɨjìm nyaʼa jɨg ɨkwɨ ɨghɨjɨg mɔʼ. À yɨə Ŋwìə̀ nyaʼa naʼ ɨghɨjɨg mbe əmbɨ mɨ̀mə̌d.

⁴Mɨ̀mə̌d mɨjìm nyaʼa bə̀ nɔ mɨnib mɔʼ. À yɨə Ŋwìə̀ nyaʼa bə̀ naʼ mɨnib mbe əmbɨ mɨ̀mə̌d. Mbɨ nyaʼa nɔ mɨnib mbe nɨ nyaʼə jwɨ̀ rɨ ənɨ ɨwɔ̌ we nɨ Ŋwìə̀ nyaʼa nàʼ əmbɨ mɨ̀mə̌d. Ɨwɔ̌ we wɨə nyaʼə yènə̀ mbɨ mɨ̀mə̌d. Ɨwɔ̌ we yɨ nyaʼə Kristo.

⁵Ka à bè yeʼi əne, chəi fîŋ Ŋwìə̀ nyaʼa bɔŋ əbɔʼ bə̂d mɨ̀nɔnɔʼ rəkaʼ mɨ̀mə̌d. Mbɨ nyaʼa kwɨ, əne ɨvɨ bə̂d mbe nɨ nyaʼa kwɨ nyaʼa jàŋ ɨŋga ɨbad rɨkwàʼi.

⁶Ɨnû mbɔ̂ yɨ ɨnweenɨ ɨ na tɨ̀nîn ɨmbə̀ʼ tɨ̀ kwembɨ ɨnû rəŋgu ni tɨ rɨ̀ feenɨ a ɨnû rɨbɔ̀ŋ, ɨchî nɨ mbɨ nyaʼə feenɨə.

⁷Tɨ mbə̀ wumnɨ ə mbɨ̀anèŋ, ɨchî nɨ mɨ̀mə̌d mɔʼɔ nyaʼə wumnɨə. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Bə̂d mbe nyaʼa chub ə si ɨ jɨg bə̀ nɔ. Mbɨ nyaʼa ghɨ̀ əne, nɔ̀ʼ kɔ binɨ.”

⁸Tɨ rɨ̀ ghɨ a ɨfabrɨ-ɨnû, ɨchî nɨ mɨ̀mə̌d mɔʼɔ nyaʼa ghɨ̌, əne mɨ̀mə̌d chuʼ ɨwum be chɔ̀b rɨtad nyaʼa kwɨ ɨgwɨ əni ə mɔʼ.

⁹Tɨ rɨ̀ kwaʼnɨ a Ə̀nùŋɨ̀sɨg [5] ɨchî nɨ mɨ̀mə̌d mɔʼɔ nyaʼa kwaʼnɨ, əne jɔ rɨ nyaʼa zwiirɨ mɨ̀mə̌d.

¹⁰Tɨ mbə̀ ghambɨ ə, ɨchî nɨ mɨ̀mə̌d mɔʼɔ nyaʼa ghambɨ, əne Ŋwìə̀ nyaʼa chà aŋgɨrə̀ nɨə zwiirɨə bə̂d ni wɨ̀ wo nimnɨ mɨ̀mə̌d.

¹¹Ɨnû mbɔ̂ nyaʼa ghɨ̀ ənɨ mɨ̀mə̌d ɨghabɨ ənweenɨ əmbɨ ə bə̂d cherə. Mbɨ nyaʼa bə̀ ŋwàʼnɨ̀ ɨmbə̀ʼ mbà mbe nɨ yeʼ ɨkǎ ənɨ ə nyùmə̀ wɔ̂ nɨ ɨsɨg ə sɨə wo nwìə̀.

¹²Əne wə̀d mɔʼɔ we nɨ kɔndɨ ni tə fə təm kàànɨ̀ berɨ we i ɨmbə̀ʼ wɨ̀ sɨ gù.

¹³Chəi ənû ə mɔʼɔ ə kweʼ numbɨ əwən nɨ chəi zɨə kweʼ numbɨ bə̂d cherə. Ŋwìə̀ wɨə ghɨ̀ ənû ze nɨ wɨ̀ kàʼi, əne ka wɨ̀ bɨrɨ saŋ i ni ənû ə mɔʼɔ ə numbɨ əwən chè ə ɨka. Ənɨ mbɨ numbɨ əwən, wɨ̀ bɨrɨ chwi ɨnə̂njɨ̀, ɨmbə̀ʼ mbə mbe tɨ̀ mbə nyìʼ ənû ze.

¹⁴Əne mbɨ bɔŋgɔb nɨ mə̀ ghaʼi kwàʼ rɨŋgəʼ, mbə̀ ton ənû nɨ wumnɨ mbɨ̀anèŋ.

¹⁵Mə wɨə ghà əmbɨ ə bə̂d nɨ berɨ ɨwe ni: Mbə̀ kwaʼnɨ mbə ɨtu ɨmbə̀ʼ ənû zɔ̂ nɨ mə̀ bɨrɨ gha ɨ nən.

¹⁶Toʼ ze nɨ tɨə nɔə rɨŋga ənɨ tɨə jɨg Ɨtarɨ Ə̀nùŋɨ̀sɨg, əne nàʼə̀ məben-əwe əmbɨ ə Ŋwiə̀, ka à wa kɨ i ni mbà mɨjìm mbɨə nɔ ənəm ə Kristo ə? Ŋgə̀ŋ ze nɨ tɨə bəʼrɨə bə̀ jɨgə, ka à wa kɨ i ni mbà mɨjìm mbɨə kurə nyamnyod Kristo ə?

¹⁷Chiŋ ŋgə̀ŋ mei mɔʼ, əne mbà mbe nɨ nɔʼɔ mbɨə jɨgə tɨ ənɨ ə chiŋ ŋgə̀ŋ ze mɔʼ. Əze ə chwi ni tɨ̀ yɨə nyamnyod mɔʼ.

¹⁸Mbə̀ neŋ mɨ̀Izre: Ɨmbə̀ʼ bə̂d mbe nɨə jɨg ɨghɨ mbe nɨ mbɨ naʼ ənɨ ɨghɨ ə̀fà fə fɔtɨ mbɨ mbe nɨə naʼ ɨghɨ ə̀fà mbe əmbɨ ə Ŋwiə̀ ə?

¹⁹Mə̀ kɨ əni ghàə̀ ni yè ə? Mə kɨ əni ghàə̀ ni ɨghɨ mbe nɨ mbɨ naʼ ənɨ ɨghɨ ə̀fà əmbɨ mbɨ̀anèŋ yɨ ɨghɨ ə mɔʼɔ ə, kɨ̀ ni anèŋ yɨ əghɨ ə mɔʼɔ ə?

²⁰Chə̂! Mə wɨə ghàə̀ yeʼ ni bə̂d mbe nɨ chəi mbɨə wumnɨ ə Ŋwìə̀ mbɨə nàʼ ɨghɨ ə̀fà yeʼ əmbɨ ɨzwî rɨbɔ̀ŋ, kaʼi əmbɨ ə Ŋwiə̀. Chəi mə̀ kəb ni mbə̀ fɔtɨ mbɨ ɨzwî rɨbɔ̀ŋ.

²¹Chəi ənɨ tɨ̀ mbə nɔ rɨŋga toʼ Ə̀nùŋɨ̀sɨg bə̀ nɔ rɨŋga toʼ ɨzwî rɨbɔ̀ŋ. Chəi ənɨ tɨ̀ mbə jɨg ɨgun ə tebrə̀ Ə̀nùŋɨ̀sɨg bə̀ jɨg ɨgun ə tebrə̀ ɨzwî rɨbɔ̀ŋ.

²²Tɨ̀ wa kə̀b ni Ə̀nùŋɨ̀sɨg sə ɨtəm ə? Tɨ̀ wa kà chè əməd ə?

²³Bə̂d mɔʼɔ mbɨə ghàə̀ ni, “Tɨ̀ we tɨ̀ rɨ̀ ghɨ̀ ɨnû jìm.” À yɨ əne, àyɨə chəi ɨnû jìm mbe tɨ̀ mbɨ wèèrɨ̀ əwən. “Tɨ̀ we tɨ̀ rɨ̀ ghɨ̀ ɨnû jìm,” ɨchî nɨ mbɨ gha, àyɨə chəi ɨnû jìm ə ghɨ̀ ni ɨbenɨ kaanə.

²⁴Tɨ wə̀d mɔʼɔ kəb i àmei ɨnû mbe nɨ bɔŋ ɨ bɔ. Wɨ̀ kəb yeʼ mbe nɨ bɔŋ əmbɨ ə bə̂d cherə.

²⁵Mbə̀ kud əghɨ ze nɨ mbɨə fèn ɨwin nyam, zɨ rɨ biirɨ ənû ə mɔʼɔ ze nɨ bɨrɨ ghɨ̀ ni tə fîŋ saʼ əwən.

²⁶Ə zɨ ɨŋga Ə̀ŋwàʼnɨ̀ ə Ŋwiə̀ ni, “Si mbɨ ɨghɨjìm mbe nɨ yeʼ ɨgwɨ ə si yɨ mbɨ Ə̀nùŋɨ̀sɨg.”

²⁷Wə̀d mɔʼɔ we nɨ chəi wɨ̀ ben ə Kristo mɨ won əwən ni mbə̀ wo jɨg, əne mbə bə̀ ben nɨ wò, mbə̀ pe jɨg əghɨ ze nɨ wɨ̀ nuŋ ɨfě nən, zɨ rɨ biirɨ ənû ə mɔʼɔ ze nɨ bɨrɨ ghɨ̀ ni tə fîŋ saʼ əwən.

²⁸Àyɨə wə̀d mɔʼɔ mɨ ghà ɨ nən ni, “Mbɨ fə nàʼ ɨghɨ mbɔ̂ ənɨ ɨghɨ ə̀fà əmbɨ mbɨ̀anèŋ,” tɨ mbə̀ jɨg ə ɨghɨ mbe ɨmbə̀ʼ wə̀d we nɨ ghà ənû ze ɨ nən. Tɨ mbə̀ bɨ jɨg ə ɨmbə̀ʼ tɨ fîŋ saʼ i wə̀d mɔʼɔ.

²⁹Mə wɨə ghà yeʼ fîŋ wə̀d we nɨ gha ənû ze ɨ nən, kaʼi zən. Əton nɨ fîŋ wə̀d cherə bɨrɨ saʼ əghɨ ze nɨ mɨə jɨgə kɨ̀ əze nɨ chəi mɨə jɨgə kɨ ɨmbə̀ʼ ə yè ə?

³⁰Mə mɨ nàʼ məben-əwe əmbɨ ə Ŋwiə̀, əne jɨg tɨjɨg te, njɨ əton nɨ bə̂d bɨrɨ zɨ əzum ɨmbə̀ʼ ɨghɨ mbe nɨ mə̀ naʼ məben-əwe bɔŋ jɨg kɨ ɨmbə̀ʼ ə yè ə?

³¹Əne, kɨ̀ à jɨg, kɨ̀ à nɔ, kɨ̀ à ghɨ ənû ə mɔʼɔ, ghɨ ɨnû mbe jìm ɨmbə̀ʼ wumnɨ ə Ŋwiə̀.

³²Mbə̀ we əwən ni tɨ mbə̀ ghɨ ə ənû ə mɔʼɔ ze nɨ bɨrɨ ghɨ ni mɨ̀Jû kɨ̀ bə̂d mbe nɨ kaʼi mɨ̀Jû kɨ̀ bə̂d rɨŋga ɨfetɨ bə̂d Ŋwiə̀ gu ənû.

³³Mbə̀ ghɨ ɨghabɨ ə mɔ̌, ɨmbə̀ʼ ɨghəm nɨ mə wɨə kəbɨ ni fîŋ rɨ bə̂d mɨjìm bɔŋ ɨchî nɨ mɨə ghɨ̀ ɨnû jìm. Chəi mə̀ kəb nɨ ghɨ àmei ɨnû mbe nɨ bɔŋ ɨ num. Mə wɨə kəb ghɨ̀ yeʼ mbe nɨ bɔŋ əmbɨ ə bə̂d mɨ̀nɔnɔʼ, ɨmbə̀ʼ ɨ mbe tɨ̀ mbɨ jwɨ̀ rəŋgəʼ.