Read Fɨso Fi 1 Kɔrèn 12 Bible Online

1 Kɔrèn 12 - Fɨso Fi bible

1 Kɔrèn 12

¹Mbɨ bɔŋgɔb, tɨ̀nîn mə kə̀b ni mbə̀ kyerɨ rəsìʼ ɨmbə̀ʼ mɨneʼe mbe nɨ Əzwî ə Zeŋɨ ə nàʼ əmbɨ ə bə̂d.

²Mbə̀ nyaʼa fə kyerɨ ə ni ənɨ chəi mbə̀ nyaʼa kɨrɨ ben ə Ŋwiə̀, ɨ mbɨ nyaʼə fèbrɨ̀ əwən ni mbə̀ wumnɨ mbɨ̀anèŋ nɨ chəi mbɨə ghàmə̀.

³Əne tɨ̀nîn mə kə̀b ni mbə̀ kyerɨ ni chəi wə̀d mɔʼɔ we nɨə ghà ɨŋgam nɨ Əzwî ə Ŋwiə̀ ə naʼ ɨ bɔ we tɨ̀ wɨ̀ ghà ni, “Ndɔ̀n nyɨ ɨgwɨ ə Yeso.” Mə bə̀ kə̀b ni mbə̀ kyerɨ ni chəi wə̀d mɔʼɔ we tɨ̀ wɨ̀ ghà ni, “Yeso yɨ Ə̀nùŋɨ̀sɨg,” nɨ kaʼi Əzwî ə Zeŋɨ ə ghɨ ni wɨ̀ gha əne.

⁴Mɨneʼe mbɨ əŋgu tɨkwɨrɨkwɨ, àyɨə àmei Əzwî ə Zeŋɨ ə nàʼ mɨneʼe mbe.

⁵Ɨ̀fàʼì mbɨ əŋgu tɨkwɨrɨkwɨ, àyɨə àmei Ə̀nùŋɨ̀sɨg we mɔʼ ə nàʼ ɨ̀fàʼì mbe.

⁶Mɨnə̂njɨ̀ nɨ fàʼ mbɨ əŋgu tɨkwɨrɨkwɨ, àyɨə àmei Ŋwìə̀ we mɔʼ ə ghɨ̀ə̀ ni wə̀d jìm faʼ ə̀fàʼì ze nɨ wɨ̀ naʼ ɨ bɔ.

⁷Ŋwìə̀ wɨə chwiə ni e Əzwî ə zɨ ɨŋga wə̀d mɔʼ mɔʼ, ɨmbə̀ʼ təŋgàŋ weerɨ bə̂d mɨ̀jìm.

⁸Ŋwìə̀ wɨə nàʼ Əzwî ze nɨə ghɨ̀ ni bə̂d gha ɨŋgam ɨwe əmbɨ wə̀d mɔʼ. Ɨ wɨə bə̀ chè àmei ənjìm Əzwî ze ghɨ̀ ni wɨ cherə gha ɨŋgam nɨ chwiə ni wɨ̀ kyerɨ ənû.

⁹Ŋwìə̀ wɨə ghɨ̀ ni wə̀d mɔʼ berɨ ɨbenɨ ənjìm Əzwî ze ə mɔʼ. Ɨ wɨə bə̀ chè àmei ənjìm Əzwî ze nàʼ ɨneʼe nɨ vɨ bə̂d əwɔn əmbɨ wɨ cherə.

¹⁰Ŋwìə̀ wɨə nàʼ ɨka əmbɨ wə̀d mɔʼ ni wɨ̀ ghɨ ɨnû yiirɨ. Ɨ wɨə nàʼ ɨneʼe əmbɨ wɨ cherə ni wɨ̀ gha ɨkə̂n Ŋwiə̀. Ɨ wɨə nàʼ ɨneʼe əmbɨ wɨ cherə ni wɨ̀ kyerɨ ɨkwepɨ rəbɔʼ mɨneʼe mbe nɨ Əzwî ə Zeŋɨ ə nàʼ rəbɔʼ mbe nɨ chəi Əzwî ə Zeŋɨ ə nàʼə̀. Ɨ wɨə nàʼ ɨneʼe əmbɨ wɨ cherə ni wɨ̀ gham mɨŋgam tɨkwɨrɨkwɨ. Ɨ wɨə bə̀ nàʼ ɨneʼe əmbɨ wɨ cherə ni wɨ̀ toʼrɨ mɨŋgam mbe.

¹¹Ɨnû mbɔ̂ jìm yɨ rɨ əmbɨ Əzwî ze ə mɔʼ. Əzwî ze ə zɨə nàʼ ɨneʼe əmbɨ wə̀d mɔʼ mɔʼ ɨchî nɨ wɨ̀ kə̀bɨ.

¹²Ɨchî nɨ nyamnyod mei mɔʼ mbɨ ɨsɨ ɨnyod nɔnɔʼ, əne ɨsɨ ɨnyod jìm, ka mbɨ bè nɔʼ i, yɨə nyamnyod mɔʼ. À yɨ ɨchî nɨ nyamnyod Kristo yeʼ we.

¹³Tɨ̀ nyaʼa nɨŋ mɨnib ənjìm Əzwî ze ə mɔʼ. Əne tɨ̀ fə fɔtɨ sɨə nyamnyod mɔʼ. Ŋwìə̀ nyaʼa zɨ̀ Əzwî ze ə mɔʼ ɨŋga ta fîŋ, kɨ̀ tɨ̀ yɨ mɨ̀Jû kɨ̀ bə̂d nɨ kaʼi mɨ̀Jû, kɨ̀ tɨ̀ yɨ ɨ̀bòʼò kɨ̀ bə̂d nɨ yeʼ ənɨ ə ɨghəm.

¹⁴Chəi nyamnyod berɨ àmei əsɨ ɨnyod ə mɔʼ. Zɨ̀ berɨ ɨsɨ ɨnyod nɔnɔʼ.

¹⁵Əwu ə mɨ ghà ni, “Ɨchî nɨ ka mɔ̌ yɨ əmɨ əbɔ, əne ka mɔ̌ yɨ əmɨ əba rɨ ənɨ ə nyamnyod.” Ka əze ə bɨrɨ ghɨ i ni tɨ məd yeʼi əba rɨ ənɨ ə nyamnyod.

¹⁶Ətǒŋ ə mɨ ghà ni, “Ɨchî nɨ ka mɔ̌ yɨ əmɨ ɨghə, əne ka mɔ̌ yɨ əmɨ əba rɨ ənɨ ə nyamnyod.” Ka əze ə bɨrɨ ghɨ i ni tɨ məd yeʼi əba rɨ ənɨ ə nyamnyod.

¹⁷Nyamnyod jìm mɨ yeʼ ɨghə, zɨ̀ kɨə wo zu ənû rɨ ye ə? Nyamnyod jìm mɨ yeʼ ə̀tǒŋ, zɨ̀ kɨə wo ŋweʼrɨ ɨghɨ rɨ ye ə?

¹⁸Ɨchî nɨ zɨə yeʼ əne, Ŋwìə̀ nyaʼa tekɨ nyamnyod mbɨ ɨsɨ ɨnyod nɔnɔʼ. Əne wɨ̀ nyaʼa zɨ̀ ɨsɨ ɨnyod ɨ mɔʼ mɔʼ ɨgun ə nyamnyod ze àmei ɨchî nɨ wɨ̀ nyaʼa kə̀bɨ.

¹⁹Ɨsɨ ɨnyod jìm mɨ yeʼ àmei əsɨ ə mɔʼ, njɨ nyamnyod jìm kɨə wo yeʼ rɨ ye ə?

²⁰Ɨchî nɨ zɨə yeʼ əne, ɨsɨ ɨnyod nɔnɔʼ mbɨ əŋgu, àyɨə nyamnyod mei mɔʼ.

²¹Chəi ənɨ tɨ̀ ɨghə ghà əmbɨ əbɔ ni, “Chəi mə̀ kəb əwe!” Chəi ənɨ tɨ̀ ətu ə bə̀ ghà əmbɨ ɨwu ni, “Chəi mə̀ kəb əwən!”

²²Ənû nɨ yeʼ əŋgu yɨ ni chəi ənɨ tɨ̀ nyamnyod fàʼ ɨchî chɔ̀m nɨ chəi ɨsɨ ɨnyod mɔʼɔ mbe nɨ yeʼ ɨghabɨ ni mbɨ ə bɔd.

²³Ɨsɨ ɨnyod mbe nɨ chəi bə̂d ə nèŋə̀ ni mbɨ yɨ ɨghɨ mɔʼɔ, yɨ mbe nɨ tɨə jeŋgɨə wumnɨə. Mbe nɨ chəi mbɨ bɔŋ nɨ zə, yɨ mbe nɨ tɨə jeŋgɨə nəŋgɨə.

²⁴Chəi tɨə jeŋgɨə nəŋgɨ ɨsɨ ɨnyod mbe nɨ bɔŋ nɨ zə. Àyɨə Ŋwìə̀ nyaʼa fə fɔtɨ ɨsɨ ɨnyod jìm ənɨ mbɨ mɔʼ, əne nàʼ ɨwumnɨ kyeŋ əmbɨ ɨsɨ ɨnyod mbe nɨ chəi bə̂d ə nèŋə̀ ni mbɨ yɨ əghɨ ə mɔʼɔ.

²⁵Wɨ̀ nyaʼa ghɨ̀ əne ɨmbə̀ʼ tɨ ə̀ghàbrɨ̀ ə jwɨ i əkaʼ ɨsɨ ɨnyod mbe. Wɨ̀ nyaʼa kə̀b yeʼ ni ɨsɨ ɨnyod jìm nəŋgɨ mbə bɔŋgɔb.

²⁶Əsɨ ɨnyod ə mɔʼ ə mɨ yeʼə zəə ŋgəʼ, ɨsɨ ɨnyod jìm bɨrɨ bɨ zə ŋgəʼ mbɨ məd. Mbɨ mɨ nàʼ ɨwumnɨ əmbɨ əsɨ ɨnyod ə mɔʼ, ɨsɨ ɨnyod jìm bɨrɨ ghaʼrɨ mbɨ məd.

²⁷Tɨ̀nîn, mbə̀ yɨə nyamnyod Kristo, əne wə̀d mɔʼ mɔʼ rəbɔʼ nən yɨ əba rɨ ənɨ ə nyamnyod ze.

²⁸Ŋwìə̀ fə chɔʼ bə̂d ɨŋga ɨfetɨ bə̂d Kristo. Mbɨ rɨtu yɨə bə̂d tom, mbe nɨ pe ənɨ mbɨ be yɨə bə̂d ɨ̀kə̀n, mbe nɨ pè ənɨ mbɨ tad yɨ məchwiə̀-ɨnû, beenɨ mbe nɨə ghɨ̀ ɨnû yiirɨ, beenɨ mbe nɨə vɨ̀ ɨwɔn, beenɨ mbe nɨə wèèrɨ̀ mbɨ cherə, beenɨ mbe nɨə tekɨ ɨchî nɨ ɨnû bɨrɨ yènɨ̀, beenɨ mbe nɨə ghàm mɨŋgam tɨkwɨrɨkwɨ.

²⁹Bə̂d mɨ̀jìm wa kɨə bə̂d tom ə? Bə̂d mɨ̀jìm wa kɨə bə̂d ɨ̀kə̀n ə? Bə̂d mɨ̀jìm wa kɨ məchwiə̀-ɨnû ə? Bə̂d mɨ̀jìm mbɨə wa ghɨ̀ ɨnû yiirɨ ə?

³⁰Bə̂d mɨ̀jìm wa berɨ ɨneʼe nɨ vɨ ɨwɔn ə? Bə̂d mɨ̀jìm mbɨə wa ghàm mɨŋgam rɨsɔ̀ʼɔ̀ ə? Bə̂d mɨ̀jìm mbə wa tòʼrɨ̀ mɨŋgam mbe ə?

³¹Mbə̀ kaŋ kə̀b yeʼ mɨneʼe mbe nɨ chè mbɔ̂. Mə bɨrɨ chwi ɨnə̂njɨ̀ ɨ nən nɨ bɔŋ chè mɨnə̂njɨ̀ jìm.