Read Fɨso Fi 1 Kɔrèn 4 Bible Online

1 Kɔrèn 4 - Fɨso Fi bible

1 Kɔrèn 4

¹Bə̂d berɨ neŋ əwa ni tɨ̀ yɨə bə̂d ə̀fàʼì Kristo fɔrɨ bə̂d nɨ Ŋwìə̀ ghɨ ni mbɨ gha ɨnû mbe nɨ yeʼ ənə̀mə ɨmbə̀ʼ əməd.

²Ənû nɨ mbɨ kəb rɨ əmbɨ ə bə̂d mbe nɨ mbɨ zɨ ɨnû ɨŋga tɨkyerɨ-ɨbɔ mɨ̀mə̌d yɨ ni mbɨ berɨ fàʼ ənɨ tə fîŋ rɨ̀jìm.

³Ɨ num, à yɨ ənû ə kwa ni mbə̀ saʼ əmɨ, kɨ̀ ni bə̂d mɨ̀sɔŋɨchù cherə saʼ əmɨ. Chəi mɔ̌ ə bèə̀ saʼə mɨ ɨnyod.

⁴Chəi mə̀ kyerɨ ənû rɨbɔ̀ŋ ə mɔʼɔ ze nɨ mə ghɨ, àyɨə zɨ rɨka chwi i ni chə mə̀ kweʼ ghɨ̀ ənû rɨbɔ̀ŋ. Àmei Ə̀nùŋɨ̀sɨg we nɨ tɨ̀ wɨ̀ saʼ əmɨ.

⁵Əne tɨ mbə̀ sob ə ɨsaʼi ɨgun ə wə̀d mɔʼɔ bɔŋ nyùmə̀ sɨə kùʼə̀. Mbə̀ womə pè ənɨ Ə̀nùŋɨ̀sɨg wɨrɨ yeʼe. Məd bɨrɨ du ɨnû mbe nɨ bə̂d ə ghɨ̀ ɨŋga ɨsɨ firɨ, bə̀ chwi rɨkɔndɨ te nɨ yeʼ ɨŋga fîŋ rɨ bə̂d. Ənɨ ə nyùmə̀ we, Ŋwìə̀ bɨrɨ naʼ məben-əwe əmbɨ wə̀d jìm ɨchî nɨ zɨə kuʼ əmbɨ wə̀d mɔʼ mɔʼ.

⁶Tɨ̀nîn, kyɨə bɔŋgɔb, mə fə nɨŋ mɨ ənû mbɨ əzɨ Àpolòs ɨghabɨ əmɨgɨ. Mə nɨŋ əne ɨmbə̀ʼ weerɨ əwən, ɨmbə̀ʼ mbə̀ kwembɨ ənû rɨ na ɨmbə̀ʼ ɨŋgam we nɨə ghàə̀ ni, “Mbə̀ ghɨ àmei ɨnû mbe nɨ yeʼ ɨŋga Ə̀ŋwàʼnɨ̀ ə Ŋwiə̀.” Mbə mɨ ghɨ̀ əne, chəi mbə̀ bɨrɨ nɔ wə̀d mɔʼ, əne tə̀ə̀nɨ̀ wɨ cherə.

⁷À kɨə ye nɨ mbə̀ berɨ nɨ chwi ni mbə̀ chè bə̂d cherə ə? À kɨə ye nɨ mbə̀ berɨ nɨ kaʼi Ŋwìə̀ naʼ ɨ nən ə? Wɨ̀ mɨ nyaʼa nàʼ ɨghɨ ɨ nən, njɨ əton nɨ mbə̀ə goŋ ɨgɔ̂ ɨghabɨ ni chəi wɨ̀ nyaʼa naʼ ɨghɨ ɨ nən kɨ ɨmbə̀ʼ ə yè ə?

⁸Mbə mbɨə ghɨ̀ ɨghabɨ ni mbə fə berɨ ɨghɨjìm mbe nɨ mbə̀ kəbɨ! Mbə mbɨə ghɨ̀ ɨghabɨ ni mbə fə berɨ mbɔ̂n! Mbə mbɨə ghɨ̀ ɨghabɨ ni mbə fə sɨ mɨfɔ̂n, ka à bè yeʼi ni ka tɨ̀ yɨ a mɨfɔ̂n! Mə wɨə kàŋə̀ kə̀bə̀ ni mbə yeʼ mɨfɔ̂n ɨmbə̀ʼ tɨ̀ bə̀ yeʼ mɨfɔ̂n mbɨ nən!

⁹Zɨə chub ɨ num ɨghabɨ ni Ŋwìə̀ fə nùŋ əwa, mbà bə̂d tom, ni tɨ̀ yeʼ bə̂d nɨ sɨ nwìə̀ ənɨ ɨwaŋ ɨmbə̀ʼ ə bə̂d zə əwa. Tɨ̀ yɨ ɨghabɨ ə bə̂d nɨ mbɨ fə sob ɨsaʼi ni mbɨ zwiirɨ mɨ̀mə̌d, ɨmbə̀ʼ ɨghəm nɨ ɨsɨg wɨə nèŋ əwa, mbɨ̀aŋgɨrə̀ mbɨə nèŋ əwa, bə̂d mɨ̀sɔŋɨchù bə̀ nèŋ əwa.

¹⁰Tɨ̀ yɨ ɨneŋ ɨmbə̀ʼ ɨchî nɨ tɨə fàʼ əmbɨ Kristo, àyɨə mbə yɨə bə̂d ɨwe ɨchî nɨ mbə̀ fɔtɨ mbɨ Kristo. Tɨ̀ bɔd, àyɨə mbən ə kà. Bə̂d mbɨə wumnɨ əwən, àyɨə ɨ mbɨə tìbrɨ̀ əwa!

¹¹Ɨ pe rɨ̀nîn, tɨ̀ wɨə chubə njì, ədɔʼ ə zɨə ne əwa, tɨ̀ wɨə zɨ̀ ɨta ngywɨ̌, bə̂d mbɨə som əwa, chəi tɨ̀ berɨ ɨkwɨ.

¹²Tɨ̀ wɨə fàʼ rɨ̀kǎ ənɨ mba ɨbɔ. Ənɨ bə̂d zɔm əwa, tɨ̀ wɨə nàʼə̀ yeʼ əbɔrəbɔd. Ənɨ mbɨ nwendɨ ta rɨkyerɨ-ɨwu, tɨ̀ wɨə nyìʼə̀.

¹³Ənɨ mbɨ chəkɨ ta rɨkum, tɨ wɨə wììrɨ̀ ənɨ ɨŋgam chɔ̀m. Ɨ pe rɨ̀nîn bə̂d fə nɨŋ əwa ɨghabɨ ni tɨ̀ yɨ ɨghɨ rɨbɔ̀ŋ fɔrɨ ɨghabɨ ni tɨ̀ yɨ rɨfiŋɨ.

¹⁴Chəi mɨə ŋwàʼnɨ̀ ənû zɔ̂ ɨmbə̀ʼ ɨ naʼ tɨ̀nìd ətu ɨ nən. Mə wɨə ŋwàʼnɨ̀ ɨmbə̀ʼ kəərɨ əwən ɨchî nɨ mbə̀ yeʼ mbɨ bɔn nɨ mə̀ ghaʼi kwàʼ rɨŋgəʼ.

¹⁵Ka à bè yeʼi ni mbə̀ berɨ bə̂d nɨ kaŋ nɔʼ əku nɨə chwi ɨchî nɨ tɨ̀ bə̂d Kristo chubɨ, àyɨə chəi mbə̀ berɨ mɨ̀mbǎʼ nɔnɔʼ. Mɔ̌ yɨ ə mbǎʼ ənɨ ɨfɔtɨ mbɨ Kristo Yeso ɨchî nɨ mɨə ghà ɨkə̂n chɔ̀m.

¹⁶Əne mə wɨə buʼ ɨbɔ ɨ nən ni mbə̀ beenɨ əbɔʼ mə əwu yènɨ̀.

¹⁷Əzɔ̂ yɨ əton nɨ mɨə tom ə Timotì əsɨ nən. Məd yɨ mɨ wan nɨ mə̀ ghaʼi kwàʼ rɨŋgəʼ. Məd wɨə fàʼ əmbɨ Ə̀nùŋɨ̀sɨg ənɨ i fîŋ jìm. Məd bɨrɨ nɔɔrɨ mbə ɨtu ɨmbə̀ʼ ɨnû mbe nɨ mə̀ nyaʼə ghɨ̀ ənɨ mə̀ nyaʼa ben ə Kristo Yeso, nɨ yeʼ ɨnû mbe nɨ mɨə chwi ɨsɨ jìm ɨŋga rɨfetɨ bə̂d Kristo rɨjìm.

¹⁸Bə̂d mɔʼɔ rəbɔʼ nən mbɨə seenɨə. Ɨ mbɨə kɔndɨə ni chəi mə̀ bɨrɨ wɨrɨ yeʼe əsɨ nən.

¹⁹Àyɨə Ŋwìə̀ mɨ benɨ, mə bɨrɨ zambɨ yeʼe əsɨ nən. Mə mɨ yeʼe, mə bɨrɨ pe nwèndɨ̀ ɨnû mbe nɨ bə̂d mbe nɨə seenɨ ə ghàə̀, bə̀ nwèndɨ̀ ɨka we nɨ mbɨ berɨ.

²⁰Ka ənû ɨfɔ̀n ə Ŋwiə̀ yɨ i ənû ɨmbə̀ʼ mɨŋgam, à yɨ ənû ɨmbə̀ʼ ɨka nɨ ghɨ ɨnû mbe nɨ Ŋwìə̀ kəbɨ.

²¹Mbə kɨə kəbə ni ye ə? Mbə̀ wa kə̀b yeʼ ni mə̀ yeʼe əsɨ nən mbɨ fɨŋgyeŋ, kɨ̀ ni mə̀ yeʼe mbɨ ɨghaʼi fɔrɨ əzwî ə bɔtɨ bɔtɨ ə?