Read Fɨso Fi 1 Kɔrèn 6 Bible Online

1 Kɔrèn 6 - Fɨso Fi bible

1 Kɔrèn 6

¹Ənɨ wə̀d mɔʼɔ rəbɔʼ nən berɨ ɨsaʼi mbɨ wə̀d Kristo cherə, wɨ̀ kɨə nɨŋ ɨsaʼi we wò əsɨ ə bə̂d mbe nɨ chəi mbɨə wumnɨ ə Ŋwiə̀ ɨmbə̀ʼ ə ye ə? Njɨ ɨmbə̀ʼ wɨ̀ kə̀ʼ nɨŋ wò yeʼ əsɨ bə̂d Ŋwiə̀ ə?

²Chəi mbə̀ kyerɨ ni à yɨə bə̂d Ŋwiə̀ bɨrɨ saʼ ɨsɨg wɔ̂ ə? À mɨ yeʼ ni à yɨə mbə̀nə bɨrɨ saʼ ɨsɨg, njɨ mbə̀ rɨ wa kuʼ ə nɨ saʼ bɔn tɨ mɨsaʼi ə?

³Chəi mbə̀ kyerɨ ni à yɨə mbǎ bɨrɨ saʼ mbɨ̀aŋgɨrə̀ ə? À nɨə yeʼ əne, njɨ tɨ̀ berɨ bɨ saʼ ɨnû nɨ dè ɨ̀tènɨ̀ wɔ̂!

⁴Əne mbə mɨ berɨ mɨsaʼi ɨghabɨ mbɔ̂, mbə̀ kɨə chɔʼɔ bə̂d mbe nɨ chəi mbɨə nàʼ ɨwumnɨ əmbɨ mɨ̀mə̌d ɨŋga ɨfetɨ ni mbɨ saʼ ɨnû rəŋgu ɨmbə̀ʼ ə yè ə?

⁵Mə wɨə ghà ənû zɔ̂ ɨmbə̀ʼ naʼ tɨ̀nìd ətu ɨ nən. Zɨə wa chwi ni chəi wə̀d mɔʼɔ əkaʼ nən nɨ kaŋ berɨ ɨwe nɨ tɨ̀ wɨ̀ saʼ bə̂d Kristo ə?

⁶Àyɨə mə wɨə zəə yeʼ ni wə̀d Kristo wɨə nɨŋə wə̀d Kristo cherə mbɨ wò ɨfě bə̂d mbe nɨ chəi mbɨ ben ə Kristo ni mbɨ saʼ mɨ̀mə̌d!

⁷Ənû nɨ berɨ mɨsaʼi əkaʼ nən ə chwi ni chəi mbə̀ə ghɨ̀ ɨnû ɨghabɨ ə bə̂d Kristo. Zɨ rɨ wa bɔŋ i ni mbɨ ghɨ ənû rɨbɔ̀ŋ yeʼ ənɨ ə nən ə? Zɨ rɨ wa bɔŋ ni mbɨ fɨg yeʼ əwən ə?

⁸Àyɨə mbə mbɨə ghɨ̀ ɨnû rɨbɔ̀ŋ bə̀ fɨ̀gə̀ ka àbei mbə bɔŋgɔb ɨŋga ɨfetɨ.

⁹Chəi mbə̀ kyerɨ ni chəi bə̂d mbe nɨə ghɨ̀ ɨnû rɨbɔ̀ŋ bɨrɨ jɨg ənû ɨfɔ̀n ə Ŋwiə̀ ə? Tɨ wə̀d mɔʼɔ tambɨ i əwən: chəi bə̂d mbe nɨə ghɨ̀ ɨfabrɨ-ɨnû bɨrɨ nɔ jɨg ənû ɨfɔ̀n ə Ŋwiə̀, kɨ̀ mbe nɨə wumnɨ mbɨ̀anèŋ, kɨ̀ mbe nɨə niirɨə məyi kɨ̀ mbaŋə̀, kɨ̀ mbaŋə̀ nɨə niə tɨ cherə,

¹⁰kɨ̀ mɨjɨ, kɨ̀ bə̂d mbe nɨə ghɨ̀ əjə, kɨ̀ mbe nɨə nɔə beə, kɨ̀ mbe nɨə chə̀kɨ̀ rɨkum bə̂d, kɨ̀ mɨjɨ bagɨ.

¹¹Bə̂d mɔʼɔ rəbɔʼ nən mbɨə nyaʼə ghɨ̀ ɨnû mbɔ̂. Àyɨə Ə̀nùŋɨ̀sɨg Yeso Kristo mbɨ Əzwî à Ŋwiə̀ fə sò əwən bə̀ zeŋnɨ əwən, ghɨ̀ mbə təm kùʼnɨ̀.

¹²Wə̀d mɔʼɔ we tɨ̀ wɨ̀ ghà ni, “Mə we tɨ̀ mə ghɨ̀ ɨnû jìm.” À yɨ əne, àyɨə kaʼi ɨnû jìm bɨrɨ weerɨ əwe. Mə kyerɨ ni, “Mə we tɨ̀ mə ghɨ̀ ɨnû jìm,” àyɨə chəi mə bɨrɨ ben ə̀bòʼò əmbɨ ənû ə mɔʼɔ.

¹³Wə̀d cherə we tɨ̀ wɨ̀ ghà ni, “Ɨghɨ mbe nɨ bə̂d jɨgɨ mbɨə chèə̀ wò ɨŋga ɨbum mbɨ ni ɨbum wɨ əŋgu ɨmbə̀ʼ yim ɨghɨjɨg.” À yɨ əne, àyɨə Ŋwìə̀ bɨrɨ zɨ ɨnwǐ ənɨ ɨnû mbɔ̂ be. Chəi tɨ̀ berɨ nɨ nɨŋ nyamnyod ghɨ̀ ɨfabrɨ-ɨnû əŋgu. Tɨ̀ berɨ nɨŋ fàʼ yeʼ əmbɨ ə Ŋwiə̀. À yɨ Ə̀nùŋɨ̀sɨg ə nəŋgɨə nyamnyod.

¹⁴Ŋwìə̀ we nɨ nyaʼa zwemnɨ Ə̀nùŋɨ̀sɨg bɨrɨ bɨ zwemnɨ əwa ənɨ i ɨka.

¹⁵Chəi mbə̀ kyerɨ ni tə nyamnyod yɨ ɨba rɨ ənɨ ə nyamnyod Kristo ə? Əne mə̀ wa nɨŋ ɨba rɨ ənɨ nyamnyod Kristo fɔtɨ mbɨ nyamnyod ə̀kùnɨ̀ ə? Chə̂!

¹⁶Chəi mbə kyerɨ ni mbaŋə̀ ze nɨ fɔtɨ i ɨnyod mbɨ ə̀kùnɨ̀ fə bèŋ sɨə nyamnyod mɔʼ mbɨ məd ə? Ə zɨ ɨŋga Ə̀ŋwàʼnɨ̀ ə Ŋwiə̀ ni, “Mɨ̀mə̌d mbe mɨbe bɨrɨ fɔtɨ sɨə nyamnyod mɔʼ.”

¹⁷Àyɨə wə̀d we nɨ fɔtɨ i ɨnyod mbɨ Ə̀nùŋɨ̀sɨg, əzwî əməd mbɨ Əzwî Ə̀nùŋɨ̀sɨg fə sɨ əzwî ə mɔʼ.

¹⁸Mbə̀ ton ɨfabrɨ-ɨnû! Chəi ɨnû rɨbɔ̀ŋ jìm cherə mbe nɨ bə̂d ə ghɨ̀ ə bètɨ̀ə̀ nyamnyod, àyɨə wə̀d we nɨə ghɨ̀ ɨfabrɨ-ɨnû wɨə ghɨ̀ ɨnû rɨbɔ̀ŋ ənɨ i nyamnyod.

¹⁹Chəi mbə̀ kyerɨ ni tə nyamnyod yɨə mbàn əmbɨ Əzwî ə Zeŋɨ ze nɨ yeʼ ɨŋga nən, nɨ Ŋwìə̀ nyaʼa naʼ ɨ nən ə? Ka tə nyamnyod yɨ i tən.

²⁰Ŋwìə̀ nyaʼa fə zon əwən ənɨ ɨkab nɔnɔʼ. Əne mbə̀ nɨŋ ə ɨnyod wumnɨ ə Ŋwiə̀ əŋgu.