Read Fɨso Fi 1 Kɔrèn 8 Bible Online

1 Kɔrèn 8 - Fɨso Fi bible

1 Kɔrèn 8

¹Tɨ̀nîn mə wɨə kə̀b ghà ɨmbə̀ʼ tɨjɨg te nɨ mbɨ naʼ ənɨ ɨghɨ ə̀fà əmbɨ mbɨ̀anèŋ: Tɨ̀ kyerɨ ni, “Mba mɨjìm ə berɨ ɨwe,” ɨchî nɨ mbə̀n mɨmɔʼɔ ə ghàə̀. Ɨwe wɨə ghɨ̀ ni bə̂d nɔ ɨnyod, àyɨə ɨghaʼi wɨə korə bə̂d ənɨ mbɨ mɔʼ.

²Chəi wə̀d mɔʼɔ we nɨ kɔndɨ ni tə kyerɨ ənû kɨrɨ kyerɨ ɨchî nɨ tɨ̀ wɨ̀ kə̀ʼ kyerɨ.

³Ŋwìə̀ ə kyerɨ wə̀d we nɨ ghaʼ əməd.

⁴Əne, mə wɨə kəb gha ɨmbə̀ʼ tɨjɨg te nɨ mbɨ naʼ ənɨ əghɨ ə̀fà əmbɨ mbɨ̀anèŋ: Tɨ̀ kyerɨ ni, “Kaʼ anèŋ yɨ i əghɨ nɨ yeʼ ɨkǎ” ɨchî nɨ mbə̀n mɨmɔʼɔ ə ghàə̀. Tɨ̀ bə̀ kyerɨ ni, “Ŋwìə̀ mei we mɔʼ” ɨchî nɨ mbə̀n mɨmɔʼɔ ə bə̀ ghàə̀.

⁵Ka à bè yeʼi ni ɨghɨ mɔʼɔ mbe nɨ mbə̀n mɨmɔʼɔ ə tɔŋ ənɨ mɨ̀ŋwìə̀ ɨ mbɨ ɨkaŋ kɨ̀ ɨgwɨ ə si, ɨchî nɨ à yɨ rəsìʼ ni mɨ̀ŋwìə̀ nɔnɔʼ mbɨ mɨ̀-ə̀nùŋɨ̀sɨg nɔnɔʼ mbɨə bə əŋgu,

⁶àyɨə ɨ na, Ŋwìə̀ mei we mɔʼ, nɨ yeʼ Mbǎʼ. Ɨghɨjìm yɨ rɨ ɨ bɔ. Tɨ̀ wɨ ɨka ɨmbə̀ʼ əməd. Tɨ̀ bə̀ berɨ Ə̀nùŋɨ̀sɨg mɔʼ, nɨ yeʼ ə Yeso Kristo. Ŋwìə̀ nyaʼa tekɨ ɨghɨjìm ənjìm məd. Tɨ̀ wɨə bə̀ ɨka ɨmbə̀ʼ əməd.

⁷Àyɨə kaʼi wə̀d jìm kyerɨ ənû zɔ̂. Bə̂d mɔʼɔ mbe nɨ fə jeŋgɨ mə̀d mbɨ mbɨ̀anèŋ mɨ yeʼə jɨgə tɨkwɨ rɨjɨg tɔ̂, ɨ mbɨə kɨrɨ kɔndɨə ni à yɨ rɨjɨg nɨ mbɨ naʼ ənɨ əghɨ ə̀fà əmbɨ mbɨ̀anèŋ. Əne fîŋ tɨ mɨ̀mə̌d te nɨ bɔrɨ tɨə saʼə mɨ̀mə̌d, mbɨ sɨə kɔndɨə ni mbə mbɨ rɨzeŋ.

⁸Ka rɨjɨg bɨrɨ ghɨ i ni tɨ̀ yeʼ bə̂d chɔ̀m ɨfě Ŋwìə̀. Chəi tɨ̀ bɨrɨ sam əghɨ ə mɔʼɔ əwù ze nɨ chəi tɨ̀ jɨgɨ. Chəi tɨ̀ bɨrɨ bɨ jɨg njìm mɔʼɔ əwù ze nɨ tɨ̀ jɨgɨ.

⁹Mbə̀ we əwən ni tɨ ɨchî nɨ tɨ mbə̀ jɨg əghɨ ə mɔʼɔ kɨ̀ ɨchî nɨ chəi ənɨ tɨ̀ mbə̀ jɨg ə ghɨ ni bə̂d mbe nɨ ɨbenɨ mɨ̀mə̌d bɔd gu ənû.

¹⁰Wə̀d mɔʼɔ we nɨ fîŋ məd bɔrɨ mɨ zə əwe, àwɔ̀ nɨ berɨ ɨwe, nɨ àwɔ̀ ə jɨg ɨŋga mbàn anèŋ, ka wɨ̀ wa bɨrɨ ghaʼi nɨ bɨ jɨg ɨghɨ mbe nɨ mbɨ naʼ ənɨ ɨghɨ ə̀fà əmbɨ mbɨ̀anèŋ ə?

¹¹Əne yɨ ni aŋgɔb wɔ̂ nɨ bɔrɨ, nɨ Kristo nyaʼa bə̀ kwɨ ɨmbə̀ʼ əməd, fə nim ɨmbə̀ʼ ɨchî nɨ à berɨ ɨwe.

¹²Ənɨ à ghɨ ənû rɨbɔ̀ŋ ənɨ mbe bɔŋgɔb ənɨ ɨkwɨ ɨchî wɔ̂, əne zɨ̀ əna ənɨ ə fîŋ tɨ mɨ̀mə̌d te nɨ fə be bɔrɨ i, kyerɨ ni à fə ghɨ̀ ənû rɨbɔ̀ŋ ənɨ Kristo.

¹³Əne, əghɨ ze nɨ mə̀ jɨg ə mɨ ghɨ̀ ni wum aŋgɔb gu ənû, chəi mə̀ bɨrɨ nɔ wɨrɨ kud nyam, ɨmbə̀ʼ tɨ wum aŋgɔb gu i.