Read Fɨso Fi 1 Kɔrèn 9 Bible Online

1 Kɔrèn 9 - Fɨso Fi bible

1 Kɔrèn 9

¹Ɨmbə̀ʼ mə wɨ ənɨ mɨ ɨghəm ə? Ɨmbə̀ʼ mə yɨə wə̀d tom Kristo ə? Ɨmbə̀ʼ mə fə zə ə Yeso a Ə̀nùŋɨ̀sɨg ə? Ɨmbə̀ʼ mbə̀ fə ben Ə̀nùŋɨ̀sɨg ɨmbə̀ʼ ɨchî nɨ mə̀ faʼ rɨka ə?

²À mɨ yeʼ nɨ chəi bə̂d mɔʼɔ ben ni mə yɨə wə̀d tom Kristo, njɨ mə kyerɨ ni mbən ə benɨ, ɨmbə̀ʼ ɨghəm nɨ mbə̀ yɨ ənweenɨ ze nɨ chwi ni mɔ̌ yɨə wə̀d tom Kristo.

³Ənɨ bə̂d ə biirɨ ɨ num ni mə kɨə ghàə̀ ni mə yɨə wə̀d tom Kristo ɨmbə̀ʼ ə ye ə? Mə bɨrɨ wiirɨ ni:

⁴Zɨ̀ rɨ wa kuʼi ni mbə̀ naʼ ɨghɨjɨg fɔrɨ mɨnoʼ ɨ na ə?

⁵Zɨ̀ rɨ wa kuʼi ni tɨ̀ yenə mbɨ mba məyi nɨ ben ə Kristo ɨchî nɨ bə̂d tom cherə mbɨ ə bɔŋgɔb Ə̀nùŋɨ̀sɨg mbɨ Pità [3] ə ghɨ̀ə̀ ə?

⁶Kɨ̀ à wa kɨ àmei mɔ̌ mbɨ Banabàs nɨ berɨ fàʼ ənɨ mba ɨbɔ bɔŋ jɨg ə?

⁷À kɨə sɔgyɨ̀ wi nɨ wɨ̀ mɨ fàʼ wɨ̀ chwɨ i ɨnyod zi ə? À kɨə we nɨ bɨrɨ kon mbeŋ vaìn nɨ chəi wɨ̀ bɨrɨ kud rɨtam vaìn mɔʼɔ ə? À kɨə we nɨə nəŋgɨə njɨ̀g nɨ chəi wɨ̀ bɨrɨ nɔ ɨbən məd ə?

⁸Mə wɨə wa ghà ənû zɔ̂ tɨ ənɨ rɨkɔndɨ bə̂d mɨ̀sɔŋɨchù ə? Ɨmbə̀ʼ tɨkə rɨ Mose tɨə bə̀ ghà àmei əndəŋ əndəŋ ə?

⁹Ə zɨ ɨŋga tɨkə rɨ Mose ni, “Tɨrə̀ kod e ɨchû rɨkun ənɨ zɨə kwètɨ̀ə̀ [4] kywɨ-kɔ̀ʼ.” Ŋwìə̀ wa nyaʼa ghà ənû zɔ̂ àmei ɨmbə̀ʼ mbɨ̀rɨkun ə?

¹⁰Ɨmbə̀ʼ wɨ̀ nyaʼa ghà ənû zɔ̂ yeʼ ɨmbə̀ʼ əwa ə? Mbɨ nyaʼa bə̀ ŋwàʼnɨ̀ yeʼ ɨmbə̀ʼ əwa, ɨmbə̀ʼ ɨghəm nɨ wə̀d we nɨə niʼ ɨbən wɨə niʼə, we nɨə kwètɨ̀ə̀ kywɨ̀ wɨə bə̀ kwètɨ̀ə̀. Ɨ mbɨə ghɨ̀ əne ɨmbə̀ʼ berɨ əba tɨ ənɨ ɨghɨ mbe.

¹¹Tɨ̀ mɨ fə kon ɨghɨ mbe nɨ Əzwî ə naʼ ɨ na əkaʼ nən, njɨ zɨə wa nɔʼ əku əwù ze nɨ tɨ̀ biirɨ ɨghɨ mɔʼɔ rɨ nən ə?

¹²Bə̂d mɔʼɔ mɨ berɨ ɨka nɨ biirɨ ɨghɨ mbɔ̂ rɨ nən, njɨ chəi tɨ̀ berɨ ɨka chè mɨ̀mə̌d ə? Àyɨə chəi tɨ̀ nɨŋ ɨka we. Tɨ̀ fə nyiʼ ɨnû jìm ɨmbə̀ʼ tɨ rɨ̀ kən a ɨkə̂n chɔ̀m we nɨ tɨə ghà ɨmbə̀ʼ ə Kristo.

¹³Chəi mbə̀ kyerɨ ni bə̂d mbe nɨə fàʼ ɨŋga mbàn Ŋwìə̀ mbɨə jɨgə rɨ ə mbàn Ŋwìə̀ ə? Chəi mbə̀ bə kyerɨ ni bə̂d mbe nɨə nàʼ ɨghɨ ə̀fà mbɨə nɨŋ əbà rɨ ənɨ ɨghɨ mbe nɨ mbɨə naʼ ənɨ mbən ə?

¹⁴À yɨə bə̀ əndəŋ əndəŋ nɨ Ə̀nùŋɨ̀sɨg fə sob ni bə̂d mbe nɨə ghà ɨkə̂n chɔ̀m jɨg rɨ ənɨ ɨkə̂n chɔ̀m we.

¹⁵Àyɨə chəi mə̀ kɨrɨ nɨŋ ɨka wɔ̂ ɨmbə̀ʼ ghɨ ɨnû ɨghabɨ mbɔ̂. Chəi mɨə ŋwàʼnɨ̀ ə̀ŋwàʼnɨ̀ zɔ̂ ɨmbə̀ʼ mbə ghɨ ɨnû ɨghabɨ mbɔ̂ ənɨ ə num. Zɨə bɨrɨ kaŋ bɔ̀ŋ ni mə̀ kwɨ chè ɨchî nɨ wə̀d mɔʼɔ bɨrɨ ghɨ ni tɨ mə̀ goŋ əmɨ ɨgɔ̂ ɨmbə̀ʼ ɨchî nɨ mɨə ghà ɨkə̂n chɔ̀m nɨ chəi mbɨə chwɨ əmɨ.

¹⁶Mə mɨ ghà ɨkə̂n chɔ̀m, kaʼi ənû ɨ num nɨ goŋ ɨgɔ̂, ɨmbə̀ʼ ɨghəm nɨ mə berɨ gha ɨkə̂n chɔ̀m. Ŋgəʼ bɨrɨ nyɨ ɨgwɨ num əwù ze nɨ chəi mə gha ɨkə̂n chɔ̀m!

¹⁷Mə mɨ yeʼə ghà ɨkə̂n chɔ̀m ənɨ mɨ ɨghəm, njɨ mə bɨrɨ kəb ɨchɔʼ ə̀fàʼì. À mɨ yeʼ nɨ chəi mɨə ghà ənɨ mɨ ɨghəm, njɨ mə wɨə ghɨ̀ yeʼ ənû ze nɨ Ŋwìə̀ zɨ ɨŋga tum rɨkyerɨ-ɨbɔ.

¹⁸Əne mɨ ɨchɔʼ ə̀fàʼì kɨə ye ə? Àmei ni mə mɨ yeʼə ghà ɨkə̂n chɔ̀m, tɨ mə̀ ghɨ əmɨ ni bə̂d chwɨ əmɨ. Əne chəi mə bɨrɨ nɨŋ ɨka we nɨ mə berɨ ɨmbə̀ʼ ghɨ̀ ni mbə̀ chwɨ əmɨ.

¹⁹Ka à bè yeʼi ni mə wɨ ənɨ mɨ ɨghəm, nɨ chəi mə̀ ben ə̀bòʼò əmbɨ wə̀d mɔʼɔ, àyɨə mə fə ben ə̀bòʼò əmbɨ wə̀d jìm ɨmbə̀ʼ mə̀ ghɨ ni bə̂d mɨ̀nɔnɔʼ ben ə Kristo.

²⁰Ənɨ mə̀ yeʼ əkaʼ mɨ̀Jû, mə yɨ ɨghabɨ wɨ̀ mɔʼɔ rəbɔʼ mɨ̀mə̌d, ɨmbə̀ʼ mə ghɨ ni mbɨ ben ə Kristo. Ənɨ mə̀ yeʼ əkaʼ bə̂d mbe nɨə nùŋ rɨkə, mə yɨ ɨghabɨ ə wə̀d nɨə nùŋ rɨkə, ɨmbə̀ʼ mə̀ ghɨ ni bə̂d mbe nɨə nùŋ rɨkə ben ə Kristo, ka à be yeʼi ni chəi mɨə nùŋ rɨkə.

²¹Ənɨ mə̀ yeʼ əkaʼ bə̂d mbe nɨ chəi mbɨə nùŋ rɨkə, mə yɨ ɨghabɨ ə wə̀d nɨ chəi wɨə nùŋ rɨkə, ka à be yeʼi ni chəi mɨə nùŋ rɨkə te, àyɨə mə wɨ əton rɨkə Kristo, ɨmbə̀ʼ mə̀ ghɨ ni bə̂d mbe nɨ chəi mbɨə nùŋ tɨkə rɨ Ŋwiə̀ ben ə Kristo.

²²Ənɨ mə̀ yeʼ əkaʼ bə̂d mbe nɨ bɔrɨ, mə bə̀ bɔd, ɨmbə̀ʼ mə̀ ghɨ ni bə̂d mbe nɨ bɔrɨ ben ə Kristo. Mə fə bèŋ ənɨ ɨghɨjìm əmbɨ ə bə̂d mɨ̀jìm, ɨmbə̀ʼ mə̀ che ənɨ tɨkwɨrɨ ɨnə̂njɨ̀ jìm chɨ̀ mbɨ mɔʼɔ rəŋgəʼ.

²³Mə wɨə ghɨ̀ ɨnû mbɔ̂ jìm ɨmbə̀ʼ jaŋ ɨkə̂n chɔ̀m. Mə wɨə ghɨ̀ əne ɨmbə̀ʼ mə̀ bə̀ berɨ əbɔrəbɔd ze nɨ ɨkə̂n chɔ̀m ə ghɨ̀ ni bə̂d berɨ.

²⁴Chəi mbə̀ kyerɨ ni ənɨ ə̀nòtɨ̀, bə̂d mɨ̀jìm mbɨə nòrə̀, àyɨə àmei wə̀d mɔʼ we ə nɨŋ ɨchwɨ ə? Əne mbə̀ notə ənɨ ɨkwɨ ɨnə̂njɨ̀ nɨ tɨ̀ mbə̀ nɨŋ ɨchwɨ we.

²⁵Bə̂d mɨ̀jìm mbe nɨə ferɨə mbɨə yimbɨ ɨnyod ɨchî chɔ̀m ənɨ ɨnû jìm. Ɨ mbɨə ghɨ̀ əne ɨmbə̀ʼ nɨŋ ɨchwɨ nɨ yeʼ tɨ̀kwě te nɨə bə̀ə. Àyɨə tɨ̀ wɨə ghɨ̀ əne ɨmbə̀ʼ nɨŋ te nɨ chəi tɨə bə̀ə.

²⁶Əne chəi mɨə nòtɨ̀ əŋgu əŋgu. Chəi mɨə bə̀ zɔ̀ŋ ɨghabɨ ə wə̀d nɨə kòm əsɨ əko.

²⁷Mə wɨə yimbɨ mɨ ɨnyod ɨmbə̀ʼ wɨ ben ə̀bòʼò ɨ num, ɨmbə̀ʼ mə mɨ ghà ɨkə̂n chɔ̀m əmbɨ ə bə̂d cherə, tɨ mə̀ sam əmɨ ɨchwɨ we.