Read Fɨso Fi 2 Kɔrèn 11 Bible Online

2 Kɔrèn 11 - Fɨso Fi bible

2 Kɔrèn 11

¹Mə kə̀b ni mbə̀ yim fîŋ mbɨ num ɨchî nɨ mə fundɨ rɨpiî. Mbə̀ wom yim fîŋ mbɨ num!

²Mə wɨə ghɨ̀ ə̀dìì ɨgwɨ nən ɨchî nɨ Ŋwìə̀ ziə ə bə̀ ghɨ̀ə̀. Mbə yɨ əyi rɨ kyerɨ mbaŋə̀ nɨ mə nyaʼa nyɨ əmbɨ ɨnom mɔʼ, əne yɨə Kristo.

³Àyɨə mə wɨə bɔə ni ɨchî nɨ jɔ nyaʼa nɨŋ ɨwe tambɨ ə Efà, [3] ɨ mbe tɨ mbɨ bə̀ fèbrɨ̀ tə rɨkɔndɨ tɨ ənɨ ɨchî nɨ mbə̀ə fàʼ əmbɨ Kristo ənɨ ə fîŋ jìm bə̀ fɔrɨ ənɨ ə fîŋ nɨ zeŋɨ.

⁴Mə wɨə ghà əne ɨmbə̀ʼ ɨghəm nɨ mbə mbɨə zàmbɨ̀ə̀ benə wə̀d mɔʼɔ we nɨ yeʼe ghà ɨnû ɨ nən ɨmbə̀ʼ ə Yeso cherə chè rɨ ənɨ we nɨ tɨ̀ nyaʼa gha ɨ nən ɨmbə̀ʼ əməd, kɨ̀ ɨmbə̀ʼ əzwî ə cherə chè rɨ ənɨ əze nɨ mbə nyaʼa nɨŋɨ, kɨ̀ mbə zu ɨkə̂n chɔ̀m cherə chè rɨ ənɨ we nɨ mbə nyaʼa benɨ.

⁵Chəi mə̀ kɔndɨ ni mə kə chè “bə̂d tom Kristo mbe nɨə ghàə̀ ni mbə chè mbɨ mɨjìm.”

⁶Chəi mə̀ kyerɨ ɨchî nɨ ghàm ɨchî chɔ̀m, àyɨə mə berɨ ɨwe. Tɨ̀ fə nɨŋ tɨkwɨrɨ ɨnə̂njɨ̀ jìm ɨ ghɨ ni ɨnû mbɔ̂ zeŋ ɨ nən.

⁷Mə wa nyaʼa ghɨ̀ ənû rɨbɔ̀ŋ ənɨ mə nyaʼa swi mɨ ɨnyod ɨmbə̀ʼ nɔ əwən, kɨ ɨchî nɨ mə̀ nyaʼa gha ɨkə̂n chɔ̀m rɨ əmbɨ ə Ŋwiə̀ ɨ nən ətu ə̀kǒ ə?

⁸Mə nyaʼa jɨ rɨ əmbɨ rɨfetɨ bə̂d Kristo cherə ɨchî nɨ mə nyaʼə nɨŋ ə̀wèèrɨ̀ tɨ əmbɨ mɨ̀mə̌d ɨmbə̀ʼ faʼ ɨ nən.

⁹Ənɨ mə̀ nyaʼa mbɨ nən kwaŋ əghɨ ə mɔʼɔ, chəi mə̀ nyaʼa chə wə̀d mɔʼɔ rəbɔʼ nən, ɨmbə̀ʼ ɨghəm nɨ mbɨ bɔŋgɔb mbe rɨ ə Màsèdonià nyaʼa naʼ ɨghɨ mbe nɨ mə̀ nyaʼa kwaŋɨ. Mə nyaʼa ton, əne mə wɨə bə̀ kɨrɨ ton nɨ chə əwən.

¹⁰Mə wɨə ghà rəsìʼ ɨchî nɨ Kristo nyaʼə ghàə̀. Əne chəi wə̀d mɔʼɔ rɨŋga əbà əbeŋ ze rɨ ə Àkàiyà we tɨ̀ wɨ̀ təmnɨ ɨchî nɨ mɨə goŋ ɨgɔ̂.

¹¹Əton kɨ ni ye ə? À kɨ ɨmbə̀ʼ ɨghəm nɨ chəi mə̀ ghaʼ əwən ə? Ŋwìə̀ ə kyerɨ ni mə ghaʼ əwən.

¹²Mə bɨrɨ wo ɨmbì ghɨ ənû ze nɨ mɨə ghɨ̀ə̀, ɨmbə̀ʼ chɨ ətən rɨ ɨnyɨ bə̂d mbe nɨə ghàə̀ nɨ mbə mbɨ əndəŋ əndəŋ mbɨ na ənɨ ɨnû mbe nɨ mbɨə goŋ ɨgɔ̂ ɨmbə̀ʼ mbɨwən.

¹³Tɨkwɨrɨ bə̂d tɔ̂ yɨə bə̂d tom mɨghab. Ɨ mbɨə tambɨ ə bə̂d ənɨ ɨnû mbe nɨ mbɨə ghɨ̀ə̀. Ɨ mbɨə bə̀ bègrə̀ ɨghabɨ ni mbə yɨə bə̂d tom Kristo rəsìʼ.

¹⁴Chəi ənû ə̀bìrɨ̀ ənɨ ənû zɔ̂! Satàn ziə wɨə bègrə̀ ɨghabɨ ni tə yɨə aŋgɨrə̀ Ŋwiə̀ nɨə nàʼ ɨzeŋɨ zeŋɨ.

¹⁵Əne kaʼi ənû rɨ̀sɔ̀ʼɔ̀ ni bə̂d ə̀fàʼì məd mbɨə bə̀ bègrə̀ ɨghabɨ ni mbə yɨə bə̂d nɨə ghɨ̀ ɨnû nɨ kuʼnɨ. Ɨnwǐ mɨ̀mə̌d bɨrɨ yeʼ ɨchî nɨ ɨ̀fàʼì mɨ̀mə̌d chwiə.

¹⁶Mə̀ yì ghà ni, tɨ wə̀d mɔʼɔ kɔndɨ i ni mə yɨ əneŋ. Àyɨə mbə mɨ kɔndɨ əne, mbə sɨ nɨŋ ni mə yɨ əneŋ, ɨmbə̀ʼ mə bə goŋ ɨgɔ̂ rɨpiî.

¹⁷Ənû zɔ̂ nɨ mɨə ghà ɨmbə̀ʼ ənû nɨ goŋ ɨgɔ̂, kaʼi Ə̀nùŋɨ̀sɨg nàʼ ɨka ɨ num ni mə̀ ghà əne. Mə wɨə ghàə̀ yeʼ ɨghabɨ əneŋ.

¹⁸Bə̂d mɨ̀nɔnɔʼ mbɨə goŋ ɨgɔ̂ ɨchî nɨ bə̂d ɨŋga ɨsɨg ə goŋə, əne mə bɨrɨ bɨ goŋ.

¹⁹Ɨchî nɨ mbə̀ yeʼ bə̂d ɨwe, mbə mbɨə ghaʼə nɨ ben ɨnû mbe nɨ ɨneŋ ə ghàə̀!

²⁰Mbə mbɨə benə wə̀d mɔʼɔ we nɨ beŋ əwən ənɨ ɨ̀bòʼò, kɨ̀ we nɨ tambɨ əwən fè mbə ɨghɨ, kɨ̀ we nɨ nyem əwən ɨmbə̀ʼ jɨg mbə ɨghɨ, kɨ̀ we nɨ ghɨ ɨghabɨ ni tə yɨə Wə̀d kyeŋ mɔʼɔ, kɨ̀ we nɨ tum əbɔ ənɨ ə ɨfě.

²¹Mɨ ətu ə zɨə nìrə̀ nɨ gha ɨ nən ni tɨ̀ nyaʼa bɔd əku nɨ ghɨ tɨkwɨrɨ ɨnû tɔ̂! Ənû ze nɨ wə̀d mɔʼɔ yim fîŋ goŋ ɨgɔ̂ ɨmbə̀ʼ əzɨ əwən, mə wɨə ghàm ɨghabɨ əneŋ, mə bɨrɨ bɨ yim fîŋ goŋ ɨgɔ̂ ɨmbə̀ʼ əzɨ əwən.

²²Mbɨ wa kɨ mɨ̀Hibrù ə? Mɔ̌ yɨə bə wɨ mɔʼɔ. Mbɨ wa kɨ mɨ̀Izre ə? Mɔ̌ yɨə bə wɨ mɔʼɔ. Mbɨ wa kɨə bɔn tɨ ənɨ əghaŋ ə Abràham ə? Mɔ̌ yɨə bə wɨ mɔʼɔ.

²³Mbɨ wa kɨə bə̂d ə̀fàʼì Kristo ə? Mə wɨə ghàm ɨghabɨ ətəd. Mə chè mɨ̀mə̌d. Mə fə fàʼ rɨ̀kǎ chè mɨ̀mə̌d, mə fə nyɨ ndəŋ ɨghəm nɔnɔʼ, mbɨ fə som əmɨ ɨghəm nɨ chəi ənɨ tɨ̀ mbɨ taŋ, mə fə jwɨ̀ rɨ ɨchû ɨvɨ ɨghəm nɔnɔʼ.

²⁴Mɨ̀Jû nyaʼa te əmɨ ənɨ ə ŋgwad ɨghəm ɨwum tad chɔ̀b əbuə. Mbɨ nyaʼa ghɨ əne ɨghəm tân. [4]

²⁵Mbɨ nyaʼa buʼ əmɨ ənɨ ə mbàŋ ɨghəm tad. Mbɨ nyaʼa tumbɨ əmɨ ənɨ əti ɨghəm mɔʼ. Ɨbaŋ ɨgyɨ̀ nyaʼa sandɨ mbɨ num ɨŋga ɨghəm tad. Mə nyaʼa nəŋ ɨgwɨ rɨ̀bàà ɨzimɨ mɔʼ mbɨ əziə mɔʼ.

²⁶Mə wɨə nyaʼə kɨə yènə̀. Mə nyaʼa nɨrə koŋ ɨŋga ɨgyɨ̀ kyeŋ. Mɨjɨ ka ka nyaʼa nɨrə zwiirɨ əmɨ. Mbɨ bə̂d əbeŋ nyaʼa nɨrə zwiirɨ əmɨ. Bə̂d mbe nɨ kaʼi mɨ̀Jû nyaʼa nɨrə zwiirɨ əmɨ. Mə nyaʼa nɨrə kwɨ ɨŋga ɨsɨ kyeŋ. Mə nyaʼa nɨrə kwɨ ɨŋga ɨbad rɨkwàʼi. Mə nyaʼa nɨrə kwɨ ɨŋga rɨ̀bàà. Bɔŋgɔb mɨghab nyaʼa nɨrə zwiirɨ əmɨ.

²⁷Mə wɨə nyaʼə fàʼ rɨ̀kǎ bə̀ nwìʼ ɨnyod. Chəi mə nyaʼa gwenɨ ɨzimɨ nɔnɔʼ. Mə wɨə nyaʼa chub ə njì, ədɔʼ ə bə̀ ne əmɨ. Mə wɨə nyaʼə chub ɨghəm nɔnɔʼ nɨ chəi əghɨjɨg. Mə wɨə nyaʼə kwaŋ ngywɨ̌ əne ɨfə wɨə nyaʼə kɔ əmɨ.

²⁸Ɨ yi əbɔʼ ɨnû mbɔ̂, mə wɨə nyaʼə kɔn ɨnû ɨni jìm ɨmbə̀ʼ tɨfetɨ bə̂d Kristo rɨjìm.

²⁹À kɨə we nɨ bɔrɨ, nɨ chəi mə̀ bə bɔd ə? À kɨə we nɨ mbɨ ghɨ ni wɨ̀ ghɨ̌ ənû rɨbɔ̀ŋ, nɨ chəi mɨ fîŋ tɔb əmɨ ə?

³⁰À mɨ kàŋ yeʼ ni mə berɨ goŋ ɨgɔ̂, njɨ mə bɨrɨ goŋ ɨmbə̀ʼ ɨnû mbe nɨ chwiə ni mə bɔd.

³¹Ŋwìə̀ Mbǎʼ Ə̀nùŋɨ̀sɨg Yeso ə kyerɨ ni chəi mɨə ghà mɨghab. Tɨ̀ yiirɨ məd koŋ!

³²Ənɨ mə nyaʼa ə Dàmaskɔ̀s, gɔmnà we nɨ nyaʼa əton ɨfɔ̀n Aretàs nyaʼa chà mɨ̀sɔgyɨ̀ ni mbɨ nəŋgɨ əsɨ ze ɨmbə̀ʼ gywɨ əmɨ.

³³Àyɨə bə̂d mɔʼɔ nyaʼa swi əmɨ ɨŋga rɨkaʼ ənɨ ə windò nɨ nyaʼa ə̀gùʼ ɨkam, əne mə nyaʼa vɨ rɨŋga tɨkyerɨ-ɨbɔ məd.