Read Fɨso Fi 2 Kɔrèn 2 Bible Online

2 Kɔrèn 2 - Fɨso Fi bible

2 Kɔrèn 2

¹Mə nyaʼa fə nùŋ ɨŋga mɨ fîŋ ni chəi mə̀ bɨrɨ wɨrɨ yeʼe mo əwən, ɨmbə̀ʼ tɨ mə̀ tɔɔnɨ əmɨ tə fîŋ.

²Mə mɨ tɔɔnɨ tə fîŋ, njɨ à kɨ mɨwe cherə yeʼ əŋgu nɨ bɨrɨ ghɨ ni ɨghaʼi swi ɨŋga mɨ fîŋ chè àmei rɨ ənɨ mbə̀n mbe nɨ mə̀ tɔɔnɨ tə fîŋ ə?

³Mə nyaʼa ŋwaʼnɨ ə̀ŋwàʼnɨ̀ ze ɨchî nɨ mə̀ nyaʼa ŋwaʼnɨ, ɨmbə̀ʼ mə mɨ yeʼe, tɨ bə̂d mbe nɨ kəʼ berɨ ghɨ ni ɨghaʼi swi ɨŋga mɨ fîŋ wɨrɨ bèŋ ə tɔɔnɨ mɨ fîŋ. Mə kyerɨ rəsìʼ ɨmbə̀ʼ mbə̀n mɨjìm ni ɨghaʼi mɨ swi ɨŋga mɨ fîŋ, wɨ bɨrɨ bɨ swi ɨŋga tən.

⁴Ənɨ mə nyaʼa ŋwaʼnɨ ə̀ŋwàʼnɨ̀ ze ɨ nən, mə nyaʼa kàŋ kə̀n əku, mɨ fîŋ bə̀ tɔb əmɨ, əne mə nyaʼa zə̀ʼ. Chəi mə̀ nyaʼa ŋwaʼnɨ ɨmbə̀ʼ tɔɔnɨ tə fîŋ. Mə nyaʼa ŋwàʼnɨ̀ ɨmbə̀ʼ mbə̀ kyerɨ ni mə kàŋ ghaʼ əwən kwàʼ rɨŋgəʼ.

⁵Wə̀d mɔʼɔ mɨ tɔɔnɨ fîŋ wə̀d cherə, chəi wɨ̀ ghɨ əne yeʼ ənɨ ə num. Wɨ̀ fə chè ənɨ ɨkwɨ ɨnə̂njɨ̀ mɔʼɔ ghɨ̀ yeʼ ənɨ mbə̀n mɨjìm. Chəi mə̀ bɨrɨ gha əku ɨmbə̀ʼ ənû zɔ̂.

⁶Ɨchə we nɨ bə̂d mɨ̀nɔnɔʼ əkaʼ nən nyaʼa zɨ ɨgwɨ məd fə kùʼ. [1]

⁷Àyɨə rɨ̀nîn, mbə berɨ waʼ ɨnû rɨbɔ̀ŋ məd bə̀ nəərɨ əməd ɨmbə̀ʼ tɨ wɨ̀ kən əku, njɨ ə̀kə̀nɨ̀ ze ə bɨrɨ ghɨ̀ ni ɨbenɨ məd wɨrɨ bɔd.

⁸Əne mə wɨə buʼ ɨbɔ ɨ nən ni mbə̀ chwi ɨ bɔ ni mbə kɨrɨ ghaʼ əməd.

⁹Mə nyaʼa ŋwaʼnɨ ə̀ŋwàʼnɨ̀ ze ɨmbə̀ʼ zweʼrɨ əwən ɨ zə ni mbə mbɨə zuunɨ əmɨ ənɨ ɨnû jìm ə.

¹⁰Mbə mɨ fə waʼ ɨnû rɨbɔ̀ŋ wə̀d mɔʼɔ, mə fə bə̀ waʼ. Mə mɨ fə waʼ, njɨ ənû ze nɨ mə̀ fə waʼa, mə fə waʼ ɨfě Kristo ɨmbə̀ʼ əwən.

¹¹Tɨ̀ wɨə ghɨ̀ əne ɨmbə̀ʼ tɨ Satàn che i əwa ənɨ ɨwe. Tɨ̀ kyerɨ ɨnû rɨbɔ̀ŋ jìm mbe nɨ wɨə taŋə.

¹²Ənɨ mə nyaʼa wò ə Troàs ɨ gha ɨkə̂n chɔ̀m ɨmbə̀ʼ ə Kristo əŋgu, Ə̀nùŋɨ̀sɨg nyaʼa chwi əpan ɨ num ni mə faʼ ɨ bɔ.

¹³Chəi mɨ fîŋ nyaʼa zurɨ ɨmbə̀ʼ ɨghəm nɨ chəi mə̀ nyaʼa zə wum aŋgɔb Taitùs əŋgu. Əne mə nyaʼa ndàʼnɨ̀ mbɨ ə bə̂d mbe nɔ̀ʼ wò ə Màsèdonià.

¹⁴Tɨ̀ naʼ məben-əwe əmbɨ ə Ŋwiə̀ ni, ənjìm ɨchî nɨ tɨ̀ yeʼ ənɨ ɨfɔtɨ mbɨ Kristo, ɨ wɨə che ɨmbì na ɨghəm jìm ghɨ̀ə̀ ni tɨ̀ yèn ɨghabɨ ə bə̂d nɨ che bid. Ɨ wɨə ghɨ̀ə̀ ni tɨ̀ jaŋ ɨnû mbe nɨ tɨ̀ kyerɨ ɨmbə̀ʼ ə Kristo ɨsɨ jìm. Ɨnû mbe yɨ ɨghabɨ ɨfɔ chɔ̀m.

¹⁵Tɨ̀ yɨ ɨghabɨ əghɨ ze nɨə nyùʼrɨ ɨfɔ chɔ̀m nɨ Kristo ə nàʼ əmbɨ ə Ŋwiə̀. Tɨ̀ wɨə nyùʼrɨ ɨfɔ chɔ̀m əkaʼ bə̂d mbe nɨ Ŋwìə̀ ə chɨ̀ rəŋgəʼ bə̀ fɔrɨ əkaʼ mbe nɨə nimə.

¹⁶Əmbɨ ə bə̂d mbe nɨə nimə, ɨfɔ we wɨə zwiirɨə bə̂d. Əmbɨ mbe nɨə jwɨ̀ rəŋgəʼ, ɨfɔ we wɨə nàʼ ɨ̀tènɨ̀. À kɨə we nɨ kaŋ kùʼ nɨ faʼ ɨkwɨ ə̀fàʼì wɔ̂ ə?

¹⁷Ka tɨ̀ yɨ a ɨghabɨ ə bə̂d mɨ̀nɔnɔʼ mbe nɨə nɨŋ ɨŋgam Ŋwiə̀ beʼrɨ ɨwin əŋgu ɨmbə̀ʼ jɨg njìm. Tɨ̀ wɨə ghà rəsìʼ ənɨ ta fîŋ rɨjìm ɨfě Ŋwiə̀ ɨchî nɨ tɨ̀ yeʼ ənɨ ɨfɔtɨ mbɨ Kristo. À yɨə Ŋwìə̀ ziə tom əwa ni tɨ̀ ghamə.