Read Fɨso Fi 2 Kɔrèn 7 Bible Online

2 Kɔrèn 7 - Fɨso Fi bible

2 Kɔrèn 7

¹Mbɨ bɔŋgɔb nɨ mə̀ ghaʼi kwàʼ rɨŋgəʼ, ɨchî nɨ Ŋwìə̀ kaʼ ɨnû mbɔ̂ ɨ na, əne tɨ̀ ton ɨnû rɨbɔ̀ŋ mbe nɨə ghɨ̀ ni nyamnyod mbɨ əzwî chubɨ rɨ zeŋ. Tɨ̀ kywɨ ənywɨ zə ni tɨ̀ zeŋ màànɨ̀ ɨchî nɨ tɨə wumnɨ ə Ŋwiə̀.

²Mbə tekɨ əsɨ ɨ na ɨŋga tə fîŋ. Chəi tɨ̀ ghɨ ənû rɨbɔ̀ŋ ənɨ ə wə̀d mɔʼɔ. Chəi tɨ̀ febrɨ wə̀d mɔʼɔ. Chəi tɨ̀ nyem wə̀d mɔʼɔ ɨmbə̀ʼ jɨg əməd.

³Chəi mə ghà ənû zɔ̂ ɨmbə̀ʼ zɨ ɨsaʼi ɨgwɨ nən, ɨmbə̀ʼ ɨghəm nɨ mə fə be kə̀ʼ ghà ni mbə mbɨ ɨŋga ta fîŋ. Tɨ̀ bɨrɨ kwɨ ɨnɔ̂n bə̀ tèn ɨnɔ̂n.

⁴Mɨ fîŋ zɨə kaŋ ɨgwɨ nən. Mə wɨə kàŋə̀ nɔ ɨnyod ɨmbə̀ʼ əwən. Mbə fə tìmbɨ̀ əmɨ kwàʼ ɨchî chɔ̀m. Ɨŋga a ŋgəʼ jìm, ɨghaʼi nɨ chè əbɔ ə swi ɨŋga mɨ fîŋ ɨmbə̀ʼ əwən.

⁵Ka àbei ənɨ tɨ̀ nyaʼa pe ə Màsèdonià, chəi nyaʼa i ə̀zwììrɨ̀ ɨ na, àyɨə tɨ̀ wɨə nyaʼə zə ŋgəʼ ənɨ ɨkwɨ ɨnə̂njɨ̀ jìm. Tɨ̀ wɨə nyaʼə tàŋə̀ mbɨ ə bə̂d. Ɨbɔɔ nyaʼa bə̀ swi ɨŋga ta fîŋ.

⁶Àyɨə Ŋwiə̀ we nɨə nəərɨə bə̂d mbe nɨ ɨnû ə chè mɨ̀mə̌d, nyaʼa nəərɨ əwa ɨchî nɨ Taitùs nyaʼa yeʼe.

⁷Ka àmei ɨchî nɨ Taitùs nyaʼa yeʼe we nyaʼa nəərɨ əwa. Ɨchî nɨ mbə̀ nyaʼa timbɨ əməd nyaʼa bə̀ nəərɨ əwa. Wɨ̀ nyaʼa ghà ɨ na ɨmbə̀ʼ ɨchî nɨ mbə̀ kəb nɨ zə əmɨ. Wɨ̀ nyaʼa ghà ɨmbə̀ʼ ɨchî nɨ mbə mbɨə kə̀n ɨmbə̀ʼ ɨnû mbe nɨ mbə̀ nyaʼa ghɨ̌. Wɨ̀ nyaʼa bə̀ ghà ɨmbə̀ʼ ɨchî nɨ mbə̀ zɨ ɨka nɨ ghɨ ɨnû mbe nɨ mə̀ nyaʼa gha ɨ nən. Ɨnû mbɔ̂ nyaʼa ghɨ̀ ɨghaʼi swi ɨŋga mɨ fîŋ.

⁸Ə̀ŋwàʼnɨ̀ ze nɨ mə̀ nyaʼa cha ɨ nən ə nyaʼa mɨ ghɨ̀ ni ə̀kə̀nɨ̀ ə swi ɨŋga tə fîŋ, njɨ chəi mə kən ɨmbə̀ʼ əzɨ əwən. Mə mɨ nyaʼa kə̀n, njɨ mə nyaʼa kə̀n ɨmbə̀ʼ ɨchî nɨ mə nyaʼa zə ni zɨə nyaʼa ghɨ̀ ə̀kə̀nɨ̀ ə swi ɨŋga tə fîŋ ənɨ əkɔb ə nyùmə̀.

⁹Tɨ̀nîn mə wɨə ghaʼə, kaʼi ɨmbə̀ʼ ɨchî nɨ ə̀kə̀nɨ̀ ə nyaʼa swi ɨŋga tə fîŋ. Mə wɨə ghaʼ ɨmbə̀ʼ ɨchî nɨ ə̀kə̀nɨ̀ ze ə nyaʼa ghɨ̀ ni mbə bèŋ tə fîŋ. Ɨchî nɨ ɨkwɨ ə̀kə̀nɨ̀ we nɨ Ŋwìə̀ kəbɨ nyaʼa swi ɨŋga tə fîŋ, əne chəi tɨ̀ nyaʼa ghɨ ənû rɨbɔ̀ŋ ə mɔʼɔ ənɨ ə nən.

¹⁰Ɨkwɨ ə̀kə̀nɨ̀ we nɨ Ŋwiə̀ kəb ə zɨə ghɨ̀ ni bə̂d beŋ tə fîŋ. Ə zɨə ghɨ̀ ni bə̂d jwɨ rəŋgəʼ. Chəi bə̂d berɨ nɨ kə̀n ɨmbə̀ʼ ənû zɔ̂! Àyɨə ɨkwɨ ə̀kə̀nɨ̀ we nɨ bə̂d rɨŋga ɨsɨg kəb ə zɨə ghɨ̀ ni bə̂d kwɨ.

¹¹Mbə̀ zə əghɨ ze nɨ ɨkwɨ ə̀kə̀nɨ̀ we nɨ Ŋwiə̀ kəb ə fə ghɨ ɨŋga nən. Mbə̀ fə ghɨ̀ ɨka nɨ chɨ mbə ɨbɔ rɨŋga ɨnû mɔʼɔ mbe nɨ mbɨ nyaʼa chuʼ əwən ɨmbə̀ʼ mbɨwən. Mbə̀ nyaʼa sə ɨtəm əbɔʼ wə̀d we nɨ nyaʼa gu ənû. Mbə̀ nyaʼa bɔ ni Ŋwìə̀ bɨrɨ chə əwən. Mbə̀ nyaʼa kə̀b ni mə yeʼe mò əwən. Mbə̀ fə zɨ ɨka nɨ ghɨ ɨnû nɨ kuʼnɨ. Mbə̀ nyaʼa bə̀ chə wə̀d we nɨ nyaʼa gu ənû! Ənɨ ɨnû jìm, mbə fə chwiə ni chəi mbə̀ gu ənû ə mɔʼɔ.

¹²Əne ka à bè yeʼi ni mə nyaʼa ŋwàʼnɨ̀ ɨ nən, chəi mə nyaʼa ŋwaʼnɨ ɨmbə̀ʼ wə̀d we nɨ nyaʼa gu ənû, kɨ ɨmbə̀ʼ we nɨ wɨ̀ nyaʼa gu ənû ɨ bɔ. Mə nyaʼa ŋwàʼnɨ̀, ɨmbə̀ʼ ɨfě Ŋwiə̀, mbə mbe tɨ̀ mbə zə ɨchî nɨ mbə̀ ghaʼ əwa bə̀ zə ɨchî nɨ mbə̀ə zuunɨ əwa.

¹³Ənû zɔ̂ ə fə kàŋ nəərɨ əwa. Ɨ yì əbɔʼ ɨchî nɨ mbə̀ fə nəərɨ əwa, tɨ̀ wɨə bə̀ kàŋə̀ ghaʼ ɨchî nɨ ɨghaʼi nyaʼa swi ɨŋga fîŋ Taitùs, ɨmbə̀ʼ ɨghəm nɨ mbə̀n mɨjìm nyaʼa ghɨ̀ fîŋ məd zùtɨ̀.

¹⁴Mə wɨə nyaʼə goŋ ɨgɔ̂ əmbɨ Taitùs ɨmbə̀ʼ əwən, əne chəi mbə̀ naʼ tɨ̀nìd ətu ɨ num. Ɨchî nɨ ɨnû jìm mbe nɨ tɨ̀ nyaʼa gha ɨ nən yɨə nyaʼa ɨnû rəsìʼ, əne bə̂ ənû ze nɨ tɨ̀ nyaʼə goŋ ɨgɔ̂ ɨfě Taitùs ɨmbə̀ʼ əwən fə bə̀ jwɨ̀ ənɨ rəsìʼ.

¹⁵Ɨ wɨə ghaʼ əwən rɨ̀nîn chè ɨchî nɨ wɨ̀ nyaʼə beə ghaʼə, màànɨ̀ ənɨ wɨ̀ kɔndɨ ɨchî nɨ mbə̀n mɨjìm nyaʼə zuunɨ əməd fɔrɨ ənɨ wɨ̀ kɔndɨ ɨchî nɨ mbə̀ nyaʼa nɨŋ əməd mbɨ ɨbɔɔ fɔrɨ ɨwumnɨ kyeŋ.

¹⁶Mə kaŋ ghaʼ əku ɨmbə̀ʼ ɨghəm nɨ mə we tɨ̀ mə nùŋ mɨ fîŋ ɨgwɨ nən ənɨ ɨnû jìm!