Read Fɨso Fi 2 Kɔrèn 8 Bible Online

2 Kɔrèn 8 - Fɨso Fi bible

2 Kɔrèn 8

¹Mba bɔŋgɔb, tɨ̀ kə̀b ni mbə̀ kyerɨ ɨ̀chɔ̀m we nɨ Ŋwiə̀ nyaʼa ghɨ ənɨ rɨfetɨ bə̂d Kristo te rɨ əbà əbeŋ ze rɨ ə Màsèdonià.

²Ɨ mbɨə nyaʼa zə ŋgəʼ əku, àyɨə ɨghaʼi nyaʼa swi ɨŋga fîŋ tɨ mɨ̀mə̌d. Əze ə nyaʼa ghɨ̀ ni mbɨ saŋnɨ chè əbɔ, ka à bè yeʼi ni ɨkwaŋ mɨ̀mə̌d nyaʼa bə̀ chè əbɔ.

³Mə we tɨ̀ mə ghà ni mbɨ nyaʼa nàʼ ɨkab chè ɨchî nɨ mbɨ nyaʼa berɨ. Mbɨ nyaʼa nàʼ ɨchî nɨ mbɨ nyaʼa ghaʼ nɨ naʼ, kaʼi ni mbɨ nyaʼa nyèŋ mɨ̀mə̌d.

⁴Mbɨ nyaʼa buʼ ɨbɔ ɨ na ənɨ tə fîŋ rɨ̀jìm ni tɨ̀ naʼ əpan mbə̀ weerɨ bə̂d Ŋwiə̀ mbe nɨ yeʼ bə̂d kwaŋ ə Jèrusalèm.

⁵Mbɨ nyaʼa ghɨ̀ ənû zɔ̂ chè ɨchî nɨ tɨ̀ nyaʼa kɔndɨ. Mbɨ nyaʼa bè nàʼ ə ɨnyod əmbɨ Ə̀nùŋɨ̀sɨg. Mbɨ nyaʼa beenɨ nàʼ ə ɨnyod ɨ na ɨchî nɨ Ŋwìə̀ nyaʼa kəb ni mbɨ ghɨ əne.

⁶Əne tɨ̀ nyaʼa buʼ ɨbɔ əmbɨ Taitùs, nɨ nyaʼa kɔ ə̀fàʼì zɔ̂, ni wɨ̀ wo ɨmbì màànɨ̀ ə̀fàʼì ə chɔ̀m zɔ̂ əkaʼ nən.

⁷Tɨ̀nîn, ɨchî nɨ mbə̀ yeʼ ɨmbì ənɨ ɨnû jìm, əne yɨ ənɨ ɨbenɨ, ənɨ ɨŋgam, ənɨ ɨkyerɨ ɨnû, ənɨ ə fîŋ chɔ̀m nɨ weerɨ bə̂d bə̀ fɔrɨ ənɨ ɨghaʼi we nɨ mbə̀ ghaʼ əwa, mbə̀ zə ni mbə̀ bə yeʼ ɨmbì ənɨ ənû nɨ saŋnɨ.

⁸Chəi mə ghà ənû zɔ̂ ɨ nən ɨghabɨ ni à yɨ mə sobɨ sobɨ. Mə wɨə kəb mɨg yeʼ ɨchî nɨ mbə̀ ghaʼ bə̂d ənɨ tə fîŋ rɨ̀jìm mbɨ ɨchî nɨ bə̂d cherə ghaʼ ənû nɨ wèèrɨ̀.

⁹Mbə kyerɨ ɨ̀chɔ̀m we nɨ Ə̀nùŋɨ̀sɨg Yeso Kristo nyaʼa ghɨ̌, nɨ ka à bè yeʼi ni wɨ̀ nyaʼa berɨ mbɔ̂n, àyɨə wɨ̀ nyaʼa bèŋ ənɨ wə̀d ɨkwaŋ ɨmbə̀ʼ əwən, ɨmbə̀ʼ ənjìm ɨchî nɨ wɨ̀ kwaŋɨ, mbə mbe tɨ̀ mbə berɨ mbɔ̂n.

¹⁰Ɨkə we nɨ mə̀ berɨ nɨ naʼ ɨ nən ɨmbə̀ʼ ənû zɔ̂ yɨ ni: zɨə kùʼ ni mbə̀ maanɨ ənû ze nɨ mbə̀ nyaʼa be kɔ əghəm əwu. Mbə yɨə bə̂d rɨtu nɨ nyaʼa be kəb wèèrɨ̀. Mbə yɨə bə̀ ə bə̂d rɨtu nɨ nyaʼa ghɨ əne.

¹¹Mbə̀ maanə fetɨ ɨkab we ɨchî nɨ mbə nyaʼa be kaŋ nuŋ ɨŋga tə fîŋ ni mbə bɨrɨ wèèrɨ̀. Mbə̀ kaŋ ghɨ əne ənɨ ɨghɨ mbe nɨ mbə̀ berɨ,

¹²ɨmbə̀ʼ ɨghəm nɨ wə̀d mɨ berɨ fîŋ chɔ̀m nɨ wèèrɨ̀, Ŋwìə̀ bɨrɨ nɨŋ əghɨ ze nɨ wɨ̀ naʼa ɨchî nɨ wɨ̀ berɨ ɨghɨ, kaʼi ɨchî nɨ chəi wɨ̀ berɨ ɨghɨ.

¹³Chəi mə̀ kəb nɨ ghɨ ni ɨnû zam ɨgwɨ ə bə̂d mɔʼɔ, sɨ nìd yeʼ ɨgwɨ nən. Mə kə̀b yeʼ ni bə̂d mɨ̀jìm yeʼ əndəŋ əndəŋ.

¹⁴Tɨ̀nîn nɨ mbə̀ berɨ ɨghɨ nɔnɔʼ, mbə̀ naʼ ɨghɨ mbe nɨ mbɨ kəbɨ, ɨmbə̀ʼ ənɨ mbɨ bə̀ berɨ ɨghɨ nɔnɔʼ, mbɨ bɨrɨ bɨ naʼ mbe nɨ mbə̀ kəbɨ. Mbə mɨ ghɨ̀ əne, bə̂d mɨ̀jìm bɨrɨ yeʼ əndəŋ əndəŋ.

¹⁵Ə zɨ ɨŋga Ə̀ŋwàʼnɨ̀ ə Ŋwiə̀ ni, “Chəi wə̀d we nɨ nyaʼa fetɨ ɨghɨ nɔnɔʼ, nyaʼa berɨ mbɨ nɔʼ əku. Chəi we nɨ nyaʼa fetɨ àmei rɨpiî, nyaʼa berɨ mbɨ kə əku.”

¹⁶Mə wɨə nàʼə̀ məben-əwe əmbɨ ə Ŋwiə̀ nɨ nyaʼa ghɨ ni Taitùs berɨ fîŋ chɔ̀m nɨ weerɨ əwən ɨchî nɨ mə̀ bə berɨ.

¹⁷Chəi wɨ̀ nyaʼa ben àmei ənû ze nɨ tɨ̀ nyaʼa gha ɨ bɔ, àyɨə ɨchî nɨ wɨ̀ kaŋ ghaʼ nɨ weerɨ əwən, məd ziə wɨə yeʼe əsɨ nən ənɨ i ɨghəm.

¹⁸Tɨ̀ wɨə chà əməd mbɨ aŋgɔb cherə nɨ tɨfetɨ bə̂d Kristo rɨ̀jìm jeŋgɨ kyerɨ əməd ɨmbə̀ʼ ɨchî nɨ wɨə ghà ɨkə̂n chɔ̀m.

¹⁹Kaʼ àmei əze, tɨfetɨ bə̂d Kristo rɨ̀jìm fə bə̀ chɔʼ əməd ni wɨ̀ yenə mbɨ na ənɨ tɨə wo naʼ ə̀wèèrɨ̀ zɔ̂. Tɨ̀ wɨə wo nàʼ ɨmbə̀ʼ wumnɨ Ə̀nùŋɨ̀sɨg fɔrɨ ɨmbə̀ʼ chwiə fîŋ chɔ̀m ze nɨ tɨ̀ berɨ.

²⁰Tɨ̀ wɨə kə̀bə̀ ni tɨ wə̀d mɔʼɔ gha i ni chəi tɨ̀ jeŋgɨ yim ɨneʼe wɔ̂ nɨ tɨə wo nàʼ,

²¹ɨmbə̀ʼ ɨghəm nɨ tɨ̀ wɨə kə̀b ghɨ ɨnû nɨ kuʼnɨ ɨfě Ŋwiə̀ fɔrɨ ɨfě bə̂d.

²²Əne tɨ̀ wɨə bə̀ chà wa aŋgɔb mbɨ mɨ̀mə̌d. Aŋgɔb wɔ̂ yɨ we nɨ tɨ̀ fə zweʼrɨ əməd ɨghəm nɔnɔʼ zə ni wɨə kaŋ ghaʼ ənû nɨ weerɨ ənɨ ɨnû nɔnɔʼ. Wɨ̀ ghaʼ ənû nɨ wèèrɨ̀ tɨ̀nîn chè ɨchî nɨ wɨ̀ nyaʼə bèə̀ ghɨ̀ə̀. Ɨ wɨə ghɨ̀ əne ɨmbə̀ʼ ɨghəm nɨ wɨ̀ fə nuŋ i fîŋ ɨgwɨ nən.

²³À yeʼ ɨmbə̀ʼ ə Taitùs, məd wɨə fàʼə̀ mbɨ num ɨchî nɨ tɨə fàʼ ɨ nən ɨnɔ̂n. À yeʼ ɨmbə̀ʼ mba bɔŋgɔb, à yɨ tɨfetɨ bə̂d Kristo tom mɨ̀mə̌d. Ɨ mbɨə ghɨ̀ ni Kristo berɨ ɨwumnɨ.

²⁴Əne mbə̀ chwi ənweenɨ əmbɨ ə bə̂d mbɔ̂ ni mbə ghaʼ mɨ̀mə̌d, bə̀ chwi əton nɨ tɨə goŋ ɨgɔ̂ ɨmbə̀ʼ əwən, ɨmbə̀ʼ tɨfetɨ bə̂d Kristo te zə.