Read Fɨso Fi Gàlesià 2 Bible Online

Gàlesià 2 - Fɨso Fi bible

Gàlesià 2

¹Ənɨ ɨghəm ɨwu nyaʼa che wum chɔ̀b rɨ̀kwè, mə nyaʼa bə̀ yì kɔʼ wò ə Jèrusalèm mbɨ Banabàs. Mə nyaʼa bə̀ nɨŋ ə Taitùs tɨ̀ wò ɨnɔ̂n.

²Mə nyaʼa wò ɨmbə̀ʼ ɨghəm nɨ à yɨə Ŋwìə̀ nyaʼa chwi ɨ num ni mə̀ wo əŋgu. Mə nyaʼa wò pè tòʼrɨ̀ ɨkə̂n chɔ̀m we nɨ mə nyaʼə ghà əmbɨ ə bə̂d mbe nɨ kaʼi mɨ̀Jû. Mə nyaʼa tòʼrɨ̀ àmei əmbɨ ə bə̂d mbe nɨ nyaʼə chà ɨfetɨ we rɨ ə Jèrusalèm. Mə nyaʼa ghɨ̀ əne ɨmbə̀ʼ tɨ ə̀fàʼì ze nɨ mɨə fàʼə̀ kɨ̀ əze nɨ mə nyaʼa fə faʼi, ə che ətu ə̀kǒ.

³Chəi mbɨ nyaʼa be nyèŋ ni mbɨ ne ə Taitùs nɨ nyaʼa mbɨ num, ka à be yeʼi ni məd yɨə nyaʼə rɨ ə Gris.

⁴Ənû zɔ̂ ə nyaʼa kɔ ɨchî nɨ bɔŋgɔb mɨ̀ghab mɔʼɔ nyaʼa nyaʼrɨ yeʼe nyɨ əkaʼ na kə̀b kyerɨ ɨchî nɨ tɨ̀ nyaʼa chubɨ ənɨ a ɨghəm ɨchî nɨ tɨ̀ ɨfɔtɨ mbɨ Kristo Yeso. Mbɨ nyaʼa kə̀b yeʼ ni tɨ̀ ben ə̀bòʼò əton tɨkə rɨ Mose.

⁵Chəi tɨ̀ nyaʼa ben ənû ze nɨ mbɨ nyaʼa ghǎ, ka àbei ənɨ ɨkə nyùmə̀, ɨmbə̀ʼ mbə̀ wo ɨmbì ben ɨkə̂n chɔ̀m rəsìʼ we nɨ tɨ̀ nyaʼa gha ɨ nən.

⁶Chəi bə̂d mbɔ̂ nɨ bə̂d nyaʼə nèŋə̀ ni mbɨ yɨə bə̂d kyeŋ nyaʼa yi ənû ə mɔʼɔ əbɔʼ ɨkə̂n chɔ̀m we nɨ mə nyaʼə ghàə̀. (Kɨ̀ bə̂d mbɔ̂ nyaʼa yim mbɨ̀rɨmbin mbi, ka əze yɨ i ənû ə mɔʼɔ ɨ num. Ənû nɨ mə̀ kyerɨ yɨ ni chəi Ŋwìə̀ ə nèŋə̀ bə̂d yeʼ ənɨ mbɨ̀rimbin mbe nɨ mbɨ yimɨ).

⁷Àyɨə mbɨ nyaʼa zə ni Ŋwìə̀ fə zɨ̀ ənû nɨ gha ɨkə̂n chɔ̀m əmbɨ ə bə̂d mbe nɨ kaʼi mɨ̀Jû ɨŋga tum rɨkyerɨ-ɨbɔ, àmei ɨchî nɨ wɨ̀ nyaʼa zɨ ənû nɨ gha ɨkə̂n chɔ̀m əmbɨ mɨ̀Jû ɨŋga rɨkyerɨ-ɨbɔ Pità.

⁸Ɨtu mɨ̀mə̌d nyaʼa zeŋ ni Ŋwìə̀ we nɨ nyaʼa chɔʼ ə Pità tom ni wɨ̀ fàʼ əkaʼ mɨ̀Jû, nyaʼa bə̀ chɔʼ əmɨ tom ni mə faʼ əkaʼ ə bə̂d mbe nɨ kaʼi mɨ̀Jû.

⁹Ənɨ ə Jems mbɨ Pità fɔrɨ ə Jɔ̌n, nɨ nyaʼə təʼ ɨŋga ɨfetɨ we, nyaʼa zə ɨ̀chɔ̀m we nɨ Ŋwìə̀ nyaʼa ghɨ̌ ənɨ ə num, mbɨ nyaʼa te əbɔ ə jɨgɨ mbɨ num mbɨ Banabàs ɨ chwi ni tɨ̀ wɨ ənɨ ənû ə mɔʼ mbɨ mɨ̀mə̌d. Mbɨ nyaʼa ghɨ̀ əne ɨmbə̀ʼ tɨ̀ wo əsɨ ə bə̂d mbe nɨ kaʼi mɨ̀Jû, mɨ̀mə̌d sɨ wò əsɨ mɨ̀Jû.

¹⁰Ənû nɨ mbɨ nyaʼa gha ɨ na àmei ni tɨ̀ kɔndɨ ənû nɨ weerɨ bə̂d ɨkwaŋ, nɨ yeʼ ənû nɨ mə̀ nyaʼa kəb nɨ ghɨ̀.

¹¹Ənɨ Pità nyaʼa yeʼe ə Antiɔ̀k, mə nyaʼa ghàm əbɔʼ əməd ɨfě bə̂d. Mə nyaʼa ghàm əbɔʼ əməd ɨmbə̀ʼ ɨghəm nɨ wɨ̀ nyaʼa ghɨ̀ ənû nɨ rɨ kuʼ i.

¹²Mə nyaʼa ghàm əbɔʼ əməd ɨmbə̀ʼ ɨghəm nɨ bɔŋ bə̂d mbe nɨ Jems nyaʼa tomɨ nyaʼa yeʼe, ɨ wɨə nyaʼə jɨgə mbɨ ə bə̂d mbe nɨ kaʼi mɨ̀Jû. Àyɨə ənɨ mbɨ nyaʼa yeʼe, wɨ̀ nyaʼa kɔ sùŋgɨ̀ i rə̀bɔ̀ʼɔ̀ bə̀ kɔ ghàbrɨ̀ i ɨnyod, ɨmbə̀ʼ ɨghəm nɨ wɨ̀ nyaʼə bɔə bə̂d mbe nɨ nyaʼə ghàə̀ ni mbɨ ne bə̂d mɨ̀jìm mbe nɨ ben ə Kristo.

¹³Ənɨ wɨ̀ nyaʼə ghɨ̀ ə̀bèkɨ̀ ənû zɔ̂, mɨ̀Jû cherə nyaʼa beenɨ əbɔʼ məd. Ka àbei ə Banabàs, wɨ̀ nyaʼa bə̀ fèbə̀ ɨchî nɨ wɨ̀ nyaʼa beenɨ əbɔʼ bə̂d mbe nɨ nyaʼə ghɨ̀ ə̀bèkɨ̀ ənû zɔ̂.

¹⁴Ənɨ mə̀ nyaʼa zə ni chəi mbɨ nyaʼə beenɨ əbɔʼ rəsìʼ we nɨ yeʼ ɨŋga ɨkə̂n chɔ̀m, mə nyaʼa ghà əmbɨ Pità ɨfě mɨ̀mə̌d mɨjìm ni, “Àwɔ̀ yɨə Jû, əne à mɨ yeʼə ghɨ̀ ɨnû ɨghabɨ ə wə̀d nɨ kaʼi Jû, ne àwɔ̀ yɨə Jû, njɨ àwɔ̀ kɨə wò nyeŋ bə̂d mbe nɨ kaʼi mɨ̀Jû ni mbɨ ghɨ ɨnû ɨghabɨ mɨ̀Jû rɨ ye ə?”

¹⁵Mbǎ, tɨ̀ yɨə bɔn tɔb si mɨ̀Jû. Ka tɨ̀ yɨ a “Bə̂d nɨ kaʼi mɨ̀Jû nɨə ghɨ̀ ɨnû rɨbɔ̀ŋ,” ɨchî nɨ bə̂d mɔʼɔ ə tɔŋə mɨ̀mə̌d.

¹⁶Ənû nɨ tɨ̀ kyerɨ yɨ ni chəi wə̀d təm kùʼnɨ̀ ɨfě Ŋwiə̀ ɨchî nɨ wɨə nùŋə̀ tɨkə rɨ Mose. Wɨ̀ təm kùʼnɨ̀ àmei ɨchî nɨ wɨ̀ nuŋ fîŋ ɨgun ə Yeso Kristo. Mba bə̂ fə nuŋ fîŋ ɨgun ə Kristo Yeso, əne tɨ̀ fə təm kùʼnɨ̀ ənjìm ɨchî nɨ tɨ̀ nuŋ fîŋ ɨgun ə Kristo, kaʼi ɨmbə̀ʼ ɨchî nɨ tɨ̀ nuŋ tɨkə rɨ Mose. Chəi wə̀d bɨrɨ təm kùʼnɨ̀ ɨchî nɨ wɨə nùŋə̀ rɨkə.

¹⁷Tɨ̀ mɨ yeʼə kə̀b nɨ təm kùʼnɨ̀ ɨchî nɨ tɨ̀ yeʼ ənɨ ɨfɔtɨ mbɨ Kristo, àyɨə tɨ̀ zə ni tɨ̀ wɨə kɨrɨ ghɨ ɨnû rɨbɔ̀ŋ, əze ə wa chwiə ni Kristo wɨə ghɨ̀ə̀ ni bə̂d ghɨ ɨnû rɨbɔ̀ŋ ə? Chə̂!

¹⁸Mə mɨə wɨrɨə ghɨ̀ ɨnû mbe nɨ mə̀ nyaʼa fə tonɨ, njɨ zɨə chwiə ni mə fə gù ɨkə.

¹⁹Mə wɨə nyaʼə nùŋ rɨ̀kə, əne tɨ̀nîn, mə fə zə ni chəi ənɨ tɨ̀ rɨkə weerɨ əmɨ. Əne mə yɨ ɨghabɨ ə wə̀d nɨ rɨkə fə zwiirɨ, ɨmbə̀ʼ mə̀ chubɨ ɨkǎ fàʼ əmbɨ ə Ŋwiə̀. Mbɨ fə kòmbɨ̀ əmɨ əzed ə baʼnɨ mbɨ Kristo,

²⁰əne kaʼi mɔ̌ yeʼ ɨkǎ. Wə̀d we nɨ yeʼ ɨkǎ yɨə Kristo we nɨ yeʼ ɨŋga num. Ɨ̀tènɨ̀ we nɨ mə berɨ tɨ̀nîn yɨ ɨmbə̀ʼ ɨchî nɨ mə̀ nuŋ fîŋ ɨgun ə Wan Ŋwìə̀ we nɨ nyaʼa ghaʼ əmɨ əne nàʼ i ɨnyod ənɨ əghɨ ə̀fà ɨmbə̀ʼ əmɨ.

²¹Chəi mə̀ ton ni Ŋwìə̀ wɨə ghɨ ɨ̀chɔ̀m. Àyɨə wə̀d mɨ berɨ təm kùʼnɨ̀ ɨchî nɨ wɨə nùŋə̀ rɨkə, njɨ Kristo nyaʼa kwɨ ətu ə̀kǒ.