Read Fɨso Fi Gàlesià 3 Bible Online

Gàlesià 3 - Fɨso Fi bible

Gàlesià 3

¹Wəi, mbə̀n məGàlesià yɨ ɨneŋ! À kɨə we nùʼ əwən ə? Ɨmbə̀ʼ mbɨ nyaʼa fə kàŋ chwi ɨ nən zɨə zeŋ ni mbɨ nyaʼa kòmbɨ̀ ə Yeso Kristo əzed ə baʼnɨ ə?

²Mbə̀ sɨ mə biirɨ àmei ənû zɔ̂ ə mɔʼ ɨ nən: Ŋwìə̀ wa nyaʼa nàʼ əzwî ɨ nən ɨmbə̀ʼ ɨchî nɨ mbə̀ nyaʼa ghɨ ɨnû mbe nɨ yeʼ ɨŋga rɨ̀kə̌, kɨ̀ ɨmbə̀ʼ ɨchî nɨ mbə̀ nyaʼa ben ənû ze nɨ mbə̀ nyaʼa zu ə?

³Mbə̀ kɨə kàŋ ɨneŋ əni ɨmbə̀ʼ ə yè ə? Mbə nyaʼa kɔ mbɨ Əzwî ə Ŋwiə̀, əne mbə kɨə kəb màànɨ̀ ənɨ ə ɨka ə?

⁴Ɨnû nɔnɔʼ mbe nɨ nyaʼa ghɨ̌ ənɨ ə nən wa nyaʼa ətu ə̀kǒ ə? Chə̂, ka à yɨə nyaʼa i ətu ə̀kǒ.

⁵Ŋwìə̀ we nɨ naʼ Əzwî ɨ nən bə̀ faʼ ɨnû yiirɨ əkaʼ nən wa nyaʼa ghɨ əne ɨmbə̀ʼ ɨchî nɨ mbə̀ nyaʼa ghɨ ɨnû mbe nɨ yeʼ ɨŋga rɨ̀kə̌, kɨ̀ ɨmbə̀ʼ ɨchî nɨ mbə̀ nyaʼa ben ənû ze nɨ mbə̀ nyaʼa zu ə?

⁶Mbə̀ kɔndɨ ə Abràham. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Wɨ̀ nyaʼa ben ə Ŋwiə̀, əne Ŋwìə̀ nyaʼa nɨŋ ni məd ə təm kùʼnɨ̀.”

⁷Əne mbə̀ kyerɨ ni bə̂d mbe nɨ nuŋ fîŋ ɨgun ə Ŋwìə̀ yɨə bɔn tɨ ənɨ əghaŋ ə Abràham.

⁸Ə̀ŋwàʼnɨ̀ ə Ŋwìə̀ ə nyaʼa fə ghà rɨmbì ni Ŋwìə̀ bɨrɨ ghɨ ni bə̂d mbe nɨ kaʼi mɨ̀Jû təm kùʼnɨ̀ ənjìm ɨchî nɨ mbɨ nuŋ fîŋ ɨgwɨ məd. Əne wɨ̀ nyaʼa fə bè ghà ɨkə̂n chɔ̀m əmbɨ ə Abràham ni, “Mə bɨrɨ che ənɨ e njìm zɨ̀ əbɔrəbɔd ɨgwɨ ɨbeŋ jìm.”

⁹Əne Ŋwìə̀ bɨrɨ bɨ zɨ əbɔrəbɔd ɨgun ə bə̂d mbe nɨ nuŋ fîŋ ɨgwɨ məd, ɨchî nɨ wɨ̀ nyaʼa zɨ̌ ɨgun ə Abràham nɨ nyaʼa bə nùŋ fîŋ ɨgwɨ məd.

¹⁰Ndɔ̀n zɨ ɨgun ə bə̂d mɨ̀jìm mbe nɨ zɨ ətu àmei nɨ ghɨ ɨnû mbe nɨ yeʼ ɨŋga rɨ̀kə̌. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Ndɔ̀n zɨ ɨgun ə wə̀d jìm we nɨ chəi wɨə nùŋ ɨnû jìm mbe nɨ yeʼ ɨŋga Ə̀ŋwàʼnɨ̀ rɨkə fɔrɨ ɨgwɨ we nɨ chəi wɨə bə̀ ghɨ̀ə̀.”

¹¹Tɨ̀nîn zɨə zeŋ nɨ chəi wə̀d mɔʼɔ nɨ təm kùʼnɨ̀ ɨfě Ŋwiə̀ ɨmbə̀ʼ ɨghəm nɨ ɨ wɨə nùŋə̀ rɨ̀kə̌. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Bə̂d mbe nɨə ghɨ̀ ɨnû nɨ kuʼnɨ bɨrɨ chub ɨkǎ ənjìm ɨchî nɨ mbɨ nuŋ fîŋ ɨgun ə Ŋwiə̀.”

¹²Chəi ənû nɨ nuŋ rɨkə berɨ ənû nɨ ghɨ̀ mbɨ ənû nɨ nuŋ fîŋ ɨgun ə Ŋwiə̀. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Wə̀d we nɨə ghɨ̀ ɨnû mbe nɨ yeʼ ɨŋga rɨ̀kə̌ ɨghəm jìm bɨrɨ chubɨ ɨkǎ ɨmbə̀ʼ rɨwən.”

¹³Kristo nyaʼa choʼ mba ɨtu tɨ ənɨ ə ndɔ̀n ze nɨ rɨkə nyaʼa zɨ ɨgwɨ na. Wɨ̀ nyaʼa ghɨ̀ əne ɨchî nɨ wɨ̀ nyaʼa beʼ ndɔ̀n ɨmbə̀ʼ əwa. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Ndɔ̀n zɨ ɨgun ə wə̀d jìm we nɨ mbɨ tiŋ əməd ɨkaŋ əzed.”

¹⁴Kristo Yeso nyaʼa ghɨ̀ əne ɨmbə̀ʼ əbɔrəbɔd ze nɨ Ŋwìə̀ nyaʼa kaʼi əmbɨ Abràham ə nyɨ ɨgun ə bə̂d mbe nɨ kaʼi mɨ̀Jû. Ɨchî nɨ zɨə yeʼ əne, Əzwî ə Zeŋɨ ze nɨ Ŋwìə̀ nyaʼa kaʼi ə bɨrɨ nyɨ ɨgwɨ na ənjìm ɨchî nɨ tɨ̀ nuŋ fîŋ ɨgwɨ məd.

¹⁵Mbɨ bɔŋgɔb, mə bɨrɨ nɨŋ ənweenɨ rɨ ənɨ ɨnû mbe nɨ bə̂d mɨ̀sɔŋɨchù ə ghɨ̀ ɨni jìm: Bə̂d mɨ fə ben ənû ə mɔʼɔ, san fɨso, chəi wə̀d nɨ tɨ̀ wɨ̀ wɨrɨ ghà ni chəi ənɨ tɨ̀ fɨso fe təm, kɨ̀ nɨ tɨ̀ wɨ̀ yì ənû ə mɔʼɔ ənɨ fɨso fe.

¹⁶Ŋwìə̀ nyaʼa kàʼ ɨnû mbɔ̂ əmbɨ Abràham bə̀ kàʼ əmbɨ ə wan tɨ ənɨ əghaŋ əməd. Chəi Ə̀ŋwàʼnɨ̀ ə Ŋwiə̀ ə gha ni, “Əmbɨ ə bɔn tɨ ənɨ əghaŋ əməd,” əne yɨə bə̂d mɨ̀nɔnɔʼ. Zɨə ghà yeʼ ni, “Əmbɨ ə wan tɨ ənɨ e əghaŋ,” əne yɨə Kristo.

¹⁷Ənû nɨ mə̀ gha yɨ ni, “Ŋwìə̀ nyaʼa san fɨso mbɨ Abràham kàʼ ni tə bɨrɨ nuŋ fɨso fe. Əne ka rɨkə te nɨ sɨ yeʼe ənɨ ɨghəm ɨwu fə che əkɨ əkwè mbɨ ɨwum tad bɨrɨ nimnɨ i fɨso fe nɨ Ŋwìə̀ nyaʼa fə be san, əne ghɨ̀ ni ənû ze nɨ Ŋwìə̀ nyaʼa kaʼi ə che ətu ə̀kǒ.”

¹⁸Ŋwìə̀ mɨ yeʼe nàʼ ɨghɨ əmbɨ ə bə̂d ənjìm ɨchî nɨ mbɨə nùŋə̀ rɨkə, njɨ ka à yɨə wɨrɨ i ɨchî nɨ wɨ̀ nyaʼa kàʼi. Wɨ̀ nyaʼa nàʼ ɨghɨ əmbɨ Abràham àmei ɨchî nɨ wɨ̀ nyaʼa kaʼi.

¹⁹Ŋwìə̀ nyaʼa nàʼ rɨkə ɨmbə̀ʼ ə yè ə? Wɨ nyaʼa yì rɨkə əbɔʼ fɨso ɨmbə̀ʼ ɨghəm nɨ bə̂d mbɨə nyaʼə gù ɨnû. Tɨkə nyaʼa berɨ yeʼ əŋgu pè ənɨ ə wan we nɨ Ŋwìə̀ nyaʼa kaʼi ɨnû mbe ɨ bɔ yeʼe. Ŋwìə̀ nyaʼa chè ənjìm mbɨ̀aŋgɨrə̀ nàʼ rɨkə te əmbɨ Mose ni wɨ̀ naʼ əmbɨ ə bə̂d. Əne wə̀d wɨ ɨŋga mɨgharə̀ Ŋwìə̀ mbɨ ə bə̂d.

²⁰Wə̀d mɨ yeʼ ɨŋga mɨgharə̀, əne yɨ ni bə̂d ə nɔʼ. Àyɨə Ŋwìə̀ mei we mɔʼ.

²¹Tɨkə ə wa ton ɨnû mbe nɨ Ŋwìə̀ kàʼ ə? Chə̂! Ɨkə mɔʼɔ mɨ kə̀ʼ yeʼ əŋgu nɨ tɨ̀ wɨ nàʼ ɨ̀tènɨ̀, njɨ ənû nɨ təm kùʼnɨ̀ ɨfě Ŋwiə̀ berɨ yeʼe ənjìm ɨchî nɨ bə̂d ə nùŋə̀ rɨkə.

²²Àyɨə ə zɨ ɨŋga Ə̀ŋwàʼnɨ̀ ə Ŋwiə̀ ni ɨsɨg jìm wɨ əton ɨnû rɨbɔ̀ŋ. Əne ɨnû mbe nɨ Ŋwìə̀ nyaʼa kaʼi ənjìm ɨchî nɨ bə̂d nuŋ fîŋ ɨgun ə Yeso Kristo, ɨ we tɨ̀ wɨ̀ nàʼ əmbɨ ə bə̂d mbe nɨ benɨ.

²³Bɔŋ ənû nɨ nuŋ fîŋ ɨgun ə Kristo nyaʼa sɨə yeʼe, tɨkə nyaʼa wùb əwa ɨghabɨ ni tɨ̀ yɨə bə̂d ndəŋ. Tɨ̀ nyaʼa wùb əne pè ənɨ Ŋwìə̀ nyaʼa chwi ənû nɨ nuŋ fîŋ ɨgun ə Kristo.

²⁴Tɨkə tɨə nyaʼə tùmbɨ̀ əwa pè ənɨ Kristo nyaʼa yeʼe. Əne Kristo nyaʼa yeʼe ɨmbə̀ʼ tɨ̀ təm kùʼnɨ̀ ɨfě Ŋwiə̀ ənjìm ɨchî nɨ tɨ̀ nuŋ fîŋ ɨgwɨ məd.

²⁵Àyɨə tɨ̀nîn nɨ ənû nɨ nuŋ fîŋ ɨgun ə Kristo ə fə yeʼe, chə wɨrɨ əwa əton rɨkə te nɨ nyaʼə tùmbɨ̀ əwa.

²⁶Mbə̀n mɨjìm yɨə bɔn Ŋwiə̀ ənjìm ɨchî nɨ mbə̀ nuŋ fîŋ ɨgun ə Kristo Yeso.

²⁷Mbə̀n mɨjìm mbe nɨ nyaʼa fɔtɨ mbɨ Kristo ənɨ mbə̀ nyaʼa nɨŋ mɨnib, fə sɨ ɨghabɨ ə Kristo.

²⁸Əne chə wɨrɨ i Jû kɨ̀ wə̀d nɨ kaʼi Jû, chə wɨrɨ i ə̀bòʼò kɨ̀ wə̀d nɨ yeʼ ənɨ i ɨghəm, chə wɨrɨ i mbaŋə̀ kɨ əyi, ɨmbə̀ʼ ɨghəm nɨ mbə̀n mɨ̀jìm fə sɨə wə̀d mɔʼ ɨchî nɨ mbə̀ yeʼ ənɨ ɨfɔtɨ mbɨ Kristo Yeso.

²⁹Mbə mɨ yeʼ bə̂d Kristo, əne yɨ ni mbə yɨə bɔn tɨ ənɨ əghaŋ ə Abràham. Ɨchî nɨ mbə̀ yeʼ bɔn tɨ ənɨ əghaŋ ə Abràham, əne yɨ ni mbə bɨrɨ jɨg ɨghɨ mbe nɨ Ŋwìə̀ kaʼi.