Read Fɨso Fi Gàlesià 4 Bible Online

Gàlesià 4 - Fɨso Fi bible

Gàlesià 4

¹Ənû nɨ mɨə ghàə̀ yɨ ni, əjɨnəb mɨ yeʼ wan kwa, əne yɨ ni ɨ wɨə kɨrɨ i ɨghabɨ ə̀bòʼò nɨə zu ɨnû rɨ əmbɨ ə bə̂d cherə, ka à bè yeʼ i ni ɨghɨjìm yɨ mbɨ məd.

²Wɨ̀ bɨrɨ chub əton ə bə̂d mbe nɨə nəŋgɨ əməd bə̀ chub əton mbe nɨə nəŋgɨ ɨghɨ məd pè ənɨ ə nyùmə̀ we nɨ mbǎʼ məd nuŋɨ.

³À yɨ əndəŋ əndəŋ mbɨ na. Əne yɨ ni ənɨ tɨ̀ nyaʼə bɔn kwa, tɨ̀ yɨə nyaʼə ɨ̀bòʼò əton ɨzwî mbe nɨ nyaʼə tùmbɨ̀ ɨsɨg.

⁴Àyɨə ənɨ ə nyùmə̀ nyaʼa fə kuʼu, Ŋwìə̀ nyaʼa tom i Wan. Mbɨ nyaʼa gywɨ əməd ɨghabɨ ə wə̀d mɨ̀sɔŋɨchù. Wɨ̀ nyaʼa bə̀ kwi ɨŋga rɨ̀kə̌,

⁵ɨmbə̀ʼ wɨ̀ choʼ ɨtu bə̂d mbe nɨ nyaʼa əton rɨkə. Wɨ̀ nyaʼa ghɨ̀ əne ɨmbə̀ʼ tɨ̀ yeʼ bɔn Ŋwiə̀.

⁶Ɨchî nɨ mbə̀ yeʼ bɔn, Ŋwìə̀ fə chà Əzwî ə Wan məd ɨŋga ta fîŋ. Əzwî ze ə zɨə kyeŋə ghàə̀ ni, “Mbǎʼ, mɨ Mbǎʼ!”

⁷Əne ka àwɔ̀ yɨə wɨrɨ e ə̀bòʼò. Àwɔ̀ yɨə wan. Ɨchî nɨ àwɔ̀ yɨə wan, əne àwɔ̀ yɨ əjɨnəb.

⁸À nyaʼa rɨ ɨmbì, ənɨ chəi mbə̀ nyaʼa kɨrɨ kyerɨ ə Ŋwiə̀, mbə yɨə nyaʼa ɨ̀bòʼò əmbɨ ɨghɨ mbe nɨ ka nyaʼa bei mɨ̀ŋwìə̀.

⁹Àyɨə rɨ̀nîn nɨ mbə fə kyerɨ ə Ŋwìə̀, kɨ̀ mə we tɨ̀ mə ghà ni nɨ Ŋwìə̀ fə kyerɨ əwən, mbə̀ kɨə kəb wɨrɨ beŋ əbɔʼ ɨzwî mbe nɨə tùmbɨ̀ ɨsɨg, nɨ bɔrɨ, nɨ chəi əghɨ əmbɨ mɨ̀mə̌d ɨmbə̀ʼ ə yè ə?

¹⁰Mbə mbɨə wumnɨ ɨni mɔʼɔ, wumnɨ əmɨg ə mɔʼɔ, wumnɨ mɨ̀nyùmə̀ mɔʼɔ bə̀ wumnɨ ɨghəm ɨwu mɔʼɔ!

¹¹Mə wɨə bɔə ni ɨghəm mə fə fàʼ ɨgwɨ nən ətu ə̀kǒ.

¹²Mbɨ bɔŋgɔb, mə wɨə buʼ ɨbɔ ɨ nən ni mbə̀ yeʼ ɨghabɨ ə mɔ̌, ɨmbə̀ʼ ɨghəm nɨ mə fə bə̀ sɨ ɨghabɨ ə mbə̀nə. Chəi mbə̀ nyaʼa gu ənû ə mɔʼɔ ɨ num.

¹³Mbə̀ kàŋ kyerɨ ə ni à yɨ ɨmbə̀ʼ əwɔn nɨ mə̀ nyaʼa be ghà ɨkə̂n chɔ̀m ɨ nən.

¹⁴Ka à bè yeʼi ni mɨ əwɔn yɨə nyaʼa ə̀kwàʼnɨ̀ ɨ nən, chəi mbə̀ nyaʼa təənɨ əmɨ kɨ̀ bè ton əmɨ. Àyɨə mbə nyaʼa nɨŋ əmɨ ɨghabɨ ni mɔ̌ yɨə aŋgɨrə̀ Ŋwìə̀, kɨ̀ ɨghabɨ ni mɔ̌ yɨə Kristo Yeso ziə.

¹⁵Mbə mbɨə nyaʼa kɨə ghaʼrɨə. À kɨ ənû ə ye sɨ ghɨ ə? Mə we tɨ̀ mə ghà ni, à mɨ yeʼ nɨ ɨchî nyaʼa chwiə, njɨ mbə nyaʼa ghɨ̀ ɨnû jìm ɨ num, ka àbei nɨ chɔʼrɨ ə əghə nàʼ ɨ num.

¹⁶Mə wa fə bèŋ ənɨ ə wə̀d pə̀n ɨchî nɨ mə ghà rəsìʼ ɨ nən ə?

¹⁷Bə̂d mbe nɨə kə̀b beŋ ɨkə̂n chɔ̀m mbɨə kə̀bə̀ ni mbə ben ɨnû mbe nɨ mbɨə ghàə̀, àyɨə chəi əze ə bɨrɨ weerɨ əwən. Ɨ mbɨə kə̀b ghabrɨ əwən tɨ ənɨ ə num ɨmbə̀ʼ mbə̀ ben ɨnû mbe nɨ mbɨə ghàə̀.

¹⁸Zɨə bɔ̀ŋ ni mbə̀ ben ɨnû mbe nɨ mbɨə ghàə̀ əwu ze nɨ mbɨə ghɨ̀ ɨnû mbe nɨ bɨrɨ weerɨ əwən. Mbɨ ghɨ əne ənɨ mɨ̀nyùmə̀ jìm kaʼ àmei ənɨ mə̀ yeʼ əkaʼ nən.

¹⁹Mbɨ bɔn nɨ mə̀ ghaʼi kwàʼ rɨŋgəʼ, mə wɨə yɨə zu rɨbuʼ ɨghabɨ əyi nɨə nombɨə. Mə bɨrɨ zu əne pè ənɨ mbə̀ yeʼ ɨghabɨ ə Kristo.

²⁰Mə kàŋ kə̀b ni njɨ mə wɨ mbɨ nən tɨ̀nîn ɨmbə̀ʼ mə̀ kwepɨ ɨchî nɨ mɨə ghàmə̀, ɨmbə̀ʼ ɨghəm nɨ mɨ fîŋ zɨə kàŋə̀ tɔb əmɨ ɨmbə̀ʼ əwən!

²¹Mbə̀n mbe nɨə kə̀b chub əton rɨkə, mbə̀ gha ɨ num: chəi mbə̀ kyerɨ ənû ze nɨ yeʼ ɨŋga rɨkə ə?

²²Ə zɨ ɨŋga Ə̀ŋwàʼnɨ̀ ə Ŋwiə̀ ni Abràham nyaʼa berɨ bɔn mbaŋə̀ mɨbe. Wɨ fibɨ̀ yɨə nyaʼa tɨ ənɨ əyi nɨ nyaʼa ə̀bòʼò. Wɨ fibɨ̀ yɨə nyaʼa tɨ ənɨ əyi nɨ ka nyaʼa i ə̀bòʼò.

²³Mbɨ nyaʼa gywɨ wan mbaŋə̀ we nɨ ɨŋgɔb məd nyaʼa ə̀bòʼò ɨchî nɨ mbɨə gywɨə bɔn cherə, àyɨə mbɨ nyaʼa gywɨ we nɨ ka ɨŋgɔb məd yɨə nyaʼa i ə̀bòʼò ɨchî nɨ Ŋwìə̀ nyaʼa kaʼi.

²⁴Tɨ̀ we tɨ̀ rɨ̀ mɨg ənû zɔ̂ əni: məyi mbɔ̂ mɨbe ə təm ənɨ tɨso rɨbe. Əyi we nɨə gywɨə bɔn nɨ bɨrɨ ben ɨ̀bòʼò yɨə Hagà. Məd ə təm ənɨ fɨso fe nɨ mbɨ nyaʼa san ɨkaŋ Ɨwum Sinài.

²⁵Hagà ə təm ənɨ Ɨwum Sinài ə Àrebìà. Məd yɨ ɨghabɨ ə Jèrusalèm wɔ̂ rə̀chɔ̀ŋ, ɨmbə̀ʼ ɨghəm nɨ məd mbɨ mbi bɔn yɨ ɨ̀bòʼò.

²⁶Àyɨə ka Sèra yɨ i ə̀bòʼò. Məd ə təm ənɨ Jèrusalèm we nɨ yeʼ ɨkaŋ. Məd yɨ a nɨ̌ŋ.

²⁷Ə zɨ ɨŋga Ə̀ŋwàʼnɨ̀ ə Ŋwiə̀ ni, “Ghaʼrɨ əwe, kyɨə əyi nɨ chəi wɨə gywɨə! Kwerɨ ɨkyî, kyeŋ rɨkǎ, àwɔ̀ we nɨ chəi à kweʼ zu rɨbuʼ wan! Əyi we nɨ ɨnom məd nyaʼa waʼ əməd bɨrɨ berɨ bɔn nɨ nɔʼɔ chè mbɨ əyi we nɨ berɨ ɨnom.”

²⁸Mbɨ bɔŋgɔb, mbə̀nə, ɨghabɨ ə Aizìk, yɨə bɔn Ŋwiə̀ ɨchî nɨ wɨ̀ nyaʼa fə kaʼi.

²⁹À nyaʼa ənɨ ə nyùmə̀ we, wan mbaŋə̀ we nɨ mbɨ nyaʼa gywɨ əməd ɨchî nɨ mbɨə gywɨə bɔn cherə, nyaʼa nwèndɨ̀ tɨkyerɨ-ɨwu wan mbaŋə̀ we nɨ Əzwî ə Ŋwìə̀ ə nyaʼa ghɨ̌ mbɨ gywɨ əməd. À yɨ ɨchî nɨ zɨə yeʼ we rɨ̀nîn.

³⁰Zɨə kɨ ɨŋga Ə̀ŋwàʼnɨ̀ ə Ŋwiə̀ ni yè ə? Ə zɨ ɨŋga ni, “Kəndɨ ə̀bòʼò ze mbɨ ə wan məd, ɨmbə̀ʼ ɨghəm nɨ ka wan ə̀bòʼò we bɨrɨ fɔtɨ i ɨmbə̀ʼ jɨg ɨghɨ mbɨ we nɨ ka ɨŋgɔb məd yɨ i ə̀bòʼò.”

³¹Əne, kyɨə bɔŋgɔb, ka tɨ̀ yɨ əwa bɔn əyi we nɨ yeʼ ə̀bòʼò. Tɨ̀ yɨə bɔn əyi we nɨ kaʼi ə̀bòʼò.