Read Fɨso Fi Gàlesià 6 Bible Online

Gàlesià 6 - Fɨso Fi bible

Gàlesià 6

¹Mbɨ bɔŋgɔb, wə̀d mɔʼɔ rəbɔʼ nən mɨ ghɨ̀ ənû rɨbɔ̀ŋ, mbə̀n mbe nɨə ghɨ̀ ɨnû mbe nɨ Əzwî ə kəbɨ wɨrɨ ghɨ̀ ni wɨ̀ təm, àyɨə mbə̀ ghɨ əne ənɨ əbɔrəbɔd. Mbə̀ we əwən ɨmbə̀ʼ ə̀kwàʼnɨ̀ ə bə nyɨ ɨgwɨ nən.

²Wə̀d mɔʼɔ mɨ yeʼ ə ŋgəʼ, mbə̀ weerɨ əməd. Mbə mɨ ghɨ̀ əne, njɨ mbə fə nùŋ ɨkə we nɨ Kristo nyaʼa naʼ ɨ na.

³Wə̀d mɔʼɔ mɨ kɔndɨ ni tə yɨ əghɨ ə mɔʼɔ, nɨ ka məd yɨ i əghɨ ə mɔʼɔ, njɨ ɨ wɨə tambɨ i ɨnyod.

⁴Wə̀d mɔʼ mɔʼ neŋ ti rɨghɨrɨ-ɨnû. Tɨ mɨ bɔ̀ŋ, ɨ we tɨ̀ wɨ̀ goŋ ɨgɔ̂ ni tə wɨə ghɨ ɨchî chɔ̀m, nɨ chəi wɨ̀ berɨ nɨ mɨg i ɨnyod ənɨ ə wə̀d cherə,

⁵ɨmbə̀ʼ ɨghəm nɨ wə̀d mɔʼ mɔʼ berɨ beʼ i ɨkom.

⁶Wə̀d mɔʼɔ we nɨ mbɨ chwi ɨŋgam Ŋwiə̀ ɨ bɔ berɨ naʼ əbà tɨ ənɨ ɨghɨ chɔ̀m jìm mbe nɨ wɨ̀ berɨ əmbɨ we nɨ chwi ɨŋgam we ɨ bɔ.

⁷Tɨ mbə̀ tambɨ ə ɨnyod. Chəi wə̀d nɨ tɨ̀ wɨ̀ baʼrɨ ə Ŋwiə̀. Wə̀d bɨrɨ kwəŋ àmei əghɨ ze nɨ wɨ̀ konɨ.

⁸Wə̀d mɨ kon əghɨ ze nɨ nyamnyod məd ə feenɨə, əghɨ ze nɨ wɨ̀ bɨrɨ kwəŋ yɨ ɨvɨ. Wɨ̀ mɨ kon əghɨ ze nɨ Əzwî ə kə̀bə̀, əghɨ ze nɨ wɨ̀ bɨrɨ kwəŋ yɨ ɨ̀tènɨ̀ rɨ mì.

⁹Tɨ rɨ̀ bɔd əwa nɨ ghɨ ɨ̀chɔ̀m. Tɨ̀ mɨ ton bɔd əwa, tɨ̀ bɨrɨ kwəŋ ɨghɨ nɔnɔʼ ənɨ ə nyùmə̀ kuʼu.

¹⁰Əne, tɨ̀ mɨ berɨ əpan, tɨ̀ ghɨ ɨ̀chɔ̀m ənɨ ə wə̀d jìm, màànɨ̀ ənɨ mbe nɨ ben ə Kristo.

¹¹Mbə̀ zə ɨchî nɨ mə̀ nɨŋ mɨ əbɔ ŋwàʼnɨ̀ ə̀ŋwàʼnɨ̀ zɔ̂ ɨ nən ənɨ əghə ə̀ŋwàʼnɨ̀ nɨ faŋgɨ!

¹²Bə̂d mbe nɨə kə̀b nyeŋ ni mbɨ ne əwən mbɨə kə̀b chwi əsaŋ əsaŋ ni mbə bɔ̀ŋ. Ɨ mbɨə ghɨ̀ əne ɨmbə̀ʼ tɨ bə̂d nwendɨ ə tɨkyerɨ-ɨwu mɨ̀mə̌d ɨchî nɨ mbɨə ghàə̀ ni àmei ənjìm ɨchî nɨ Kristo nyaʼa kwɨ əzed ə baʼnɨ nɨ tɨ̀ bə̂d jwɨ̀ rəŋgəʼ.

¹³Ka àbei bə̂d mbe nɨə ghàə̀ ni mbɨ ne bə̂d, chəi mɨ̀mə̌d ə nùŋ rɨ̀kə. Àyɨə ɨ mbɨə kə̀bə̀ ni mbɨ ne əwən ɨmbə̀ʼ mbɨ goŋ ɨgɔ̂ ni mbə fə ghɨ̀ mbɨ nè əwən.

¹⁴À yeʼ ɨmbə̀ʼ əmɨ, chəi mə̀ bɨrɨ nɔ goŋ ɨgɔ̂, kɨrɨ ənɨ mə goŋ ɨgɔ̂ ɨmbə̀ʼ ənû ze nɨ ɨvɨ à Ə̀nùŋɨ̀sɨg Yeso Kristo əzed ə baʼnɨ ə nyaʼa ghɨ̌. Ɨchî nɨ Yeso Kristo nyaʼa kwɨ əzed ə baʼnɨ, əne chəi ɨghɨ rɨŋga ɨsɨg wɨrɨ berɨ ənû ə mɔʼɔ nɨ ghɨ̀ mbɨ num. Chəi mə̀ bə berɨ ənû ə mɔʼɔ nɨ ghɨ̀ mbɨ ɨghɨ rɨŋga ɨsɨg.

¹⁵Kɨ̀ mbɨ nè wə̀d, kɨ̀ chəi mbɨ ne wə̀d, chəi əze ə berɨ ənû ə mɔʼɔ nɨ ghɨ̀. Ənû ə kyeŋ nɨ yeʼ əŋgu yɨ ni tɨ̀ yɨə sɨə bə̂d fi.

¹⁶Ŋwìə̀ zɨ əbɔrəbɔd bə̀ dììrɨ̀ bə̂d mbe nɨ nuŋ ɨkə wɔ̂. Wɨ̀ bə ghɨ əne ɨgun ə bə̂d Ŋwiə̀ mɨ̀jìm.

¹⁷Nɔ̀ʼ tɨ rə̀chɔ̀ŋ, tɨ wə̀d mɔʼɔ wɨrɨ chə i əmɨ, ɨmbə̀ʼ ɨghəm nɨ ɨnweenɨ mbɨ ɨgwɨ num nɨ chwi ni mɔ̌ yɨə sɨə wə̀d Kristo.

¹⁸Mbɨ bɔŋgɔb, à Ə̀nùŋɨ̀sɨg Yeso Kristo ghɨ ɨ̀chɔ̀m ənɨ ə nən. À yɨ əne.