Read Fɨso Fi Efesùs 1 Bible Online

Efesùs 1 - Fɨso Fi bible

Efesùs 1

¹À yɨə mɔ̌ Pɔ̂l, nɨ mə yeʼ wə̀d tom Kristo Yeso ənjìm ɨchî nɨ Ŋwiə̀ nyaʼa kəbɨ, ŋwaʼnɨ ə̀ŋwàʼnɨ̀ zɔ̂. Mə wɨə ŋwàʼnɨ̀ əmbɨ mbə̀n bə̂d Ŋwiə̀ mbe nɨ yeʼ ə Efesùs nɨ berɨ ɨbenɨ ɨchî nɨ mbə̀ yeʼ ənɨ ɨfɔtɨ mbɨ Kristo Yeso.

²Ŋwìə̀ a Mbǎʼ mbɨ Ə̀nùŋɨ̀sɨg Yeso Kristo ghɨ ɨ̀chɔ̀m ənɨ ə nən bə̀ nàʼ əbɔrəbɔd ɨ nən.

³Tɨ̀ yiirɨ ə Ŋwiə̀ we nɨ yeʼ Mbǎʼ a Ə̀nùŋɨ̀sɨg Yeso Kristo. Wɨ̀ fə zɨ̀ əbɔrəbɔd ɨgwɨ na ɨchî nɨ tɨ̀ yeʼ ənɨ ɨfɔtɨ mbɨ Kristo. Əne yɨ əbɔrəbɔd əjìm ze nɨ Əzwî ə zɨə ɨgwɨ na rɨŋga ɨsɨ mbe nɨ yeʼ ɨkaŋ.

⁴Bɔŋ Ŋwìə̀ nyaʼə sɨə tekɨ ɨsɨg, wɨ̀ nyaʼa fə chɔʼ əwa ɨchî nɨ tɨ̀ yeʼ ənɨ ɨfɔtɨ mbɨ Kristo ni tɨ̀ yeʼ bə̂d zeŋɨ ɨfě məd, bə̀ yeʼ bə̂d nɨ chəi ənû rɨbɔ̀ŋ ɨgwɨ na. Wɨ̀ nyaʼa chɔʼ əne ɨchî nɨ wɨ̀ ghaʼ əwa.

⁵Wɨ̀ nyaʼa fə bè chɔʼ nùŋ ni wɨ̀ bɨrɨ nɨŋ əwa ənɨ mbi bɔn ənjìm ə Yeso Kristo. Wɨ̀ nyaʼa chɔʼ əne ɨchî nɨ wɨ̀ nyaʼa kaŋ ghaʼ bə̀ kəb nɨ ghɨ.

⁶Tɨ̀ yiirɨ əməd ɨmbə̀ʼ ɨ̀chɔ̀m zeŋɨ məd we nɨ wɨ̀ naʼ ɨ na ə̀bù-ə̀bù ɨchî nɨ tɨ̀ yeʼ bə̂d Wan məd we nɨ wɨ̀ ghaʼi kwàʼ rɨŋgəʼ.

⁷Ŋwìə̀ fə choʼ mba ɨtu ənjìm ənəm ə Kristo ze nɨ wɨ̀ nyaʼa chəmnɨ əzed ə baʼnɨ. Wɨ̀ fə bə̀ waʼ mba ɨgu ənû ənjìm ɨ̀chɔ̀m məd we nɨ kaŋ nɔʼ.

⁸Ɨ wɨə ghɨ̀ ɨ̀chɔ̀m we ənɨ ə na ə̀bù-ə̀bù. Ɨ wɨə bə̀ ghɨ̀ə̀ ni tɨ̀ berɨ ɨwe jìm bə̀ kyerɨ əton ɨnû jìm.

⁹Wɨ̀ nyaʼa nɨŋ ɨwe jìm mbɨ ɨkyerɨ-ɨnû jìm ghɨ̀ tɨ̀ kyerɨ ɨnû mɔʼɔ mbe nɨ nyaʼa ənə̀mə. Wɨ̀ nyaʼa ghɨ̀ əne ɨchî nɨ wɨ̀ nyaʼa kəbɨ fɔrɨ ɨmbə̀ʼ ɨchî nɨ wɨ̀ nyaʼa fə taŋ nùŋ ənɨ ɨfɔtɨ mbɨ Kristo.

¹⁰Wɨ̀ nyaʼa nuŋ əne, ɨmbə̀ʼ ənɨ nyùmə̀ kuʼu, wɨ̀ bɨrɨ nɨŋ ɨghɨjìm mbe nɨ yeʼ ɨkaŋ mbɨ mbe nɨ yeʼ ɨgwɨ ə si fɔtɨ mbɨ Kristo nɨ yeʼ ətu ɨgwɨ ɨghɨ mbe jìm.

¹¹Ŋwìə̀ nyaʼa ghɨ̀ ɨnû jìm ɨchî nɨ wɨ̀ nyaʼa fə taŋɨ bə̀ nùŋ. Wɨ̀ nyaʼa chɔʼ əwa ənɨ ɨfɔtɨ mbɨ Kristo ni tɨ̀ yeʼ mbi bə̂d àmei ɨchî nɨ wɨ̀ nyaʼa kəbɨ bə̀ nùŋ.

¹²Wɨ̀ nyaʼa ghɨ̀ əne ɨmbə̀ʼ mbà mbe nɨ tɨ̀ nyaʼa bə̂d rɨtu nɨ nùŋ ɨkɔndɨ ɨgun ə Kristo yiirɨ ə Ŋwiə̀.

¹³Mbə̀n bə̂ mbɨə nyaʼa ənɨ ɨfɔtɨ mbɨ Kristo, ənɨ mbə̀ nyaʼa zu ɨŋgam we nɨ yeʼ wɨ rəsìʼ, nɨ yeʼ ɨkə̂n chɔ̀m ɨmbə̀ʼ ɨchî nɨ Ŋwìə̀ bɨrɨ chɨ əwən rəŋgəʼ. Mbə nyaʼa zu benɨ, əne Ŋwiə̀ nyaʼa zɨ̀ ənweenɨ ɨgwɨ nən nɨ yeʼ Əzwî ə Zeŋɨ ze nɨ wɨ̀ nyaʼa kaʼi.

¹⁴Əzwî ə Zeŋɨ ze yɨ ənweenɨ nɨ chwiə ni tɨ̀ bɨrɨ kɔ berɨ ɨghɨ mbe nɨ Ŋwiə̀ kaʼ əmbɨ mbi bə̂d wò pè ənɨ wɨ̀ choʼ ətu mɨ̀mə̌d. Tɨ̀ yiirɨ ə Ŋwiə̀.

¹⁵Tɨ ənɨ mə̀ nyaʼa zu ɨmbə̀ʼ ɨbenɨ we nɨ mbə̀ berɨ ɨgwɨ Ə̀nùŋɨ̀sɨg Yeso bə̀ zu ɨchî nɨ mbə̀ ghaʼ bə̂d Ŋwiə̀ mɨjìm,

¹⁶chəi mə̀ nyaʼa sob nɨ ben ə Ŋwiə̀ ɨmbə̀ʼ əwən. Mə wɨə kɔndɨ əwən ənɨ mɨə kɔŋgɨ ə Ŋwiə̀ ɨghəm jìm.

¹⁷Mə wɨə kɔ̀ŋgɨ̀ ə Ŋwiə̀ nɨ yeʼ Mbǎʼ a Ə̀nùŋɨ̀sɨg Yeso Kristo, nɨ yeʼ Mbǎʼ nɨ ɨwumnɨ jìm yeʼ wɨ məd, ni wɨ̀ naʼ e Əzwî ɨ nən ɨmbə̀ʼ mbə̀ berɨ ɨwe. Mə wɨə bə̀ kɔ̀ŋgɨ̀ə̀ ni wɨ̀ chwi wi rəsìʼ ɨ nən ɨmbə̀ʼ mbə̀ jeŋgɨ kyerɨ əməd.

¹⁸Mə wɨə kɔ̀ŋgɨ̀ ə Ŋwiə̀ ni wɨ̀ fiʼ tə fîŋ mbə̀ zə ɨzeŋɨ zeŋɨ ɨmbə̀ʼ mbə̀ kyerɨ ənû mbe nɨ mbɨə nùŋ rɨkɔndɨ wòmə̀, nɨ yeʼ ɨnû mbe nɨ Ŋwìə̀ tɔŋ əwən ɨmbə̀ʼ mbɨwən. Ɨnû mbe yɨ ɨ̀chɔ̀m rɨ mì we nɨ Ŋwìə̀ kaʼ əmbɨ mbi bə̂d.

¹⁹Mə wɨə kɔ̀ŋgɨ̀ ə Ŋwiə̀ ni wɨ̀ ghɨ mbə̀ kyerɨ ni ɨka məd we nɨ chəi ənɨ tɨ mbɨ mɨg, ə dabə chè əbɔ. Ɨka we wɨə fàʼ ɨŋga mba mbe nɨ nuŋ fîŋ ɨgwɨ məd. Ɨka məd we yɨ ɨka kyeŋ we nɨ

²⁰wɨ̀ nyaʼa faʼ mbɨ wɨwən ənɨ wɨ̀ nyaʼa zwemnɨ ə Kristo, ghɨ wɨ̀ chub əbà əbɔ ə jɨg əməd ɨŋga ɨsɨ mbe nɨ yeʼ ɨkaŋ.

²¹Məd wɨə tùmbɨ̀ ɨzwî jìm mbe nɨ yeʼ əton ɨkaŋ, ka à be yeʼi ni mbɨ berɨ ɨka. Ɨkum məd ə chè tɨkum rɨjìm te nɨ mbɨə tɔŋ əkaʼ ə bə̂d tɨ̀nîn fɔrɨ ənɨ mbɨ bɨrɨ tɔŋ ənɨ ə nyùmə̀ we nɨə yeʼe.

²²Ŋwìə̀ fə nùŋ ɨghɨjìm əton ɨwu məd. Wɨ̀ fə bə̀ ghɨ̀ ni məd yeʼ ətu ɨgwɨ ɨghɨjìm ɨmbə̀ʼ weerɨ ɨfetɨ bə̂d Kristo.

²³Ɨfetɨ we yɨə nyamnyod Kristo. Ɨ wɨə swe ɨnû mbe nɨ bu rɨ ənɨ Kristo. Kristo ziə wɨə bə swe ɨnû jìm ɨsɨ jìm.