Read Fɨso Fi Efesùs 5 Bible Online

Efesùs 5 - Fɨso Fi bible

Efesùs 5

¹Mbə yɨə bɔn Ŋwiə̀ nɨ wɨ̀ ghaʼi kwàʼ rɨŋgəʼ, əne mbə̀ kywɨ ənywɨ nɨ yeʼ ɨghabɨ ə məd.

²Mbə̀ ghaʼ mbə bɔŋgɔb ɨchî nɨ Kristo ghaʼ əwa əne kwɨ ɨgwɨ mba ɨtu. Məd yɨ ɨghabɨ əghɨ ə̀fà nɨə nyùʼrɨ ɨfɔ chɔ̀m. Məd yɨə bə̀ ɨghabɨ ɨchəmnɨ nɨ mbɨə naʼ əmbɨ ə Ŋwiə̀.

³Tɨ mbə̀ tɔ ghambɨ ə ɨmbə̀ʼ ənû nɨ ni məyi kɨ̀ mbaŋə̀ əbəŋ əbəŋ, ənû nɨ ghɨ ɨnyɔɔnɨ-ɨnû kɨ̀ ənû nɨ feenɨ ɨghɨ, ɨmbə̀ʼ ɨghəm nɨ chəi bə̂d Ŋwiə̀ berɨ ghɨ̀ tɨkwɨrɨ ɨnû tɔ̂.

⁴Zɨ rɨka kuʼi ni mbə̀ gham əbɔb ɨŋgam, gham mɨŋgam əneŋ kɨ̀ bè gham mɨŋgam ə̀bènɨ̀, àyɨə mbə naʼ məben-əwe əmbɨ ə Ŋwiə̀ ɨmbə̀ʼ ɨnû mbe nɨ wɨ̀ ghɨ ənɨ ə nən.

⁵Mbə kyerɨ ni chəi wə̀d we nɨə ni əyi kɨ̀ mbaŋə̀ əbəŋ əbəŋ, kɨ̀ we nɨə nyɔɔnɨə, kɨ̀ we nɨə feenɨ ɨghɨ bə̂d (əne yɨə wə̀d nɨə wumnɨə mbɨ̀anèŋ) berɨ əghɨ ə mɔʼɔ nɨ wɨ̀ bɨrɨ jɨg ɨŋga ənû ɨfɔ̀n ə Kristo mbɨ ə Ŋwiə̀.

⁶Tɨ mbə̀ ben ə ni wə̀d mɔʼɔ tambɨ əwən mbɨ mɨŋgam əko, ɨmbə̀ʼ ɨghəm nɨ à yɨ ɨmbə̀ʼ ɨnû mbɔ̂ nɨ ɨsə ɨtəm Ŋwiə̀ bɨrɨ yeʼe ɨgwɨ ə bə̂d mbe nɨə ghɨ̀ rɨ̀zuə̀.

⁷Əne tɨ mbə̀ berɨ ə ənû ə mɔʼɔ nɨ ghɨ mbɨ tɨkwɨrɨ bə̂d tɔ̂.

⁸À nyaʼa ənɨ ə nyùmə̀ mɔʼɔ, mbə mbɨə nyaʼa ɨŋga ɨsɨ firɨ, àyɨə tɨ̀nîn nɨ mbə̀ sɨ bə̂d Ə̀nùŋɨ̀sɨg, mbə mbɨ ɨŋga ɨzeŋɨ zeŋɨ. Əne mbə̀ chub ɨghabɨ ə bə̂d nɨ yeʼ ɨŋga ɨzeŋɨ zeŋɨ,

⁹ɨmbə̀ʼ ɨghəm nɨ ɨzeŋɨ zeŋɨ mɨ yeʼə te ɨgun ə bə̂d, mbɨ bɨrɨ ghɨ ɨnû nɨ bɔŋɨ bə̀ kuʼnɨ bə̀ yeʼ mbɨ rəsìʼ.

¹⁰Mbə̀ kywɨ ənywɨ kwembɨ ənû ze nɨ bɔŋ əmbɨ Ə̀nùŋɨ̀sɨg ɨmbə̀ʼ sɨə ghɨ̀ə̀.

¹¹Tɨ mbə zɨ ə ɨbɔ ɨŋga ɨnû əko mɔʼɔ mbe nɨ bə̂d ə ghɨ̀ ɨŋga ɨsɨ firɨ, àyɨə mbə̀ du ɨnû mbe əsaŋ ni bə̂d zə.

¹²À yɨ tɨ̀nìd ətu ɨ be ghà ɨmbə̀ʼ ɨnû mbe nɨ bə̂d mbe ə ghɨ̀ ənə̀mə.

¹³Bə̂d bɨrɨ zə ɨghɨjìm ənɨ ɨzeŋɨ zeŋɨ te du ɨghɨ mbe əsaŋ,

¹⁴ɨmbə̀ʼ ɨghəm nɨ ɨghɨjìm mbe nɨ bə̂d ə zəə yɨ mbe nɨ ɨzeŋɨ zeŋɨ ə te ɨgun. À yɨ əton nɨ mbɨ ŋwaʼnɨ ni, “Wə̀d we nɨə gwenə, nɔʼ rɨ əŋgwenɨ zwemə, əne ɨzeŋɨ zeŋɨ Kristo bɨrɨ te ɨgwɨ ne.”

¹⁵Əne mbə we ɨchî nɨ mbə̀ə chubə. Tɨ mbə̀ chub ə ɨghabɨ ɨneŋ. Mbə̀ chub ɨghabɨ ə bə̂d ɨwe.

¹⁶Tɨ mbə ben ə ni əpan ə mɔʼɔ ze nɨ mbə berɨ nɨ ghɨ ɨnû nɨ kuʼnɨ ə chè ətu ə̀kǒ, ɨmbə̀ʼ ɨghəm nɨ bə̂d mbɨə ghɨ̀ ɨnû rɨbɔ̀ŋ nɔnɔʼ ənɨ ə nyùmə̀ wɔ̂.

¹⁷Əne tɨ mbə̀ ghɨ ə ɨghabɨ ɨneŋ, àyɨə mbə̀ kywɨ ənywɨ nɨ kyerɨ ənû ze nɨ Ə̀nùŋɨ̀sɨg kəbɨ.

¹⁸Tɨ mbə̀ nɔ ə mɨnoʼ be, ɨmbə̀ʼ ɨghəm nɨ mbə mɨ nɔ be, mbə bɨrɨ ghɨ ɨnû mbe nɨ bɨrɨ chəkɨ əwən. Mbə̀ saŋə yeʼ ni Əzwî ə Zeŋɨ ə swi ɨŋga nən.

¹⁹Mbə̀ kwerɨ mɨkyî əkaʼ nən ənɨ mɨ̀sâm, kwerɨ mɨkyî nɨ yiirɨ ə Ŋwiə̀ bə̀ kwerɨ mɨkyî nɨ nɔʼ rɨ əmbɨ Əzwî. Mbə̀ kwerɨ mɨkyî yiirɨ Ə̀nùŋɨ̀sɨg ɨŋga tə fîŋ.

²⁰Mbə̀ kɨə nàʼə̀ məben-əwe əmbɨ ə Ŋwiə̀ nɨ yeʼ Mbǎʼ. Mbə̀ kɨə ghɨ̀ əne ənɨ mɨ̀nyùmə̀ jìm bə̀ fɔrɨ ɨmbə̀ʼ ɨghɨjìm. Mbə̀ ghɨ əne ənɨ ɨkum a Ə̀nùŋɨ̀sɨg Yeso Kristo.

²¹Mbə zuunɨ ə mbənə mbənə ɨmbə̀ʼ chwi ni mbə̀ mbɨə wumnɨ ə Kristo.

²²Məyi, mbə̀ zuunɨ mbə mɨnom ɨchî nɨ mbə̀ə zuunɨ Ə̀nùŋɨ̀sɨg,

²³ɨmbə̀ʼ ɨghəm nɨ ɨnom yɨ ətu ɨgwɨ i wi, ɨchî nɨ Kristo yeʼ ətu ɨgwɨ ɨfetɨ bə̂d Kristo. Ɨfetɨ we yɨə nyamnyod məd nɨ wɨ̀ chɨ rəŋgəʼ.

²⁴Ɨchî nɨ ɨfetɨ bə̂d Kristo ə zuunɨ ə Kristo, əne bə, məyi berɨ zuunɨ mbə mɨnom ənɨ ɨnû jìm.

²⁵Mɨnom, mbə̀ ghaʼ mbə məyi ɨchî nɨ Kristo ghaʼ ɨfetɨ bə̂d ɨməd. Wɨ̀ nyaʼa kwɨ ɨgwɨ ətu ɨfetɨ we,

²⁶ɨmbə̀ʼ ɨfetɨ we chub ɨzeŋɨ zeŋɨ ɨchî nɨ wɨ̀ nyaʼa so ənɨ mɨnib bə̀ sò ənɨ ɨŋgam Ŋwiə̀.

²⁷Wɨ̀ nyaʼa ghɨ əne ɨmbə̀ʼ nuŋ ɨfetɨ we ənɨ i ɨfě, nɨ wɨ̀ fə yèʼɨ wɨ bɔŋ, nɨ chəi rɨfiŋ ɨgun, nɨ chəi ɨfě nyɔpɨ, nɨ chəi ənɔʼɔ kɨ̀ əghɨ ə mɔʼɔ ɨghabɨ əze ɨgun, ɨmbə̀ʼ ɨfetɨ we chub ɨzeŋɨ zeŋɨ nɨ chəi əghəm ɨgun.

²⁸Əndəŋ əndəŋ, mɨnom berɨ ghaʼ mbə məyi ɨchî nɨ mbɨ ghaʼ tə nyamnyod. Mbaŋə̀ ze nɨ ghaʼ i ɨwi ə bə̀ ghaʼ i ɨnyod.

²⁹Chəi wə̀d mɔʼɔ kweʼ bàn i ɨnyod. Ɨ wɨə jə ɨnyod we bə̀ nəŋgɨə kwàʼ ɨchî chɔ̀m, ɨchî nɨ Kristo ə ghɨ̀ əmbɨ ɨfetɨ bə̂d məd.

³⁰Tɨ̀ yɨə ɨsɨ ɨnyod rɨ ənɨ ə nyamnyod məd.

³¹Ə zɨ ɨŋga Ə̀ŋwàʼnɨ̀ ə Ŋwiə̀ ni, “À yɨ əton nɨ mbaŋə̀ bɨrɨ saŋ i mbǎʼ mbɨ i nɨŋ wo fɔtɨ mbɨ i ɨwi, mɨ̀mə̌d mbe mɨbe sɨə nyamnyod mɔʼ.”

³²Əzɔ̂ yɨ ənû ə kyeŋ nɨ yeʼ ənə̀mə nɨ mə̀ kyerɨ ni ə zɨə berɨ ənû nɨ ghɨ mbɨ Kristo fɔrɨ mbɨ ɨfetɨ bə̂d Kristo.

³³Əne mbaŋə̀ mɔʼ mɔʼ rəbɔʼ nən ghaʼ i ɨwi ɨchî nɨ wɨ̀ ghaʼ i ɨnyod. Əyi berɨ bɨ wumnɨ i nom.