Read Fɨso Fi Filipì 1 Bible Online

Filipì 1 - Fɨso Fi bible

Filipì 1

¹À yɨə mɔ̌ Pɔ̂l mbɨ Timotì, nɨ tɨ̀ yeʼ bə̂d ə̀fàʼì Kristo Yeso, ŋwaʼnɨ ə̀ŋwàʼnɨ̀ zɔ̂. Tɨ̀ wɨə ŋwàʼnɨ̀ əmbɨ mbə̀n bə̂d Ŋwiə̀ mɨ̀jìm mbe nɨ yeʼ ə Filipì, nɨ yeʼ ənɨ ɨfɔtɨ mbɨ Kristo. Tɨ̀ wɨə ŋwàʼnɨ̀ əmbɨ mbə̀n mbe nɨ yeʼ ɨtu nɨə chà ɨfetɨ bə̂d Kristo. Tɨ̀ wɨə bə̀ ŋwàʼnɨ̀ əmbɨ mbə̀n mbe nɨə wèèrɨ̀ mɨ̀mə̌d.

²Ŋwìə̀ a Mbǎʼ mbɨ Ə̀nùŋɨ̀sɨg Yeso Kristo ghɨ ɨ̀chɔ̀m ənɨ ə nən bə̀ nàʼ əbɔrəbɔd ɨ nən.

³Mə wɨə nàʼə̀ məben-əwe əmbɨ mɨ Ŋwìə̀ ənɨ mɨ̀nyùmə̀ jìm mbe nɨ mə kɔndɨ əwən.

⁴Ənɨ mɨ̀nyùmə̀ jìm mbe nɨ mɨə kɔ̀ŋgɨ̀ ə Ŋwiə̀ ɨmbə̀ʼ mbə̀n mɨjìm, mə̀ wɨə kɔ̀ŋgɨ̀ə̀ mbɨ ɨghaʼi ɨŋga mɨ fîŋ,

⁵ɨmbə̀ʼ ɨghəm nɨ mbə mbɨə wèèrɨ̀ əmɨ nɨ jaŋ ɨkə̂n chɔ̀m ɨmbə̀ʼ ə Kristo. Mbə nyaʼa kɔ ghɨ əne tɨ ənɨ mbə̀ nyaʼa zu ɨkə̂n we benɨ. Mbə mbɨə bə̀ kɨrɨ ghɨ əne yeʼe pè rɨ̀nîn.

⁶Mə kàŋ kyerɨ ni Ŋwìə̀ we nɨ nyaʼa kɔ ə̀fàʼì ə chɔ̀m zɔ̂ ɨŋga nən bɨrɨ chè ɨmbì mbɨ əzɨ əwən pè əni ze nɨ Kristo Yeso bɨrɨ wɨrɨ yeʼe.

⁷Zɨə kàŋ kùʼ ni mə̀ kɔndɨ əne ɨmbə̀ʼ mbə̀n mɨjìm, ɨmbə̀ʼ ɨghəm nɨ mə kàŋ ghaʼ əwən əku. Ŋwìə̀ wɨə ghɨ̀ ɨ̀chɔ̀m ənɨ mba mɨjìm ɨchî nɨ tɨə fàʼ ɨ bɔ. Ɨ wɨə ghɨ̀ əne ənɨ mə̀ yeʼ ə nəb ndəŋ, ənɨ mɨə ghà ni ɨkə̂n chɔ̀m yɨ ənû rəsìʼ kaʼi mɨghab bə̀ fɔrɨ ənɨ mə nyaʼə ghɨ̀ə̀ ni bə̂d ben ɨnû mbe nɨ yeʼ ɨŋga ɨkə̂n chɔ̀m.

⁸Ŋwìə̀ ə kyerɨ ni mə ghaʼ əwən fɔrɨ ni mə wɨə bə̀ kàŋ kəb zə mbə̀n mɨjìm. Mə wɨə ghɨ əne àmei ɨchî nɨ Kristo Yeso ziə ghaʼ əwən.

⁹Mə wɨə kɔ̀ŋgɨ̀ ə Ŋwiə̀ ni mbə̀ ghaʼ mbə bɔŋgɔb wò ɨmbì. Mə wɨə bə̀ kɔ̀ŋgɨ̀ə̀ ni mbə̀ kyerɨ rəsìʼ ɨmbə̀ʼ ə Ŋwiə̀ bə̀ kyerɨ ɨkwepɨ rəbɔʼ ɨnû chɔ̀m mbɨ ɨnû rɨbɔ̀ŋ,

¹⁰ɨmbə̀ʼ mbə̀ chɔʼ əze nɨ jeŋgɨ bɔ̀ŋ. Mbə mɨ ghɨ̀ əne, mbə bɨrɨ chub ɨzeŋɨ zeŋɨ fɔrɨ ni chəi bə̂d bɨrɨ gha ɨnû rɨbɔ̀ŋ ɨmbə̀ʼ əwən əni ze nɨ Kristo bɨrɨ wɨrɨ yeʼe.

¹¹Àmei Yeso Kristo we tɨ wɨ̀ ghɨ̀ ni mbə̀ ghɨ ɨnû ɨchî nɨ kuʼnɨ, ɨmbə̀ʼ bə̂d wumnɨ ə Ŋwiə̀ bə̀ yiirɨ əməd.

¹²Mbɨ bɔŋgɔb, mə kə̀b ni mbə̀ kyerɨ ni ənû ze nɨ nyaʼa ghɨ̌ ənɨ ə num ə nyaʼa wèèrɨ̀ nɨ ghɨ̀ ni ɨkə̂n chɔ̀m wo ɨmbì.

¹³Zɨə nyaʼa ghɨ̀ ni mɨ̀sɔgyɨ̀ mɨjìm mbe nɨ nyaʼə nəŋgɨ ə tɔʼ mbɨə bə̂d cherə mɨjìm kyerɨ ni mə wɨ ə nəb ndəŋ ɨmbə̀ʼ ɨchî nɨ mɨə ghà ɨkə̂n chɔ̀m ɨmbə̀ʼ ə Kristo.

¹⁴Ɨchî nɨ mə yeʼ ə nəb ndəŋ ə fə ghɨ̀ ni bɔŋgɔb nɔnɔʼ rəbɔʼ mbe nɨ ben ə Kristo jeŋgɨ ghà ɨŋgam Ŋwiə̀ ənɨ ə fîŋ nɨ kǎ fɔrɨ ənɨ chəi mbɨə bə̀ bɔ ə.

¹⁵À yɨ rəsìʼ ni bə̂d mɔʼɔ mbɨə ghà ɨkə̂n chɔ̀m ɨmbə̀ʼ ə Kristo ənjìm ə̀dìì bə̀ fɔrɨ ənjìm əwindɨ, àyɨə mbɨ mɔʼɔ mbɨə ghàə̀ mbɨ fîŋ chɔ̀m.

¹⁶Mbe nɨə ghàə̀ mbɨ ə fîŋ chɔ̀m mbɨə ghɨ̀ əne mbɨ ɨghaʼi, ɨmbə̀ʼ ɨghəm nɨ mbɨ kyerɨ ni mə wɨ̀ əgha ɨmbə̀ʼ ɨchî nɨ Ŋwìə̀ naʼ ə̀fàʼì ɨ num ni mə̀ chwi ni ɨkə̂n chɔ̀m yɨ ənû rəsìʼ kaʼi mɨghab.

¹⁷Chəi bə̂d mbe nɨə ghɨ̀ ə̀dìì ə ghà ɨkə̂n chɔ̀m mbɨ ə fîŋ nɨ zeŋɨ. Ɨ mbɨə ghàə̀ yeʼ ɨmbə̀ʼ ɨghəm nɨ mbɨ kəb ni bə̂d mɨ̀nɔnɔʼ beenɨ əbɔʼ mɨ̀mə̌d. Ɨ mbɨə kɔndɨə ni ɨnû mbe nɨ mbɨə ghɨ̀ə̀ bɨrɨ ghɨ mə̀ jeŋgɨ nyɨ ŋgəʼ ɨchî nɨ mə̀ yeʼ ə nəb ndəŋ.

¹⁸Ka əze yɨ i ənû ə mɔʼɔ! Ənû ə kyeŋ nɨ yeʼ əŋgu yɨ ni ənɨ mɨnə̂njɨ̀ jìm, kɨ̀ à kɨ mbɨ ə fîŋ chɔ̀m kɨ̀ mbɨ ə fîŋ rɨbɔ̀ŋ, mə wɨə ghaʼə ni ɨ mbɨə ghà ɨkə̂n chɔ̀m ɨmbə̀ʼ ə Kristo.

¹⁹Mə wɨə ghaʼ ɨmbə̀ʼ ɨghəm nɨ mə̀ kyerɨ ni ənjìm ə̀kɔ̀ŋgɨ̀ ze nɨ mbən ə kɔ̀ŋgɨ̀ə̀ bə̀ fɔrɨ ənjìm ə̀wèèrɨ̀ ze nɨə nɔʼ rɨ əmbɨ Əzwî ə Yeso Kristo, Ŋwiə̀ bɨrɨ chɨ əmɨ rəŋgəʼ koŋ.

²⁰Ənû nɨ mə kàŋ kə̀b bə̀ kyerɨ ni zɨə bɨrɨ jwɨ ənɨ ənû nɨ mə̀ fə bə̀ nùŋ mɨ ɨkɔndɨ ɨ wòm yɨ ni chəi mɨ ətu ə bɨrɨ nɔ nìd ɨmbə̀ʼ ənû ze nɨ mɨə ghɨ̀ə̀. Àyɨə ənɨ mɨ̀nyùmə̀ jìm, màànɨ̀ rɨ̀nîn, mə berɨ ɨka fîŋ ɨmbə̀ʼ wumnɨ ə Kristo mbɨ mɨ ɨ̀tènɨ̀ jìm, kɨ̀ à kɨ ənɨ mə̀ yeʼ ɨkǎ kɨ̀ ənɨ mə̀ fə kwɨ,

²¹ɨmbə̀ʼ ɨghəm nɨ mə mɨ yeʼ ɨkǎ, à yɨ ɨmbə̀ʼ wumnɨ ə Kristo mə mɨ kwɨ, əze ə bɔŋɨ chè.

²²Mə mɨ chɔʼ nɨ chub ɨkǎ, mə bɨrɨ wò ɨmbì ghɨ̀ ɨnû cherə nɨ kaanɨ. Àyɨə əbà ze nɨ mə bɨrɨ chɔʼ, chəi mə kɨrɨ kyerɨ.

²³Ɨnû mbɔ̂ be mbɨ ɨgwɨ num. Zɨə kàŋ se nɨ chɔʼ əzɨ ə fibɨ̀. Ənû nɨ mə̀ kaŋ kə̀b yɨ ni mə̀ saŋ ɨsɨg wɔ̂ wò chubɨ mbɨ Kristo. Əze yɨ ənû nɨ bɔŋ chè.

²⁴Àyɨə zɨə bɔ̀ŋ ni mə̀ chub ɨkǎ ɨmbə̀ʼ weerɨ əwən.

²⁵Mə kyerɨ ni ənû zɔ̂ yɨ ənû rəsìʼ. Mə bə̀ kyerɨ ni mə bɨrɨ chub ɨkǎ ɨmbə̀ʼ wò ɨmbì wèèrɨ̀ mbə̀n mɨjìm, ɨmbə̀ʼ ɨghaʼi swi ɨŋga tə fîŋ ɨchî nɨ mbə̀ ben ə Kristo,

²⁶ɨmbə̀ʼ ənɨ mə wɨrɨ yeʼe əsɨ nən, mbə bɨrɨ kaŋ berɨ əton nɨ wumnɨ ə Kristo Yeso ɨmbə̀ʼ ənû ze nɨ wɨ̀ che ənɨ mɨ njìm ghɨ̀.

²⁷Kɨ̀ à kɨ ənû ə ye ə, mbə mɨchî berɨ kùʼnɨ̀ mbɨ ɨchî nɨ ɨkə̂n chɔ̀m ɨmbə̀ʼ ə Kristo chwi, ɨmbə̀ʼ zɨə mɨ chwi ni mə yeʼe zə əwən kɨ̀ ni tɨ mə̀ yeʼe əmɨ, mə bɨrɨ zu ni mbə fə təm kàànɨ̀ mbɨ ə fîŋ mɔʼ fɔrɨ mbɨ ɨkɔndɨ mɔʼ, bə̀ zu ni mbə mbɨə kywɨ ənywɨ ɨnɔ̂n ɨ zə ni bə̂d nuŋ fîŋ ɨgun Kristo ɨchî nɨ ɨkə̂n chɔ̀m chwiə.

²⁸Tɨ mbə̀ bɔ ə mbə bə̂d pə̀n. Əzɔ̂ ə bɨrɨ chwi əmbɨ mɨ̀mə̌d ni mbɨ bɨrɨ nim, àyɨə mbə bɨrɨ jwɨ rəŋgəʼ. Ŋwìə̀ fə ghà ni zɨə bɨrɨ yeʼ əne.

²⁹Ŋwìə̀ fə nàʼ əpan ɨ nən ni mbə̀ faʼ əmbɨ Kristo, kaʼ àmei nɨ ben əməd, à yɨ bə̀ nɨ zə ŋgəʼ ɨmbə̀ʼ əməd.

³⁰Mbə mbɨə zɔ̀ŋə̀ tɨ̀nîn mbɨ ə bə̂d pə̀n àmei ɨchî nɨ mə̀ nyaʼə bə̀ zɔ̀ŋə̀. Mbə̀ mbɨə zuə ni mə wɨə bə̀ kɨrɨ zɔŋə̀.