Read Fɨso Fi Filipì 2 Bible Online

Filipì 2 - Fɨso Fi bible

Filipì 2

¹Ɨchî nɨ mbə̀ yeʼ ənɨ ɨfɔtɨ mbɨ Kristo zɨə tìmbɨ̀ əwən. Ɨchî nɨ wɨ̀ ghaʼ əwən wɨə nəərɨ əwən. Mbə mbɨ ənɨ ɨfɔtɨ mbɨ Əzwî ə Ŋwìə̀. Mbə mbɨə ghɨ̀ ɨ̀chɔ̀m ənɨ mbə bɔŋgɔb. Mbɨ mbɨə kə̀n ənɨ wə̀d mɔʼɔ we rəbɔʼ nən nɨə zəə ŋgəʼ.

²Əne mbə̀ ghɨ ni ɨghaʼi swi ɨŋga mɨ fîŋ ɨchî nɨ mbə̀ə nuŋ rɨkɔndɨ ənɨ wɨ mɔʼ, ɨchî nɨ mbə̀ə ghaʼə mbə bɔŋgɔb, ɨchî nɨ mbə̀ə ghɨ̀ ɨnû ənɨ mbɨ mɔʼ mbɨ ɨchî nɨ mbə̀ə kɔndɨ ənû ə mɔʼ.

³Tɨ mbə̀ ghɨ ə ɨghabɨ ni àmei mbə̀nə berɨ ɨghɨ. Tɨ mbə̀ bɨ ghɨ ə ɨnû nɨ chwi ni mbə mbɨə nɔ̀ ɨnyod, àyɨə mbə swi ɨnyod kɔndɨ ni bə̂d cherə ə chè əwən.

⁴Tɨ mbə̀ neŋ ə àmei ɨnû mbe nɨ de əwən. Mbə̀ neŋə mbɨ mbe nɨ de bə̂d cherə.

⁵Mbə̀ ghɨ ɨnû ɨchî nɨ Kristo Yeso nyaʼə ghɨ̀ə̀.

⁶Wɨ̀ nyaʼa berɨ mɨchî Ŋwiə̀, àyɨə chəi wɨ̀ nyaʼa kəb chwi ni tə wɨ əndəŋ əndəŋ mbɨ ə Ŋwiə̀.

⁷Wɨ̀ nyaʼa saŋ ɨkyěŋ məd, swi i ɨnyod ənɨ ə̀bòʼò. Mbɨ nyaʼa gywɨ əməd ɨchî nɨ mbɨə gywɨə bə̂d mɨ̀sɔŋɨchù. Wɨ̀ nyaʼa yeʼe ɨghabɨ ə wə̀d mɨ̀sɔŋɨchù, əne bə̂d nyaʼa zə əməd.

⁸Ɨchî nɨ wɨ̀ yɨə nyaʼə wə̀d mɨ̀sɔŋɨchù əne, wɨ̀ nyaʼa swi i ɨnyod, zuunɨ wò pè ənɨ wɨ̀ nyaʼa benɨ nɨ kwɨ. Wɨ̀ nyaʼa kwɨ əzed ə baʼnɨ.

⁹Əne Ŋwìə̀ fə nɔ̀ əməd nùŋ əsɨ ze nɨ che ɨsɨ jìm. Wɨ̀ fə bə̀ nàʼ ɨkum ɨ bɔ nɨ che tɨkum rɨjìm.

¹⁰Wə̀d mɔʼɔ mɨ tɔŋ ɨkum Yeso, bə̂d mɨ̀jìm ɨkaŋ, ɨgwɨ ə si, mbɨ əton ə si bɨrɨ chìndɨ̀ ɨtu ɨnywɨ ə si.

¹¹Wə̀d jìm bɨrɨ ben əsaŋ əsaŋ ni Yeso Kristo yɨ Ə̀nùŋɨ̀sɨg, ɨmbə̀ʼ bə̂d mɨ̀jìm wumnɨ ə Ŋwìə̀ Mbǎʼ.

¹²Mbɨ bɔŋgɔb nɨ mə̀ ghaʼi kwàʼ rɨŋgəʼ, ɨchî nɨ mbə̀ nyaʼə zuunɨ ə Ŋwiə̀ ɨghəm jìm ənɨ mə̀ nyaʼa mbɨ nən, əne tɨ̀nîn nɨ chəi əmɨ mbɨ nən, mbə̀ jeŋgɨ zuunɨ əməd. Ŋwiə̀ fə chɨ̀ əwən rəŋgəʼ, əne mbə̀ kywɨ ənywɨ màànɨ̀ ɨchî nɨ wɨ̀ chɨ̀ əwən rəŋgəʼ ɨchî nɨ mbə̀ə bɔ əməd bə̀ wumnɨ əməd.

¹³Mbə̀ kyerɨ ni Ŋwìə̀ wɨə fàʼ ɨŋga nən ɨ ghɨ ni mbə̀ ghɨ ɨnû chɔ̀m mbe nɨ wɨ̀ kəbɨ, mbɨ ni mbə̀ ghaʼ nɨ ghɨ ɨnû mbe.

¹⁴Mbə ghɨ ɨnû jìm nɨ chəi mbə̀ə ghàmbɨ̀ə̀ kɨ̀ nɨ mbə̀ə tàŋə̀,

¹⁵ɨmbə̀ʼ tɨ bə̂d gha ə ɨnû rɨbɔ̀ŋ ɨmbə̀ʼ əwən, fɔrɨ ɨmbə̀ʼ mbə̀ zeŋ ɨghabɨ ə bɔn Ŋwiə̀ nɨ chəi ɨgu ənû ɨgwɨ mɨ̀mə̌d. Ɨgu ənû yɨ əkaʼ bə̂d mbe nɨə ghɨ̀ ɨnû rɨbɔ̀ŋ bə̀ ghɨ̀ ɨnû nɨ chəi mbɨ kuʼnɨ. Mbə̀ berɨ chub əkaʼ mɨ̀mə̌d ɨchî nɨ rɨtəmɨ ə te ɨŋga ɨsɨg.

¹⁶Mbə̀ yim ɨŋgam we nɨə nàʼ ɨ̀tènɨ̀, ɨmbə̀ʼ mə̀ goŋ ɨgɔ̂ əni ze nɨ Kristo bɨrɨ wɨrɨ yeʼe ni chəi mə̀ nyaʼa notɨ ətu ə̀kǒ kɨ̀ bə̀ fàʼ ətu ə̀kǒ.

¹⁷Kɨ̀ mə be kwɨ, mɨ ənəm ə bɨrɨ yeʼ ɨghabɨ ɨchəmnɨ nɨ mbɨ zɨ ɨgun ɨghɨ ə̀fà. Ɨghɨ ə̀fà mbe yɨ ɨbenɨ we nɨ mbə̀ nuŋ ɨgun ə Ŋwiə̀. Əne mɨ ɨnyod wɨə bɔ̀ŋə̀, mə bə̀ ghaʼrɨ ɨchî nɨ mbə̀n ə bə̀ ghaʼrɨə.

¹⁸Əne bə, ə ɨnyod bə̀ bɔŋ, mbə̀ bə ghaʼrɨ ɨchî nɨ mɔ̌ ə bə̀ ghaʼrɨə.

¹⁹Ə̀nùŋɨ̀sɨg Yeso mɨ benɨ, mə bɨrɨ tom ə Timotì əsɨ nən, ɨmbə̀ʼ ɨghaʼi swi ɨŋga mɨ fîŋ ənɨ wɨ̀ wɨrɨ yeʼe pe gha ɨnû ɨ num ɨmbə̀ʼ əwən.

²⁰Chəi mə̀ wɨrɨ berɨ wə̀d mɔʼɔ ɨghabɨ əməd nɨə kàŋə̀ kə̀bə̀ ni mbə̀ chub ɨchî chɔ̀m.

²¹Bə̂d mɨ̀jìm mbə mbɨə zɨ̀ ɨtu àmei ənɨ ɨnû mbe nɨ mbɨ kəbɨ, kaʼi mbe nɨ Yeso Kristo kə̀bɨ.

²²Mbə kyerɨ ə ni Timotì nyaʼa chwi nɨ tə yɨə wə̀d ə̀fàʼì chɔ̀m. Ɨghabɨ ə wan mbɨ i mbǎʼ, wɨ̀ fə fàʼ mbɨ num nɨ gha ɨkə̂n chɔ̀m.

²³Mə wɨə kɔndɨə ni mə bɨrɨ tom əməd əsɨ nən ənɨ mə̀ kyerɨ ɨchî nɨ ɨnû bɨrɨ yènɨ̀ mbɨ num.

²⁴Mə kyerɨ ni Ə̀nùŋɨ̀sɨg mɨ benɨ, mə bɨrɨ zambɨ yeʼe əsɨ nən mɔ̌ mɔ̌.

²⁵Mə kàŋ kɔndɨ ni zɨə bɔ̀ŋ ni mə̀ wɨrɨ tom ə Èpàfroditùs əsɨ nən. Məd yɨ wa aŋgɔb. Məd wɨə fàʼə̀ mbɨ num bə̀ ghà ɨkə̂n chɔ̀m mbɨ num ɨghabɨ ə sɔgyɨ̀ chɔ̀m. À yɨə məd nɨ mbə̀ nyaʼa tom ni wɨ̀ yeʼe weerɨ əmɨ.

²⁶Ɨ wɨə kə̀bə̀ ni njɨ tə zə əwən mbə̀n mɨjìm. Fîŋ zɨə tɔb əməd ɨmbə̀ʼ ɨchî nɨ mbə̀ nyaʼa zu ni wɨ̀ nyaʼa wɔ̀n.

²⁷À yɨ rəsìʼ ni wɨ̀ nyaʼa wɔ̀n sɨə wò kwɨ. Àyɨə chəi Ŋwìə̀ nyaʼa diirɨ àmei əməd. Wɨ̀ nyaʼa bə̀ dììrɨ̀ əmɨ, njɨ ə̀kə̀nɨ̀ nɨ che əbɔ ə nyaʼa swi ɨgwɨ num.

²⁸Əne mə wɨə kàŋə̀ ghaʼə nɨ wɨrɨ cha əməd, ɨmbə̀ʼ ənɨ mbə̀ zə əməd, ɨghaʼi bɨrɨ swi ɨŋga tə fîŋ. Chəi mə bɨrɨ wɨrɨ nwìʼ ɨnyod ɨmbə̀ʼ əwən.

²⁹Əne mbə nɨŋ əməd mbɨ ɨghaʼi ɨchî nɨ mbə̀ə nɨŋə bə̂d mbe nɨ ben ə Kristo. Mbə̀ naʼ ɨwumnɨ əmbɨ ə bə̂d nɨ yeʼ ɨghabɨ əməd,

³⁰ɨmbə̀ʼ ɨghəm nɨ wɨ̀ nyaʼa nɨrə kwɨ ɨchî nɨ wɨ̀ nyaʼə fàʼ əmbɨ Kristo. Wɨ̀ nyaʼa bə̀ sɔ̀ŋ i ɨ̀tènɨ̀ ɨmbə̀ʼ weerɨ əmɨ nɨ chəi ənɨ tɨ̀ mbə nyaʼa ghɨ̀ əne.