Read Fɨso Fi Kòlosè 2 Bible Online

Kòlosè 2 - Fɨso Fi bible

Kòlosè 2

¹Mə wɨə kə̀bə̀ ni mbə̀ kyerɨ ni mə wɨə fàʼ rɨka ɨmbə̀ʼ əwən, ɨmbə̀ʼ bə̂d mbe rɨ ə Laodisià, fɔrɨ ɨmbə̀ʼ bə̂d mɨjìm mbe nɨ chəi mbɨ kyerɨ əmɨ.

²Əton yɨ ni mə wɨə kəb nəərɨ fîŋ tɨ mɨ̀mə̌d ni mbɨ ghaʼ mbə bɔŋgɔb əne chub ənɨ ənû mɔʼ, ɨmbə̀ʼ mbɨ berɨ mbɔ̂n ze nɨ bɨrɨ ghɨ ni mbɨ berɨ ɨwe bə̀ jeŋgɨ kyerɨ ɨnû mbe nɨ yeʼ ənə̀mə ɨmbə̀ʼ ə Ŋwiə̀. Ɨnû mbe nɨ yeʼ ənə̀mə yɨə Kristo ziə.

³Ŋwìə̀ fə nə̀m ɨwe jìm bə̀ nə̀m ɨkyerɨ-ɨnû jìm ɨŋga məd.

⁴Mə wɨə ghà əne ɨmbə̀ʼ tɨ wə̀d mɔʼɔ tambɨ i əwən mbɨ mɨŋgam nəmɨ nəmɨ mɔʼɔ.

⁵Ka à bè yeʼi ni chəi əmɨ mbɨ nən ənɨ nyamnyod, àyɨə mə wɨ mbɨ nən ənɨ əzwî. Mə wɨə ghaʼə nɨ zə ni mbə mbɨə chub ɨchî ɨ̀chɔ̀m bə̀ ghaʼə nɨ zə ni mbə berɨ ɨbenɨ nɨ kaanɨ ɨgun ə Kristo.

⁶Ɨchî nɨ mbə̀ fə ben ni Kristo Yeso yɨ Ə̀nùŋɨ̀sɨg, əne mbə̀ wo ɨmbì chub ənɨ ənû ə mɔʼ mbɨ məd.

⁷Mbə̀ sɔɔrɨ mbə ɨghaŋ mbɨ jeŋgɨ nyɨ ɨŋga məd, nùŋ ə ɨ̀tènɨ̀ àmei ɨgwɨ məd bə̀ ghɨ̀ ni ə ɨbenɨ kaanɨ ɨchî nɨ mbɨ nyaʼa chwi ɨ nən. Mbə̀ naʼ məben-əwe ɨ bɔ ɨghəm jìm ɨmbə̀ʼ ɨnû jìm mbe nɨ wɨə ghɨ̀ ənɨ ə nən.

⁸Tɨ mbə̀ ben ə ni wə̀d mɔʼɔ nɨŋ ɨwe əko bə̂d mɨ̀sɔŋɨchù tambɨ əwən əŋgu əne ghɨ̀ mbə̀ ben ɨ̀bòʼò ɨ bɔ. Ɨwe əko we yɨ rɨ ənɨ mɨchî mɨ̀mbǎʼ mbɨ rəŋwe bə̀ fɔrɨ rɨ əmbɨ ɨzwî mbe nɨə tùmbɨ̀ ɨsɨg. Ka ɨwe əko wɔ̂ yɨ i rɨ əmbɨ Kristo.

⁹Mɨchî Kristo ənɨ wɨ̀ nyaʼə wə̀d mɨ̀sɔŋɨchù yɨə nyaʼa ɨghabɨ mɨchî Ŋwiə̀.

¹⁰Ɨ̀tènɨ̀ wɨ ɨŋga nən ɨ swi ɨchî nɨ mbə̀ yeʼ ənɨ ɨfɔtɨ mbɨ Kristo. Məd ə chè ɨzwî jìm mbe nɨ yeʼ ɨkaŋ bə̀ chè ɨzwî jìm mbe nɨ yeʼ ɨŋga ɨsɨg.

¹¹Ɨchî nɨ mbə̀ yeʼ ənɨ ɨfɔtɨ mbɨ məd, əne mbɨ nyaʼa fə bə̀ ne əwən. Kaʼi bə̂d mɨ̀sɔŋɨchù nyaʼa ne əwən ənɨ mbə ɨbɔ. À yɨə Kristo ziə nyaʼa ne əwən ɨchî nɨ wɨ̀ chɨ əwən rɨ əton ɨka we ɨnû rɨbɔ̀ŋ nyaʼa berɨ ɨgwɨ nən.

¹²Mbɨ nyaʼa fə tweŋ əwən mbɨ Kristo ənɨ ə nyùmə̀ we nɨ mbə̀ nyaʼa nɨŋ mɨnib. Ŋwìə̀ fə bə zwemnɨ əwən mbɨ məd ənjìm ɨchî nɨ mbə̀ ben ni məd ə berɨ ɨka nɨ ghɨ əne. À yɨə məd nyaʼa zwemnɨ ə Kristo.

¹³Ənɨ mbə̀ nyaʼa fə kwɨ ɨmbə̀ʼ mbə ɨnû rɨbɔ̀ŋ fɔrɨ ɨmbə̀ʼ ɨchî nɨ chəi mbɨ nyaʼa kɨrɨ ne əwən ənɨ mbə̀ nyaʼa kɨrɨ ghɨ ɨnû rɨbɔ̀ŋ, Ŋwìə̀ nyaʼa waʼ ta rɨ̀gùrɨ-ɨnû jìm, əne ghɨ̀ mbə chub ɨka mbɨ Kristo.

¹⁴Wɨ̀ nyaʼa ghɨ̀ əne ɨchî wɨ̀ nyaʼa fu əghɨ ze nɨ mbɨ nyaʼa ŋwaʼnɨ ta rɨ̀gùrɨ-ɨnû ɨgun bə̀ fu rɨkə te nɨ nyaʼa əbɔʼ wò kombɨ əzed ə baʼnɨ.

¹⁵Wɨ̀ nyaʼa fe ɨka rɨ əmbɨ ɨzwî ka ka mbe nɨ yeʼ ɨkaŋ bə̀ fe rɨ əmbɨ ɨzwî ka ka mbe nɨ yeʼ ɨŋga ɨsɨg. Əze ə nyaʼa chwi əmbɨ bə̂d mɨjìm ni wɨ̀ fə baŋ mɨ̀mə̌d əzed ə baʼnɨ.

¹⁶Əne tɨ wə̀d mɔʼɔ zɨ i ɨsaʼi ɨgwɨ nən ɨmbə̀ʼ rɨjɨg, kɨ̀ ɨmbə̀ʼ əghɨ nɨ nɔ, kɨ̀ ɨmbə̀ʼ ənû nɨ jɨg əchwɨ̂, kɨ̀ ɨmbə̀ʼ əchwɨ̂ ɨmɨg fi, kɨ̀ ɨmbə̀ʼ əni əkwɨ.

¹⁷Mbɔ̂ yɨ ɨziŋɨ tɨ ənɨ ɨghɨ mbe nɨ bɨrɨ yeʼe. Tɨ̀ we tɨ̀ rɨ zə rəsìʼ we nɨ yeʼ ɨŋga ɨnû mbɔ̂ àmei ənjìm ə Kristo.

¹⁸Tɨ mbə ben ə ni wə̀d mɔʼɔ ghɨ ni mbə̀ nim ɨneʼe we nɨ Ŋwiə̀ kaʼ ɨ nən ɨchî nɨ wɨə nyeŋ əwən ni mbə swi ɨnyod bə̀ nyèŋə̀ ni mbə̀ wumnɨ mbɨ̀aŋgɨrə̀. Bə̂d mbe nɨə ghɨ̀ əne mbɨə ghàə̀ ni mbə zə ɨnû mbe ɨŋga rɨ̀taanɨ njə̀m. Ɨ mbɨə nɔ̀ ɨnyod ɨmbə̀ʼ ɨghɨ mbe nɨ mbɨ kɔndɨ ni mbə kyerɨ, àyɨə chəi mbɨ berɨ əton nɨ nɔ ɨnyod.

¹⁹Chəi mɨ̀mə̌d ə wɨrɨə beenɨ əbɔʼ Kristo we nɨ yeʼ ətu rɨ ənɨ ə nyamnyod mɨ̀mə̌d. Nyamnyod ze yɨ ɨfetɨ bə̂d Kristo. À yɨə Kristo ə jəə nyamnyod ze. À yɨə məd ə fɔtɨ ɨsɨ ɨnyod mbe nɨ gumə, bə̀ fɔtɨ rɨnye tɨ kwiə ɨchî nɨ Ŋwiə̀ kəbɨ.

²⁰Mbə mɨ fə kwɨ mbɨ Kristo, əne wɨ̀ fə chɨ̀ əwən rɨ əton ɨka we nɨ ɨzwî rɨbɔ̀ŋ mbe rɨŋga ɨsɨg berɨ ɨgwɨ nən. À kɨə ye sɨ ghɨ ni mbə̀ chub ɨghabɨ bə̂d nɨ kɨrɨ ɨŋga ɨsɨg ə? Mbə kɨə zuunɨ rɨkə te rɨŋga ɨsɨg ɨmbə̀ʼ ə yè ə? Tɨ mɔʼɔ rəbɔʼ yɨ ni:

²¹“Tɨ mbə̀ yim ə əghɨ zɔ̂! Tɨ mbə̀ zweʼrɨ ə əghɨ zɨə! Tɨ mbə betɨ ə ɨghɨ mɔʼɔ!”

²²(Əne yɨ mbɨə ghà ɨmbə̀ʼ ɨghɨjìm mbe nɨə bə əwu ze nɨ mbɨ faʼ mbɨ mbɨwən). Ɨ mbɨə ghà əne beenɨ əbɔʼ rɨkə te nɨ bə̂d mɨ̀sɔŋɨchù ə nùŋə̀ bə̀ fɔrɨ əbɔʼ ɨnû mbe nɨ mbɨə chwiə.

²³Tɨkə tɔ tɨ ɨghabɨ ni tɨ̀ berɨ ɨwe ɨŋga ɨchî nɨ tɨə nyèŋə̀ bə̂d ni mbɨ wumnɨ ə Ŋwiə̀, swi ɨnyod bə̀ chə ɨnyod, àyɨə chəi tɨ berɨ ɨka nɨ yim bə̂d ni mbɨ ton ɨnû mbe nɨ nyamnyod ə kə̀bə̀.