Read Fɨso Fi Kòlosè 3 Bible Online

Kòlosè 3 - Fɨso Fi bible

Kòlosè 3

¹Ŋwìə̀ mɨ fə zwemnɨ əwən mbɨ Kristo, əne mbə̀ sɨ kɔ kəb yeʼ ɨghɨ mbe nɨ yeʼ ɨkaŋ, əsɨ ze nɨ Kristo chub əbà əbɔ ə jɨg ə Ŋwiə̀.

²Mbə̀ nuŋ tə rɨkɔndɨ àmei ɨgun ɨghɨ mbe nɨ yeʼ ɨkaŋ, kaʼi ɨgun mbe nɨ yeʼ ə si.

³Mbə fə kwɨ, əne ə ɨ̀tènɨ̀ wɨ ənə̀mə mbɨ Kristo ɨfě Ŋwiə̀.

⁴Ənɨ Kristo nɨ yeʼ a ɨ̀tènɨ̀ wɨrɨ jwɨ̀, mbə̀ bɨrɨ bɨ jwɨ mbɨ məd ɨŋga ɨwumnɨ məd.

⁵Əne mbə zwiirɨ ɨghɨ rɨ ɨgwɨ ə si mbe nɨ tə nyamnyod ə feenɨə. Əne yɨ ənû nɨ niirɨ məyi kɨ̀ mbaŋə̀ əbəŋ əbəŋ, ənû nɨ ghɨ ɨnyɔɔnɨ-ɨnû, ənû nɨ feenɨ əyi kɨ̀ mbaŋə̀, tɨkɔndɨ ɨmbə̀ʼ ɨnû rɨbɔ̀ŋ, ənû nɨ ghɨ əjə. (Əjə yɨ ənû nɨ wumnɨ anèŋ.)

⁶À yɨ ɨmbə̀ʼ ɨnû mbɔ̂ nɨ Ŋwìə̀ bɨrɨ sə ɨtəm əbɔʼ bə̂d mbe nɨ chəi mbɨə zuunɨ əməd.

⁷Mbə mbɨə nyaʼə kweʼə ghɨ̀ ɨnû mbɔ̂ ənɨ mbə̀ nyaʼə nɨŋə ni à mɨ yeʼ nɨ chəi ɨnû mbɔ̂, njɨ chəi bəi ɨ̀tènɨ̀.

⁸Àyɨə rɨ̀nîn, mbə berɨ waʼ ɨnû mbɔ̂ jìm. Əne yɨ ənû nɨ sə ɨtəm, ənû nɨ chɔb, ənû nɨ ghɨ ɨbə, ənû nɨ ghambɨ wə̀d mbɨ ənû ənɨ gham əbɔb ɨŋgam.

⁹Tɨ mbə̀ gha ə mɨghab əmbɨ mbə bɔŋgɔb, ɨmbə̀ʼ ɨghəm nɨ mbə fə waʼ nyamnyod ənun bə̀ waʼ ɨnû ənun mbe nɨ mbə̀ nyaʼə ghɨ̀ə̀.

¹⁰Tɨ̀nîn, mbə fə nɨŋ nyamnyod fi. Ŋwìə̀ wɨə beŋə nyamnyod fi zɔ̂ ni zɨ̀ jeŋgɨ kyerɨ əməd bə̀ chub ɨghabɨ əməd.

¹¹Əne chəi wɨrɨ i ɨkwepɨ əkaʼ bə̂d nɨ kaʼi mɨ̀Jû mbɨ mɨ̀Jû, chəi wɨrɨ i ɨkwepɨ əkaʼ bə̂d mbe nɨ mbɨ ne mbɨ mbe nɨ chəi mbɨ ne mɨ̀mə̌d, chəi wɨrɨ i ɨkwepɨ əkaʼ bə̂d əgyeŋ nɨ kɨrɨ ɨŋga ɨzimɨ, chəi wɨrɨ i ɨkwepɨ əkaʼ ɨ̀bòʼò mbɨ ə bə̂d nɨ yeʼ ənɨ ə ɨghəm. Kristo yɨ ɨnû jìm. Məd wɨ ɨŋga bə̂d mɨjìm mbe nɨ yeʼ ənɨ ənû ə mɔʼ mbɨ məd.

¹²Əne mbə̀n mbe nɨ Ŋwìə̀ fə chɔʼ ni mbə̀ yeʼ mbi bə̂d berɨ yeʼ bə̂d zeŋɨ nɨ wɨ̀ ghaʼi kwàʼ rɨŋgəʼ. Mbə berɨ diirɨ bə̂d cherə. Mbə berɨ berɨ ɨbɔŋ fîŋ. Mbə berɨ berɨ bɔtɨ ɨnyod. Mbə berɨ berɨ ɨbɔtɨ fîŋ bə̀ berɨ ɨyim fîŋ.

¹³Əne mbə̀ yim fîŋ mbənə mbənə bə̀ waʼ tɨ̀gurɨ-ɨnû wə̀d we nɨ gu ənû əmbɨ aŋgɔb. Ɨchî nɨ Ə̀nùŋɨ̀sɨg fə waʼ mbə ɨgu ɨnû, əne bə̂, mbə berɨ bɨ waʼ mbɨ bə̂d cherə.

¹⁴Ɨgwɨ ɨnû mbɔ̂ jìm yɨ ɨghaʼi. Ɨghaʼi yɨ əghɨ nɨə korə bə̂d mɨjìm ni mbɨ yeʼ ənɨ mbɨ mɔʼ.

¹⁵Mbə̀ saŋ ə ni əbɔrəbɔd ze nɨ Kristo ə nàʼə̀ ə tumbɨ tə fîŋ. À yɨ ɨmbə̀ʼ əbɔrəbɔd zɔ̂ nɨ Ŋwìə̀ nyaʼa tɔŋ əwən ni mbə̀ yeʼe fɔtɨ ɨŋga nyamnyod mɔʼ. Mbə naʼ məben-əwe əmbɨ ə Ŋwiə̀ ənɨ mɨ̀nyùmə̀ jìm.

¹⁶Ɨŋgam ɨmbə̀ʼ ə Kristo kaŋ tèn ɨŋga tə fîŋ kwàʼ ɨchî chɔ̀m. Mbə chwi ɨnû, bə̀ kəərɨ mbə bɔŋgɔb ənɨ ɨwe jìm. Mbə̀ kwerɨ mɨ̀sâm, kwerɨ mɨkyî nɨ yiirɨ ə Ŋwiə̀ bə̀ kwerɨ mɨkyî nɨ nɔʼ rɨ əmbɨ Əzwî naʼ əmbɨ ə Ŋwiə̀. Mbə̀ ghɨ əne mbɨ ɨghaʼi kyeŋ ɨŋga tə fîŋ.

¹⁷Əne ɨnû jìm mbe nɨ mbə̀ə ghɨ̀ə̀, kɨ̀ ənɨ mbe nɨ mbə̀ə ghàə̀, mbə ghɨ ənɨ ɨkum Ə̀nùŋɨ̀sɨg Yeso. Mbə mɨə ghɨ̀ə̀ əne, mbə bɨrɨ yeʼə chè ənjìm məd nàʼə̀ məben-əwe əmbɨ Ŋwiə̀ Mbǎʼ.

¹⁸Məyi, mbə zuunɨ mbə mɨnom. Əzɔ̂ yɨ ənû nɨ kuʼ əmbɨ Ə̀nùŋɨ̀sɨg.

¹⁹Mɨnom, mbə̀ ghaʼ mbə məyi. Tɨ mbə̀ nya ə əbɔʼ mɨ̀mə̌d.

²⁰Bɔn, mbə̀ zuunɨ mbə mɨ̀mbǎʼ bə̀ zuunɨ mbə mɨ̀nɨ̌ŋ ənɨ ɨnû jìm, ɨmbə̀ʼ ɨghəm nɨ əze ə bɔ̀ŋ əmbɨ Ə̀nùŋɨ̀sɨg.

²¹Mɨ̀mbǎʼ, tɨ mbə̀ nɔmbɨ ə mbə bɔn, njɨ fîŋ tɨ mɨ̀mə̌d bɨrɨ bɔd.

²²Ɨ̀bòʼò, mbə̀ zuunɨ mbə mɨ̀mbǎʼ ə̀fàʼì mbe rɨ ɨgwɨ ə si ənɨ ɨnû jìm. Tɨ mbə̀ zuunɨ ə mɨ̀mə̌d àmei ənɨ mbɨə neŋ əwən, ɨmbə̀ʼ mbɨ ghaʼ əwən. Mbə̀ faʼ əmbɨ mɨ̀mə̌d ənɨ tə fîŋ rɨ̀jìm, fàʼə̀ bɔ Ə̀nùŋɨ̀sɨg.

²³Kɨ̀ à kɨ ɨkwɨ ə̀fàʼì wi, mbə̀ faʼ ənɨ tə fîŋ rɨjìm, ɨghabɨ ni mbə mbɨə fàʼ yeʼ əmbɨ Ə̀nùŋɨ̀sɨg, kaʼi əmbɨ ə bə̂d.

²⁴Mbə mɨ yeʼə fàʼə̀, mbə̀ kyerɨ ni Ə̀nùŋɨ̀sɨg bɨrɨ chɔʼ ə ə̀fàʼì ənɨ ɨghɨ mbe nɨ wɨ nuŋ ɨ nən ɨkaŋ. Mbə mbɨə fàʼə̀ yeʼ əmbɨ Ə̀nùŋɨ̀sɨg Kristo.

²⁵Mbɨ bɨrɨ chwɨ wə̀d we nɨə ghɨ̀ ɨnû rɨbɔ̀ŋ ɨgwɨ ɨnû rɨbɔ̀ŋ mbe nɨ wɨ̀ ghɨ̌. Mbə̀ kyerɨ ni chəi Ŋwiə̀ ə ghɨ̀ə̀ ɨghə.