Read Fɨso Fi Kòlosè 4 Bible Online

Kòlosè 4 - Fɨso Fi bible

Kòlosè 4

¹Mɨ̀mbǎʼ ə̀fàʼì, mbə̀ ghɨ mbɨ mbə ɨ̀bòʼò ɨchî nɨ kuʼnɨ bə bɔŋ. Mbə̀ kyerɨ ni mbə bə̀ berɨ Mbǎʼ ə̀fàʼì ɨkaŋ.

²Mbə̀ kɔŋgɨ ə Ŋwiə̀ ənɨ mɨ̀nyùmə̀ jìm. Mbə mɨ yeʼə kɔ̀ŋgɨ̀ə̀, mbə̀ chub ɨkyèʼe bə̀ nàʼə̀ məben-əwe ɨ bɔ.

³Mbə̀ bə kɔŋgɨ ə Ŋwiə̀ ə ɨgwɨ na, ɨmbə̀ʼ wɨ̀ naʼ əpan ni tɨ̀ gha ɨnû mbe nɨ yeʼ ənə̀mə ɨmbə̀ʼ ə Kristo. À yɨ ɨnû mbe ghɨ ni mə̀ yeʼ ə nəb ndəŋ.

⁴Mbə̀ kɔŋgɨ ə Ŋwiə̀ ni mə̀ gha ɨnû mbe mbɨ zeŋ, àmei ɨchî nɨ mə kəʼ berɨ ghɨ̀.

⁵Mbə̀ we əwən ɨchî nɨ mbə̀ə ghɨ̀ə̀ mbɨ ə bə̂d mbe nɨ kaʼi bə̂d Kristo. Mbə̀ nɨŋ əpan ze nɨ mbə̀ berɨ fàʼ mbɨ mɨ̀mə̌d ɨchî chɔ̀m.

⁶Ɨŋgam we nɨə jwɨ rɨ ənɨ mbə mɨchû berɨ mɨə nə̀m ɨghabɨ ni mbɨ fə nùʼ ənɨ fɨ̀ŋgwaŋ. Mə kə̀b ni mbə̀ kyerɨ ɨchî nɨ wiirɨ ɨŋgam əmbɨ wə̀d jìm.

⁷Taikikùs nɨ yeʼ aŋgɔb nɨ mə̀ ghaʼi kwàʼ rɨŋgəʼ bɨrɨ gha ɨnû jìm ɨ nən ɨmbə̀ʼ əmɨ. Məd wɨə fàʼ ənɨ i fîŋ jìm. Məd yɨə bə wum aŋgɔb ə̀fàʼì ɨchî nɨ tɨə fàʼ əmbɨ Ə̀nùŋɨ̀sɨg.

⁸Mə fə tom əməd ɨ nən ɨmbə̀ʼ ənû zɔ̂, ni mbə̀ kyerɨ ɨchî nɨ tɨ yeʼe. Mə bə̀ tom əməd ni wɨ̀ timbɨ əwən.

⁹Məd wɨə yeʼe mbɨ Ònèsimùs, nɨ yeʼ aŋgɔb nɨ mə̀ ghaʼi kwàʼ rɨŋgəʼ. Məd wɨə bə̀ fàʼ ənɨ i fîŋ jìm. Məd yɨ wɨ mɔʼɔ rəbɔʼ nən. Mɨ̀mə̌d mbɔ̂ bɨrɨ gha ɨnû jìm mbe nɨ fə che əgha ɨ nən.

¹⁰Àristakùs, nɨ mə yeʼ ə nəb ndəŋ mbɨ məd wɨə chàʼrɨ̀ əwən. Mak we nɨ məd mbɨ Banabàs yeʼ bɔn tɨ ənɨ əghaŋ ə wə̀d mɔʼ wɨə bə̀ chàʼrɨ̀ əwən. (Mbɨ fə gha ɨ nən ɨmbə̀ʼ əməd. Wɨ̀ mɨ yeʼe əsɨ nən mbə̀ nɨŋ əməd ɨchî chɔ̀m.)

¹¹Yeso we nɨ mbɨə tɔŋ ənɨ Jostùs wɨə bə chàʼrɨ̀ əwən. Mbɔ̂ mei mɨ̀Jû mbe nɨ yeʼ əbɔʼ bə̂d mbe nɨə fàʼə̀ mbɨ num ɨmbə̀ʼ ənû ɨfɔ̀n ə Ŋwiə̀. Mbɨ fə kàŋ kəŋgɨ əmɨ kwàʼ ɨchî chɔ̀m.

¹²Epafràs, nɨ yeʼ wə̀d ə̀fàʼì Kristo, nɨ bə̀ yeʼ wə̀d rəbɔʼ nən wɨə chàʼrɨ̀ əwən. Ɨ wɨə kɔ̀ŋgɨ̀ ə Ŋwiə̀ kwàʼ rɨka ɨghəm jìm kɔndɨ əwən ni mbə̀ təm kàànɨ̀ bə̀ jeŋgɨ kyerɨ ɨnû jìm mbe nɨ Ŋwìə̀ kə̀bɨ.

¹³Mɔ̌ yɨə zərɨmbin ɨ bɔ ni wɨ̀ fə faʼ kwàʼ rɨ̀kǎ ɨ nən bə̀ fàʼ kwàʼ rɨ̀kǎ əmbɨ bə̂d mbe nɨ yeʼ ə Laodisià fɔrɨ ə Hirapolìs.

¹⁴Luk, nɨ yeʼ wə̀d ɨfuʼ nɨ mə̀ ghaʼi kwàʼ rɨŋgəʼ fɔrɨ ə Demàs bə̀ chàʼrɨ̀ əwən.

¹⁵Mbə naʼ mɨ ə̀chàʼrɨ̀ əmbɨ ə bɔŋgɔb mbe nɨ yeʼ ə Laodisià, əmbɨ Nimfà fɔrɨ əmbɨ ə bə̂d Kristo mbe nɨə nyɨ ɨfetɨ ɨŋga nəb məd.

¹⁶Ənɨ mbɨ fə foŋ ə̀ŋwàʼnɨ̀ zɔ̂ əkaʼ nən, mbə̀ zə ni mbɨ bə foŋ ɨŋga ɨfetɨ bə̂d Kristo we rɨ ə Laodisià. Mbə̀ bə zə ni mbə̀ foŋ ə̀ŋwàʼnɨ̀ ze nɨ nɔʼ rɨ ə Laodisià.

¹⁷Mbə̀ gha əmbɨ Akipùs ni wɨ̀ maanɨ ə̀fàʼì ze nɨ Ə̀nùŋɨ̀sɨg zɨ ɨŋga tɨkyerɨ-ɨbɔ məd.

¹⁸Àyɨə mɔ̌, Pɔ̂l ŋwàʼnɨ̀ ə̀chàʼrɨ̀ zɔ̂ ənɨ mɨ əbɔ. Mbə̀ kɔndɨ ɨchî nɨ mbɨ kod əmɨ ənɨ mɨ̀kàrə̀. Ŋwìə̀ ghɨ ɨ̀chɔ̀m ənɨ ə nən.