Read Fɨso Fi 1 Tèsàlonikà 3 Bible Online

1 Tèsàlonikà 3 - Fɨso Fi bible

1 Tèsàlonikà 3

¹Ənɨ chəi ənɨ tɨ̀ nyaʼa wò ɨmbì nyìʼ zɨ rɨ zə əwən, tɨ̀ nyaʼa ben nɨ chub ə Atèns tə̀zìʼ wa.

²Tɨ̀ nyaʼa tom wa aŋgɔb Timotì ni wɨ̀ yeʼe ghɨ tə fîŋ kaanə bə̀ tìmbɨ̀ əwən ɨchî nɨ mbə nuŋ fîŋ ɨgun ə Kristo. Məd wɨə fàʼ əmbɨ ə Ŋwiə̀ mbɨ na ɨchî nɨ tɨə ghà ɨkə̂n chɔ̀m ɨmbə̀ʼ ə Kristo.

³Tɨ̀ nyaʼa bə̀ tom əməd ɨmbə̀ʼ tɨ wə̀d mɔʼɔ bɔrɨ i ɨchî nɨ mbɨə nwèndɨ̀ tə rɨkyerɨ-ɨwu. Mbə fə kàŋ kyerɨ ə ni mbɨ berɨ nwèndɨ̀ ta rɨkyerɨ-ɨwu.

⁴Mbə kyerɨ ə ni ənɨ tɨ̀ nyaʼa mbɨ nən, tɨ̀ nyaʼə ghà ɨ nən ni mbɨ bɨrɨ nwendɨ ta rɨkyerɨ-ɨwu. Ənû ze ə fə jwɨ̀ àmei ɨchî nɨ tɨ̀ nyaʼa gha ɨ nən.

⁵À yɨ əton nɨ ɨchî nɨ chəi ənɨ tɨ mə nyaʼa wɨrɨ nyìʼ wò ɨmbì, mə nyaʼa tom ə Timotì əsɨ nən ni wɨ̀ yeʼe zə ni mbə mbɨə kɨrɨ nuŋ fîŋ ɨgun ə Kristo ə. Mə nyaʼa ghɨ̀ əne ɨmbə̀ʼ ɨghəm nɨ mə̀ wɨə nyaʼə bɔə ni ɨghə̀m ənumbɨ bə̂d fə numbɨ əwən əne ghɨ̀ ə̀fàʼì ze nɨ tɨ̀ nyaʼa faʼ ə chè ətu ə̀kǒ.

⁶Tɨ̀nîn Timotì fə bə̀ndɨ̀ yeʼe əsɨ na mbɨ ɨkə̂n chɔ̀m ɨmbə̀ʼ ɨchî nɨ mbə̀ nuŋ fîŋ ɨgun ə Kristo fɔrɨ ɨmbə̀ʼ ɨchî ni mbə̀ ghaʼ mbə bɔŋgɔb. Wɨ̀ fə ghà ɨ na ni mbə mbɨə kɔndɨ əwa ɨghəm jìm ənɨ ə fîŋ chɔ̀m bə fɔrɨ ni mbə mbɨə kəb zə əwa àmei ɨchî nɨ tɨə bə̀ kəb zə əwən.

⁷Mbɨ bɔŋgɔb, ɨchî nɨ mbə̀ nuŋ fîŋ ɨgun ə Kristo ə zɨə nəərɨ əwa ənɨ tɨə zə ɨkwɨ ŋgəʼ jìm bə̀ fɔrɨ ənɨ mbɨə nwèndɨ̀ ta rɨkyerɨ-ɨwu.

⁸Tɨ̀nîn ta fîŋ fə wɨrɨ bə̀ndɨ̀ yeʼe ɨchî nɨ mbə̀ təm kàànɨ ɨŋga ɨbenɨ we nɨ mbə̀ nuŋ ɨgun Ə̀nùŋɨ̀sɨg Yeso.

⁹Tɨ̀ kɨə kaŋ wo naʼ məben-əwe nɨ kuʼ əmbɨ Ŋwiə̀ ɨmbə̀ʼ əwən rɨ ye, ɨmbə̀ʼ chwi ɨghaʼi we nɨ tɨ̀ berɨ ɨfě a Ŋwiə̀ ɨmbə̀ʼ əwən ə?

¹⁰Tɨ̀ wɨə kɔ̀ŋgɨ̀ ə Ŋwiə̀ ənɨ ta fîŋ rɨjìm əziə mbɨ ɨzimɨ ni tɨ̀ we tɨ̀ rɨ wɨrɨ zə əwən əne ghɨ̀ mbə jeŋgɨ berɨ əghɨ ze nɨ kɨrɨ buʼ ɨchî nɨ mbə̀ nuŋ fîŋ ɨgun ə Kristo.

¹¹Tɨ̀ wɨə kɔ̀ŋgɨ̀ ə Ŋwiə̀ nɨ yeʼ à Mbǎʼ bə̀ kɔ̀ŋgɨ̀ a Ə̀nùŋɨ̀sɨg Yeso ni mbɨ ghɨ̀ əpan ə jwɨ ni tɨ̀ yeʼe əsɨ nən.

¹²Ə̀nùŋɨ̀sɨg ghɨ ni ɨghaʼi we nɨ yeʼ əkaʼ nən bə̀ fɔrɨ əkaʼ bə̂d mɨ̀jìm swi gwèə̀, àmei ɨchî nɨ wa bə̀ swi ɨgwɨ nən gwèə̀.

¹³Tɨ̀ wɨə kɔ̀ŋgɨ̀ə̀ ni wɨ̀ ghɨ tə fîŋ kaanɨ ɨmbə̀ʼ chəi ənɨ tɨ wə̀d mɔʼɔ zɨ ənû ɨgwɨ nən fɔrɨ ɨmbə̀ʼ mbə̀ chub ɨzeŋɨ zeŋɨ ɨfě Ŋwiə̀ a Mbǎʼ ənɨ a Ə̀nùŋɨ̀sɨg Yeso wɨrɨ yeʼe mbɨ mbi bə̂d.