Read Fɨso Fi 1 Tèsàlonikà 4 Bible Online

1 Tèsàlonikà 4 - Fɨso Fi bible

1 Tèsàlonikà 4

¹Mba bɔŋgɔb, ɨ wo ɨmbì, tɨ̀ nyaʼa fə chwi ɨchî nɨ tɨ̀ mbə̀ chubɨ ɨmbə̀ʼ ghɨ ni fîŋ Ŋwìə̀ bɔŋ ə. À yɨ rəsìʼ ni mbə mbɨə chub əne. Tɨ̀nîn tɨ̀ wɨə buʼ ɨbɔ bə̀ ghà ɨ nən ənɨ ɨkum Ə̀nùŋɨ̀sɨg Yeso ni mbə̀ wo ɨmbì ghɨ əne chè ɨchî nɨ mbə̀ nyaʼə bèə̀ ghɨ̀ə̀.

²Mbə fə kyerɨ ə tɨkə te nɨ Ə̀nùŋɨ̀sɨg Yeso nyaʼa naʼ ɨka ɨ na ni tɨ̀ chwi ɨ nən.

³Ənû ze nɨ Ŋwìə̀ kəbɨ yɨ ni mbə̀ chub ɨzeŋɨ zeŋɨ ɨmbə̀ʼ tɨ mbə̀ ni ə məyi kɨ̀ mbaŋə̀ əbəŋ əbəŋ.

⁴Wə̀d mɔʼ mɔʼ rəbɔʼ nən kyerɨ ɨchî nɨ yimbɨ i ɨnyod [2] ənɨ ɨnə̂njɨ̀ nɨ zeŋɨ bə̀ fɔrɨ ənɨ ɨnə̂njɨ̀ nɨ kuʼnɨ.

⁵Tɨ̀ wə̀d mɔʼɔ rəbɔʼ nən feenɨ i ənû nɨ ni əyi kɨ̀ mbaŋə̀ əku ɨchî nɨ bə̂d mbe nɨ chəi mbɨ kyerɨ ə Ŋwiə̀ ə ghɨ̀ə̀.

⁶Tɨ̀ wə̀d mɔʼɔ rəbɔʼ nən chəkɨ i fîŋ wi aŋgɔb ənɨ ənû zɔ̂. Tɨ wɨ̀ nɨŋ i ɨwi wi aŋgɔb. Ə̀nùŋɨ̀sɨg bɨrɨ chə bə̂d mbe nɨə ghɨ̀ tɨkwɨrɨ ɨnû rɨbɔ̀ŋ tɔ̂ rɨjìm, àmei ɨchî nɨ tɨ̀ nyaʼa fə gha ɨ nən bə̀ patɨ əwən.

⁷Chəi Ŋwìə̀ nyaʼa tɔŋ əwa ni tɨ̀ yeʼ mbi bə̂d ɨmbə̀ʼ ghɨ ɨnyɔɔnɨ-ɨnû. Wɨ̀ nyaʼa tɔŋ əwa yeʼ ni tɨ̀ chub ɨzeŋɨ zeŋɨ.

⁸Chəi wə̀d mɔʼɔ we nɨ ton tɨkə tɔ̂ ton wə̀d mɨ̀sɔŋɨchù, wɨ̀ ton yeʼ Ŋwiə̀ we nɨə nàʼ e Əzwî ə Zeŋɨ ɨ nən.

⁹Tɨ̀nîn chəi tɨ̀ berɨ əton nɨ wɨrɨ ŋwaʼnɨ ɨ nən ɨmbə̀ʼ ɨchî nɨ mbə̀ berɨ ghaʼ mbə bɔŋgɔb. Ŋwìə̀ ziə fə chwi ɨ nən ni mbə̀ ghaʼ bɔŋgɔb.

¹⁰À yɨ rəsìʼ ni mbə kàŋ ghaʼ mbə bɔŋgɔb mɨ̀jìm mbe nɨ yeʼ ɨŋga ɨsɨ jìm mbe rɨ ə Màsèdonià. Àyɨə tɨ̀ wɨə buʼ ɨbɔ ɨ nən, kyɨə bɔŋgɔb, ni mbə̀ wo ɨmbì ghɨ əne tɨ̀nîn chè ɨchî nɨ mbə̀ nyaʼə bèə̀ ghɨ̀ə̀.

¹¹Mbə̀ kywɨ ənywɨ ghɨ ɨnû jìm ɨmbə̀ʼ chub ənɨ əbɔrəbɔd. Tɨ mbə̀ zɨ ə mbə mɨchû ɨŋga ɨnû bə̂d cherə. Wə̀d jìm zɨ e ətu àmei ənɨ e ə̀fàʼì bə̀ fàʼ ənɨ mbi ɨbɔ ɨchî nɨ tɨ̀ nyaʼa gha ɨ nən.

¹²Mbə ghɨ əne ɨmbə̀ʼ bə̂d mbe nɨ kaʼi bə̂d Kristo wumnɨ əwən fɔrɨ ɨmbə̀ʼ tɨ mbə̀ kəb ə ni bə̂d cherə naʼ ɨghɨ mbe nɨ mbə̀ kəbɨ.

¹³Mba bɔŋgɔb, tɨ̀ kə̀b ni mbə̀ kyerɨ rəsìʼ ɨmbə̀ʼ bə̂d mbe nɨ fə kwɨ, ɨmbə̀ʼ tɨ mbə kən ə ɨghabɨ ə bə̂d nɨ chəi mbɨ nuŋ ɨkɔndɨ ni mbə bɨrɨ chubɨ mbɨ ə Ŋwiə̀.

¹⁴Tɨ̀ ben ni Yeso nyaʼa kwɨ wɨrɨ zwemə. Tɨ̀ bə̀ ben ni Ŋwìə̀ bɨrɨ wɨrɨ nɨŋ bə̂d mbe nɨ nyaʼa ben Yeso bɔŋ kwɨ ni mbɨ chub mbɨ Yeso.

¹⁵Ənû zɔ̂ nɨ tɨə ghà ɨ nən yɨ ənû nɨ Ə̀nùŋɨ̀sɨg ziə nyaʼa ghǎ. Wɨ̀ nyaʼa ghà ni ka mbà mbe nɨ yeʼ ɨkǎ ənɨ ə nyùmə̀ we nɨ Ə̀nùŋɨ̀sɨg wɨrɨ yeʼe bɨrɨ be wò a ɨmbì mbe nɨ fə kwɨ.

¹⁶Ənɨ ə nyùmə̀ we nɨ Ə̀nùŋɨ̀sɨg ziə bɨrɨ swiʼ rɨkaŋ, bə̂d bɨrɨ zu ɨŋgam ka ka, zu gɨ̂ aŋgɨrə̀ kyeŋ bə̀ zu tàŋ Ŋwìə̀. Bə̂d mbe nɨ nyaʼa ben ə Kristo bɔŋ kwɨ bɨrɨ be zwemə.

¹⁷Mbe nɨə zwemə, Ŋwìə̀ sɨ nɨŋ mba mbe nɨ yeʼ ɨkǎ nɨ sɨ buʼ ɨgwɨ ɨsɨg ni tɨ̀ wo fɔtɨ mbɨ mɨ̀mə̌d ɨŋga pàʼ əne bòmnɨ̀ mbɨ Ə̀nùŋɨ̀sɨg ɨŋga ɨfə. Əne tɨ̀ bɨrɨ sɨə chubə mbɨ Ə̀nùŋɨ̀sɨg koŋ.

¹⁸Əne mbə nəərɨ wə̀d mɔʼ mɔʼ mbɨ ɨŋgam wɔ̂.