Read Fɨso Fi 2 Tèsàlonikà 1 Bible Online

2 Tèsàlonikà 1 - Fɨso Fi bible

2 Tèsàlonikà 1

¹À yɨə mɔ̌ Pɔ̂l mbɨ Sailàs fɔrɨ ə Timotì ŋwaʼnɨ ə̀ŋwàʼnɨ̀ zɔ̂. Tɨ̀ wɨə ŋwàʼnɨ̀ ɨ nən mbə̀n bə̂d Kristo mbe nɨ yeʼ ɨŋga ɨfetɨ we rɨ ə Tèsàlonikà, nɨ mbə̀ bə yeʼ bə̂d Ŋwiə̀ a Mbǎʼ fɔrɨ bə̂d Ə̀nùŋɨ̀sɨg Yeso Kristo.

²Ŋwìə̀ Mbǎʼ mbɨ Ə̀nùŋɨ̀sɨg Yeso Kristo ghɨ ɨ̀chɔ̀m ənɨ ə nən bə̀ nàʼ əbɔrəbɔd ɨ nən.

³Mba bɔŋgɔb, tɨ̀ berɨ naʼ məben-əwe əmbɨ ə Ŋwiə̀ ɨghəm jìm ɨmbə̀ʼ əwən. Tɨ̀ berɨ ghɨ əne ɨchî nɨ zɨə kuʼnɨ, ɨmbə̀ʼ ɨghəm nɨ ə ɨbenɨ wɨə kwiə wò ɨmbì. Mbə mbɨə ghaʼə mbə bɔŋgɔb wò ɨmbì.

⁴Əne tɨ̀ wɨə goŋ ɨgɔ̂ ɨmbə̀ʼ əwən ɨŋga rɨfetɨ bə̂d Ŋwiə̀ ɨchî nɨ mbə̀ə nyìʼə̀ fɔrɨ ɨmbə̀ʼ ɨchî nɨ ə ɨbenɨ kaanɨ ənɨ mɨ̀nyùmə̀ jìm mbe nɨ mbɨə nwèndɨ̀ tə rɨkyerɨ-ɨwu fɔrɨ ənɨ mbɨə zəə ŋgəʼ.

⁵Ɨnû mbɔ̂ jìm ə chwi ni Ŋwìə̀ bɨrɨ saʼ bə̂d ɨchî nɨ kuʼnɨ. Əne Ŋwìə̀ bɨrɨ zə ni mbə kuʼ nɨ nyɨ ɨŋga ənû ɨfɔ̀n əməd. Mbə mbɨə zəə ŋgəʼ ɨmbə̀ʼ ənû ɨfɔ̀n rəŋgu ze.

⁶Ŋwìə̀ wɨə ghɨ̀ ɨnû nɨ kuʼnɨ, əne wɨ̀ bɨrɨ chə bə̂d mbe nɨə chə əwən.

⁷Wɨ̀ bɨrɨ naʼ ə̀zwììrɨ̀ əmbɨ mbə̀n mbe nɨə zəə ŋgəʼ. Wɨ̀ bɨrɨ bɨ naʼ ɨ na. Wɨ̀ bɨrɨ ghɨ̀ əne ənɨ ə nyùmə̀ we nɨ Ə̀nùŋɨ̀sɨg Yeso bɨrɨ swiʼ rɨkaŋ mbɨ mbi mbɨ̀aŋgɨrə̀ nɨ berɨ ɨka.

⁸Wɨ̀ bɨrɨ swiʼi mbɨ ɨwid nɨə berɨə, pè zɨ̀ ŋgəʼ ɨgun ə bə̂d mbe nɨ chəi mbɨ kyerɨ ə Ŋwiə̀, zɨ̀ ɨgun mbe nɨ ton nɨ wumnɨ əməd bə̀ zɨ̀ ɨgun mbe nɨ chəi mbɨə ghɨ̀ ɨnû mbe nɨ yeʼ ɨŋga ɨkə̂n chɔ̀m a Ə̀nùŋɨ̀sɨg Yeso.

⁹Ŋwìə̀ bɨrɨ zɨ ŋgəʼ ɨgwɨ mɨ̀mə̌d, bə̀ ghɨ̀ ni ŋgəʼ ze chə mɨ̀mə̌d koŋ. Wɨ̀ bɨrɨ chɨ mɨ̀mə̌d rɨ ɨfě Ə̀nùŋɨ̀sɨg Yeso. Chəi mbɨ bɨrɨ bɨ nyɨ ɨŋga ɨwumnɨ məd we nɨ kaŋ dabə.

¹⁰Ɨgwɨ əni ze nɨ wɨ̀ bɨrɨ yeʼe, bə̂d məd bɨrɨ yiirɨ, bə̂d mɨjìm mbe nɨ ben əməd bə̀ nàʼ ɨwumnɨ ɨ bɔ. Mbə̀n bə bɨrɨ yeʼ əbɔʼ mɨ̀mə̌d, ɨmbə̀ʼ ɨghəm nɨ mbə̀ ben ənû ze nɨ tɨ̀ nyaʼə ghà ɨ nən.

¹¹Əne tɨ̀ wɨə kɔ̀ŋgɨ̀ a Ŋwiə̀ ɨghəm jìm ni wɨ̀ ghɨ̀ mbə̀ kuʼ nɨ chub ɨchî nɨ wɨ̀ nyaʼa tɔŋ əwən ni mbə̀ chubɨ. Tɨ̀ wɨə bə̀ kɔ̀ŋgɨ̀ə̀ ni ənjìm ɨka məd, mbə mbe tɨ̀ mbə ghɨ̀ ɨ̀chɔ̀m we nɨ mbə̀ kəb nɨ ghɨ, bə̀ màànɨ̀ ə̀fàʼì ze nɨ ɨbenɨ ghɨ ni mbə̀ faʼa.

¹²Tɨ̀ wɨə kɔ̀ŋgɨ̀ ə Ŋwiə̀ ni bə̂d wumnɨ Ə̀nùŋɨ̀sɨg Yeso ɨmbə̀ʼ əwən. Tɨ̀ wɨə bə̀ kɔ̀ŋgɨ̀ə̀ ni bə̂d bə wumnɨ əwən. Ənû zɔ̂ ə bɨrɨ ghɨ̀ ɨmbə̀ʼ ɨghəm nɨ a Ŋwiə̀ mbɨ Ə̀nùŋɨ̀sɨg Yeso Kristo mbɨə ghɨ̀ ɨ̀chɔ̀m ənɨ ə nən.