Read Fɨso Fi 2 Tèsàlonikà 3 Bible Online

2 Tèsàlonikà 3 - Fɨso Fi bible

2 Tèsàlonikà 3

¹Mba bɔŋgɔb, ɨ wo ɨmbì, mbə̀ kɔŋgɨ ə Ŋwiə̀ ɨgwɨ na ni ɨkə̂n chɔ̀m ɨmbə̀ʼ Ə̀nùŋɨ̀sɨg zambɨ kɨə jàŋə̀ wo ɨmbì, bə̂d zu benɨ bə̀ wumnɨ, àmei ɨchî nɨ mbə̀ nyaʼa zu benɨ bə̀ wumnɨ.

²Mbə̀ kɔŋgɨ ə Ŋwiə̀ ni wɨ̀ chɨ əwa rɨŋga rɨkyerɨ-ɨbɔ bə̂d nɨə ghɨ̀ ɨzɨg bə̀ chɨ̀ rɨŋga rɨkyerɨ-ɨbɔ bə̂d ɨnû rɨbɔ̀ŋ, ɨmbə̀ʼ ɨghəm nɨ kaʼi bə̂d mɨjìm ben ə Yeso Kristo.

³Àyɨə Ə̀nùŋɨ̀sɨg Yeso wɨə ghɨ̀ ɨnû mbe nɨ wɨ̀ kaʼi. Wɨ̀ bɨrɨ ghɨ tə fîŋ kaanə bə̀ kən əwən rɨ əmbɨ Satàn Wə̀d Ɨnû Rɨbɔ̀ŋ.

⁴Ə̀nùŋɨ̀sɨg ə fə ghɨ̀ ni tɨ̀ nuŋ ta fîŋ ɨgwɨ nən ɨchî nɨ mbə̀ə ghɨ̀ə̀ bə̀ kɨrɨ wò ɨmbì ghɨ̀ ɨnû mbe nɨ tɨ̀ gha ɨ nən.

⁵Ə̀nùŋɨ̀sɨg ghɨ ni mbə̀ jeŋgɨ kyerɨ ɨchî nɨ Ŋwìə̀ ghaʼ əwən, bə̀ ghɨ̀ ni mbə nyiʼ ənɨ bə̂d ə nwèndɨ̀ tə rɨkyerɨ-ɨwu àmei ɨchî nɨ Kristo ziə nyaʼa bə nyìʼ.

⁶Mba bɔŋgɔb, tɨ̀ wɨə ghà ɨ nən ənɨ ɨkum Ə̀nùŋɨ̀sɨg Yeso Kristo ni tɨ mbə̀ jɨgnɨ ə mbɨ ə bə̂d Kristo mbe nɨə ghɨ̀ ɨgwed, nɨ chəi mbɨə beenɨ əbɔʼ rɨkə te nɨ tɨ̀ nyaʼa naʼ ɨ nən.

⁷Mbə fə kyerɨ ə kwàʼ ɨchî chɔ̀m ni mbə berɨ fàʼ àmei ɨchî nɨ tɨ̀ nyaʼə fàʼə̀. Chəi tɨ̀ nyaʼə ghɨ̀ ɨgwed ənɨ tɨ̀ nyaʼa mbɨ nən.

⁸Chəi tɨ̀ nyaʼa jɨg tɨjɨg wə̀d mɔʼɔ nɨ chəi tɨ̀ nyaʼa chwɨ. Tɨ̀ wɨə nyaʼə fàʼə̀ kwàʼ rɨkǎ əziə mbɨ ɨzimɨ ɨmbə̀ʼ tɨ rɨ̀ chə a wə̀d mɔʼɔ rəbɔʼ nən.

⁹Tɨ̀ wɨə nyaʼə ghɨ̀ əne, kaʼi ɨmbə̀ʼ ɨghəm nɨ chəi tɨ̀ nyaʼa berɨ ɨka we nɨ biirɨ ə̀wèèrɨ̀ rɨ nən. Tɨ̀ wɨə nyaʼə ghɨ̀ əne ɨmbə̀ʼ mbə̀ faʼ àmei ɨchî nɨ mbə̀ nyaʼa zə ənɨ tɨə fàʼə̀.

¹⁰Ka àbei ənɨ tɨ̀ nyaʼa mbɨ nən, tɨ̀ wɨə nyaʼə ghà ɨ nən ni, “Wə̀d mɔʼɔ mɨ ton ni ka tə bɨrɨ faʼ i, tɨ wɨ̀ bɨ jɨg i.”

¹¹Tɨ̀ wɨə ghà əne ɨmbə̀ʼ ɨghəm nɨ mbɨ fə ghà ɨ na ni bə̂d mɔʼɔ rəbɔʼ nən yɨ mɨgwed. Mbɨ yɨ mbɨ-aŋganyiʼ, nɨ chəi mbɨə fàʼ əghɨ ə mɔʼɔ.

¹²Tɨ̀ wɨə ghà əmbɨ tɨkwɨrɨ bə̂d tɔ̂ bə̀ kəərɨə mɨ̀mə̌d ənɨ ɨkum Ə̀nùŋɨ̀sɨg Yeso Kristo ni mbɨ nyeʼ chubɨ fàʼ mbə ɨ̀fàʼì bə̀ berɨ əghɨ nɨ ni ə ɨnyod əŋgu.

¹³Mba bɔŋgɔb, tɨ mbə̀ bɔd ə nɨ ghɨ ɨnû nɨ kuʼnɨ.

¹⁴Wə̀d mɔʼɔ mɨ ton i nɨ zuunɨ ɨnû mbe nɨ tɨ̀ ŋwaʼnɨ ɨŋga ə̀ŋwàʼnɨ̀ zɔ̂, mbə̀ nweenɨ əməd. Tɨ mbə̀ berɨ ə ənû ə mɔʼɔ nɨ ghɨ mbɨ məd, ɨmbə̀ʼ ətu ə nid ɨ bɔ.

¹⁵Tɨ mbə̀ nɨŋ əməd ɨghabɨ ni à yɨə wə̀d pə̀n, àyɨə mbə̀ patɨ əməd ɨchî nɨ mbə̀ə patɨ aŋgɔb nɨ ben ə Kristo.

¹⁶Ə̀nùŋɨ̀sɨg ziə nɨə nàʼ əbɔrəbɔd, naʼ əbɔrəbɔd ɨ nən ənɨ mɨ̀nyùmə̀ jìm bə̀ fɔrɨ ənɨ mɨnə̂njɨ̀ jìm. Ə̀nùŋɨ̀sɨg chubɨ mbɨ mbə̀n mɨjìm.

¹⁷À yɨə mɔ̌ Pɔ̂l ŋwaʼnɨ ə̀chàʼrɨ̀ zɔ̂ ənɨ mɨ əbɔ. Əzɔ̂ yɨ ənweenɨ nɨ mɨə zɨ ɨgun ɨ̀ŋwàʼnɨ̀ jìm mbe nɨ mɨə ŋwàʼnɨ̀ə̀. Əzɔ̂ yɨ mɨ əbɔ ə̀ŋwàʼnɨ̀.

¹⁸A Ə̀nùŋɨ̀sɨg Yeso Kristo ghɨ ɨ̀chɔ̀m ənɨ mbə̀n mɨjìm.