Read Fɨso Fi 1 Timotì 1 Bible Online

1 Timotì 1 - Fɨso Fi bible

1 Timotì 1

¹À yɨə mɔ̌ Pɔ̂l ŋwaʼnɨ ə̀ŋwàʼnɨ̀ zɔ̂. Mə yɨə wə̀d tom Kristo Yeso ɨchî nɨ Ŋwìə̀ we nɨə chɨ̀ əwa rəŋgəʼ mbɨ Kristo Yeso we nɨ tɨ̀ nuŋ ta rɨkɔndɨ ɨgwɨ məd gha.

²Mə wɨə ŋwàʼnɨ̀ ɨ ne àwɔ̀ Timotì, nɨ à yeʼ mɨ wan rəsìʼ ɨchî nɨ tɨ̀ ben ə Kristo. Ŋwìə̀ Mbǎʼ mbɨ Kristo Yeso a Ə̀nùŋɨ̀sɨg ghɨ ɨ̀chɔ̀m ənɨ ə ne, dììrɨ̀ əwe bə̀ nàʼ əbɔrəbɔd ɨ ne.

³Mə yì ghà ɨ ne àmei ɨchî nɨ mə nyaʼa be ghà bɔŋ sɨə wò ə Màsèdonià ni à chub ə Efesùs. Bə̂d mɔʼɔ mbɨ əŋgu nɨə chwi ɨnû cherə, əne mə kə̀b ni à təmnɨ mɨ̀mə̌d.

⁴Gha əmbɨ mɨ̀mə̌d ni tɨ mbɨ wɨrɨə gha ə tɨpoʼ əko mbɨ ənû ɨmbə̀ʼ tɨwaŋ bə̂d nɨ chəi ɨnwǐ. Ɨnû mbɔ̂ mbɨə ghɨ̀ə̀ ni bə̂d taŋ ə. Chəi tàŋ ə ghɨ̀ ni bə̂d ghɨ ɨnû mbe nɨ Ŋwìə̀ kəbɨ. Bə̂d bɨrɨ kyerɨ ɨnû mbe nɨ Ŋwìə̀ kəbɨ àmei ənjìm ɨbenɨ.

⁵Əton nɨ mə gha ənû zɔ̂ ɨ ne yɨ ni bə̂d Kristo berɨ ghaʼ əwən mbənə mbənə. Ɨghaʼi we berɨ jwɨ rɨŋga fîŋ nɨ zeŋɨ, rɨŋga fîŋ nɨ chəi ɨnû rɨbɔ̀ŋ ɨŋga bə̀ fɔrɨ rɨŋga ɨbenɨ we nɨ yeʼ wɨ rəsìʼ.

⁶Bə̂d mɔʼɔ fə waʼ ɨnû mbe nɨ mbɨ berɨ nɨ ghà. Əne mbɨ fə bèŋ sɨə ghàə̀ yeʼ mɨŋgam əko.

⁷Mbɨ nyaʼa kə̀b ni njɨ mbə mbɨə chwiə tɨkə rɨ Mose, àyɨə chəi mbɨ nyaʼa kyerɨ ɨnû mbe nɨ mbɨ nyaʼə ghàə̀, kɨ̀ mbe nɨ mbɨ nyaʼa bə̀ ghàə̀ ni mbə kyerɨ.

⁸Tɨ̀ kyerɨ ni tɨkə ə bɔ̀ŋ əwù ze nɨ mbɨ faʼ mbɨ rɨwən ənɨ ɨnə̂njɨ̀ nɨ kuʼnɨ.

⁹Tɨ̀ bə̀ kyerɨ ni chəi Ŋwiə̀ nyaʼa naʼ rɨkə ɨmbə̀ʼ bə̂d mbe nɨə ghɨ̀ ɨnû nɨ kuʼnɨ. Wɨ̀ nyaʼa nàʼ yeʼ ɨmbə̀ʼ mbe nɨə gù rɨkə fɔrɨ əmbɨ mbe nɨ chəi mbɨə zuunɨ əməd. Wɨ̀ nyaʼa nàʼ ɨmbə̀ʼ mbe nɨ chəi mbɨə wumnɨ əməd bə̀ nàʼ ɨmbə̀ʼ mbe nɨə ghɨ̀ ɨnû rɨbɔ̀ŋ. Wɨ̀ nyaʼa nàʼ ɨmbə̀ʼ mbe nɨ chəi mbɨ zeŋ ɨfě məd bə̀ nàʼ ɨmbə̀ʼ mbe nɨə tə̀ə̀nɨ̀ ənû ə Ŋwiə̀. Wɨ̀ nyaʼa nàʼ ɨmbə̀ʼ mbe nɨə zwiirɨə mbə mɨ̀mbǎʼ mbɨ mbə mɨ̀nɨ̌ŋ, ɨmbə̀ʼ mbe nɨə zwiirɨə mbɨ cherə,

¹⁰ɨmbə̀ʼ mbe nɨə ghɨ̀ ɨfabrɨ-ɨnû, ɨmbə̀ʼ mbaŋə̀ te nɨə niə mbaŋə̀ rɨ cherə, ɨmbə̀ʼ mbe nɨə gywɨ̀ə̀ bə̂d wo fèndɨ̀ə̀, ɨmbə̀ʼ mbe nɨə ghà mɨghab, ɨmbə̀ʼ mbe nɨə nɔ gû àyɨə ɨ mbɨə kɨrɨ ghà mɨghab. Wɨ̀ nyaʼa bə̀ nàʼ ɨmbə̀ʼ mbe nɨə ghɨ̀ ɨnû cherə mbe nɨ chəi mbɨ kuʼnɨ mbɨ mbe nɨ bə̂d Ŋwiə̀ ə chwiə.

¹¹Tɨ̀ we tɨ̀ rɨ̀ zə ɨnû mbɔ̂ ɨŋga ɨkə̂n chɔ̀m we nɨ Ŋwiə̀ zɨ ɨŋga tum rɨkyerɨ-ɨbɔ. Məd yɨə Ŋwìə̀ we nɨ bə̂d ə yiirɨə bə̀ wumnɨə.

¹²Mə wɨə nàʼə̀ məben-əwe əmbɨ Kristo Yeso a Ə̀nùŋɨ̀sɨg. Wɨ̀ fə nàʼ ɨka ɨ num ɨmbə̀ʼ ɨghəm nɨ wɨ̀ fə neŋ əmɨ zə ni ɨ we tɨ̀ wɨ̀ zɨ̀ i fîŋ ɨgwɨ num. Əne wɨ̀ nyaʼa chɔʼ əmɨ ni mə faʼ ɨ bɔ.

¹³Ka à bè yeʼi ni mə wɨə nyaʼə ghà ɨnû rɨbɔ̀ŋ ɨgwɨ məd, nwèndɨ̀ə̀ tɨkyerɨ-ɨwu bə̂d mbe nɨ nyaʼə beenɨ əbɔʼ məd bə̀ zɔ̀m əməd, àyɨə wɨ̀ nyaʼa dììrɨ̀ əmɨ ɨmbə̀ʼ ɨghəm nɨ chəi mə nyaʼa kyerɨ ənû ze nɨ mə nyaʼə ghɨ̀ə̀. Wɨ̀ nyaʼa bə̀ dììrɨ̀ əmɨ ɨmbə̀ʼ ɨchî nɨ chəi mə̀ nyaʼa bə kɨrɨ ben əməd.

¹⁴À Ə̀nùŋɨ̀sɨg nyaʼa ghɨ̀ ɨ̀chɔ̀m ənɨ ə num wɨ swi sɨə gwèə̀. Wɨ̀ nyaʼa bə̀ nàʼ ɨbenɨ ɨ num bə̀ ghɨ̀ ni ɨghaʼi swi ɨŋga mɨ fîŋ ɨchî nɨ mə̀ yeʼ ənɨ ɨfɔtɨ mbɨ Kristo Yeso.

¹⁵Ɨŋgam wɔ̂ yɨ wɨ rəsìʼ nɨ kuʼ ni tɨ̀ ben ənɨ ta fîŋ rɨjìm. Ɨŋgam rəŋgu yɨ ni Kristo Yeso nyaʼa yeʼe ɨŋga ɨsɨg ɨmbə̀ʼ chɨ bə̂d mbe nɨə ghɨ̀ ɨnû rɨbɔ̀ŋ rəŋgəʼ. Mɔ̌ yɨə kàŋ ə wə̀d ɨnû rɨbɔ̀ŋ we nɨ bə̌ chè bə̂d mɨjìm mbe nɨə ghɨ̀ ɨnû rɨbɔ̀ŋ.

¹⁶Àyɨə Ŋwìə̀ nyaʼa dììrɨ̀ əmɨ ɨmbə̀ʼ Kristo Yeso chwi ɨchî nɨ wɨ̀ kaŋ jeŋgɨ yim fîŋ ɨmbə̀ʼ əmɨ, mɔ̌ we nɨ yeʼ wə̀d ɨnû rɨbɔ̀ŋ nɨ bə̌ chè mbɨ mɨjìm. Wɨ̀ nyaʼa ghɨ̀ əne ɨmbə̀ʼ mə yeʼ ənweenɨ əmbɨ ə bə̂d mɨjìm mbe nɨ bɨrɨ nɨ ben əməd əne jɨg ɨ̀tènɨ̀ rɨ mì.

¹⁷Bə̂d wumnɨ bə̀ yiirɨ Ɨfɔ̂n we nɨ ten i koŋ, nɨ chəi wɨ̀ bɨrɨ nɔ kwɨ, nɨ chəi bə̂d ə zə əməd, nɨ yeʼ àmei we mɔʼ koŋ koŋ. À yɨ əne.

¹⁸Mə ghà ɨ ne, àwɔ̀ Timotì mɨ wan, ni à ghɨ ɨnû mbɔ̂ beenɨ əbɔʼ mbe nɨ wə̀d ɨ̀kə̀n Ŋwìə̀ nyaʼa ghǎ ɨmbə̀ʼ əwe. À mɨ beenɨ əbɔʼ ɨnû mbe, à we tɨ̀ à zɔ̀ŋ ɨchî nɨ kuʼnɨ ɨmbə̀ʼ ɨkə̂n chɔ̀m we nɨ yeʼ wɨ rəsìʼ.

¹⁹Ənɨ àwɔ̀ ə ghɨ̀ə̀ əne, à berɨ yim e ɨbenɨ wɨ kaanə bə̀ berɨ fîŋ nɨ zeŋɨ. Ɨchî nɨ chəi bə̂d mɔʼɔ ə zwetɨ ɨnû mbe nɨ fîŋ tɨ mɨ̀mə̌d ə ghàə̀, mbɨ fə nimnɨ ɨbenɨ we nɨ mbɨ nyaʼa berɨ.

²⁰Mbɨ mɔʼɔ rəbɔʼ mɨ̀mə̌d yɨə Haimenaùs mbɨ Àlèzandà. Mə fə sàŋ mɨ̀mə̌d ɨŋga tɨkyerɨ-ɨbɔ Satàn ɨmbə̀ʼ mbɨ kwembɨ ni zɨ rɨka bɔŋ i nɨ gha ɨŋgam rɨbɔ̀ŋ ɨmbə̀ʼ ə Ŋwiə̀.