Read Fɨso Fi 1 Timotì 2 Bible Online

1 Timotì 2 - Fɨso Fi bible

1 Timotì 2

¹Ənû rɨtu yɨ ni mə wɨə buʼ ɨbɔ ni mbə̀ nɔn ɨghɨ rɨ əmbɨ ə Ŋwiə̀, kɔ̀ŋgɨ̀ əməd, biirɨ ɨghɨ bə̀ nàʼ məben-əwe ɨ bɔ ɨgwɨ ətu ə wə̀d jìm.

²Mbə̀ ghɨ əne ɨgwɨ ətu mɨfɔ̀n bə̀ fɔrɨ ɨgwɨ ətu ə bə̂d mɨ̀jìm mbe nɨə tùmbɨ̀ə̀ bə̂d, ɨmbə̀ʼ tɨ̀ nyeʼ bɔtɨ chubɨ bə̀ chub ənɨ əbɔrəbɔd, əne nàʼ ɨwumnɨ əmbɨ ə Ŋwiə̀ ənɨ tɨkwɨrɨ ɨnə̂njɨ̀ jìm bə̀ fɔrɨ ni tɨ̀ ghɨ̀ ɨnû nɨ kuʼnɨ.

³Ənû nɨ kɔŋgɨ ə Ŋwiə̀ ɨgwɨ ətu ə bə̂d mɨjìm ə kàŋ bɔ̀ŋ. Ŋwiə̀ ziə nɨə chɨ̀ əwa rəŋgəʼ ə ben ni zɨə bɔ̀ŋ.

⁴Məd ə kə̀b ni wə̀d jìm kyerɨ rəsìʼ ɨmbə̀ʼ jwɨ rəŋgəʼ.

⁵Ŋwìə̀ mei we mɔʼ. Wə̀d we nɨ yeʼ ɨŋga mɨgharə̀, maanɨə taŋ ze nɨ Ŋwiə̀ berɨ mbɨ ə bə̂d mei we mɔʼ. Təŋgàŋ yɨə Kristo Yeso.

⁶Wɨ̀ nyaʼa nàʼ i ɨnyod ənɨ əghɨ ə̀fà ɨmbə̀ʼ choʼ ɨtu bə̂d mɨjìm. Əzɔ̂ yɨ ənweenɨ ni ənɨ ə nyùmə̀ nyaʼa kuʼu, Ŋwiə̀ nyaʼa kə̀b ni bə̂d mɨ̀jìm jwɨ rəŋgəʼ.

⁷À yɨ ɨmbə̀ʼ ənû zɔ̂ nɨ Kristo nyaʼa chɔʼ əmɨ ni mə̀ gha ɨŋgam Ŋwiə̀, bə̀ yeʼ wə̀d tom, bə̀ yeʼ wə̀d nɨə chwi ɨnû ɨmbə̀ʼ ɨbenɨ mbɨ we nɨə chwi rəsìʼ ɨmbə̀ʼ Kristo əmbɨ bə̂d mbe nɨ kaʼi mɨ̀Jû. Chəi mɨə ghàə̀ mɨghab. Mə wɨə ghàə̀ yeʼ rəsìʼ.

⁸Mə kə̀b ni ɨsɨ jìm mbe nɨ bə̂d fetɨ əŋgu ɨ wumnɨ ə Ŋwiə̀, mbaŋə̀ te nɨ zeŋɨ nɔɔrɨ ɨbɔ kɔŋgɨ ə Ŋwiə̀. Mbɨ berɨ ghɨ əne nɨ chəi mbɨə sə ɨtəm bə̀ fɔrɨ ənɨ chəi mbɨə tàŋə̀.

⁹Mə bə kə̀b ni məyi yèʼ ɨnyod ɨchî nɨ kuʼnɨ. Mbɨ zɨ ngywɨ̌ te nɨ kuʼnɨ ɨfě bə̂d cherə. Tɨ mbɨ baʼ ə mbə ɨtu zɨ ɨ̀yèʼè ɨgun kɨ̀ bè tìŋ ɨghɨ mbe nɨ mbɨ tekɨ ənɨ ə gôl kɨ̀ ənɨ ə pə̂l. Tɨ mbɨ zɨ ə ngywɨ̌ əka ɨnun.

¹⁰Mbɨ yèʼ ə ɨnyod yeʼ ənɨ ɨnû chɔ̀m mbe nɨ mbɨə ghɨ̀ə̀, nɨ yeʼ ɨnû mbe nɨ məyi mbe nɨ gha ni mbə mbɨə wumnɨ ə Ŋwiə̀ ə ghɨ̀ə̀.

¹¹Məyi berɨ kwembɨ ɨnû rəziə rəziə mbɨ ɨwumnɨ jìm.

¹²Chəi mə̀ ben ni əyi mɔʼɔ chwi ənû kɨ̀ ni əyi tumbɨ mbaŋə̀. Wɨ berɨ kəm rəziə ənɨ mbɨə chwi ɨnû.

¹³Əton yɨ ni Ŋwiə̀ nyaʼa bè tekɨ Adàm bɔŋ wɨ̀ nyaʼa sɨə tekɨ ə Efà.

¹⁴Chəi Satàn nyaʼa tambɨ ə Adàm. Wɨ̀ nyaʼa tambɨ yeʼ əyi we. Əne əyi we nyaʼa beŋ ənɨ ə wə̀d rɨtu nɨ nyaʼa gu ɨkə Ŋwiə̀.

¹⁵Àyɨə Ŋwìə̀ bɨrɨ chɨ əyi rəŋgəʼ ənjìm ɨchî nɨ wɨə gywɨə bɔn, əwù ze nɨ wɨ wò ɨmbì nùŋ i ɨbenɨ, ghaʼ bə̂d, chub ɨzeŋɨ zeŋɨ bə̀ ghɨ̀ ɨnû ɨnə̂njɨ̀ nɨ kuʼnɨ.