Read Fɨso Fi 1 Timotì 5 Bible Online

1 Timotì 5 - Fɨso Fi bible

1 Timotì 5

¹Tɨrə̀ gham e əbɔʼ mbaŋə̀ te nɨ fə nunɨ chè əwe, àyɨə kəərɨ mɨ̀mə̌d ɨghabɨ ni mbɨ yɨ mbe mɨ̀mbǎʼ. Ghɨ mbɨ ə bɔn ɨjɔŋ ɨghabɨ ni mbɨ yɨ mbe bɔŋgɔb.

²Ghɨ mbɨ məyi mbe nɨ fə nunɨ chè əwe ɨghabɨ ni mbɨ yɨ mbe mɨ̀nɨ̌ŋ. Ghɨ ɨnû ɨzeŋɨ zeŋɨ mbɨ mɨkwirɨ ɨghabɨ ni mbɨ yɨ te njàbɨ.

³Wumnɨ mɨku əyi mbe nɨ chəi wə̀d ə nəŋgɨ mɨ̀mə̌d.

⁴Àyɨə ɨku əyi mɨ berɨ bɔn kɨ̀ wɨ̀ mɨ berɨ bɔn bɔn, bɔn mbe kɨ̀ bɔn bɔn mbe berɨ be kwembɨ ɨchî nɨ ghɨ ənû ze nɨ ənû ə Ŋwiə̀ ə kəb ni mbɨ ghɨ ənɨ ɨnəbɨ mɨ̀mə̌d, əne wi ɨchî nɨ mɨ̀mbǎʼ mɨ̀mə̌d mbɨ mɨ̀mbǎʼ kyeŋ mɨ̀mə̌d nyaʼə nəŋgɨ mɨ̀mə̌d. Mbɨ ghɨ əne ɨmbə̀ʼ ɨghəm nɨ əzɔ̂ ə bɔ̀ŋ əmbɨ ə Ŋwiə̀.

⁵Ɨku əyi we nɨ chəi wə̀d nɨə nəŋgɨ əməd, nɨ yeʼ tə̀zìʼ wi, fə nùŋ ti rɨkɔndɨ ɨgun ə Ŋwiə̀. Ɨ wɨə wò ɨmbì nɔn ɨnû rɨ əmbɨ ə Ŋwiə̀ bə̀ kɔ̀ŋgɨ̀ əməd ɨzimɨ mbɨ əziə.

⁶Àyɨə ɨku əyi we nɨə jɨg ɨsɨg fə kwɨ, ka à bè yeʼi ni ɨ wɨə kɨrɨ ɨkǎ.

⁷Gha ɨnû mbɔ̂ nɨ mə gha ɨ ne, ɨmbə̀ʼ kɨ wə̀d mɔʼɔ ghà i ənû rɨbɔ̀ŋ ə mɔʼɔ ɨgwɨ mɨ̀mə̌d.

⁸Wə̀d mɨ ton nɨ nəŋgɨ mbi ɨfurɨ, màànɨ̀ mbe nɨ yeʼ ɨnəbɨ məd, əne wɨ̀ fə waʼ i ɨbenɨ. Wɨ̀ fə bə̂ chè wə̀d we nɨ chəi wɨ̀ ben ə Kristo.

⁹Tɨrə̀ ŋwaʼnɨ e ɨkum ɨku əyi əbɔʼ rɨkum mɨku əyi mbe nɨ tɨ̀ mbɨ wèèrɨ̀, kɨrɨ ənɨ wɨ̀ fə pe ɨghəm ɨwu ɨwum rɨ̀fuə. Wɨ̀ berɨ yeʼ ɨku əyi nɨ nyaʼa nam àmei ɨnom mɔʼ.

¹⁰Bə̂d berɨ kyerɨ əməd ɨmbə̀ʼ ɨnû chɔ̀m mbe nɨ wɨə ghɨ̀ə̀, ɨghabɨ ɨchî nɨ wɨə nìə̀ bɔn ɨchî chɔ̀m, ɨchî nɨ wɨə nɨŋə bə̂d əkwɨ ni, ɨchî nɨ wɨə sò ɨwu bə̂d Ŋwiə̀ [3] ɨchî nɨ wɨə weerɨ bə̂d mbe nɨ yeʼ ə ŋgəʼ mbɨ ɨchî nɨ wɨə nàʼ i ɨnyod nɨ ghɨ ɨnû chɔ̀m ənɨ tɨkwɨrɨ ɨnə̂njɨ̀ jìm.

¹¹Tɨrə̀ ŋwaʼnɨ e rɨkum mɨku əyi mbe nɨ chəi mbɨ kɨrɨ pè ɨghəm ɨwu ɨwum rɨ̀fuə, ɨmbə̀ʼ ɨghəm nɨ ɨnû mbe nɨ nyamnyod tɨ mɨ̀mə̌d ə feenɨə bɨrɨ ghɨ̀ ni mbɨ kəb nɨ wɨrɨ nam, əne waʼ ənû nɨ faʼ əmbɨ Kristo.

¹²Mbɨ mɨ tɔ ghɨ̀ əne, Ŋwìə̀ bɨrɨ saʼ mɨ̀mə̌d ɨmbə̀ʼ ɨghəm nɨ mbɨ fə waʼ ənû ze nɨ mbɨ nyaʼa fə be kàʼ.

¹³Kaʼ àmei əze, mbɨ bɨrɨ kwembɨ ənû nɨ kɔ ghɨ ɨgwed. Mbɨ bɨrɨ bə̀ kɔ ghanə nyɨrə nəb. Kaʼ àmei ənû nɨ ghɨ ɨgwed, mbɨ bɨrɨ kɔ ghanə ghɨ̀ mɨniə bə̀ kɔ zɨ ɨchû ɨŋga ɨnû mbe nɨ chəi mbɨ de mɨ̀mə̌d. Mbɨ bɨrɨ bə̀ kɔ ghà ɨnû nɨ chəi mbɨ berɨ nɨ ghà.

¹⁴Əne mə wɨə kəərɨə mɨku əyi mbe nɨ chəi mbɨ kɨrɨ nunə ni mbɨ wɨrɨ nam, gywɨ bɔn, nəŋgɨ bə̂d mbe nɨ yeʼ ɨŋga nəb tɨ mɨ̀mə̌d, ɨmbə̀ʼ tɨ bə̂d pə̀n berɨ ə əpan nɨ gha ɨnû rɨbɔ̀ŋ ɨgwɨ na,

¹⁵ɨmbə̀ʼ ɨghəm nɨ mɨku əyi mɔʼɔ fə fèbə̀ sɨə beenɨ əbɔʼ Satàn.

¹⁶Əyi we nɨ ben ə Kristo mɨ berɨ mbi ɨfurɨ mɔʼɔ nɨ yeʼ mɨku əyi, wɨ̀ berɨ weerɨ mɨ̀mə̌d. Tɨ wɨ̀ saŋ i ni ɨfetɨ bə̂d Kristo beʼ ɨkom we, ɨmbə̀ʼ ɨfetɨ we weerɨ yeʼ mɨku əyi mbe nɨ chəi bə̂d nɨ tɨ mbɨ weerɨ mɨ̀mə̌d.

¹⁷Zə ni mbɨ naʼ ɨwumnɨ əmbɨ ə bə̂d mbe nɨə chà ɨfetɨ bə̂d Kristo bə̀ jeŋgɨ chɔʼ ə̀fàʼì mɨ̀mə̌d, maanɨ mbe nɨə fàʼ rɨkǎ nɨ ghà ɨŋgam Ŋwiə̀ bə̀ fɔrɨ ni chwi ɨnû ɨmbə̀ʼ ə Kristo.

¹⁸Ə zɨ ɨŋga Ə̀ŋwàʼnɨ̀ ə Ŋwiə̀ ni, “Tɨrə̀ kod e ɨchû rɨkun ni tɨ zɨ kud i kywɨ ənɨ zɨə tə̀ʼrɨ̀ə̀ kywɨ̀ kwètɨ̀ə̀,” [4] mbɨ ni, “Mbɨ berɨ chwɨ wə̀d ə̀fàʼì.”

¹⁹Tɨrə̀ ben e ni mbɨ zɨ ɨsaʼi ɨgun ə wə̀d mɔʼɔ rəbɔʼ mbe nɨə chà ɨfetɨ, kɨrɨ ənɨ bə̂d mɨbe kɨ̀ bə̂d mɨ̀tad yeʼe mbɨ ɨsaʼi we ɨghabɨ mɨ̀zərɨmbin.

²⁰Bə̂d mɔʼɔ mɨ yeʼə ghɨ̀ ɨnû rɨbɔ̀ŋ nɨ chəi mbɨ ben nɨ beŋ tə fîŋ, ghàm əbɔʼ mɨ̀mə̌d ɨfě bə̂d Kristo mɨ̀jìm, ɨmbə̀ʼ ə̀bùʼ ə bə̂d bɔ nɨ wɨrɨ ghɨ ɨnû rɨbɔ̀ŋ.

²¹Mə wɨə ghà ɨ ne ɨfě Ŋwiə̀, ɨfě Kristo Yeso bə̀ fɔrɨ ɨfě mbɨ̀aŋgɨrə̀ mbe nɨ Ŋwìə̀ chɔʼɔ ni à nuŋ tɨkə tɔ̂ nɨ mə naʼ ɨ ne zɨ rɨ ghɨ ɨghə, kɨ̀ nɨ chwiə ni à ghaʼ wə̀d mɔʼɔ.

²²Tɨrə̀ kɨə zàmbɨ̀ə̀ zab e mbe ɨbɔ ɨgun ə bə̂d ənɨ àwɔ̀ ə zɔʼə mɨ̀mə̌d ənɨ ə bə̂d nɨə chà ɨfetɨ. Tɨrə̀ zɨ e əbɔ ɨŋga ɨnû rɨbɔ̀ŋ bə̂d cherə. Nuŋ e ɨnyod ni wɨ chub ɨzeŋɨ zeŋɨ.

²³Tɨrə̀ bə̀ nɔ e àmei mɨnib. Bə nɔ ɨkə mɨnoʼ ɨmbə̀ʼ əwɔn ze nɨə nàʼə̀ ŋgəʼ ɨŋga fe ɨbum fɔrɨ ɨmbə̀ʼ ɨwɔn cherə mbe nɨə sàʼə̀ nàʼə̀ ŋgəʼ ɨ ne.

²⁴Ɨnû rɨbɔ̀ŋ bə̂d mɔʼɔ mbɨ əsaŋ əsaŋ nɨ bə̂d ə zəə. Ɨnû rɨbɔ̀ŋ mbe ə zeŋ chwiə ni mbɨ fə gù ɨsaʼi bɔŋ mbɨ be sɨə saʼə mɨ̀mə̌d. Ɨnû rɨbɔ̀ŋ bə̂d cherə bɨrɨ jwɨ̀ əsaŋ ənɨ əgha ə tɔ sààrɨ̀.

²⁵Əndəŋ əndəŋ bə, bə̂d mbɨə zəə ɨnû chɔ̀m mbe nɨ bə̂d ə ghɨ̀ə̀. Ka à bè yeʼi mbe nɨ chəi bə̂d ə zəə, àyɨə chəi ənɨ tɨ mbɨ nə̀m.