Read Fɨso Fi 2 Timotì 3 Bible Online

2 Timotì 3 - Fɨso Fi bible

2 Timotì 3

¹Kyerɨ ni ɨŋga ɨni mbe nɨ sɨ nwìə̀, ŋgəʼ rɨbɔ̀ŋ bɨrɨ yeʼe.

²Bə̂d bɨrɨ sɨə ghaʼ àmei ə ɨnyod, sɨə ghaʼ àmei ɨkab, sɨə nɔ ɨnyod, sɨə seenɨə, sɨə zɔ̀m ə bə̂d bə̀ sɨə ghɨ̀ rɨ̀zuə̀ əmbɨ mbə mɨ̀mbǎʼ fɔrɨ əmbɨ mbə mɨ̀nɨ̌ŋ. Chəi mbɨ bɨrɨ naʼ məben-əwe ɨmbə̀ʼ ɨnû mbe nɨ mbɨ ghɨ ənɨ mɨ̀mə̌d. Chəi mbɨ bɨrɨ ben ənû ə Ŋwiə̀.

³Chəi mbɨ bɨrɨ neŋ bə̂d ni mbɨ yɨə bə̂d. Chəi mbɨ bɨrɨ diirɨ bə̂d. Mə bɨrɨ sɨə chə̀kɨ̀ rɨkum bə̂d cherə. Chəi mbɨ bɨrɨ yimbɨ ɨnyod. Mbɨ bɨrɨ sɨə tɔə. Mbɨ bɨrɨ ban ɨnû chɔ̀m.

⁴Mbɨ bɨrɨ sɨə fènə̀ bə̂d, sɨə ghɨ̀ ɨnû zɨ rɨ kɔndɨ, bə̀ sɨə nɔ ɨnyod. Mbɨ bɨrɨ sɨə ghaʼ ɨnû mbe nɨ nyamnyod tɨ mɨ̀mə̌d ə feenɨə chè ɨchî nɨ mbɨ ghaʼ ə Ŋwiə̀.

⁵Mbɨ bɨrɨ sɨə ghɨ̀ ɨghabɨ ə bə̂d nɨ kyerɨ ə Ŋwiə̀, àyɨə mbɨ bɨrɨ ton ɨka Ŋwiə̀ we nɨ tɨ̀ wɨ ghɨ ni mbɨ yeʼ bə̂d Ŋwiə̀ rəsìʼ. Tɨrə̀ berɨ e ənû ə mɔʼɔ nɨ ghɨ̀ mbɨ tɨkwɨrɨ bə̂d tɔ̂.

⁶Mbɨ mɔʼɔ rəbɔʼ mɨ̀mə̌d mbɨə nyɨ ɨŋga nəb rɨ bə̂d. Mbɨ mɨ nyɨ əne, mbɨ tambɨ məyi mbe nɨ fîŋ tɨ mɨ̀mə̌d bɔrɨ, nɨ ɨnû rɨbɔ̀ŋ fə nyem mɨ̀mə̌d fɔrɨ ənɨ mbɨ fə naʼ tə fîŋ əmbɨ tɨkwɨrɨ ɨnû rɨbɔ̀ŋ jìm mbe nɨ nyamnyod tɨ mɨ̀mə̌d ə feenɨə.

⁷Ɨ mbɨə zwetɨ ɨnû rɨ əmbɨ wə̀d jìm, àyɨə chəi mbɨ bɨrɨ nɔ kyerɨ rəsìʼ ɨmbə̀ʼ ə Ŋwiə̀.

⁸Ɨchî nɨ Janès mbɨ Jambrès [2] nyaʼa ton ənû ze nɨ Mose nyaʼə ghàə̀, əne bə̂d mbɔ̂ mbɨə bə̀ tonə rəsìʼ. Chəi ɨwe mɨ̀mə̌d ə wɨrɨə fàʼə̀. Ka ɨbenɨ mɨ̀mə̌d yɨ i wɨ rəsìʼ.

⁹Àyɨə chəi mbɨ bɨrɨ wo əsa əgha, ɨmbə̀ʼ ɨghəm nɨ bə̂d mɨ̀jìm bɨrɨ zə ənû əneŋ mɨ̀mə̌d, ze ɨchî nɨ mbɨ nyaʼa zə əzɨ ə Janès mbɨ Jambrès.

¹⁰À yeʼ ɨmbə̀ʼ əwe, àwɔ̀ Timotì, à fə kyerɨ e ɨnû mbe nɨ mə̀ nyaʼə chwiə, à fə kyerɨ e ɨchî nɨ mə̀ nyaʼə ghɨ̀ ɨnû, à fə kyerɨ e ɨnû mbe nɨ mə̀ nyaʼə kəb nɨ ghɨ. À fə kyerɨ e ɨchî nɨ mə̀ nyaʼa nuŋ fîŋ ɨgun ə Ŋwìə̀. À fə kyerɨ e ɨchî nɨ mə̀ nyaʼə yimə fîŋ. À fə kyerɨ e ɨchî nɨ mə̀ nyaʼə ghaʼ ə bə̂d. À fə kyerɨ e ɨchî nɨ mə nyaʼə nyìʼ əton ə ŋgəʼ.

¹¹À fə kyerɨ e ɨchî nɨ mbɨ nyaʼə nwèndɨ̀ tum rɨkyerɨ-ɨwu bə̀ kyerɨ ɨchî nɨ mə̀ nyaʼə zəə ŋgəʼ. À fə kyerɨ e ənû ze nɨ nyaʼa ghɨ ənɨ ə num ə Antiɔ̀k, ə Ikoniùm fɔrɨ ə Listrà, ɨchî nɨ mə nyaʼa nyiʼ ənɨ mbɨ nyaʼə nwèndɨ̀ tum rɨkyerɨ-ɨwu kwàʼ rɨkǎ. À yɨ Ə̀nùŋɨ̀sɨg nyaʼa chɨ əmɨ rɨŋga ŋgəʼ tɔ̂ rɨ̀jìm.

¹²Mbɨ bɨrɨ kàŋ nwendɨ tɨkyerɨ-ɨwu bə̂d mɨ̀jìm mbe nɨ ben ə Kristo Yeso. Mbɨ berɨ ghɨ əne ɨmbə̀ʼ ɨchî nɨ ɨ mbɨə chub ɨchî nɨ Ŋwìə̀ kəbɨ.

¹³Àyɨə bə̂d mbe nɨə ghɨ̀ ɨnû rɨbɔ̀ŋ mbɨ mbe nɨə nɨŋ rɨkum bə̂d cherə tambɨə bə̂d əŋgu bɨrɨ rəbə ghɨ̀ ə ɨnû rɨbɔ̀ŋ ghɨ̌ wò ɨmbì. Mbɨ bɨrɨ mɨə tambɨ ə bə̂d, bə̂d bə tambɨ ə mɨ̀mə̌d.

¹⁴Àyɨə à yeʼ ɨmbə̀ʼ əwe, àwɔ̀ Timotì, chè ɨmbì ghɨ̀ ɨnû mbe nɨ à nyaʼa fə kwembɨ bə̀ ben ənɨ e fîŋ jìm, ɨmbə̀ʼ ɨghəm nɨ à kyerɨ bə̂d mbe nɨ à kwembɨ ɨnû mbe rɨ əmbɨ mɨ̀mə̌d.

¹⁵À nyaʼa fə kyerɨ ɨŋgam Ŋwiə̀ tɨ ənɨ à nyaʼə wan kwa. Ɨŋgam we fə kəərɨ əwe ɨmbə̀ʼ à berɨ ɨwe jwɨ rəŋgəʼ ɨchî nɨ à nuŋ fîŋ ɨgun ə Kristo Yeso.

¹⁶À yɨə Ŋwìə̀ nyaʼa fe bə̂d ni mbɨ ŋwàʼnɨ̀ Ɨŋgam Ŋwiə̀ jìm. Ɨŋgam Ŋwiə̀ ə bɔŋ ni mbɨ nɨŋ chwi ɨnû, ni mbɨ nɨŋ gham əbɔʼ ə bə̂d, ni mbɨ nɨŋ ghà ənû rɨbɔ̀ŋ ze nɨ wə̀d ghɨ̌ ɨmbə̀ʼ wɨ̀ kwepə. Wɨ bə̀ bɔ̀ŋ ni mbɨ nɨŋ chwi ɨchî nɨ tɨ bə̂d chub ɨchî nɨ kuʼnɨ,

¹⁷ɨmbə̀ʼ wə̀d we nɨə fàʼ əmbɨ ə Ŋwìə̀ kyerɨ ɨnû jìm bə̀ kyerɨ ɨchî nɨ ghɨ ɨnû chɔ̀m jìm.