Read Fɨso Fi 2 Timotì 4 Bible Online

2 Timotì 4 - Fɨso Fi bible

2 Timotì 4

¹Mə wɨə ghà ɨ ne ɨfě Ŋwiə̀ bə̀ fɔrɨ ɨfě Kristo Yeso we nɨ bɨrɨ saʼ bə̂d mbe nɨ yeʼ ɨka mbɨ mbe nɨ fə kwɨ, bə̀ gha ɨmbə̀ʼ ɨchî nɨ wɨ̀ bɨrɨ wɨrɨ yeʼe ɨ tumbɨ ɨsɨg ni:

²gha ɨŋgam Ŋwiə̀. Kɨ̀ bə̂d ghaʼ nɨ zu kɨ̀ chəi mbɨ ghaʼ nɨ zu, gha e gha. Mbɨ mɨ ghɨ ənû rɨbɔ̀ŋ, à gha əmbɨ mɨ̀mə̌d. Gham əbɔʼ mbe nɨə ghɨ̀ ɨnû rɨbɔ̀ŋ. Mbɨ mɨ ghɨ̀ ɨnû nɨ kuʼnɨ, à tìmbɨ̀ mɨ̀mə̌d. À berɨ yim fîŋ ənɨ à ghɨ̀ ɨnû mbɔ̂.

³Nyùmə̀ wɨə yeʼe nɨ chəi bə̂d bɨrɨ ghaʼ nɨ zu ɨŋgam rəsìʼ. Mbɨ bɨrɨ fetɨ məchwiə̀-ɨnû ɨban mɨ̀mə̌d nɨ bɨrɨ gha ɨnû mbe nɨ ɨ̀tǒŋ mɨ̀mə̌d ə zòə̀ nɨ zu.

⁴Mbɨ bɨrɨ zindɨ mbə ɨ̀tǒŋ nɨ zu ɨnû rəsìʼ. Əne mbɨ bɨrɨ bèŋ sɨə zwetɨə yeʼ tɨpoʼ əko.

⁵À yeʼ ɨmbə̀ʼ əwe, àwɔ̀ Timotì, yimbɨ e ɨnyod ənɨ ənû jìm. Nyiʼ fîŋ ənɨ à zəə ŋgəʼ. À berɨ fàʼ ɨmbə̀ʼ zə ni bə̂d yeʼe əsɨ Kristo. Ghɨ ɨnû jìm mbe nɨ Ŋwìə̀ zɨ ɨŋga te rɨkyerɨ-ɨbɔ.

⁶À yeʼ ɨmbə̀ʼ əmɨ, nyùmə̀ fə kuʼi nɨ mbɨ bɨrɨ naʼ əmɨ ənɨ əghɨ ə̀fà. Nyùmə̀ fə kùʼi nɨ mə̀ bɨrɨ saŋ ɨsɨg.

⁷Mə fə kàŋ zɔ̀ŋ ɨchî chɔ̀m ɨchî nɨ mɨə fàʼ əmbɨ Kristo. Mə fə nòtɨ̀ wò pè ənɨ ɨnwǐ. Mə fə nùŋ mɨ fîŋ ɨgun ə Kristo wò pè ənɨ ɨnwǐ.

⁸Əne Ə̀nùŋɨ̀sɨg we nɨə saʼə bə̂d ɨchî nɨ kuʼnɨ bɨrɨ naʼ əjwɨ-əgu ɨ num əni ze nɨ wɨ̀ bɨrɨ yeʼe ɨ saʼ ɨsɨg. Wɨ̀ bɨrɨ naʼ ɨmbə̀ʼ ɨghəm nɨ mə wɨə ghɨ̀ ɨnû nɨ kuʼnɨ. Chəi wɨ̀ bɨrɨ naʼ àmei ɨ num. Wɨ̀ bɨrɨ bɨ naʼ əmbɨ ə bə̂d mbe nɨə wòmə̀ ni wɨ̀ wɨrɨ yeʼe.

⁹Kywɨ ənywɨ zambɨ yeʼe əsɨ num,

¹⁰ɨmbə̀ʼ ɨghəm nɨ Demàs fə waʼ əmɨ wo əwi ə Tèsàlonikà. Wɨ̀ fə wò əŋgu ɨmbə̀ʼ ɨghəm nɨ wɨ̀ ghaʼ ɨnû rɨŋga ɨsɨg wɔ̂. Kresèn fə wò ə Gàlesià. Taitùs fə bə̀ wò ə Dalmatià.

¹¹Àmei Luk yeʼ əgha mbɨ num. Ənɨ àwɔ̀ ə yeʼe, nɨŋ ə Mak yeʼe mbɨ məd, ɨmbə̀ʼ ɨghəm nɨ wɨ̀ bɨrɨ weerɨ əmɨ ənɨ mɨ ə̀fàʼì.

¹²Mə fə tom ə Taikikùs ə Efesùs.

¹³Ənɨ àwɔ̀ ə yeʼe, bə nɨŋ mɨ ngywɨ̌ maʼi ze nɨ mə nyaʼa nuŋ mbɨ Kapùs yeʼe mbɨ zɨwən. Mə nyaʼa nùŋ ngywɨ̌ ze ənɨ mə̀ nyaʼa ə Troàs. Bə nɨŋ mbɨ ɨ̀ŋwàʼnɨ̀ mbe nɨ mbɨ karɨ yeʼe mbɨ mbɨwən, màànɨ̀ mbe nɨ mbɨ tekɨ ənɨ ə gôb rɨ njɨ̀g.

¹⁴Àlèzandà we nɨə kywɨ ɨghɨ ənɨ ə kopà nyaʼa zɨ̀ ŋgəʼ nɔnɔʼ ɨgwɨ num. Ə̀nùŋɨ̀sɨg bɨrɨ chwɨ əməd ɨmbə̀ʼ ɨnû mbe nɨ wɨ̀ nyaʼa ghɨ̌.

¹⁵Àwɔ̀ we əwe ɨmbə̀ʼ əməd, ɨmbə̀ʼ ɨghəm nɨ wɨ̀ fə ton ɨnû mbe nɨ tɨ̀ nyaʼə ghàə̀. Wɨ̀ nyaʼa ton kwàʼ rɨ̀kǎ.

¹⁶Ənɨ ə nyùmə̀ rɨtu we nɨ mə nyaʼa təm ni mbɨ saʼ əmɨ, chəi wə̀d mɔʼɔ nyaʼa yeʼe ɨ kəŋgɨ əmɨ. Wə̀d jìm nyaʼa waʼ əmɨ. Tɨ Ŋwìə̀ ŋwaʼnɨ i ɨnû mbe nɨ mbɨ ghɨ ənɨ rɨkum tɨ mɨ̀mə̌d.

¹⁷Mbɨ nyaʼa ghɨ̀ əne, àyɨə Ə̀nùŋɨ̀sɨg nyaʼa təm ɨban num, naʼ ɨka ɨ num ni mə gha ɨŋgam Ŋwiə̀ jìm, ɨmbə̀ʼ ə bə̂d mɨ̀jìm mbe nɨ kaʼi mɨ̀Jû zu. Ənɨ mə̀ nyaʼa gha əne, Ə̀nùŋɨ̀sɨg nyaʼa chɨ̀ əmɨ rɨ ɨchû ɨvɨ, ɨchî nɨ mbɨ nyaʼa nɨrə sobə ni mbɨ zwiirɨ əmɨ.

¹⁸Ə̀nùŋɨ̀sɨg bɨrɨ chɨ̀ əmɨ rɨŋga tɨkwɨrɨ ŋgəʼ jìm, əne nɨŋ əmɨ kwàʼ ənɨ əbɔrəbɔd wò zɨ̀ ɨŋga ənû ɨfɔ̀n əməd ze nɨ yeʼ ɨkaŋ. Ɨwumnɨ yeʼ wɨ məd koŋ koŋ. À yɨ əne.

¹⁹Chaʼrɨ ə Priskà [3] mbɨ Àkwilà, bə̀ chàʼrɨ̀ bə̂d mbe nɨ yeʼ ɨŋga nəb Ònèsiforùs.

²⁰Erastùs nyaʼa tèn əwi ə Kɔrèn. Mə nyaʼa bə̀ sàŋ ə Trofimùs ə Miletùs, ɨmbə̀ʼ ɨghəm nɨ ɨ wɨə nyaʼə wɔ̀nə̀.

²¹Kywɨ ənywɨ yeʼe bɔŋ ə nyùmə̀ we nɨ ɨfə ə kɔ əku sɨə kùʼə̀. Eubulùs bə̀ chàʼrɨ̀ əwe. Pudèns mbɨ Lainùs mbɨ Klaudià mbɨ ə bə̂d Kristo mɨ̀jìm chàʼrɨ̀ əwe.

²²Ə̀nùŋɨ̀sɨg chubɨ mbɨ e əzwî. Ŋwìə̀ ghɨ ɨ̀chɔ̀m ənɨ mbə̀n mɨjìm.