Read Fɨso Fi Taitùs 1 Bible Online

Taitùs 1 - Fɨso Fi bible

Taitùs 1

¹À yɨə mɔ̌ Pɔ̂l, nɨ mə yeʼ wə̀d ə̀fàʼì Ŋwìə̀ bə̀ yeʼ wə̀d tom Yeso Kristo, ŋwaʼnɨ ə̀ŋwàʼnɨ̀ zɔ̂. Ŋwìə̀ nyaʼa chɔʼ əmɨ ni mə ghɨ̀ ni ɨbenɨ bə̂d mbe nɨ wɨ̀ chɔʼɔ wɨ kaanə, bə̀ ghɨ̀ ni mbɨ kyerɨ rəsìʼ we nɨ bɨrɨ ghɨ ni mbɨ chub ɨchî nɨ Ŋwìə̀ kə̀bɨ.

²Təsìʼ wɔ̂ bɨrɨ ghɨ ni tɨ̀ nuŋ rɨkɔndɨ wòm ɨ̀tènɨ̀ rɨ mì we nɨ Ŋwìə̀ kaʼi. Ŋwìə̀ we nɨ chəi wɨə ghà mɨghab nyaʼa kàʼ ɨ̀tènɨ̀ wɔ̂ bɔŋ wɨ̀ nyaʼa sɨə tekɨ ɨsɨg.

³Ənɨ nyùmə̀ nyaʼa kuʼu, Ŋwìə̀ nɨ chɨ̀ əwa rəŋgəʼ nyaʼa ghɨ̀ ni bə̂d kyerɨ rəsìʼ we ɨchî nɨ wɨ̀ nyaʼa zɨ ɨkə̂n we ɨŋga tum rɨkyerɨ-ɨbɔ.

⁴Mə wɨə ŋwàʼnɨ̀ ɨ ne, àwɔ̀ Taitùs, nɨ yeʼ mɨ wan rəsìʼ ɨchî nɨ mɔ̌ mbɨ ne tɨ̀ ben ə Kristo. Ŋwìə̀ Mbǎʼ mbɨ Kristo Yeso nɨə chɨ̀ əwa rəŋgəʼ, ghɨ ɨ̀chɔ̀m ənɨ ə ne bə̀ nàʼ əbɔrəbɔd ɨ ne.

⁵Əton nɨ mə̀ nyaʼa saŋ əwe ə Kret yɨ ni à tekɨ ɨnû jìm mbe nɨ nyaʼa kɨrɨ buʼ ɨŋga ɨfetɨ bə̂d Kristo we. Mə nyaʼa bə̀ sàŋ əwe əŋgu ni à chɔʼ bə̂d mbe nɨə chà tɨfetɨ bə̂d Kristo ɨŋga ɨsɨ jìm mbe nɨ yeʼ ə Kret àmei ɨchî nɨ mə̀ nyaʼa fə gha ɨ ne.

⁶Wə̀d nɨə chà ɨfetɨ bə̂d Kristo berɨ yeʼ we nɨ chəi ɨgu ənû ɨgwɨ məd. Wɨ̀ berɨ berɨ àmei əyi mɔʼ. Bɔn məd berɨ ben ə Kristo. Tɨ mbɨ yeʼ ə bɔn nɨə ghɨ̀ rɨtǎn kɨ bɔn nɨə ghɨ̀ rɨ̀zuə̀.

⁷Ətu ɨgwɨ ɨfetɨ bə̂d Kristo yɨə wə̀d nɨə nəŋgɨ ə̀fàʼì ə Ŋwiə̀. Wɨ̀ berɨ yeʼ wə̀d nɨ chəi ɨgu ənû ɨgwɨ məd. Tɨ wɨ̀ yeʼi wə̀d nɨə seenɨə, kɨ̀ wə̀d nɨə kɨə sə ɨtəm, kɨ̀ wə̀d nɨə nɔə beə, kɨ̀ wə̀d nɨə zɔ̀ŋə̀, kɨ̀ wə̀d nɨə ghɨ̀ ədɔʼ ənɨ ɨkab.

⁸Wɨ̀ berɨ yeʼ wə̀d nɨə nɨŋə bə̂d əkwɨ ni. Wɨ̀ berɨ yeʼ wə̀d nɨə ghaʼə nɨ ghɨ̀ ɨ̀chɔ̀m. Wɨ̀ berɨ yeʼ wə̀d nɨə ghɨ̀ ɨnû mbɨ ɨwe. Wɨ̀ berɨ yeʼ wə̀d nɨ təm kùʼnɨ̀ ɨfě Ŋwiə̀. Wɨ̀ berɨ yeʼ wə̀d nɨ chub ɨzeŋɨ zeŋɨ bə̀ yeʼ wə̀d nɨə yimbɨ ɨnyod.

⁹Wɨ̀ berɨ yim ɨŋgam Ŋwiə̀ we nɨ mbɨ chwi ɨ bɔ, ɨmbə̀ʼ məd ziə we tɨ̀ wɨ̀ chwi rəsìʼ ɨmbə̀ʼ ənû ə Ŋwiə̀ ɨchî nɨ kuʼnɨ, fɔrɨ ni məd we tɨ̀ wɨ̀ bə̀ chwi əmbɨ ə bə̂d mbe nɨə taŋ ɨnû ə Ŋwiə̀ ni ɨnû mbe nɨ mbɨə tàŋə̀ yɨ ɨnû rəsìʼ.

¹⁰Mə wɨə ghà əne ɨmbə̀ʼ ɨghəm nɨ bə̂d mɨ̀nɔnɔʼ mbɨ əŋgu nɨ chəi mbɨə zuunɨə bə̂d kyeŋ, màànɨ̀ mɨ̀Jû mbe nɨə ghàə̀ ni mbɨ ne bə̂d. Ɨ mbɨə ghà ɨŋgam nɨ chəi wɨə yim mɨnib. Ɨ mbɨə bə̀ tambɨ ə bə̂d.

¹¹À berɨ ghɨ ni mbɨ kubrɨ mbə mɨchû, ɨmbə̀ʼ ɨghəm nɨ ɨ mbɨə bùùrɨ̀ mɨnəbɨ jìm ɨchî nɨ mbɨə chwi ɨnû mbe nɨ chəi mbɨ berɨ nɨ chwiə. Ɨ mbɨə ghɨ̀ əne ɨmbə̀ʼ berɨ ɨkab ənɨ ɨnə̂njɨ̀ nɨ chəi wɨ kuʼnɨ.

¹²Wə̀d mɔʼɔ rəbɔʼ mɨ̀mə̌d nɨ nyaʼə wə̀d-ɨwe nyaʼa ghà ni, “MəKret mbɨə ghà mɨghab ɨghəm jìm. Ɨ mbɨə ghɨ̀ ɨzɨg ɨghabɨ nyam rɨ tɔtɔ. Mbɨ yɨ mɨgwed nɨə jɨg əku.”

¹³Ənû zɔ̂ nɨ wə̀d-ɨwe we nyaʼa ghǎ yɨ ənû rəsìʼ. Əne à berɨ gham əbɔʼ tɨkwɨrɨ bə̂d tɔ̂ kwàʼ rɨ̀kǎ, ɨmbə̀ʼ ɨbenɨ mɨ̀mə̌d wɨrɨ kàànɨ̀.

¹⁴Əne chəi mbɨ bɨrɨ wɨrɨ zwetɨ rɨpoʼ əko mɔʼɔ te nɨ mɨ̀Jû nyaʼa tekɨ, kɨ̀ bè zwetɨ ɨnû mbe nɨ bə̂d mbe nɨ ton rəsìʼ ə ghàə̀.

¹⁵Ɨnû jìm ə zeŋ əmbɨ ə bə̂d mbe nɨ fîŋ tɨ mɨ̀mə̌d zeŋɨ, àyɨə chəi mbɨ zeŋɨ əmbɨ ə bə̂d mbe nɨ chəi fîŋ tɨ mɨ̀mə̌d bə zeŋ. Chəi mbɨ bə zeŋ əmbɨ mbe nɨ chəi mbɨ nuŋ fîŋ ɨgun ə Kristo, ɨmbə̀ʼ ɨghəm nɨ ɨbə fə nyɨ ɨŋga tɨkɔndɨ tɨ mɨ̀mə̌d bə̀ nyɨ ɨŋga fîŋ tɨ mɨ̀mə̌d.

¹⁶Ɨ mbɨə ghàə̀ ni mbə kyerɨ ə Ŋwiə̀, àyɨə ənû mbe nɨ mbɨə ghɨ̀ə̀ mbɨə chwiə ni ɨ mbɨə ton əməd. Chəi bə̂d ghaʼ mɨ̀mə̌d. Chəi mbɨə zuunɨ ə Ŋwiə̀. Mbɨ rɨka kaŋ kuʼ əwən nɨ ghɨ ənû ə chɔ̀m ə mɔʼɔ.