Read Fɨso Fi Taitùs 2 Bible Online

Taitùs 2 - Fɨso Fi bible

Taitùs 2

¹À yeʼ ɨmbə̀ʼ əwe, àwɔ̀ Taitùs, chwi àmei ɨnû mbe nɨ yeʼ mbɨ rəsìʼ bə̀ yeʼ mbe nɨ kuʼnɨ.

²Gha əmbɨ ə mbaŋə̀ te nɨ fə kaanɨ ni tɨ bɔtɨ ɨnyod, chwi ni mbə fə kàànɨ̀, chwi ni mbə kyerɨ ɨnû, chwi ni ə ɨbenɨ ə kàànɨ̀, chwi ni mbə ghaʼ bə̂d Kristo bə̀ chwi ni mbə kyerɨ ɨchî nɨ nyìʼ əton ə ŋgəʼ.

³Əndəŋ əndəŋ, bə ghà əmbɨ məyi mbe nɨ fə kaanɨ ni mbɨ chub ɨzeŋɨ zeŋɨ. Tɨ mbɨ chəkɨ ə tɨkum bə̂d kɨ̀ bè ben ə̀bòʼò əmbɨ mɨnoʼ. Mbɨ berɨ yeʼ məyi nɨə chwi ɨnû chɔ̀m,

⁴ɨmbə̀ʼ dandɨ məyi bɔd ni mbɨ ghaʼ mbə mɨnom bə̀ ghaʼ mbə bɔn,

⁵ni mbɨ yimbɨ ə ɨnyod chub àmei mbɨ mbə mɨnom, ni mbɨ kyerɨ ɨchî nɨ nuŋ tə nəb, ni mbɨ ghɨ ɨ̀chɔ̀m, ni mbɨ zuunɨ mbə mɨnom. Mbɨ mɨ ghɨ̀ əne, chəi bə̂d bɨrɨ gha ɨnû rɨbɔ̀ŋ ɨmbə̀ʼ ɨŋgam Ŋwiə̀.

⁶Əndəŋ əndəŋ, bə gha əmbɨ ɨjɔŋ ni mbɨ yimbɨ ə ɨnyod.

⁷Chwi ənɨ ɨnû jìm ni àwɔ̀ yɨ əmɨg ɨchî nɨ àwɔ̀ ə ghɨ̀ ɨnû chɔ̀m. Chwi ɨnû ɨchî chɔ̀m ənɨ e fîŋ jìm.

⁸Gha àmei ɨŋgam nɨ kuʼnɨ nɨ chəi ənɨ tɨ̀ wə̀d zə ənû rɨbɔ̀ŋ ɨŋga. À mɨ ghɨ̀ əne, tɨ̀nìd ətu bɨrɨ yim mbe bə̂d pə̀n, ɨmbə̀ʼ ɨghəm nɨ chəi mbɨ zə ənû rɨbɔ̀ŋ nɨ tɨ̀ mbɨ gha ɨmbə̀ʼ əwa.

⁹Gha əmbɨ ɨ̀bòʼò ni mbɨ zuunɨ mbə mɨ̀mbǎʼ ə̀fàʼì bə̀ ghɨ̀ ni fîŋ tɨ mɨ̀mə̌d bɔŋ ɨchî nɨ mbɨə ghɨ̀ ɨnû jìm kwàʼ ɨchî chɔ̀m. Tɨ mbɨ chaanɨ ə ɨŋgam mbɨ mɨ̀mə̌d

¹⁰kɨ̀ bè jɨ əghɨ ə mɔʼɔ. Mbɨ berɨ chwi ni mbə yɨə bə̂d chɔ̀m bə̀ chwi ni mbə mbɨə fàʼ ənɨ tə fîŋ rɨjìm. Mbɨ berɨ ghɨ əne ɨmbə̀ʼ chwi ni ənɨ ɨnû jìm ni ɨ mbe tɨ mbɨ ghɨ̀ bə̂d ghaʼ nɨ zu ɨŋgam Ŋwìə̀ we nɨə chɨ̀ əwa rəŋgəʼ.

¹¹Ŋwìə̀ nyaʼa ghɨ̀ ni bə̂d kyerɨ ɨ̀chɔ̀m məd, ɨmbə̀ʼ wɨ̀ chɨ mɨ̀mə̌d mɨjìm rəŋgəʼ.

¹²Ɨ̀chɔ̀m we wɨə ghɨ̀ ni tɨ̀ ton ɨnû mbe nɨə ghɨ̀ə̀ ni tɨ rɨ̀ wumnɨ a Ŋwiə̀ bə̀ ton nɨ beenɨ əbɔʼ ɨnû rɨŋga ɨsɨg. Ɨ wɨə ghɨ̀ ni tɨ yimbɨ ɨnyod, wumnɨ ə Ŋwiə̀ bə̀ chub ɨŋga ɨsɨg wɔ̂ ɨchî nɨ kuʼnɨ.

¹³Tɨ̀ wɨə nùŋə̀ rɨkɔndɨ wòm əbɔrəbɔd ze nɨ Ŋwiə̀ kaʼ ɨ na. Əbɔrəbɔd ze ə bɨrɨ yeʼe ənɨ ə nyùmə̀ we nɨ a Ŋwìə̀ kyeŋ Ə̀nùŋɨ̀sɨg Yeso Kristo wɨrɨ yeʼe mbɨ ɨwumnɨ.

¹⁴Yeso Kristo nyaʼa nàʼ i ɨnyod ɨmbə̀ʼ choʼ mba ɨtu tɨ ənɨ ɨnû rɨbɔ̀ŋ jìm. Wɨ̀ nyaʼa bə̀ nàʼ ɨmbə̀ʼ zeŋɨ əwa ni tɨ̀ yeʼ bə̂d nɨə zɨ̀ ətu nɨ ghɨ ɨnû chɔ̀m.

¹⁵Gha ɨnû mbɔ̂. Nɨŋ ɨka jìm we nɨ Kristo naʼ ɨ ne tìmbɨ̀ bə̂d əŋgu, bə̀ nɨŋ ghàm əbɔʼ mɨ̀mə̌d. Tɨrə̀ ben e ni wə̀d mɔʼɔ təənɨ əwe.